2 Peter 1
1
1Jesus Christ ii sawltakpa le silapa Simon Peter in —
Ih Pathian le Hunpa Jesus Christ thumaan thutang tungtawn a, kote ii upna za ma in a manpha upna, a neite tungah lai kong thaak hi:
2Pathian le Jesus, ih Topa na heakna uh tungtawnin, thuthiamna le thinnopna kicing sia no aa hi tahen.
Pathian ii Sapna le Tealna
3Pathian ii a nei vaangletna in, ama ii minthanna le phatna nga tu a, hong sam pa ih heakna tungtawnin, Pathian thu sungah a maan nuntakna ih nei natu in, ih kitaangsap theampo ei tungah hong pia hi. 4Hi bangin hong kamciamsa ahi a lian mama le a manpha letsongte sia, leitung ah a om hong lalsak thei cii le sa deina pan suatakna na nga thei natu le ama pianzia na siim thei natu in hong piak ahi hi. 5Hi thu hang mama in, na hi thei tawpin phatna sia na upna tungah belap vun; na phatna tungah heakna belap vun; 6na heakna tungah pumpi ki ukzawkna belap vun; pumpi ki ukzawkna tungah thuak zawkna belap vun; na thuak zawkna tungah Pathian bang hina belap vun; 7Pathian bang hina tungah u le nau ki itna belap vun; tuaciang u le nau ki itna tungah ngual it theina belap vun. 8Hi kicinnate sia na kitaangsap uh hi a, tuaciangin tuate tam mama na nei uh le, tua teng in no sia ih Topa Jesus Christ heakna sungah a diang zo tawntung le a muibunin hong nungtasak tu hi. 9Ahihang hi kicinnate a nei ngawl peuma sia, a khua muna toi ahikom, a mawna luite pan kithiansua zo ahi hunlam mu thei ngawlin mangil zo uh hi.
10Tua ahikom ka suapuite awng, Pathian hong sapna le hong tealna sia a kip a kho a sua natu in a nasia zaw kanin hanciam vun; tuabangin na hi uh le na upna na nusia ngei buatu uh hi. 11Hisia tungtawnin ih Topa le Hunpa Jesus Christ ii tawntung Kumpi ngam sungah tum thei natu thu a cingin no hong kipia tu hi.
12Hi thute sia na heaksa uh hi, na saansa thumaan thutak sungah kho takin a omsa na hita uh zong, kong phawksak kikik nuam hi. 13Hi thute na tepteena kong satsuasak tu sia, ka nuntak lai teng kei atu in a maan nasep hi ci in ka ngaisun hi. 14Ih Topa Jesus Christ ii a thiang tak a hong sonsa bangin, hi a thithei pumpi sia suut pal tu cisia ka kihe hi. 15Tua ahikom, ka thi zawkciang, hi thute a tawntungin na teptee thei natu lampi a kihon natu, ka hi thei tawpin ka seam tu hi.
Christ Minthanna A mute
16Ih Topa Jesus Christ ii vaangletna taw hong pai natu thu kong heaksak ciangin, phuatawm taanghthute ka sisanh bua uh hi. Ama ii letna sia ka mit uh taw ka mu sa uh ahi hi. 17A vaanglianbel Pa in, “Hisia ka it ka Tapa hi a, dik ka sak pa ahi hi!” ci a, Pa Pathian in patoaina le minthanna a piak laitak, tua munah ka om uh hi.#Mt 17:1-5; Mk 9:2-7; Lk 9:28-35 18Hi aw vantung panin hong pai lai in, kote mama mual thiangtho tungah, ama taw ka omkhawm uh a, ka za uh hi.
19Tua ahikom kamsaangte son thute tungtaang ah thinmuanna ka nei seseam uh hi. Tua thute na thupi ngaisut tu pha hi, banghang ziam cile, tua Ni khua hong vak a, nikonghong aksi na thinsung uh ah hong taan dong in, khuazingna munah tua thu sia meivak taang taw kibang hi. 20Ahizong, thildang a vaal lai, a thupibel in Laithiangtho sungah a om kamsaanna thu khat sia kuama in ama thu in, a khiakna son thei ngawl ahi hunlam ciamtee tavun. 21Banghang ziam cile kamsaanna thute sia mihing deina pan bek hong pai ngeingawl a, ahihang Pathian kung pan hong pai thute a son uh ciangin, mihingte sia Thaa Thiangtho ukna nuai ah a om ahi uh hi.
Currently Selected:
2 Peter 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
