Pianciilna 43
43
Joseph ii Suapuite Egypt ah Benjamin taw Heak kik
1Canaan ah kialpi nasia seseam a, 2Jacob innkuanpuite in Egypt pan a antang lei teng a neak siat zawkciang, Jacob in a tapate tungah, “Pai kik tavun a, antawm va taw tavun,” ci hi.
3Judah in a pa tungah, “Tua mipa in na naupa nong paipui bua uh le ka mai nong mu thei buatu uh hi, ci in ka kidop natu uh ngat takin hong vaitha zo hi. 4Ka naupa nong zuisak le kote pai in nang atu an ka taw tu uh hi. 5Tuabang na oai buale pai ngawl tu khu hi, banghang ziam cile tua pa in na naupa nong keng bua uh le ka mai nong mu thei buatu uh hi, hong ci sa hi” ci hi.
6Jacob in, “Tua pa tungah suapui dang nei lai khu hi ci in na sonna uh taw banghangin hi zata thinngim hong pia thong nu ziam?” ci hi.
7Amate in, “Tua pa in eite thu le ih innkuan thu hong dongh top a, ‘Na pa uh nungta lai ziam? Suapui dang na nei uh ziam?’ hong ci hi. Ama thu dokte ka zo nanak uh kul hi. Na naupa hong paipui tavun, ama hong ci tu sia bangbangin hekhol thei tu khu ziam?,” ci in zo hi.
8Judah in a pa tungah, “Tangvalpa kei taw paisak in, ding kik pai tu khu hi. Tua hile eite ih pukthi buatu hi. 9Ka naupa atu in ka nuntakna taw kong kiciam hi. Nang kungah ciidam in kong ciapui kik bua ahile a tawntungin mawsiatna ka thuak tu hi. 10Eite ngei mama ngakin vaikai bualeang tu in niivei kilee a, ih thet kik natu hi zo hi,” ci hi.
11A pa in amate tungah, “Tuabang hi tu ahile ngamsung pan a piang a phabel te: thingnaai tawm, khuaitui tawm, hel namtui tawm, pistachio nga le almond ngate tun in ngamukpa tungah piak tu in keng tavun. 12Na ip ngong sungah nong ciapui uh na sumte na ken kik uh kul tu ahiciang na sum uh a zaa nii in keng vun. Sum hong khiak khial zong hi thei tu hi. 13Na suapuipa paipui vun a, hong ciapui kik pai tavun. 14Ama in na suapuipa le Benjamin sia no hong piak kik natu in Vaanglianbelpa Pathian in tuasia pa, no tungah hesuakna thin neisak tahen. Kei, ka tate a khuai siat tu ka hile zong thuak ka heu tong,” ci hi.
15Tua ahiciang unaute sia letsongte le dangka a zaa nii in keng a, Egypt ngam ah Benjamin taw pai uh hi. Joseph kungah amate ki aap uh hi. 16Joseph in amate taw a om Benjamin a mu ciang, ama in a inn uk naseampa tungah, “Amate ka inn ah paipui in. Sun ciang amate kei taw an nekhawm tu ahikom ngan khat ngo in a, kinging in,” ci hi. 17Ama thupiak bangin naseampa in Joseph inn ah unaute paipui hi.
18Inn ah amate a kipaipui ciang amate lau a, “A masa lai a sumte ih ip sungah a om kik hu in hi munah hong kipaipui hi. Amate in thakhat thu hong sim tu a, ih laate hong laaksak zawkciang sila hong suaksak tu hi,” ci in ngaisun uh hi. 19Tuaciang amate Joseph a inn uk naseampa omna kongkha ah pai in 20“Topa awng hi lai ah antaw tu in khatvei kong pai zo uh hi. 21Inn ka cia lam ka ngiaphual ah ka ipte ka hon uh ciang ka ipngong sung tek ah ka sumte — a vekpi ma in ka mu uh hi. Tua sumte kong keng kik uh hi. 22An a tamzaw lei natu in sum dang zongh kong keng thua uh hi. Ka ip sungah ka sumte uh akua in hong koisak kik ci sia ka he bua uh hi,” ci hi.
23Naseampa in, “Thinngim om bo, lau heak vun. Note ii Pathian, na pa ii Pathian in na ip sungah note atu in sum hong koisak hi nanak tu hi. Na antang man uh a cingin ka nga hi,” ci hi. Tua zawkciang ama in amate kungah Simeon paipui hi.
24Naseampa in unaute inn sungah paipui hi. Ama in a peang sil natu in tui pia a, a laate an pia hi. 25Amate ni sun ciang inn ah hong cia Joseph taw an nekhawm tu ci ahikom a piak tu letsong teng kinging khol uh hi. 26Joseph inn hong thet ciang amate in a letsong puakte inn sung ama kungah paipui in ama mai, lei ah kunsuk uh hi. 27Ama in amate tungah na dam uh ziam ci in a dok zawkciang, “A thu nong sonsa na pa huai — ama bangbang ahi ziam? Cidam in a nungta lai na ziam?” ci hi.
28Amate in, “A kiniamkhiak na naseam pa, ka pa uh nungta lai in a ciidam hi,” ci in zo uh hi. Tuaciang amate khupdin in ama mai ah kunsuk uh hi.
29Joseph in a naupa Benjamin a mu ciang, “Tua ahile, hisia kei tung a nong son uh na nau nobel sia ahi ziam? Ka tapa awng, Pathian in nang thupha hong pia tahen,” ci hi. 30Tua zawkciang Joseph sia a naupa ciliaphuai sa in a neno ahikom thakhat thu in pusuak hi. Ama in thuak zo nawn ngawl ahiciang a inndoi sungah pai in kap hi. 31A mai a phia zawkciang hong pusuak a, ama le ama tha la tawmin an thuukin sawl hi. 32Joseph atu sabuai khat ah an kilui in, a suapuite atu sabuai dang khat ah an kilui hi. Tualai ah an a ne Egypt te sia a tuamin kinesak hi, banghang ziam cile Egypt te in Hebrew te taw ankuang uum khop sia zano kisa hi. 33Joseph mai sabuai ah a suapuite ama maingat in a haambel pan a moibel dong a kizomin tosak hi. Tuabangin amate a kitosak a mu uh ciang lamdang sa in khat le khat ki en uh hi. 34Joseph ii sabuai tung pan amate an kipia a, Benjamin sia a dangte sangin a zaa nga tamzaw in kipia hi. Tuabangin amate Joseph taw anne tuidawn in nuamsa uh hi.
Currently Selected:
Pianciilna 43: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
