Ruuka 4

Yeesu arasakibhwa na Erisambwa

(Mataayo 4:1-11; Mariko 1:12-13)

1Yeesu akarwa ahasi ha oruuji rwa Yorodani, enu yeejwiri Omutima Omurabhu. Omutima uyo akabhanga aramugendya kukibhara, eginsiku mirongo ena. 2Nho, Erisambwa#4:2 Erisambwa. Maaha eringʼana rinu mu Moonjooro eguru ya Amangʼana Amakongʼu. rikabhanga riramusakya eyo. Na eribhaga riyo ryonsego, ataaryanga ekintu kyokyonse. Hanú yaamara eginsiku giyo, akeegwa omweko bhukongʼu.

3Nho, Erisambwa rikamukeerya ega, “Nyoore maheene uuwe m-Mwana wa Waryubha, hunjura erigina rinu ribhe omukaate.” 4Yeesu akarikyukya ega, “Yaangʼoorwa mu Mangʼoore Amarabhu ega, ‘Omuntu atakubha na obhuhoru kwa okurya omukaate okwenego.’#4:4 Maaha mukitabho kya Obhuhiituki bhwa Amaragiriryo 8:3. ”

5Mbe, Erisambwa rikamuriinʼya kunkuku entambi bhukongʼu, rikamoorokya obhutungi bhwa ebhyaro bhyonsego kwa eribhaga erimwi. 6Rikamukeerya ega, “Ndakuhaana obhutungi bhwa bhinu bhyonsego, hamwi na eginkuma gyaye eginjomu, kwa okubha giringi mumabhoko gaani. Nooni naahaanwa na Waryubha, na ndatura okuhaana omuntu wowonse unú ndeenda. 7Kwa ego, uuwe hanú oraansyengere, ndakuhaana obhutungi bhwa gayo gonsego.” 8Yeesu akarikyukya ega, “Engʼoorerwe mu Mangʼoore Amarabhu ega, ‘Omusyengere Omukuru Waryubha waaho. Omukorere emirimu weeki omwenego.’ #4:8 Maaha mukitabho kya Obhuhiituki bhwa Amaragiriryo 6:13.”

9Mbe, Erisambwa rikamuhira mumugi gwa Yerusaremu, rikamwimirirya eguru kukinsongyo kya erisyengerero erikuru rya Waryubha, rikamukeerya ega, “Nyoore maheene uuwe m-Mwana wa Waryubha, irekera hansi! 10Otakutura okunyahaarika, kwa okubha yaangʼoorwa mu Mangʼoore Amarabhu ega,

‘Waryubha arikutumira bhamaraika bhaaye, naho bhakwangararire.’

11Kweki ega,

‘Bharaakutuumire kwa amabhoko gaabho,

otaaja okwikuujura kwigina, onyahaarike amaguru gaaho.’#4:10-11 Maaha mukitabho kya Egijabhuri 91:11-12.”

12Yeesu akarikyukya ega, “Engʼoorerwe ega, ‘Otakaamusakya Omukuru, Waryubha waaho.’#4:12 Maaha mukitabho kya Obhuhiituki bhwa Amaragiriryo 6:16. ”

13Erisambwa hanú ryamara okumusakya Yeesu, rikamutiga, rikagya gyaye okuhikira eribhaga erindi.

Yeesu araangwa mumugi gwa Najareeti

(Mataayo 4:12-17, 13:53-58; Mariko 1:14-15, 6:1-6)

14Mbe, Yeesu akahunjuka mukyaro kya Gariraaya, enu yeejwiri eginguru gya Omutima Omurabhu. Amangʼana eguru ya Yeesu, gakanyaragana bhukongʼu mukyaro kiyo kyonsego. 15Akabha areehigirya abhantu kira ahasi mumasinagogi#4:15 Mumasinagogi. Erisinagogi ryaringa enyumba ya Abhayahudi ya okusyengera Waryubha orusiku rwa Esabhato. Maaha Erisinagogi mu Moonjooro eguru ya Amangʼana Amakongʼu. gaabho. Abhantu bhonsego bhakabha bharamugungya.

