Thupualaakna 11

Tetti Niite

1Tua zawkciang kei sia ciangkang khat hong kipia a, a sau teena piciang bang ahi hi, tuaciang hi bangin hong sawl hi, “Va pai ta'n a, Pathian biakinn le a biaknatau sia va tee ta'n, tuaciang biakinn sungah biakpiakna a nei mihing phaza hong sim ta'n.#Eze 40:3; Zec 2:1-2 2Ahihang a huang puanung sia na tee heak in, banghang ziam cile tua mun sia Pathian he ngawlte atu a kipiasa hi a, amate in Khuapi Thiangtho sia tha sawmli le tha nii sung tuanhcil tu uh hi.#Lk 21:24 3Ka tetti te nii khau-ip puan silh in, ka paisak tu a, amate in ni 1,260 sung teng Pathian ii thu vaithak thangsak tu uh hi,” hong ci hi.

4Tetti te nii a cite sia leitung Topa mai ah a ding olive kung niite le meivak khuam niite ahi uh hi.#Zec 4:3; 11:14 5Khat po in amate vawtsia tu in a sawm le, a kam sung pan meikuang pusuak tu a, a ngalte lalcipsak tu uh hi; tuaciang hi bangin a kuama po amate susia nuamin a kipante sia kithatlum tu hi. 6Amate in van khakbil in Pathian thu vaithak a thansak hun sungin, ngua a zuksak ngawl natu in thunei uh hi. Amate in ciktuite chisan a suasak thei natu thunei si uh hi; tuaciang amate in a uuk ni sim po in, leitung sia ngimna lian nam theampo taw ngim piak thei natu zongh thunei uh hi.#1 Kum 17:1; Pu 7:17-19; 1 Sa 4:8

7Amate in a thu vaithak a thansak zawk ciangin, a hawng thukpui sung pan hong pusuak nganhing sia in, amate sim tu hi. Tua nganhing in amate zo in thatlum tu a, #Dan 7:7-21; Tpl 13:5-7; 17:8 8a luangte sia amate ii Topa thinglamtee tungah a kithalupna mun tua khuapi lian sia sung lampi tungah kisial tu uh hi. Tua khuapi ii a minsealh sia Sodom, ahibuale Egypt kici hi.#Is 1:9-10 9Ngam, minam, kampau namte le minam khente pan mihingte in a luangte sia ni thum le ni lang sung en tu a, a phumsak buatu uh hi. 10Leitung mihingte in hite nii ii thi hu in lungdam tu uh hi. Amate in lungdamna poaikhaam in, khat le khat letsong kithaak tu uh hi; banghang ziam cile tua kamsaangte nii in, mihingte tungah ngimna tam mama tungsak hi. 11Ni thum le ni lang zawkciang, Pathian kung pan nuntakna a pia husanna hong pai in, amate sungah tum a, tuaciangin amate hong dingto uh hi; a mu theampo lau mama uh hi.#Eze 37:10 12Tua zawkciang kamsaangte nii in “Hi sungah hong pai to tavun!” ci in vantung panin awnging tatak khat za hi. A ngalte mu tangin, amate sia meeikaai khat taw van ah kaato uh hi.#2 Kum 2:11 13Tua hun laitak nasia tatakin zinliing hi; khuapi ii see sawm sua see khat laltham a, mihing tul sali thi hi. A om lai mihingte lau in vantung ah om Pathian letna pok uh hi.#Tpl 6:12; 16:18

14Liinna launa lian a niina sia bo ahihang a thumna sia hong pai pal tu hi!

Lemle A salina

15Tua zawkciang vantunglalang a salina sia in a lemle tum a, vantung ah awnging tatak taw, “Leitung uk natu vaangletna in ih Topa le ama Messiah ii neisa hi a, ama in, a tawntung a tawntungin uk tu hi!” ci hi.#Pu 15:18; Dan 2:44; 7:14-27 16Tuasia ciang a kumpi tokhumte taw Pathian mai ah a to upa kul le lite bokin Pathian bia uh a:

17“Topa Pathian vaanglianbelpa,

a om nginge le a omsa pa,

Na vaangletna lian taw

ukna kipan tu hi zo na hikom

lungdam kong ko uh hi!”

18Pathian he ngawlte sia

thin uukna taw kidim hi,

banghang ziam cile

na thin uuk tu hun le,

a thite tungah thu na khen tu

hun hong theng zo hi.

Na naseam kamsaangte,

a lian a no nang hong thasia theampo

minphatna thaman na piak tu hun hi zo a,

Leitung a lalsakte

na lalsak tu hun hong theng zo hi!” ci hi.#Ps 2:5; 110:5; 115:13

19Vantung ah Pathian biakinn sia kihong a, Thuciamna Thingkuang sia tua munah kimu hi. Tuasia zawkciang khualengin, vanto ngawp a, zinliing in ngial nasia takin kia hi.#Tpl 8:5; 16:18-21

Currently Selected:

Thupualaakna 11: SCB2

Highlight

Copy