मत्ती 27
27
पिलातुस कै सामणै यीशु
(मर 15:1; लूका 23:1-2; युहन्ना 18:28-32; प्रेरि 1:18-19)
1जोबै झीशींदै मुख्य यहूदी पुरोहितो, औरौ लोगौ कै बुड़ेईके यीशु कै मारणौ कै सलाह कौरी। 2औरौ तिनुऐ यीशु खै बाना औरौ नियौ राज्यपाल पिलातुस कै हाथौ दा सौंपै दिया।
यहूदा इस्करियोती कै आत्म हत्या
3जोबै तैसीखै पोकड़ाणौ वाल़ै यहूदा इस्करियोती कै पौता लागा कै तैसीखै मोरवाणो कारिए दोषी ठोहराए राए तौ सै पोछतौऊवा औरौ सैजै तीस चांदी कै सिक्कै मुख्य यहूदी पुरोहित औरौ बुड़ेईक कै धोरे लोऊवे। 4औरौ बौल़ौ, “मोऐं निर्दोष आदमी खै मारणौ कारिए थोम्बाएबा पाप कौरे राए!” तिनुऐ बौल़ौ, “आमु इथकै बारै मुंजी किछै परवाह ना आथी? तू आपी इथकारिए जुमैवार औसौ।” 5तोबै सै तिनु सिक्कै खै मन्दिर कै आँगणो दै फैरकायो आगु हौटा औरौ बायरै जाऐबा आपी खै फांशी लाए।
6मुख्य यहूदी पुरोहित तिनु सिक्कै कै लोयो बौल़ौ, “इनु सिक्कै खै मन्दिर कै भण्डार दै राखणै अमारै कानून कै हिसाब सै ठीक ना आथी जिथुकै ऐजौ कोसी कै लोऊ बोवाणो का दाम औसौ।” 7औरौ तिनुऐ योजना बाणैयो तिनु सिक्कै खै ओकी देशो कै लोगौ कि मुर्दै दफनाणो कारिए कुम्हारो कै बागड़ी मोलै लोए। 8इथकारिए तियौं बागड़ी खै ऐलो तौड़ी बै लोऊ कै बागड़ै बौल़ौ। 9तोबै जू वचन यिर्मयाह पौरमेशवर कै बातौ बौताणौवाल़ै दवारा बौल़ै राए थिया, सै पूरा हौआ, “तिनुऐ सैजै तीस चांदी कै सिक्कै औरौ सैजी कीमत जू इस्राएल देश कै लोगै यहूदा कै दैणौ कारिए मानै राए थै सैजै आगु कौरे। 10औरौ जैशै प्रभुए मुखै आज्ञा दैय राए थी तैशैखैई तिनुऐ कुम्हार कै खेत कै रुपये देएयो मोलै लोए।”
पिलातुस का यीशु शै सवाल
(मर 15:2-5; लूका 23:3-5; युहन्ना 18:33-38)
11जोबै यीशु राज्यपाल पिलातुस कै सामणै खौड़ा थिया तौ राज्यपाले तैसी पूछु, “का तू यहूदियों का राजा औसौ?” यीशुए तैसी बौल़ौ, “तुऐं आपी ही लौ बौल़ै।” 12जोबै मुख्य यहूदी पुरोहित औरौ बुड़ेईके तैसी पांदी दोष लाए लौआ थिया, तौ तैणै किछै बै जोवाब ना दी। 13इथपांदी राज्यपाल पिलातुसे तैसी बौल़ौ, “का तैरै ना शुणियों कै ऐजै तैरै खिलाफ दी कैतरी गवाही दैंव?” 14पौरौ तैणै तैसी ऐकी बै बातौ का जोवाब ना दी, इथै पांदी राज्यपाल पिलातुस खै बै बैजाए हैरानी हौए।
यीशु कै छौड़णौ दा पिलातुस नाकामयाब
(मर 15:6-15; लूका 23:13-25; युहन्ना 18:39-19:16)
