1 Thessalonica te 2
2
Thessalonica khua ah Paul Nasep
1Ko ii suapuite awng, no kung kong hawna uh sia, nguaksuak ngawl hi ci in noma mama ii na heak uh ahi hi. 2Noma kung Thessalonica ah kong pai uh ma in Philippi ah kote hong kivawtsia zo a, hong kizawnsakzia sia na heak uh ahi hi. Tuaciangin hong langpan tam kale, ama kung pan a hong pai Lungdamna Thupha note tungah kong son natu in, ih Pathian in thinletna hong pia hi.#Sawl 16:19-24; 17:1-9 3Note tungah kong maangkaana uh sia khialna ahibuale a thiangtho ngawl niimnate tungah kibulphu ngawl hi, khat po theam tu zongh ka hanciam bua uh hi. 4Tuate luangin Pathian in pau a hong dei bangin ka pau tawntung uh hi, banghang ziam cile Lungdamna Thupha son tu in kote kiphu hi ci in ama in khensat hi. Mihingte diksak tu in ka hanciam bua uh hi, ahihang ka niimna uh hong sittel Pathian diksak tu in ka hanciam uh hi. 5Note kungah kong pai uh lai in, kisialpokna kampauna taw kong pai bua uh a, duhopna a phualseal natu kammalte kong zangh bua uh hi. Tuabang ka hi uh sia noma in nong he mama uh hi — Pathian sia koma tetti ahi hi! 6No tung pan hikale, ngualdangte tung pan hikale, kuama tung pan pokna nga tu in ka hanciam bua uh hi, 7Christ ii sawltakte ka hina uh taw, ka deina uhte no tung pan kong nget thei uh hi napi, kong ngen bua uh hi. Ahihang note taw ka om uh lai in nu khat ii tate a kep bangin kong khoi uh hi. 8No kong it hu in Pathian kung pan hong pai Lungdamna Thupha bek hi ngawlin ka nuntakna uh no hong hawm tu in ka kinging uh hi. Note sia ko atu in a ithuai mama na hi uh hi! 9Ko ii suapuite awng, ka sep ka dianna uh teng ciamtee nak vak uh te! Pathian tung pan hong pai Lungdamna Thupha no tungah kong hil uh ciangin, no ngim kong piakna uh ahi ngawl natu in, a sun a zanin na ka seam uh hi.
10No thu umte tungah ka ngamtatna uh sia thiangtho, maan, khialna om ngawl ahi hunlam note in ka tetti te na hi uh a, Pathian zongh ka tetti uh ahi hi. 11Pa ii tate tung, a vawt tu bangin note khat sim tungah kong vawt uh sia na he uh hi. 12Ama Ngam le a minthanna hong hawm tu in hong sam Pathian ii diksak nuntakna a nei tu in, kong hanthawn a, kong heeneam a, kong thawn top uh hi.
13Tuaciangin, Pathian tungah a tawntung lungdam ka kona uh ahang khat zongh om hi. Pathian thu kong puak uh lai in, mihing ii thupuak bang hi ngawlin Pathian thupuak bang ahi takpi sia na za uh a, na saang uh hi. Banghang ziam cile no thu umte sungah Pathian in na hong seam hi. 14Ko ii suapuite awng, no sungah thupiangte ma Judea ah Pathian ii Pawlpite, tua mun a om Christ Jesus ii neisa mihingte tung zongh ah piang hi. Note in na mipuite ii vawtsiatna na thuak uh bangin, amate zongh Jew te ii vawtsiatna thuak hi, #Sawl 17:5 15tua Jew te in Topa Jesus le kamsaangte thatlum a, ko hong vawtsiate ma ahi uh hi. Amate Pathian atu in bangza in lungkimhuai ngawl tu ziam! A kuama po atu in amate bangza in ngal ciipha ahi ziam!#Sawl 9:23,29; 13:45,50; 14:2,5,19; 17:5,13; 18:12 16Ngupna a piangsak tu thute Gentile te tungah ka hil tu uh ngawngawn khaktan tu in hanciam uh hi. Hi bangin amate ii a paltan tawntung sa mawna theampo pawlcingsak uh hi. Tu in Pathian thin uukna sia amate tungah a khakbel ciangin hong thengsuk zo hi!
Amate kungah Paul A Haw kik Nopna
17Ko ka hi uh le suapuite awng, note taw tawmvei ih kikhen zawkciang — ka ngaisutna uh taw hi ngawlin, pumpi mama taw — bangza in no hong ngai a, kong mu kik natu bangza haksa in hanciam khu ziam! 18Note kungah kong heak kik nuam uh hi. Keima mama heak kik tu in khatvei bek dom ngawl ka kithoai bul a, ahihang Satan in hong oai bua hi. 19A huamin ci leang, note sia — ngualdang hi ngawl! — note sia kote lametna, lungdamna le zawna ka nga uh hu in Topa Jesus hong pai ciang, ama mai ah ka kisuantaakna na hi tu uh hi. 20Note sia kote kiphatsakna le lungdamna tatak na hi tu uh hi!
Currently Selected:
1 Thessalonica te 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
