Pianciilna 38

Judah le Tamar

1Tua hun khawng in Judah sia a suapuipate nusia a, Adullam khua mi Hirah a kici pa taw teang khawm hi. 2Tualai ah Judah in Canaan mi Shua ii tanu ngaknu khat taw kimu hi. Ama in tua nu teenpui a, 3tapa khat nei in a min Er phuak hi. 4Ama ngai kik a, tapa dangkhat nei in a min Onan phuak hi. 5Tapa khat nei kik a, a min Shelah phuak hi. A tapa a sua laitakin Judah sia Achzib ah om hi.

6Judah in a tapaciil Er atu in Tamar kici zi khat puisak hi. 7Er ngamtat pha ngawl a, Topa lungkimsak ngawl ahikom Topa in ama thatlum hi. 8Tua zawkciang Judah in Er ii suapuipa Onan tungah, “Pai in, na suapuipa zi meingong nu taw lumkhawm ta'n. Na suapuipa in suan le paal a nei thei natu in, a pasal suapui na hi bangma na vaipuak tu teng khuangkhim ta'n,” ci hi. 9Ahizong Onan in a tate sia ama aa ahi ngawl tu he ahikom a upa zi taw a omkhop simin, a suapuipa atu ta kuama a pian ngawl natu in a bawtui lei ah taaksak hi. 10A ngamtatna Topa lungkim ngawlin Topa in ama zongh thatlum hi. 11Tuasia ciang Judah in a monu Tamar tungah, “Na nungsang na pa inn zuan kik ta'n a, ka tapa Shelah a tangval mateng meingong in va om phot ta'n,” ci hi. Shelah zongh a suapuite bangma in a kithalup tu a lau hangin Judah in hi bangin a ci ahi hi. Tua ahiciang Tamar a nungsang zuan hi.

12Tua zawk hun khat ciang Judah ii zi thi hi. A khuangai hun a ven ciang, ama sia Adullam khua mi a lawmpa Hirah taw a tuute mul meetna mun Timnah ah pai uh hi. 13Mi khat in Tamar tungah na topasal a tuute mul meet tu in Timnah ah pai hi, ci in son hi. 14Tuasia ciang ama silh lai a meingong puante laih a, maituamna puanpaa khat taw a mai tuamin Timnah khua paina lampi tung, Enaim khua sung tumna ah to hi. Tu in Judah ii tapa nobel Shelah sia tangval zo ahi hunlam Tamar in he hi, ahizong ama sia Shelah taw kiteangsak ngawl lai hi.

15Judah in Tamar a mu ciang ama sia a mai tuam ahikom numei pumpi kizuakte khat in ngaisun hi. 16Lampi hui ama omna ah pai in, “Pha hi, bangza ngen ni ziam?” ci hi. (Tua nu sia a monu ahi hunlam ama in he ngawl hi.)

Tamar in, “Bang hong pia tu ni ziam?” ci hi.

17Ama in, “Ka nganhon sung pan kealno khat kong puak tu hi,” ci in zo hi.

Tamar in, “Tua keal nong puak dong kei tungah kiciamna kho khat nong pia tu ahile thukim tu khi hi,” ci hi.

18Ama in, “Kiciamna bang hong pia tu khi ziam?” ci in dongh hi.

Tamar in, “Na min tupna le a khau, na khut sungah a om na ciangkhut,” ci in zo hi. Ama in tua teng pia hi. Tua zawkciang amate omkhawm a, ama naupaai hi. 19Tamar inn ah cia in, a maituamna puan hawkin, a meingong puan teng silh kik hi.

20Judah in a kiciamna vanh teng tan kik tu in keal khat taw a lawmpa Hirah paisak a, ahizong Hirah in tua nu mu zo ngawl hi. 21Ama in Enaim ah pasal pawlkhat dongh a, “Hi sung lamhui ah a om pumpi kizuak nu sia koi sungah om ziam?” ci hi.

Amate in, “Hi sungah pumpi kizuak numei om ngeingawl hi,” ci in zo uh hi.

22Ama cia kikin Judah tungah, “Ama ka mu zo bua hi. Tua munah pasalte in hi sungah pumpi kizuak numei om ngeingawl hi, hong ci hi,” ci hi.

23Judah in, “Vanhte ama in keamsak lel tawng, Mite in nuisansak nuam bua hing. A man piak ka sawm hang ama mu zo ngawl ni hi,” ci hi.

24Tha thum bang zawkciang mihing khat in Judah tungah, “Na monu Tamar sia pumpi kizuak khat bang ngamta a, tu in ama naupaai hi,” ci in son hi. Judah in, “Ama paipui vun a, hallum tavun,” ci in thupia hi.

25Ama a kipaipui ciang, a topasal tungah kam vaitha a: “Hi vanh teng a neipa taw naupaai khi hi. Hi khau kivaw min tupna le hi ciangkhutte — en hen, akua neisa ziam?,” ci hi.

26Judah in tua vanhte ciamtee a, “Ama maan hi. Ka tapa Shelah taw ka teensak tu hi napi ka teangsak bua hi — ama atu ka vaipuak a lel ka hi hi,” ci hi. Tuaciang Judah in ama omkhop pui kik ngei nawn ngawl hi.

27Nausua hun a thet ciang naupeang a nei tu sia kimu hi. 28Nausuak tu a tut laitak naute khat in a baan kilawtsak hi; nausuaksak syanu in tua baan zamhin khausan khat a khut tung khii a, “Hisia suak masa hi,” ci hi. 29Ahizong a khut dawk kik a tuaciang a suapuipa hong suak masa hi. Tuasia ciang nausuaksak syanu in, “Hi bangin na sua natu lampi nangma in hong tawm ni hi,” ci hi. Tua ahikom ama min Perez kiphuak hi. 30Tua zawkciang a khut tung a khausan taw a suapuipa hong suak a, ama min Zerah kiphuak hi.

Currently Selected:

Pianciilna 38: SCB2

Highlight

Copy