15औरौ राज्यपाल का ऐजा भोवार थिया कै तैसीकै फसह कै तैयारो मुंजी लोगौ कारिए कोसी ऐकी कैदी कै आज़ाद कौरणा पौड़ौ थिया, जैसीखै लोग चांव थिए। 16तैसी सौमय तिनकै इथै बरअब्बा नांव का ऐक मानैयौंदा कोयदै थिया। 17औरौ जोबै सै कौठै हुवे तौ पिलातुसे तिनु बौल़ौ, “तुऐं कोसी चांव की हांव तुऔं कारिए छोड़े दियु? बरअब्बा कै, या यीशु खै जैसकै मसीह बौल़ौ?” 18जिथुकै सै जाणौ थिया, कै तिनुऐ यीशु खै रिशो की बौजैह शै थोमाए राए थिया।
19जोबै सै न्याय आसन पांदी बौठै रौआ थिया तोबै तैसकै घोरवाल़ीए तैसी बैवरा दिया, “तू तैसी धरमी कै मामलै दा हाथ नी लाया जिथुकै मोऐं ऐलो सुईणै मुंजी तैसकी बौजैह शै बौहिता दुख सैय राए।”
20मुख्य यहूदी पुरोहिते औरौ बुड़ेईके लोगौ खै उकसोऊवे, कै सै बरअब्बा ही खै आज़ाद कौरणौ कै मांग कौरौ। औरौ यीशु कै नाश कौरौ।
21राज्यपाले तिनुवांदो पूछु, “इनु दुईनै मुंजीदा कोसी खै चांव कै हांव तुऔं कारिए छोड़े दियु?” तिनुऐ बौल़ौ, “बरअब्बा कै।” 22पिलातुसे तिनुआदो पूछु, “तोबै यीशु खै जैसकै मसीह बौल़ौ, का कौरणौ?” सौबीए तैसी बौल़ौ, “यीशु खै क्रूसो पांदी किलियों खत्म कौरौ।” 23राज्यपाल पिलातुसे तिनुखै बौल़ौ, “किथुखै, ऐणै का बुरु कौरे राए?” पौरौ सैजै हौजौ बै लेलयाए लैलियायो बौलदै लागै, “तैसीखै क्रूसो पांदी चौढ़ाव।”
24जोबै पिलातुसे दैखौ, कै किछै बै बौणै ना रैई पौरौ इथकै उलटु रोल़ा बोड़दा ही गौआ, तोबै तैणै पाणी लैई भीड़ौ खै सामणै आपणै हाथ धोवे। औरौ बुलू, “हांव ऐसी धरमी खै लोऊ शै निर्दोष औसौ; तुऐंई जाणौ।” 25सौबै लोगै जवाब दिया, “ऐसकै लोऊ का इलजाम आमु पांदी औरौ अमारै सन्तानों पांदी हौंव।”
ऐसकै लोऊ का इलजाम आमु पांदी औरौ अमारै सन्तान पांदी हौंव
26इथपांदी तैणै बरअब्बा खै तिनु कारिए छोड़े दिया, औरौ यीशु दै कौड़ै लाएबा रोमी सैनिकौ खै दैय दिया, कै क्रूसो पांदी किलियों खत्म कौरौ।
सिपाहियो दवारा यीशु कै बैज्जती
(मर 15:16-20; युहन्ना 19:2-3)
27तोबै राज्यपाल कै सिपाहीए यीशु खै महल दा नियौ खै औरौ सौबै सैनिक तैसखै चोऊ ढौबौ कौठै हौए गौवै। 28औरौ तैसकै खोटणो उतारेयो तैसीखै लाल रंगो का लोइया बोम्बाए दिया। 29औरौ कांडे को मुकुट बुणयो तैसकै मुंडौ पांदी राखौ, औरौ तैसकै सोऐं हाथौ दा डैंगा दिया, औरौ तैसकै औगौड़ियौ घुंडू नियुड़ायो खै तैसका मजाक उड़ांदै लागै औरौ बौल़ौ, “ओए रै यहूदियों कै राजा, नमशकार!” 30औरौ तैसी पांदी थूकु; औरौ सैजैई डैंगै कौरेयौ खै तैसकै मुंडौ पांदी मारदै लागै। 31जोबै तिनुऐ तैसका ठाटा कौरे पाए तौ तैसी पौरैशै खोटणो उंढे खोलाएबा तैसकैई खोटणो बोंम्बाऐ; औरौ तोबै तैसीखै क्रूसो पांदी चौढ़ाणौ कारिए लोए गौवै।
