1 Khangtaanghthu 14
14
David ii Jerusalem ah A Nasepte
(2 Samuel 5:11-16)
1Tyre kumpipa Hiram in David kungah sumlei sumzuak vai thu son tu palai paisak a; kumpi inn a sak natu in Cedar thingluangte, a sa tu in suangciangte le lettamate taw puak hi. 2Tuasia ciang Topa in ama Israel kumpi in kipsak zo a, ama mite atu in a kumpi ngam khangtosak ahi hunlam David in phawk hi.
3Jerusalem ah David in zi tam ma nei thua in, tanu tapa tam ma toai thua hi. 4Jerusalem pan a nei tate, a nuai a bang hi a: Shammua, Shobab, Nathan, Solomon, 5Ibhar, Elishua, Elpelet, 6Nogah, Nepheg, Japhia, 7Elishama, Beeliada, le Eliphelet te ahi hi.
Philistine te A zawna
(2 Samuel 5:17-25)
8Tu in David sia Israel ngam bup kumpipa kisuaksak zo ci in Philistine te in a zaak uh ciang a man tu in a ngalkaphonpi paisak hi. Tua ahiciang David in amate sim tu in kuan hi. 9Philistine te Rephaim Kuam theng a, vanh suttol tu kipan uh hi. 10David in Pathian tungah, “Philistine te ka sim tu ziam? Ngalzawna nong pia tu ziam?” ci in dongh hi.
Topa in, “Hi hi, sim in! Zawna kong pia tu hi!” ci in zo hi.
11Tuasia ciang David in amate Baal Perazim ah simin zo hi. Ama in, “Tuikhang bangin ngalte ngalkaphonpi a phul let tu in Pathian in keima hong zangh hi,” ci hi. Tua hu in tua mun sia Baal Perazim kici hi. 12Philistine te a taikeak ciang a milimte nusia a, David in tua milimte hal tu in thupia hi.
13Hai ngawlin Philistine te tua kuam ah heak kikin vanh suttol tu in kipan kik uh hi. 14Khatvei ma David in dongh kik a, Pathian in, “Hi sung pan sim heak in a, kiimveal in, a langkhat sang balsam thingkungte nai pan sim tu in kithoai in. 15Thingkung dawnte tungah kalsuan nging na zaak uh ciang, sim vun, banghang ziam cile Philistine ngalkaphonpi zaw natu in na mai ah ka pai tu hi,” ci in zo hi. 16David in Pathian thupiak bangin seam ahikom Philistine te Gibeon pan Gezer dongin not kik hi. 17David ii minthanna mun theampo ah kizel a, Topa in minam theampo in ama kiitasak hi.
Currently Selected:
1 Khangtaanghthu 14: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
