Ruuka 5

Yeesu araamba okusora abheehigira bhaaye

(Mataayo 4:18-22; Mariko 1:16-20)

1Orusiku rumwi, Yeesu yaaringa yeemiriiri kumurambo gwa enyanja ya Genejareeti,#5:1 Enyanja ya Genejareeti. Kwa eriina erindi erabhirikirwa enyanja ya Gariraaya. areehigirya omuganda gwa abhantu, eringʼana rya Waryubha. Abhantu bhayo bhakabha bharamwikumirira, okuhikira bhakamuhiga, naho bhamwitegeerere. 2Yeesu akarora amaato gabhiri, kumurambo gwa enyanja iyo. Abhategi bheekiri-mo, kwa okubha bhoogyanga emitego gyabho. 3Akariina mubhwato obhumwi, obhwa Simoni, akamukeerya ega, “Bhusuntarye hake munyanja.” Mbe, akeekara muyo, akagendererya okwihigirya abhantu.

4Hanú yaamara okubheehigirya, akakeerya Simoni, “Ruga obhwato tugende bhuribha, mwituumye emitego gyenyu, mutege, naho munyoore eginswi.” 5Simoni akamukyukya ega, “Uuwe Omukuru weetu, twakoreri emirimu kwa ekituunyo obhutiku okukya, bira okunyoora ekintu! Nawe, kwa okubha nuuwe ogambiri, ndagiituumya emitego mumanji.” 6Mbe, Simoni na abharikyaye bhakeetuumya emitego gyabho mumanji, bhakatega, bhakagwatya eginswi eginjaru bhukongʼu, okuhikira emitego gyabho gikaamba okutaamuka. 7Bhakanungira amabhoko abharikyabho bha obhwato obhundi, bhaaje okubhabheera. Hanú bhaaja, bhakeejurya amaato gonsego gabhiri eginswi, okuhikira gakeenda okusika.

8Simoni Petero hanú yaarora ego, akatema hansi ebhiru embere ya Yeesu, akamukeerya ega, “Omukuru, ntakwenderwa okubha hamwi na uuwe, ogende, kwa okubha oni m-muntu owa obhusarya!” 9Simoni yaagamba amangʼana gayo, kwa okubha weeki, hamwi na abharikyaye bhanú yaaringa nabho, bhaaringa bharuguuriri, eguru ya obhwaru bhwa eginswi ginú bhaaringa bhagwatirye. 10Mubhwato obhundi bhaaringa-mo Yakobho na Yoana, abhaana bha Jebhedayo, bhanú bhaaringa bhagwateeni na Simoni okukora ebhyasara. Bhonse bhakaruguura kuganú geebhuka. Yeesu akamukeerya Simoni, “Tiga okoobhoha! Okwambira bhoono, oraabhe omutegi wa abhantu.”#5:10 Omutegi wa abhantu. Ensonga yaaye niiga, aruusye abhantu okurwa mubhusarya bhwabho na okubhakumanʼya hamwi mumuganda gwa abhantu bha Waryubha. 11Mbe, Simoni na abharikyaye bhakahindya amaato kumurambo, bhakatiga obhuniibhi bhwabho bhonsego, bhakamusoorana Yeesu.

Yeesu arahwenʼya omugenge

(Mataayo 8:1-4; Mariko 1:40-45)

12Yeesu hanú yaaringa mumugi gumwi, rumwigo, akaaja-ho omuntu umwi. Omuntu uyo, yaaringa omugenge omubhiri omugima. Hanú yaarora Yeesu, akatema hansi ebhiru embere yaaye, akahiinya obhusu bhukahika hansi, akamukomererya ega, “Ee Omukuru, nyoore oreenda okunkuunʼya, oratura okunhwenʼya!” 13Yeesu akeenura okubhoko kwaye, akamukuunʼya, akamukeerya ega, “Ndeenda ohwene, iraama!” Hayohayo, akahwena obhugenge bhwaye.

14Yeesu akamukaanʼya ega, “Otamukeerya omuntu wowonse amangʼana ganu! Nawe, genda wiyorokye kumusyengeri,#5:14 Kumusyengeri. Okuringʼaana na amaragiriryo ga Waryubha, omusyengeri ngʼo yaaringa areemiririra omuntu yeeraame obhugenge. Maaha mukitabho kya Abharaawi 14:1-32. oruusye ekimwenso kya ego amaragiriryo ga Musa garagamba, naho worokye abhantu ega, wiraamiri.”