यीशु कौ क्रूस पांदी चौढ़ाए जाणौ
(मर 15:21-32; लूका 23:26-39; युहन्ना 19:17-19)
32बायरै जांदी बैई तिनु सिकन्दर औरौ रूफुस का पिता शमौन, ऐक कुरेनी शहर का आदमी भैटा, तिनुऐ तैसीखै खामखैई खै थाम्बा कै तैसकौ क्रूस टिपयौ आगु नीयों।
33औरौ यीशु कै तियौं जौगैह पांदी लियोऊवा, जिथुकै गुलगुता बौल़ौ, जिथका मतलब खोपड़ी कै जौगैह। 34तिनुऐ तैसीखै कौडुवा रस औरौ अंगूर कै रस मिलायौ पिणौ कारिए दिया, पौरौ यीशुए तिथु सिरफ चाखो पौरौ पी ना।
35तोबै तिनुऐ तैसीखै क्रूसो पांदी चौढ़ौऊवा, औरौ चिट्ठी पायौ, तैसकै खोटणो आपी मुंजी बान्डै दिए। 36औरौ ऐक पहर दूस हौए गौ थियु, जोबै तिनुऐ तैसीखै क्रूसो पांदी चौढ़ौऊवा। 37औरौ यीशु कै मुंडो दै ऊबौड़े तौकती किलियों लाए दै जिथपांदी लैखै राए थियु कै, “ऐजा यहूदी लोगौ का राजा यीशु औसौ।”
38तोबै तिनुऐ तैसकै साथै दो डाकू, ऐक तैसकै सोऐं ढौबौ औरौ ऐक डैरै ढौबौ क्रूसो पांदी चौढ़ाए।
39औरौ आणौ जाणौवाल़ै लोग मुंड हिंजाल़ै-हिन्जालेबा तैसीकै ऐजौ बौलेयौ नेंदैया कौरदै लागौ थिए। 40औरौ ऐजौ बौल़ै लो थियु, “का रै मन्दिरो का ढाल़णौवाल़ा, औरौ ती दूसौ दा बाणणौवाल़ा! जै तू पौरमेशवर का बैटा औसौ, तौ क्रूसो पांदी दा उदा ओतरेयो आपी खै बौचा।” 41ऐशैखैई मुख्य यहूदी पुरोहित बै, यहूदी शास्त्रीयों, औरौ बुड़ेईक समैंत, आपी मुंजी ठाटै लायौ बौल़ौ थिए, 42“ऐणै ओकी खै तौ बौचाए, पौरौ आपी खै नी बौचाए सौकी, ऐजा तौ ‘इस्राएल देश का राजा’ औसौ, ऐबै क्रूसो पांदी दा उदा उतरी जा कै आमै दैखैयो बिशवाश कौरु। 43तैणै पौरमेशवर पांदी भोरोशा राखा, जै सै ऐसीखै चांव, तौ ऐबै ऐसीखै छुड़ाए दैंव, पौरौ तैणै बौल़ौ, ‘हांव पौरमेशवर का बैटा औसौ।’” 44इथकारिए डाकू बै जू तैसकै साथै क्रूसो पांदी टांगेयोंदै थिए, सैजै बै तैसकै नेंदैया कौरौ थिए।
यीशु का प्राण छोड़णा
(मर 15:33-41; लूका 23:44-49; युहन्ना 19:28-30)
45दुफारियौ दै ऊबै ती बोजे तौड़ी तैसी सारै देशो दौ इनारौ छाएयौंदौ रौ। 46लमसम ती बोजे यीशुए बौड़ै शब्द शै पुकारैबा बौल़ौ, “इलोई, इलोई, लमा शबकतनी?” जिथका मतलब ऐजा औसौ, “ओए रै मैरै पौरमेशवर तुऐं मुखै किथुखै छोड़े दिया?”
