यूहन्ना 9
9
जन्म कै आन्धै की आखी ठीक कौरणी
1जोबै यीशु आपणै चैलै कै साथै जांदा लागै रौआ थिया, तौ तैणै ऐक आदमी कै दैखा जू जन्म शै आन्धा थिया। 2तैसकै चैलै तैसीयांदो पूछु, “ओए रै गुरुजी कुणै पाप कौरे राए थिया कै ऐजा आन्धा पौयदा हौआ,ऐसी आदमीए या ऐसकै माँ बापूए?” 3यीशुए जवाब दिया, “ना तौ ऐणै पाप कौरे राए थिया, ना ऐसकै माँ बापूए पाप कौरे रैई थी, पौरौ ऐजा इथकारिए आन्धा पौयदा हौआ ताकि पौरमेशवर कै चौमत्कार कै काम तैसी पांदी प्रगट हौंव। 4जांव तौड़ी दूस औसौ, आमु भैजणौवाल़ै कै काम दौ लागैयौंदो रौणौ जौरुरी औसौ, जिथुकै सैजै रात आणौवाल़ै औसौ, जिथमुंजी कुणिए बै काम ना कौरे पांदै। 5जांव तौड़ी हांव दुनिया पांदी औसौ तांव तौड़ी दुनिया कौ पेयाशो हांव औसौ।”
6ऐजौ बौलेयौ, तैणै जोमीनो पांदी थूकु औरौ तिथु थुको लैई माटी बाटी औरौ माटी तैसी आन्धै आदमी कै आखी पांदी लाए दियु। 7औरौ यीशुए तैसीखै बौल़ौ, “जा, औरौ मुँह शीलोह कै कुण्डो दो धोए पाया।” (शीलोह का मतलब भैजैयौंदा औसौ) औरौ तैणै जायौ खै आपणौ मुँह धौ औरौ दैखदै बैई पाछु ओऊवा।
8तोबै तैसी आन्धै आदमी कै पड़ोसीए औरौ औकै लोगै जिनुवै तैसी आगै भीख मांगदै दैखै राए थिया, ऐकी दूजै कैई बौलदै लागै, “का ऐजा सैजाई आदमी ना आथी जू बोठेयो खै भीख मांगो थिया?” 9कैई लोगै बौल़ौ, “ऐजा सैजाई औसौ,” ओकीए बौल़ौ, “ना, पौरौ तैसी साए दैखियौं,” तैणै बौल़ौ, “हांव सैजाई औसौ।” 10तोबै सैजै लोग तैसीयांदो पूछदै लागै, “कै तैरी आखी कैशै ठीक हौए गोई?” 11तैणै जवाब दिया, “यीशु नांव कै ऐकी आदमीए माटी बाटै औरौ मैरै आखी पांदी लायौ खै मुखै बुलू, ‘जा, आपणौ मुँह शीलोह कै कुण्डो उदु धोए पा,’ तोबै हांव शीलोह कै कुण्डो दा हौटा, औरौ जोबै मोऐं आपणौ मुँह धौ तौ मैरै दैखिंदु लागौ।” 12तिनुऐ तेसीयांदौ पूछु, “ऐबै सैजा आदमी कुकै औसौ?” तैणै बौल़ौ, “हांव ना जाणु।”
फरीसी लोगौ दवारा छान-बीन
13-14जैसी दूसै यीशुए माटी बाटियों खै तैसी आदमी खै ठीक कौरे राए थिया तौलौ विशांव कौ दूस थियु। इथकारिए लोग तैसी आदमी कै फरीसी लोगौ कै धोरे लोए गौवै। 15हौजौ फरीसी लोगै तैसीयांदो पूछु, कै तैरी आखी कैशैखै ठीक होई तैणै तिनुखै बौल़ौ, “यीशुए मैरी आखी पांदी माटी लाए, तोबै मोऐं आपणी आखी धुई, औरौ ऐबै हांव दैखदा लागै रौआ।” 16इथपांदी कैई फरीसी लोग बौलदै लागै, “ऐजा आदमी पौरमेशवर कै औरौ शा ना आथी, जिथुकै सै विशांव कै दूस कै ना मानौ।” ओकीए बौल़ौ, “ऐसकै जैशणा पापी आदमी कैशै चौमत्कार कै काम दिखाए सौकौ?” इयौं बातौ लैई तिनुमुंजी फूट पौड़ै गौए। 17तिनुऐ तैसी आन्धै आदमी कै बौल़ौ, “तैणै जैणै तैरी आखी ठीक कौरे रैई, तू तैसकै बारै मुंजी का बौल़ै।” तैणै बौल़ौ, “पौरमेशवर कै बातौ बौताणौवाल़ा।”
18पौरौ यहूदी नेताओं खै बिशवाश ना होई कै ऐजा आन्धा थिया औरौ ऐबै दैखदा लागै रौआ, इथकारिए तिनुऐ जैसकी आखी ठीक हौए गोई थी तैसकै माँ-बापू कै बौएदैयौ, 19तिनुवांदो पूछु, “का ऐजा तोंवारा बैटा औसौ, जैसी तुऐं बौल़ौ थिए कै आन्धा पौयदा हौए रौआ थिया? तोबै ऐबै कैशैखै दैखै लो।” 20तैसकै माँ-बापूए जवाब दिया, “आमै तौ जाणुए कै ऐजा अमारा बैटा औसौ, औरौ आन्धा जन्मा थिया। 