16Eribhaga erindi, akahunjuka Najareeti mumugi gunú yaarererwa-mo. Orusiku rwa Esabhato,#4:16 Orusiku rwa Esabhato. Ku Bhayahudi n-dusiku rwa okumusyengera Waryubha na okumuunya. Maaha Esabhato mu Moonjooro eguru ya Amangʼana Amakongʼu. akasoha mwisinagogi kya ego yaaringa anariri, akeemirira naho okusoma eringʼana rya Waryubha. 17Akahaanwa ekitabho kya omurooti Isaaya, akakiramburura, akasikana ahasi hangʼoorerwe ega,

18“Omutima wa Omukuru Waryubha aringi hamwi na oni.

Yansoreri okubharaarikira abhatobhu amangʼana amajomu.

Yantumiri okuraarikira abhabhohwa ega, bharisiikurirwa,

na okukeerya abhahoku ega, bhariribhurwa ameeso,

na bhanú bharanyankibhwa, mbatuurye.

19Yantumiri okubharaarikira abhantu, omwaka gwa obhutuurya,

gunú Omukuru Waryubha aryorokya eriruguto ryaye.”#4:18-19 Maaha mukitabho kya Isaaya 61:1-2.

20Mbe, Yeesu hanú yaamara okusoma amangʼana gayo, akakundikirya ekitabho, akamuhunjukirya omukangatya wa obhusyengeri. Akeekara naho yeehigirye. Abhantu bhonsego bhanú bhaaringa mwisinagogi, bhakamumaahirira, bharaganyirira kinú areehigirye. 21Akaamba okubhakeerya ega, “Eringʼoore rinú mwigwiri reero, oni ndikuneenʼye embere yeenyu.” 22Hanú yaamara okwihigirya, bhonsego bhakagamba ega, “Agambiri obhugambi bhujomu!” Bhakaruguura amangʼana gaaye, ganú yaagamba eguru ya eriruguto. Kimwi, bhakabhuuranʼya ega, “Unu tu-mwana wa Yusufu?”

23Yeesu akabhakeerya ega, “Mmanyiri muraankeerye ekirengyo kinu, ‘Omuraguri, ihwenʼya uuwe omwene!’ Na muraankeerye ega, ‘Ganú twigwiri okoreri mumugi gwa Kaperinaumu, ogakore na mumugi gwaho hanu!’ ” 24Yeesu akagendererya okugamba ega, “Ndabhakeerya obhuheene ega, atariho omurooti unú areekiriribhwa mumugi gwa owaabho.

25“Nawe, mwitegeerere! M-maheene ega, kwibhaga rya omurooti Eriya, bhaaringa-ho abhasino abhaaru mukyaro kya Isiraeri. Eribhaga riyo embura etaatwa kwa eribhaga rya emyaka esatu na emyeri esansabha. Kwa ego, mukyaro kyonsego kya Isiraeri hakabha na enjara enduru. 26Kora ego, Eriya ataatumwa kora kuumwi waabho. Nawe, yaatumwa kumusino umwi wa mumugi gwa Serepita, mukyaro kya Sidoni, embarika ya Isiraeri!#4:26 Maaha mukitabho kya 1 Abhakama 17:1-24.

27“Na kwibhaga rya omurooti Erisha, bhaaringa-ho abhagenge abhaaru mukyaro kya Isiraeri. Kora ego, ataahwenʼya kora oumwi waabho. Nawe, akahwenʼya Naamani omwenego, omuntu okurwa mukyaro kya Siria!”#4:27 Maaha mukitabho kya 2 Abhakama 5:1-14.

28Abhantu bhonsego bhanú bhaaringa bheekumeenʼye mwisinagogi riyo, hanú bheegwa amangʼana ga Yeesu, bhakajima bhukongʼu. 29Bhakeemirira kwa enkoro, bhakagya, bhakamuruusya mumugi gwabho gunú gwaringa guhagaajirwe munkuku. Bhakamuhira okuhikira ahasi ha omuhiringito omuhaari kunkuku iyo, naho bhamurekere hansi. 30Nawe, akeekyukya, akahita gati yaabho, akagya gyaye.