47जू तिथै खौड़ै थिए, तिनुमुंजी दै कुणिए ऐजौ शौणैबा बौल़ौ, “ऐणै पौरमेशवर कै बातौ बौताणौवाल़ै एलिय्याह खै पुकारै लौआ।” 48औरौ तिनुमुंजी ऐक तावल़ा दोऊड़ा औरौ सपंज कै खाटे अंगूर कै रस मुंजी डुबोयो औरौ डैंगै पांदी राखैयौ तैसीखै चुशणौ कै दियु। 49औरौ बौल़ौ, “रौकै जाव; दैखुबै कै एलिय्याह ऐसीखै बौचाणौ आन्दा कै ना।” 50तोबै यीशुए बौड़ै शब्द शै बौलेयौ, आपणै प्राण छोड़े।
51तोबै सैजा मोटा पोरदा जू यरूशलेम मन्दिर दा टांगेयोंदा थिया, ऊपरौ दा धैनै तौड़ी फाटेबा दौ टुकड़ै हौए गौआ। औरौ धोरती हिंजल़ी गौए औरौ चट्टान तिड़कै गौए। 52औरौ कब्रो खोले गोई, औरौ मौरेयौंदे पवित्र लोगौ की बौहिती लाशो जियुंदी होई। 53औरौ तैसकै मौरेयौंदे मुंजीदै जियुंदी हौणौ खै बाद सै कब्रो पांदी दै निकल़ैयो खै पवित्र नगर दै हौटै, औरौ बौहितै खै दैखियै। 54तोबै सूबेदार औरौ जिनिए तैसकै साथै यीशु कै रोखवाल़ी कौरे लोए थै, भुईचोल़ औरौ जू किछै हौए रौ थियु, दैखैबा डौरे गौवै, औरौ बौल़ौ, “सौथीखै ऐजा आदमी, पौरमेशवर का बैटा थिया।”
55तिथै बौहिती बैटमाणिशौ जू गलील जिले शै यीशु कै सेवा कौरदी बैई तैसकै साथै आए रैई थी दूर दु ऐजौ सौबै दैख लो थियु। 56तिनुमुंजी मगदेला गांव कै मरियम, औरौ याकूब औरौ योसेस खै माता मरियम, औरौ जब्दी कै बैटै खै माँ थी।
यीशु का दफनाया जाणा
(मर 15:42-47; लूका 23:50-56; युहन्ना 19:38-42)
57जोबै बैल़खौ हौ तौ यूसुफ नांव का अरिमतियाह शहरो का ऐक सैठ आदमी, जू आपी ही यीशु का चैला थिया, ओऊवा। 58तैणै राज्यपाल पिलातुस खै धोरे जाऐबा यीशु खै लाश मांगै। इथपांदी पिलातुसे दैय दैणौ कै आज्ञा दै। 59यूसुफे लाश लोयो तैसी साफ चादरै दा लोपेटा। 60औरौ तैसी आपणै नोऐं कब्र दा राखा, जू तैणै चट्टान दै खुणायै राए थी, औरौ कब्रो कै दवारो पांदी बौड़ा पाथर रोड़कायो आगु हौटा। 61मगदेला गांव कै मरियम औरौ दूजै मरियम तिथै क्रब खै धोरे बौठै रोई थी।
यीशु कै कब्रो पांदी पोयरा
62ओकी दूसै विशांव कै दूसै जू तैयारी कै दूसौ कै बाद को दूस थियु, मुख्य यहूदी पुरोहित, औरौ फरीसी लोग पिलातुस कै भैटिंदै हौटै। 63औरौ बौल़ौ “ओए रै महाराज, आमु याद औसौ कै तैसी झूठै आदमीए आपणै जीतै जी बौल़ै राए थियु, कै मैरै मौरणौ कै ती दूसौ बाद हांव हौजौ जियुंदा हौए जांदा। 64ऐशै आज्ञा दै कै तिजै दूसौ तौड़ी सैनिक ध्यान शै कब्र कै रोखवाल़ै कौरेया, जै तुऐं ऐशै नै कौरलै तौ तैसकै चैलै आयौ, यीशु कै लाश चुरियौ लोए जालै औरौ लोगौ शै बौलदै लागले, सै मौरेयौंदे मुंजीदा बै जियुंदा हौआ, तोबै पाछला धौखा आगलै दा बै बुरा हौंदा।” 65पिलातुसे तिनुखै बौल़ौ, “तोंवारै धोरे बौहितै रोमन सैनिक तौ औसौए, जांव जैतरो तुऔं शै हौए सौकौ तिशैक कब्र कै रोखवाल़ै कौरौ।” 66सैनिक आगु हौटै औरौ तिनुऐ कब्रो कै दवारो पांदी भारी पाथर रिड़ोयो तिथपांदी मोहर लाएबा कब्रो कै रोखवाल़ै कौरे।
Currently Selected:
मत्ती 27: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
