Pianciilna 39

Joseph le Potiphar ii Zi

1Ishmael mite in Egypt ah Joseph paipui a, kumpipa ii uliante sung pan khat ahi, kumpi inncing ngalkap bupa Potiphar tungah zuak hi. 2Topa in Joseph panpui a, nasep zosak hi. Ama sia Egypt mi a topa inn ah teang a, #Sawl 7:9 3Topa in Joseph panpui ahikom a nasepna theampo ah a zawsakna thu a topa in mu hi. 4Ama tungah Potiphar lungkim a, ama aituam naseam tu in koi hi; tua ahikom a inn le a neisa theampo uksak hi. 5Tua hun a kipan Joseph hangin Egypt mi Potiphar te innkuan, a inn sung le a lo sungah a neisa theampo Topa in thupha pia hi. 6Potiphar in a na theampo Joseph et tu in aap siat a, a anneak tu ngawl buang bangma dang thinbot in nei ngawl hi.

Joseph sia a khanpha in a mealhoi a, 7tawmvei zawkciang a topa zi in Joseph lungngul in luppui tu in kunh hi. 8Ama in nial a, “En in, hi sungah keima om ka hikom ka topa in inn sungah bangma thintoi ngawl hi. A neisa theampo ka et tu in hong aap siat hi. 9Hi inn sungah ama taw kibangin a thu neiza ma ka nei a, nangma simngawl buang kei atu in khaam hong nei ngawl hi. Tua ahiciang hi bang ngamtat pha ngawl vawtin Pathian tungah maw thei tu khi ziam?” ci hi. 10A topa zi in Joseph luppui tu ni khat zawk ni khat in kunh hi napi ama in luppui nuam ngawl hi.

11Ahizong ni khat ni in Joseph sia inn sungah ama ii na seam tu in a tum ciang tualai ah inn naseamte kuama om ngawl hi. 12A tonu in Joseph puantual pan man a, “Kei taw lumkhawm tawng,” ci hi. Ahizong a tonu khut sungah a puantual nusiat a, suakta in a pua sangah tai hi. 13A tonu in a puantual nusia in inn pan a tai a mu ciang, 14ama in a inn naseamte samin, “Hi sia en vun! Ka pasal ii inn ah hong ciapui, hi Hebrew sia pa in ei hong zawnsak vawt hi. Ama ka inndoi sungah hong tum a, buanin khialpui tu in hong kipan hi, ahizong a nging theiza in ka cik-au hi. 15Ama in ka cik-au a zaak ciang a puantual kei kungah nusia in doipua ah tai hi,” ci hi.

16Joseph ii topa, inn ah hong cia dong ama in Joseph puantual keam hi. 17Tuaciang a pasal tungah ama in thupiang a son ngei teng ma son a: “Hi lai ah nong ciapui Hebrew sila pa in ka inndoi sungah tumin, kei hong zawnsak vawt hi. 18Ahizong ka cik-au ciang a puantual ka kungah nusia in doipua ah tai hi,” ci hi.

19Joseph ii topa a thin uuk mama a, 20Joseph mansak in kumpipa ii thongtaakte a koina thong sungah khum hi. 21Ahihang thong ukpa ii Joseph tungah a lungkim natu in Topa in Joseph panpui a, thupha pia hi. #Sawl 7:9 22Ama in Joseph sia thongtaak dang theampo uk tu in koi a, thong sungah nasep theampo vaipuak neisak hi. 23Joseph ii nasepnate thong ukpa ii et kik kul ngawl hi, banghang ziam cile Topa in Joseph panpui a, a nasepna theampo zosak hi.

Currently Selected:

Pianciilna 39: SCB2

Highlight

Copy