15Kora ego, eringʼana eguru ya Yeesu, rikagendererya okunyaragana bhukongʼu. Abhantu abhaaru bhakabha bhareekumanʼya, naho bheetegeerere ameehigiryo gaaye, na okuhwenibhwa amarweri gaabho. 16Kora ego, Yeesu yaaringa arabhatiga, aragya kabhejyo, akabha arasabha Waryubha.

Yeesu arahwenʼya omurweri wa omujimu

(Mataayo 9:1-8; Mariko 2:1-12)

17Orusiku rumwi, Yeesu hanú yaaringa areehigirya abhantu munyumba, Abhafarisaayo#5:17a Abhafarisaayo. Bhaaringa m-muganda gwa abhatungi bha edini ya Abhayahudi. Bhaaringa bharagwata bhukongʼu amaragiriryo ga Waryubha. Maaha Abhafarisaayo mu Moonjooro eguru ya Amangʼana Amakongʼu. hamwi na abheehigirya bha amaragiriryo#5:17b Abheehigirya bha amaragiriryo. Bhaaringa abhasomi bhanú bhasomeeri amaragiriryo ga Waryubha, na mbo bhoonjooranga na okwihigirya abhantu amaragiriryo gayo, na egimiira gyabho. Maaha Abheehigirya bha amaragiriryo mu Moonjooro eguru ya Amangʼana Amakongʼu. bhaaringa-mo bheekeeri. Bhaaringa bhaajiri okurwa kira ekijiji kya mubhyaro bhya Gariraaya na Yudea, na kora okurwa mumugi gwa Yerusaremu. Yeesu yaaringa na obhuturo okurwa ku Mukuru Waryubha, naho ahwenʼye abhantu.

18Mbe, bhakaaja-ho abhasaaja, bhagegeri omurweri wa omujimu kwisayenge. Bhakasakya okumusohya munyumba, bhamutuure embere ya Yeesu. 19Nawe bhataanagya, kwa ekisigo kya omuganda omunene gwa abhantu bhanú bhaaringa bheekumeenʼye mukiseku harya. Nho bhakariina engaji okugya eguru kurusara rwa enyumba, bhamugegeri omurweri uyo kwisayenge ryaye.#5:19 Bhakariina engaji okugya eguru kurusara rwa enyumba, bhamugegeri omurweri uyo kwisayenge ryaye. Kwibhaga rya Yeesu abhantu bhaahagaajanga eginyumba gyabho, bhararaarya egimbaau kwikindaasi kurusumo rwa okumuunyira-ko, bhaakoranga na egingaji gya okuriina-ko. Bhakahaanyura ahasi hakego kurusara, bhakamwituumya embere ya Yeesu, enu areeri kwisayenge ryaye, gati ya omuganda gwa abhantu. 20Hanú Yeesu yaarora ekikorwa kya abhantu bhayo, akamanya ega, bhaaringa na eimani, akamukeerya omurweri uyo ega, “Musaani, wabhiirwe obhusarya bhwaho!”

21Mbe, abheehigirya bha amaragiriryo na Abhafarisaayo bhayo, bhakaamba okubhuuranʼya ega, “Niwi unu? Ndeegwa aragamba amangʼana ga okumujabhura Waryubha? Atariho omuntu unú aratura okwabhira obhusarya, nawe Waryubha omwenego!”

22Yeesu akamanya ganú bhaaringa bhareeganirirya, akabhabhuurya ega, “Kwaki mureeganirirya ego, mumitima gyenyu? 23Erinyoohu n-diiha? Okumukeerya omurweri ega, ‘Wabhiirwe obhusarya bhwaho,’ kasi okumukeerya ega, ‘Imirira ogende’? 24Nawe, ndeenda mumanye ega, Omwana wa Adamu,#5:24 Omwana wa Adamu. Kwa okutumira eriina riyo, Yeesu yaaringa areegamba omwene. Ensonga ya eriina riyo niiga, omuntu unú yaahaanwa obhuturo okurwa ku Waryubha. Maaha mukitabho kya Danyeri 7:13-14, kasi maaha Omwana wa Adamu mu Moonjooro eguru ya Amangʼana Amakongʼu. weeki yaana obhuturo bhwa okwabhira obhusarya mukyaro hanu.” Hanú yaamara okugamba gayo, akamukeerya omurweri uyo ega, “Ndakukeerya ega, imuka! Witiike erisayenge ryaho, ogende iika owaaho.”

25Hayohayo, omuntu uyo akeemirira embere ya abhantu, akeetiika erisayenge ryaye, akagya iika enu aramugungya Waryubha. 26Abhantu bhonsego, bhakaruguura bhukongʼu na okugwatwa na obhoobha. Hamwi na gayo, bhakamugungya Waryubha, bharagamba ega, “Bhamure! Reero, turuuji ekika!”

