Ruuka 6

Yeesu ngʼo Omukuru wa orusiku rwa Esabhato

(Mataayo 12:1-8; Mariko 2:23-28)

1Orusiku orumwi rwa Esabhato, Yeesu hamwi na abheehigira bhaaye, bhaaringa bharahita mumigunda gya egingano. Abheehigira bhaaye, bhaabhunanga ebhigara bhya egingano bhakakuuta kwa amabhoko bhakarya eginheke.

2Mbe, Abhafarisaayo abhandi bhakabhabhuurya ega, “Ndeegwa, murakora ganú gatakwikiriribhwa okukoreka orusiku rwa Esabhato!”#6:2 Orusiku rwa Esabhato. Rwaringa n-dusiku rwa okumuunya na okumusyengera Waryubha. Eteekiriribhwa okukora emirimu gyogyonse. Maaha mubhitabho bhya Okuhuruka 20:8-11, 34:21; Obhuhiituki bhwa Amaragiriryo 5:12-15, 23:25, kasi maaha Esabhato mu Moonjooro eguru ya Amangʼana Amakongʼu.

3Yeesu akabhakyukya ega, “Bhoono, bheenyu mutarasoma mu Mangʼoore Amarabhu kya ego Daudi yaakora, hanú weeki na abharikyaye bheegwa omweko.#6:3 Maaha mukitabho kya 1 Samweri 21:1-6. 4Weeki yaasoha munyumba ya Waryubha, akagega emikaate ginú gyaringa giteerwe embere ya Waryubha, akarya! Na akahaana-ko abharikyaye. Kora ego, yaangʼoorwa mumaragiriryo ganú Musa yaahaanwa okurwa ku Waryubha ega, abhantu bhanú bheekiririibhwe okurya emikaate gya ekabhira inu m-basyengeri abheenego.” 5Yeesu akoongerya okugamba ega, “Omwana wa Adamu ngʼo Omukuru wa Esabhato.”

Yeesu aramuhwenʼya omuntu orusiku rwa Esabhato

(Mataayo 12:9-14; Mariko 3:1-6)

6Orusiku orundi rwa Esabhato, Yeesu akasoha mwisinagogi, akaamba okwihigirya abhantu. Mwisinagogi muyo, yaaringa-mo omuntu umwi, unú okubhoko kwaye kwa obhuryo kwaringa na omujimu. 7Kweki, bhaaringa-mo abheehigirya bha amaragiriryo na Abhafarisaayo, bhaaringa bharamaahirira Yeesu, bharore nyoore Yeesu araamuhwenʼye omuntu, orusiku rwa Esabhato, naho bhanyoore omweya gwa okumujongera.

8Nawe, Yeesu akabha amanyiri ganú bhaaringa bhareeganirirya. Kwa ego, akamukeerya omuntu wa okubhoko kwa omujimu, “Njo, wimirire gatigati hanu.” Omuntu uyo akaaja, akeemirira gati yaabho.

9Nho, Yeesu akabhabhuurya abhantu bhayo, “Ndabhabhuurya bheenyu, okuringʼaana na amaragiriryo ga Waryubha, n-diiha erijomu orusiku rwa Esabhato, okukora amajomu kasi amabhiibhi? Okutuurya obhuhoru kasi okusikya?” 10Akabhamaahirira abhantu bhonsego egimbaara gyonsego. Hanú yaamara, akamukeerya omuntu uyo ega, “Imya okubhoko kwaho.” Omuntu uyo hanú yeemya okubhoko kwaye, rumwigo, kukahwena. 11Abhafarisaayo bhayo, bhakajima bhukongʼu. Bhakabhuuranʼya kya ego bharaamukorere Yeesu amabhiibhi.

Yeesu arasora abhatumwa ekumi na bhabhiri

(Mataayo 10:1-4; Mariko 3:13-19)

12Kuginsiku giyo, Yeesu akariina munkuku, okusabha Waryubha, akasabha obhutiku kyo. 13Na hanú bhwakya, akabhirikira abheehigira bhaaye. Gati yaabho akasora-mo ekumi na bhabhiri, akabhatoga abhatumwa.#6:13 Abhatumwa. Maaha eringʼana rinu mu Moonjooro eguru ya Amangʼana Amakongʼu. Abhatumwa bhayo, m-banu,

14Simoni unú Yeesu yaamutoga Petero, Andurea omumura waabho Simoni, Yakobho, Yoana, Firipo, Bhatoromayo, 15Mataayo, Tomaso, Yakobho omumura wa Arifayo, Simoni oumwi wa ekyama kya Abhajeroote,#6:15 Simoni oumwi wa ekyama kya Abhajeroote. Abhajeroote ni-riina rya Abhayahudi rinú bhaabhirikiranga omuntu unú yaaringa arwaniri eriihe rya okwiyagaara kwa ekyaro kyaye okurwa mubhutungi bhwa Abharuumi. 16Yuda omumura wa Yakobho, na Yuda Esikariote unú yaamara akamuriira eniku Yeesu.

