2 Peter 2
2
Sya Maan ngawlte
1A bosa hun in mihingte sungah kamsaang maan ngawlte piang hi, tuasia bangma in no sung zongh sya maan ngawlte hong piang tu hi. Amate in hong lalsak thei upna thubul maan ngawlte hong keng tu a, amate a tan Topa nial tu hi, tuasia ciang thakhat thu in, amate le amate kilalsua tu hi. 2Tua hi napi in, mihing tam mama in amate paktat nopna lampite zui tu uh hi; tuaciang amate ngamtatna hu in ngualdangte in, thumaan Lampi sia sonsia tu uh hi. 3Hi sya maan ngawlte sia duhop ahikom amate phuatawm taanghthute hong sonna taw no tung pan a meet hong vawt tu hi. Amate ii Thukhen pa sia a kingin zawk ngei zo a, amate a Lalsak pa khanglo zo hi!
4Pathian in a maw a khial vantunglalangte khoaikhe ngawlin, hell sung denna in nei hi, amate tua mun khuazing sungah Thukhenna Ni ngak tu in koltaang hi. 5Taanghlai leitung mite sia Pathian in a khoaikhe bua hi, Pathian a sel mihingte ii leitung ah tuipi liimsak hi; a ngup mihingte sia thumaan thutang a hil Noah le a dang mihing sali teng bek hi.#Pian 6:1—7:24 6Pathian a selte tung a piang tu sia mu thei natu in, Sodom le Gomorrah khuapite sia meikuang taw Pathian in haltham hi.#Pian 19:24 7Ngeina pha zui ngawl a maitatte ii paktat ngamtatnate hu in a khuangai, mihing pha Lot bekma ama in suatak hi.#Pian 19:1-16 8Tua mihing pha Lot sia amate sungah teang a, ni khat zawkciang ni khat, amate ngamtat siatnate a mu a zaak ciangin, thinngimin na sa mama hi. 9Tua ahikom Topa in Pathian ii dei bang a nungtate, haksatnate pan bangbang suatak tu ci thu, mihing seksolte Thukhenna Ni ciang bangbang daan thuaksak tu ci sia le 10a tuan in Pathian ii thuneina simmaw a, a kiihuai a pumpi deina a zuite daan piak tu ci sia he hi.
Hi sya maan ngawlte sia hangsanin kisa thei hi, tuaciang minthanna a nei vantung mite a zakta bua uh a, selno zawlai uh hi. 11Hi a maan ngawl syate sangin a nasia zaw pekin a tha khozaw, a hatzaw vantunglalangte zongh in, amate sia Topa mai ah selnona taw mawsiat ngawl hi. 12Ahihang hi mihingte in, amate thinsung pan, a piangtawm thinpuakte taw ngamta uh a, mat tu le thalup tu a, a piang ngamsate taw kibang uh hi; amate heak zawk ngawl na theampo selno nate taw do uh hi. Amate sia ngamsate bangin kithat tu hi, 13tuaciang amate in mihingte ngim thuaksak ahikom, ngim thuakna taw ma in kithuk kik tu hi. Ci le sa deina a thaisak tu ngamtatna khat pawpo suntangin a vawtna sia, amate nopsakna hi; ngualtheam a nuntakziate nuamsa ahikom, ankuang na uumpui tu zongh maizumhuai a, mindai huai hi! 14Amate in numei paktatte simngawl a dang en nuam ngawl hi; a maw nopna bo ngeingawl hi. Amate in a tha zawm mite sia thaang sung zotpui uh hi. A thinsung uh ah duhop natu a sin ahi uh hi. Amate sia Pathian haamsiatna nuai ah om uh hi! 15Amate in lampi tang nusia in, lam amh uh hi; amate in a maan ngawl sepna taw sum a nga nuam Beor tapa Balaam ii lampi zui uh a,#Mi 22:4-35 16tuaciang tua pa sia a mawna hu in teih thuak hi. Ama ii laa a khoai sia mihing aw taw pau in, kamsaangpa ii mawmawt ngamtatna khaam hi.
17Hi mihingte sia a kang sa cik taw kibang a, vuipi suangval ii a seamkeak meeikaaite bang ahi uh hi; Pathian in amate atu in, a zing belna mun khealsiasak hi. 18Amate in kiphatsakna le mawmawt kamte pau a, tuaciangin khialna sung pan a suakta tu a kipan tuungte zongh pumpi lungngul khialnate zanghin aitaa uh hi. 19Amate in tuabangte suatak natu kamciam pia ahihang, amate mama sia lalna zongsangna ii silate ahi uh hi — banghang ziam cile mihing khat sia ama a zocip na khat pawpo ii sila ahi hi. 20Mihingte in, leitung siatna thahatnate sung pan, ih Topa le ih Hunpa Jesus Christ heakna taw suakta zo hi napi, tuate ma in man kik a, zosak kik ahile, tuabang mihingte sia a kipat lai sangin a tawpna ah, a sia zaw mun theng hi. 21Amate tungah a kipia a thiangtho thupiakna pan a pial uh sangin, a heak uh thutang lampi sia he ngei phot buazaw le, amate atu phazaw lai tu hi. 22Paunak sungah, “Ui khat in a luak sa ne kik a, a kisilthiang sa vok khat buan sungah bual kik hi,” ci thu a maan hunlam sia amate tung thupiang sia in lak hi.#Pau 26:11
Currently Selected:
2 Peter 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016