Yeesu arakenyia ekihwi ekibhiibhi okurwa kumuntu

(Mariko 1:21-28)

31Eribhaga erindi, Yeesu akagya mumugi gwa Kaperinaumu, mukyaro kya Gariraaya. Orusiku rwa Esabhato, akasoha mwisinagogi, akaamba okwihigirya abhantu. 32Abhantu bhayo bhakaruguura bhukongʼu eguru ya ameehigiryo gaaye, kwa okubha yaaringa areehigirya kwa obhutungi.

33Na mwisinagogi muyo, yaaringa-mo omuntu umwi unú ajuuriibhwe na ekihwi ekibhiibhi. Ekihwi kiyo, kikakuura na okujiirira kwa eriisi rya okuribhya amatwi, ega, 34“Uuwe, Yeesu wa Najareeti, otige okutunyankya bheetu! Bhoono, uujiri okutusikya? Nkumanyiri! Uuwe m-Murabhu wa Waryubha!”

35Yeesu akakikemera ekihwi kiyo ega, “Kira! Nuurwe kumuntu unu!” Rumwigo, ekihwi kiyo kikamugwisya hansi, embere ya abhantu bhayo bhonsego. Kimwi, kikamurwa-ko bira okumunyahaara kora ahake.

36Abhantu bhonsego bhakaruguura bhukongʼu, bhakabhuuranʼya ega, “M-mangʼana-ki ganu? Kwa okubha kwa obhutungi na obhuturo, arakenyia ebhihwi ebhibhiibhi bhirwe kubhantu, na bhirabharwa-ko!” 37Kwa ego, amangʼana eguru ya Yeesu, gakabha ganyarageeni bhukongʼu, mukyaro kyonsego.

Yeesu arahwenʼya abharweri abhaaru

(Mataayo 8:14-17; Mariko 1:29-34)

38Mbe, Yeesu akarwa mwisinagogi, akasoha munyumba ya omuntu umwi unú yaabhirikirwanga Simoni.#4:38 Simoni. Simoni uyo eriina erindi yaabhirikirwanga Petero. Ngʼinabhyara waabho Simoni, yaaringa na ehooma enduru. Abhantu bhanú bhaaringa munyumba muyo, bhakamusabha Yeesu amuhwenʼye. 39Yeesu akasuntara akeemirira haangʼi nawe, akaikaanʼya ehooma iyo, rumwigo, omukari uyo akahwena. Nho, akeemuka, akaamba okubhakorera ebhyakurya.

40Eribhaga eryubha ryaringa rirasikira, orusiku rwa Esabhato rwaringa rurahwa. Abhantu bhakareetera Yeesu abharweri bhaabho bhonsego bha amarweri amanga amaaru. Yeesu akabhatuurira amabhoko gaaye kira oumwi, akabha arabhahwenʼya. 41Hamwi na gayo, Yeesu akakenyia ebhihwi ebhibhiibhi okurwa kubhantu abhandi abhaaru, bhyajiiriranga bhiragamba ega, “Uuwe m-Mwana wa Waryubha!” Nawe, Yeesu akabhikaanʼya na ataabhiikiririrya okugendererya okugamba ego, kwa okubha bhyaringa bhimanyiri ega, ngʼo Kiristu Omutuurya.

Yeesu araraarika mukyaro kya Yudea

(Mariko 1:35-39)

42Hanú bhwakya, Yeesu akeemuka hayo, akagya kabhejyo okusabha. Omuganda gwa abhantu gukabha guramutuna. Hanú bhaamunyoora, bhakeenda okumukaanʼya atabhatiga. 43Nawe, Yeesu akabhakeerya ega, “Ndeenderwa ngye mumigi egindi kweki, mbenga ndaraarika amangʼana amajomu eguru ya obhukama bhwa Waryubha,#4:43 Obhukama bhwa Waryubha. Maaha eringʼana rinu mu Moonjooro eguru ya Amangʼana Amakongʼu. kwa okubha, gayo ngo gaakora nkatumwa.”

44Nho, Yeesu akagendererya okuhitira mukyaro kya Yudea,#4:44 Mukyaro kya Yudea. Amangʼoore agandi ga akare aga Ekiyunani garagamba ega, mukyaro kya Gariraaya. araraarikira abhantu amangʼana amajomu gayo mumasinagogi gaabho.

Currently Selected:

Ruuka 4: Kabwa

Highlight

Copy