Pianciilna 42

Joseph ii Suapuipate Antaw tu in Egypt ah Pai

1Jacob in Egypt ngam ah an a omna thu a heak ciang a tapate tungah, “Banghang hi bang om thawthong nu ziam? 2Egypt ah an a omna thu za khi hi, ih pukthi ngawl natu in va pai in antaw tavun,” ci hi. #Sawl 7:12 3Tua ahiciang Joseph ii suapui sealh sawmte Egypt ah antaw tu in pai hi, 4ahizong Jacob in Joseph suapui laipee Benjamin in amate zuisak ngawl hi, banghang ziam cile ama tungah bang khat pawpo a pian thaak tu lau hi.

5Canaan ngam sungah kial tung ahikom midangte taw Jacob tapate antaw tu in pai hi. 6Egypt ngamukpa a hina taw Joseph in leitung mihing theampo tungah antang zuak hi. Tuabangin Joseph suapuipate hong pai a, a maitang uh leipha in ama mai ah kun uh hi. 7Joseph in a suapuite a mu ciang tel hi, ahizong a he ngawl bangin kivawt hi. Ama in a suapuite tungah kamngam taw, “Koisung pan hong pai nu ziam?” ci in dongh hi.

Amate in, “Canaan ngam pan antaw tu in kong pai uh hi,” ci in zo uh hi.

8Joseph in a suapuipate a tel hang a suapuipate in ama tel ngawl uh hi. 9Joseph in amate taw kisai a mangmatnate phawk kikin, “Note sia thukankute na hi uh a; koma ngamsung thaneamna mun teng a dawp tu in hong pai nu hi,” ci hi. #Pian 37:5-10

10Amate in, “Hi ngawl hi, topa awng, antaw tu in na silate bangin hong pai khu hi. 11Ko teng unau khat hi ung. Topa awng, ko sia thukankute hi ngawl a, mi thumaante ka hi uh hi,” ci in zo uh hi.

12Joseph in amate tungah, “Hi ngawl hi! Ngamsung thaneamna mun teng a dawp tu in hong pai nu hi,” ci hi.

13Amate in, “Topa awng, ka vekpi unau sawm le nii ka pha uh a, Canaan ngammi khat ii tapate ka hi uh hi. Ka suapui khat thi a, a nobel sia tu in ka pa uh taw om hi,” ci hi.

14Joseph in, “Kong cisa bangma hi. Note thukankute nu hi. 15Note hi bangin hong kisit tu hi: kumpipa min taw ka kiciam a, na nau nobel sia hi mun hong thet mateng note cia ngeingawl tu nu hi. 16Note sung pan khat pawpo in na pui tavun. Na thu uh a thian dong, thumaan son na hi hunlam a kisit thei mateng a dang teng sia thong sungah kong khum tu hi. Tuabang ahibuale a nungta kumpipa min lo in ka sonsa bang hi, note sia thukankute hi nanak tu nu hi,” ci in zo hi. 17Tuabangin Joseph in ni thum sung amate thong sungah koi hi.

18A ni thum ni in Joseph in amate tungah, “Keima in Pathian kiita mihing khat ka hi a, thu khat hangin na nuntakna uh kong khoaikhe tu hi. 19Thumaan mi na hina a kilak natu in note hong kikepna mun thong sungah khat om tu nu hi, a dang teng in ngilkial a om na innkuanpuite, na an leisa teng puak thei tu nu hi. 20Tua zawkciang na nau nobel uh sia kei kungah nong paipui tu uh hi. Tuabangin note thumaan son na hi uh sia hong kilangh tu a, kong that buatu hi,” ci hi.

Tuasia bangin amate lungkim uh hi. 21Tuaciang khat le khat tung ah, “Hi hi, ih suapuipa Joseph tuabang ih vawtsiat hu in tu in ih thuak hi ; ngimna lian a thuak ih mu a, hu ngen in hong thuum napi ih nadon bua hi. Tua hu in tu in hi ngimna sungah ih om hi,” ci uh hi.

22Reuben in, “Ih naupa vawtsia heak vun hong ci khi hi, ahihang ka thu hong ni ngawl nu hi. Tu in ama ii thina thaman hong lo kiksak hi,” ci hi. #Pian 37:21-22 23Tuabang a pau sia Joseph in tel siat hi, ahihang amate in tuasia hunlam he ngawl uh hi, banghang ziam cile amate in kampheen zanghin Joseph a paupui hang ahi hi. 24Joseph sia mundang ah pai in kap hi. Tua zawk a pau thei kik tu ciang hong heak kik a, amate sung pan Simeon tangkal in a mai ah khaukhitsak hi.

Joseph ii Suapuite Canaan ah Cia kik

25Joseph in a suapuite ip teng dim antang a hensak natu, mi khat sim ii sum sia a ip sung tek ah a koisak kik natu le lampi ah a neak tu nguai an a piak natu in thupia hi. Tuabang ma in kivawtsak hi.

26Tua unaute in a antang lei teng a laate tungah suanhin vaiding uh hi. 27Tua zan a ngiana munah amate sung pan khat in a laa an pia tu in a ip a hon le a tungbel ah a sum mu hi. 28Ama in a suapuite tungah “Ka sum hong kikoisak kik hi, hilai ka ip sungah om hi!,” ci hi. Amate thinkiam in lau a, “Pathian in eite tungah bang hong vawt thong ziam?” ci in khat le khat kidongh hi.

29Canaan ngam a pa Jacob kung a thet ciang amate in thupiang theampo a pa tungah son hi: 30“Egypt ngamukpa in kamngam taw in hong paupui a, a ngam thu kanin hong mawsiat hi. 31‘Kote thukankute hi ngawlin mi thumaante ka hi uh hi. 32Kote unau sawm le nii ka pha uh a, pa khat ii ta ka hi uh hi. Ka suapuipa khat thi a, a nobel sia ka pa uh taw Canaan ah om lai hi’ ci in ka zo uh hi. 33Tua pa in, ‘Hi bangin na thumaanna uh kong kan tu hi: note khat hi sungah kei taw om tu nu hi; a dang teng na innkuanpui ngilkialte atu in antang puakin cia tu nu hi. 34Na nau nobel sia hong paipui tavun. Tuasia ciang note thukanku hi ngawlin thumaan mi na hina uh kong he tu hi; na suapuipa kong pia kik tu hi, tuaciang hi munah om in, sumlei sumzuak thei tu nu hi,’ hong ci hi.”

35Tua zawkciang a ipte a sua uh ciang amate khat simin a sumbawm tek mu a; a sum a mu uh ciang amate le a pa Jacob patau uh hi. 36A pa in amate tungah, “Ka tate theampo hong sumsisak nuam nu ziam? Joseph bo zo; Simeon bo zo a; tu in Benjamin paipui nuam nu hi. Kei sia a thuakbelpa ka hi hi!” ci hi.

37Ahihang Reuben in a pa tungah, “Benjamin kong ciapui kik bua ahile ka tapate nii thatlum in. Ama sia keima kep tu in koi in a, kong ciapui kik tu hi,” ci hi.

38Ahizong Jacob in, “Ka tapa no taw paisak thei ngawl tu khi hi; a upa thi zo a, ama bek taang hi. Lampi ah bang khat po tawk thei tha tu hi. Kei ka huai zo a, tuabang nong khuangaisaknate in kei hong thatlum tu hi,” ci hi.

Currently Selected:

Pianciilna 42: SCB2

Highlight

Copy