Nahum 3
3
1Kitheamna, mi kithalupna,
sutol tu le phuul tu bek ahi
hauna taw a kidim khuapi
a lal hi zo hi!
2Nganno saatna a nging,
leangmui nging,
Siphu kitawte khuasuan nging,
siphu ngalleang kithinna awnging te ngai vun!
3Siphu ngalkapte kidel a,
namsaute tee vazal in,
teite nizang la vazial hi!
Mithiluangte vum vinvun in
kiseng a,
mithiluangte
sim zawk ngawlin om a —
tuate tungah
mihingte lutu uh hi.
4Pumpi zuak ahi Nineveh sia
daan kipia hi.
Dei huai in thina piangsak thei
ai taw kidim a,
ama in minamte ai taw zol in
sal suaksak hi.
5 Topa Vaanglianbelpa in,
“Daan kong pia tu hi,
Nineveh awng!
Na pumnguak kong koi tu a,
ngam tuatuamte in
kong musak tu hi,
na maizum huaina theampo
hong mu tu uh hi.
6Nang kong zawnsak vawt tu a,
a kiihuai ninteak taw kong siin tu hi.
Mihingte lau in nang
hong salh tu uh hi.
7Nang hong mu po
nungkin kik tu hi,
Amate in, ‘Nineveh sia
zaancip zo hi!
Akua in ama
hesuakhuai sa ziam?
Akua in ama heeneam nuam
tu ziam?’ ci tu uh hi” ci hi.
8Nineveh awng, nang sia Egypt khuapi Thebes, sangin phazaw ni ziam? Ama zongh pang bangin a dal tu ngun khat nei hi — Nile ngun sia ama kidalna hi. 9Ama in Ethiopia le Egypt uk hi, ama ii vaangletna ciangtan om ngawl hi; Libya sia ama kipawlpui ahi hi. 10Ahitazong Thebes mite salin kipaipui veve hi. Lampi king sim ah a patangte kivellum hi. A lampuite thikkol bul sa in kipaipui a, a mante kihawmhsak hi.
11Nineveh awng, nang zongh zu khamin na puk tu hi: Nang zongh na ngalte kung pan suatak natu na hanciam tu hi. 12Na kulhte theampo sia thei min kungte bang hi tu a: theikungte thing vun, tua hile a nga na kam sung tatak ah taak tu hi! 13Na ngalkapte sia numeite bang hi a, na ngalte mai ah na ngam sia ngalnanna sel hi. Na kongpi kilhnate meikuang in lalsak tu hi. 14Ngalte hong uumci tu kingin kholna in tui toai vun a, na kulhpite ciangthua in khosak vun! Uksuang seak natu in buan cil vun a, uksuang bekna kuang a kinging sa in koi vun! 15Bangpo na vawt zong hong kihallum veve tu hi, ahibuale ngal sungah hong kithatlum veve tu hi. Khaumaw te ii lo ante a khawn tum bangin note hong kimaimot tu hi.
Khaumawte bangin na pung uh hi! 16Van a aksite sangin a tamzaw sumvawtte na piangsak hi! Ahizong tu in tuate a tha phalhin a leang khaumawte bangin thot zo hi. 17Na uliante sia khuatuap ni in pang tung a bok khaumaw honkhat bang ahi uh hi. Ahizong ni hong sua ciang amate leang vingveng in, a zotna mun kuama in he ngawl hi!
18Assyria kumpilianpa awng, na ngamuk mangte thi uh hi, na kumpi uliante a tawntung mutthip uh hi! Na mite mualtung tengah kithethaang a, a inn ah a ciapui kik tu kuama om ngawl hi. 19Na liam nate bawl natu bangma om ngawl a, na liammate kidamsak thei ngawl hi. Na lalna thu a za theampo in lungdam in a khutbeang uh hi. Na khealmawk ngitlona uh pan, a suakta akua om na ziam?
Currently Selected:
Nahum 3: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016