21पौरौ आमै ऐजौ ना जाणु कै ऐबै कैशैकै दैखौ, औरौ ना ऐजौ जाणु कै कुणै ऐसकी आखी ठीक कौरे रैई। ऐजा बौड़ा हौए गौआ, औरौ आपी कारिए जवाब दैय सौकौ; ऐसीयांदो पूछौ, सै आपणै बारै मुंजी आपी बौतांदा।” 22ऐजी बातौ तैसकै माँ बापूए इथकारिए बुली जिथुखै सै यहूदी नेताओं शै डौरौ थिए, जिथुखै यहूदी नेता ऐक हौए गौवै थिए, कै जै कुणिए बिशवाश कौरौ कै यीशु ही मसीह औसौ, तौ तैसी यहूदी सभा-घोरो पौरैशै बायरै निकाल़ै दैंव। 23इयौं बौजैह शै तैसकै माँ-बापूए बौल़ौ, “ऐजा बौड़ा हौए गौआ, औरौ आपी कारिए जवाब दैय सौकौ; ऐसीयांदो ही पूछौ।”
24तोबै यहूदी नेताए तैसी आदमी खै जू आन्धा थिया, दुजाल़ियो बौएदैयौ खै तैसीखै बौल़ौ, “पौरमेशवर कै स्तुति कौरेयौ साचौ बौल़ै दै; जिथुकै आमु जाणुए कै ऐजा आदमी पापी औसौ।” 25तैणै जवाब दिया, “हांव ना जाणु कै सै पापी औसौ या ना हांव ऐक बात जाणु कै हांव आन्धा थिया औरौ ऐबै हांव दैखुए।” 26तिनुऐ तैसीयांदो हौजौ पूछु, “तैणै तैरै साथै का कौरौ औरौ कैशैखै तैणै तैरी आखी ठीक कौरी?” 27तैणै तिनुखै बौल़ौ, “हांव तौ तुऔं खै बौल़ै दियु औरौ तुऐं ना शुणौ ऐबै दुजाल़ियो किथु शुणणा चांव, का तुऐं बै तैसकै चैलै बौणणा चांव?” 28तोबै तिनिए तैसीखै बुरु भोलो बौलेयौ खै बौल़ौ, “तू ही तैसका चैला औसौ; आमै तौ मूसा पौरमेशवर कै बातौ बौताणौवाल़ै कै चैलै औसौ। 29आमु जाणुए कै पौरमेशवरे मूसा शै बातौ कोरी; पौरौ ऐसी आदमी कै ना जाणु कै ऐजा कुकै दा आए रौआ।”
30तैणै तिनुखै जवाब दिया, “ऐजी तौ हैरान कौरणौवाल़ै बात औसौ कै तुऐं ना जाणौ कै सै कुकै दा आए रौआ, तोबै बै तैणै मैरी आखी ठीक कौरे दी। 31आमै जाणुए कै पौरमेशवर पापी लोगौ की ना शुणौ पौरौ जै कुणिए पौरमेशवर कै आराधना कौरौ, औरौ तैसकै इछा पांदी चालौ, तौ सै तैसकी शुणौए। 32जौल़ौ दै उंडै दुनिया कै रचना कौरे राए थै, तोबै शै शुणणौ दै ना आई कै कुणिए जन्म कै आन्धै की आखी कै ठीक कौरी हौं। 33जै ऐजा आदमी पौरमेशवर कै ढौबौशा नी हौंदा तौ किछै बै ना कौरे सौकदा थिया।” 34तिनुऐ तैसीखै जवाब दिया, “तू तौ पाका ही पापौ शै पौयदा हौए रौआ, तू आमुखै का शिखाए?” औरौ तिनुऐ तैसीखै सभा घोरो शै बायरै निकाल़ै दिया।
आत्मिक आन्धापन
35यीशुए शुणु, कै यहूदी नेताए तैसी बायरै निकाल़ै दिया, औरौ जोबै सै भैटा तौ तैसीकै पूछु, “का तू आदमी कै बैटै पांदी बिशवाश कौरे?” 36तैणै जवाब दिया, “ओए रै साहब! मुखै बोता कै ऐजा पौरमेशवर का बैटा कुण औसौ, ताकि हांव तैसी पांदी बिशवाश कौर सौकु।” 37यीशुए तैसीखै बौल़ौ, “हांव पौरमेशवर का बैटा औसौ, तुऐं आगै बै मुखै दैखै राए; औरौ हांव सैजाई औसौ जैणै ऐबै तांवआरी बातौ कौरी लोई।” 38तैणै बौल़ौ, “ओए रै प्रभु हांव तांव पांदी बिशवाश कौरु।” औरौ तैसकै आराधना कौरे।
39तोबै यीशुए बौल़ौ, “हांव इयौं दुनिया पांदी ऐसी न्याय कौरणौ कारिए आए रौवा: कै आन्धै लोग दैखदै लागौ औरौ जू लोग दैखौए सैजै आन्धै हौए जांदै।” 40जू फरीसी लोग तैसकै साथै तिथै खौड़ै थिए, तिनुऐ ऐजी बातौ शोणेयो तैसीखै बौल़ौ, “का तुऐं बौल़ै लो कै आमै आन्धै औसौ?” 41यीशुए तिनुखै बौल़ौ, “जै तुऐं आन्धै हौंदै तौ तुऐं पापी नी ठोहरदै पौरौ ऐबै बौल़ौ, कै आमै दैखुए, औरौ इथकारिए तुऔं माफी ना भैटदै।”
Currently Selected:
यूहन्ना 9: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
