Nahum 2

Nineveh Khua Bona

1Nineveh awng,

nang hong kisim hi!

Nang hong vaat tham tu

vaangletna hong pai zo hi.

Ngalnan natu te kinging vun!

Lampi cing vun!

Ngalsim tu in kithoai vun!

2(A ngalte ii sutol ma

hun lai bangin

Topa in Israel mite ii

a minthanna pia kik dektak hi.)

3Ngalte ii ngalkapte in lumsante toai a,

a kibang puansante silh hi.

Amate ngalsim tu in kithoai hi!

a ngalleangte

meikuang bangin tee vazak hi!

A siphute pai nuamin a peang laam zo hi!

4Lampite kaantanin

siphu ngalleangte tai kheukho a,

khuapi khawlmunte kaantan in

kinuntaw kawkoai hi.

Amate mei lomsawm det te

bangin taang vazak a,

khualeng bangin peak kawkoai hi.

5Ngalkap bute kisam a;

maisang a phul ciang amate lutu uh hi.

A simte in khuapi uumna

luphung sangah tai a

lumte taw kidalin,

kulh sukthapna moltumte bul hi.

6Ngunhui a kongpite

kihong keak a;

kumpi inn sia launa taw kidim hi.

7Kumpinu kiman a;

a naseamte vakhu kuul bangin kap uh hi;

khuangai in a awm beang uh hi.

8A cimhtham tui cimna khat pan

tuiluang bangin Nineveh pan mihingte taikeak uh hi!

“Tawlnga vun! Tawlnga vun!” ci in

khuapi pan aw nging hi —

ahizong kuama heak kik ngawl hi.

9Ngunnte phuul vun!

Khamhte phuul vun!

Khuapi sia sumngum taw kidim hi!

10Nineveh sia kisusia in, kinusia a, ngamkhing hi!

Launa taw thin tamhtham a;

khupte liingin, a thahatna bo hi;

maitangte daang hi.

11Tawpite ii kua khat taw a kibang,

tawpi note kivaakna mun,

tawpital le tawpipui vana,

a note ngammuangin a omna

tua khuapi sia tu in koi sungah om ziam?

12Tawpi in a neak tu sa manin

a pui le a note atu balneen a;

ama in akua sia sabekte taw dimh hi.

13 Topa Vaanglianbelpa in, “Keima in na ngalpa ka hi hi! Na siphu leangte haltum tu khi hi. Na ngalkapte ngal sungah kithatlum tu a, midangte tung pan na laakte theampo hong laaksak tu khi hi. Na palaite ii ngetnate kiza nawn ngawl tu hi,” ci hi.

Currently Selected:

Nahum 2: SCB2

Highlight

Copy