Yeesu arabhahwenʼya abharweri abhaaru

(Mataayo 4:23-25)

17Yeesu akeeka okurwa munkuku, hamwi na abheehigira bhaaye. Na hanú yaahika ahasi ha orwanjaare, akeemirira. Ahasi hayo bhaaringa bheekumeenʼye-ho abheehigira bhaaye abhaaru na omuganda gwa abhantu abhandi okurwa egimbaara gyonsego gya ekyaro kya Yudea na mumugi gwa Yerusaremu, na okurwa kumurambo gwa kumigi gya Tiro na Sidoni. Abhantu bhayo bhaaja hayo, okumwitegeerera Yeesu na okuhwenibhwa amarweri gaabho. 18Kora bhanú bhaaringa bharanyankibhwa na ebhihwi ebhibhiibhi, akabha arabhahwenʼya. 19Abhantu bhayo bhonsego, bhaaringa bhareenda okumukuunʼya, kwa okubha yaaringa na eginguru gya okubhahwenʼya.

Ameehigiryo eguru ya enonkwe na enyanko

(Mataayo 5:1-12)

20Yeesu akabhamaahirira abheehigira bhaaye bhayo, akabhakeerya ega,

“Nyakara bheenyu abhatobhu,

kwa okubha obhukama bhwa Waryubha m-bwenyu.

21Nyakara bheenyu, bhanú muuna enjara bhoonwego,

kwa okubha Waryubha aribheegutya.

Nyakara bheenyu, bhanú murakuura bhoonwego,

kwa okubha muriseka.

22Nyakara bheenyu, nyoore abhantu bharibhajimira, na okubhaahura,

nyoore bharibhatuka na okubhakeerya ega, bheenyu m-basarya,

kurusumo rwa Omwana wa Adamu.

23Hanú gayo garikoreka, orusiku ruyo, mujomerwe,

kya ego muratema engʼoma okubhina,

kwa okubha omutuho gwenyu murwire m-munene.

Kweki, bhajaaji bha abhantu bhayo, bhaaringa bharabhanyankya abharooti bha Waryubha egoego.

24Nawe, murikirora-ko bheenyu abhaniibhi,

kwa okubha mumariri okunyoora obhuniibhi bhwenyu.

25Murikirora-ko, bheenyu bhanú mureeguta bhoonwego,

kwa okubha muribhanga mureegwa omweko.

Murikirora-ko, bheenyu bhanú muraseka kwa okujomerwa bhoonwego,

kwa okubha murikuura na okufumba.

26Murikirora-ko, bheenyu nyoore abhantu bharabhagungya,

kwa okubha kora bhajaaji weenyu, niigo bhaaringa bharakorera abharooti bha obhubheehi.

Ameehigiryo eguru ya okuhanja abhasigu

(Mataayo 5:38-48, 7:12)

27“Ndabhakeerya bheenyu bhanú muranyitegeerera ega, muhanje abhasigu bheenyu. Na abhantu bhanú bharabhajimira, bheenyu mubhaserenʼye. 28Na bhanú bharabheehiima na okubhanyankya, bheenyu mubhasabhire ku Waryubha, abhanonke.

29“Hanú omuntu araakuteme kumboto eimwi, omukyukirye na eindi. Na hanú omuntu araakuruusye ekabhuuti yaaho, omutigire agege na esyati. 30Wowonse unú araakusabhe ekintu, omuhaane. Na hanú omuntu araakuruusye ebhintu bhyaho, otamusabha akuhunjukirye. 31Mubhenga murakorera abhantu abhandi kya ego bheenyu bhonse mureenda bhabhakorere.

32“Nyoore muraahanje bhanú bhabhahanjiri bheenyu, murinyoora obhwera-ki? Kora abhasarya bharahanja bhanú bhabhahanjiri! 33Kweki, nyoore muraserenʼya bhanú bharabhaserenʼya abheenego, murinyoora obhwera-ki? Kora abhasarya bharakora ego! 34Kweki, hanú muraabhahaane esiiri bhanú mureeganirirya ega, bharibhahindirya abheenego, murinyoora obhwera-ki? Kora abhasarya bharahaana esiiri abharikyabho. Oranyoora bhareeganirirya ega, bhayo bharibhahindirya ebhintu bhyabho bhyonsego!