Yeesu aramubhirikira Raawi amusoorane

(Mataayo 9:9-13; Mariko 2:13-17)

27Hanú gayo gaahwa, Yeesu akarwa munyumba, akarora omutobhya umwi wa erigooti, eriina ryaye Raawi, yeekeeri mukihuuna kyaye kya okutobherya erigooti. Hayo, Yeesu akamukeerya, “Nsoorana!” 28Rumwigo, Raawi akeemuka, akatiga kira ekintu, akabha aramusoorana Yeesu.

29Eribhaga erindi, Raawi akakorera Yeesu enyangi enene iika owaaye. Munyumba munu bhaaringa bheekumeenʼye-mo abhatobhya bha erigooti abhaaru, na abhantu abhandi bhakabha bhararya hamwi kumeja. 30Ekakora Abhafarisaayo, na abheehigirya bhaabho bha amaragiriryo, bhagye okwingʼeheerya kubheehigira bha Yeesu ega, “Ndeegwa, murarya na okunywa hamwi na abhatobhya bha erigooti#5:30a Abhatobhya bha erigooti. Abhayahudi abhaaru bhaaringa bharabhajeera bhukongʼu abhatobhya bha erigooti, kwa okubha bhaabhandiriryanga abhantu okuriha erigooti okukira kya ego yeenderwanga. Kiyo nkyo kyakora abhantu bhakamaaha abhatobhya bha erigooti ega, m-basarya. Maaha Abhatobhya bha erigooti mu Moonjooro eguru ya Amangʼana Amakongʼu. na abhakori bha obhusarya#5:30b Abhakori bha obhusarya. Abhafarisaayo bhaaringa bharagwata bhukongʼu amaragiriryo ga Waryubha. Bhanú bhataaringa bharagagwata amaragiriryo na egimiira gyabho ginú bhoongerya, bhaabhabhirikiranga ega, abhakori bha obhusarya.?”

31Yeesu akabhakyukya ega, “Abhantu bhanú bhataringi abharweri bhatakwenda omureri, nawe abharweri mbo bharamwenda! 32Egoego, oni nonse ntaajiri okubhirikira abhantu bhanú bhareerora ega, m-baheene, nawe, niijiri okubhirikira abhasarya bhamwihunjurire Waryubha.”

Yeesu araringʼaanʼya ameehigiryo ga akare na amahya

(Mataayo 9:14-17; Mariko 2:18-22)

33Abhantu bhayo, bhakamukeerya Yeesu ega, “Abheehigira bha Yoana Omubhatiiji bhareeyima ebhyakurya kaaru, eribhaga oranyoora bharamusabha Waryubha. Kora abheehigira bha Abhafarisaayo bhonse, bharakoranga egoego. Nawe abhaaho, ndeegwa bhatakwiyima, bharagendererya okurya na okunywa!”

34Yeesu akabhakyukya ega, “Muratura egaki okubhakora abhageni bhanú bharaarikirwe mubhwenga bheeyime ebhyakurya hanú bharingi hamwi na omuteti? 35Nawe, eginsiku giriija, ginú omuteti ariruusibhwa gati ya abhageni bhaaye. Hayo nho, bhariiyima okurya ebhyakurya.”

36Yeesu akabhakeerya ekirengyo ekindi, ega, “Atariho omuntu unú arabhutura ekiraka okurwa kumwenda omuhya, naho akitumire kumwenda omugotu. Nyoore araakore ego, arabha ataamwiri omwenda gwaye omuhya. Hamwi na gayo, ekiraka kya omwenda omuhya kiyo, kitaahunkane na omwenda omugotu.

37“Na atariho omuntu unú aratuura edivai enhya muginsaho gya amaseero amagotu. Nyoore araakore ego, edivai enhya eraagibhimbye okuhikira gibhaaruke, edivai iitike, na eginsaho giyo ngiraasarike. 38Nawe edivai enhya, ereenderwa etuurwe muginsaho eginhya!

39“Omuntu unú anariri ebhintu bhya akare, oranyoora atakwenda ebhintu ebhihya. Aragamba ega, ‘Ebhya akare mbyo ebhijomu!’”#5:39 Ensonga ya Yeesu niiga, abhantu abhandi bharyanga amangʼana gaaye amahya, kora bhakyari okumanya ensonga yaago. Bhariibhamba eimani yaabho eya akare na bhataryenda ekintu ekindi.

Currently Selected:

Ruuka 5: Kabwa

Highlight

Copy