35“Nawe bheenyu, muhanje abhasigu bheenyu, na mubhaserenʼye. Mubhahaane esiiri, mutige okwiganirirya okuhindiribhwa. Waryubha aribhahaana omutuho omunene, na muribha abhaana bha heene kuweeki, Omukuru wa bhyonsego. Kwa okubha, Waryubha araserenʼya kora bhanú bhatakumugungya, na abhakori bha obhusarya.

36“Mubhe abhantu bhanú bharaabhira abhandi, kya ego Eseweenyu araabhira abhantu.

Ameehigiryo eguru ya okubhuturira ekiina abhandi

(Mataayo 7:1-5)

37“Mutabha murabhabhuturira ekiina abhandi, naho Waryubha atariija okubhabhuturira ekiina na bheenyu. Mutagamba ega, abhandi bhabhuturirwe ekiina, nho na bheenyu mutaribhuturirwa ekiina. Mwabhire abhantu bhanú bhabhasariirye, nho na bheenyu muryabhirwa. 38Muhaane abhantu kinú bhareenda, nho murihaanwa omutuho omunene, kya omuntu unú arahaanwa endengo inú iijwiri na okwigatirwa, esingisiibhwe ereetikirira. Kwa okubha, endengo iryairya murarengera abhandi, ngʼyo Waryubha aribharengera bheenyu.”

39Yeesu akabhakeerya ekirengyo ega, “Omuhoku aratura okoorokererya omuhoku omurikyaye? Ndamanya bhonsego bhabhiri bharaagwe mwituko!

40“Omwihigira atakumukira omwihigirya waaye. Nawe, omwihigira hanú arimara okwihigiribhwa, nho arihunkana na omwihigirya waaye.

41“Kwaki oramaaha ekingʼeningʼeni kinú kiringi muriiso rya omurikyaho, nawe, otakurora ensonko inú eringi muriiso ryaho? 42Kasi, oratura egaki okumukeerya omuhiiri waaho ega, ‘Omuhiiri waani, tiga nkuruusye ekingʼeningʼeni kinú kiringi muriiso ryaho,’ enu uuwe omwene otakurora ensonko inú eringi muriiso ryaho? Uuwe nyarwambe! Iruusya mbere ensonko inú eringi muriiso ryaho. Nho, oraature okurora bhujomu, na okuruusya ekingʼeningʼeni kinú kiringi muriiso rya omuhiiri waaho.

Abhantu bharamanyikana kwa amangʼana gaabho

(Mataayo 7:16-20, 12:33-35)

43“Gutariho omuti omujomu gunú guraama emisumo emibhiibhi. Gutariho omuti omubhiibhi, gunú guraama emisumo emijomu. 44Abhantu bhatakugesa emisumo gya emitini kumiti gya amahwa, kasi bhatakugesa egijabhibhu kumiti gya emichongoma. Nawe kira omuti, guramanyikana kwa emisumo gyago.

45“Egoego, omuntu wa enkoro enjomu aragamba amangʼana amajomu, okurwa kumajomu ganú geejwiri mumutima gwaye. Nawe, omuntu omusarya aragamba amangʼana amabhiibhi, okurwa kumabhiibhi ganú geejwiri mumutima gwaye. Kira omuntu arahaira amangʼana ganú geejwiri mumutima gwaye.

Ekirengyo kya abhahagaaji bhabhiri

(Mataayo 7:24-27)

46“Kwaki murambirikira, ‘Omukuru, Omukuru,’ nawe, amangʼana ganú ndabhakeerya, mutakugakora? 47Omuntu wowonse unú araaja kuoni, areetegeerere amangʼana gaani na okugakora arahunkana na ekirengyo kinu. 48Arahunkana na omuhagaaji wa enyumba, unú yaasimba hansi akahika kwitare, akahagaaja obhurusa eguru ya eritare. Mbe, oruuji hanú rweejura, amanji gakaitematema enyumba. Kora ego, gataaisingisya, kwa okubha yaaringa ehagaajirwe bhujomu.

49“Nawe, wowonse unú areegwa amangʼana gaani, enu atakugagwata, uyo arahunkana na omuntu unú yaahagaaja enyumba yaaye eguru ya obhutoto obhwenego, bira obhurusa. Mbe, oruuji hanú rweejura, amanji gakatematema enyumba iyo, eribhaga ekego, ekabhaaruka, yonsego ekagwa hansi.”

Currently Selected:

Ruuka 6: Kabwa

Highlight

Copy