यूहन्ना 8
8
गौलत सौमबंध राखणौ वाल़ी कै माफ कौरणा
1यीशु आपणै चैलै कै साथै जैतून नांव कि धारो पांदी हौटा। 2औरौ दूजै का झीशो ही यीशु मन्दिर कै आँगणो दा हौटा, औरौ बौहितै सारै लोग तैसकै धोरे आए; सै बौठै गौआ औरौ तिनु शिक्षा दैन्दा लागा। 3जोबै सै बौलदा लागै रौआ थिया, तोबै यहूदी शास्त्री औरौ फरीसी लोगै ऐकी बैटमाणिश कै लाए जू गौलत सौमबंध बाणदै बैई पाकड़ै गौए थी; औरौ तिनुऐ तियौं भीड़ौ कै सामणै खौड़ै कौरे दी। 4औरौ तिनुऐ यीशु खै बौल़ौ, “ओए रै गुरुजी, ऐजी बैटमाणिश गौलत सौमबंध कौरदै बैई पाकड़ै गौए। 5मूसा कै कानून दै मूसाए आमु आज्ञा दैय राए कै ऐशणी बैटमाणिशौ मारै दैणौ कारिए तियौं पाथरो लैई मारो; तौ तू का बौल़ै कै आमु इयौं बैटमाणिशौ आरी का कौरणौ चैंई।” 6तिनुऐ यीशु खै पौरखणौ कारिए ऐजै बात बौल़ै ताकि तैसी पांदी दोष लाणौ कारिए कुणजै ना कुणजै बात तिनु भैटी जांव, पौरौ यीशु झौकै गौआ औरौ आपणी गुठियों लैई जोमीनो पांदी लिखदा लागा। 7जोबै सै तैसीयांदो पूछदै लागै, तोबै तैणै सीधै खौड़ै हौयौ खै तिनुखै बौल़ौ, “तुऔं मुंजीदै जिनुवै कौलोंई बै पाप ना कौरे रैई, सैजाई इयौंकै आगला पाथर मारो।” 8औरौ हौजौ झोकैयौ खै जोमीनो पांदी गुठियों लैई लिखदा लागा। 9पौरौ तिनु लोगै यीशु कै बात शोणेयो ऐजौ जाणै पोऊ कै आमु सौबै पापी औसौ औरौ सौब लोग नानड़ै शै बौड़ै तौड़ी ऐक-ऐक कौरेयौ आगु हौटै औरौ यीशु तियौं बैटमाणिशौ आरी इकली रौए गौआ जू इबी बै तिथैशै खौड़ै थी, 10यीशुए सीधै खौड़ै हौयौ कै तियौंकै बौल़ौ, “ओए रै नारी, सैजै सौबै जोणे कुकै हौटै? का कोसीए तांव पांदी सौजा कै आज्ञा ना दी?” 11तियैं बौल़ौ, “ओए रै प्रभु, कोसीए बै सौजा ना दी।” यीशुए बौल़ौ, “हांव बै ताखै सौजा कै आज्ञा ना दैन्दा; ऐबै घोरो खै जा, औरौ आगै कै पाप दै जिन्दगी नी बिताया।”
यीशु दुनिया कौ पेयाशो
12तोबै यीशुए हौजौ लोगौ खै बौल़ौ, “दुनिया को पेयाशो हांव औसौ; जू कुणिए मैरै पाछैदा हांडला, सै इनारै दा ना हांडदा, पौरौ तिथु पेयाशै कै पाला जू सौदा कै जिन्दगी दैंव।”
13फरीसी लोगै तैसीखै बौल़ौ, “तू आपणै गवाही आपी दैय; औरौ तैरै गवाही साची ना आथी।” 14यीशुए जवाब दिया, “भले ही हांव आपणै गवाही आपी दियु, तोबै बै मैरी गवाही ठीक औसौ, जिथुखै हांव जाणुए कै हांव कुकै दा आए रौआ, औरौ कुकै जाणौ, पौरौ तुऐं ना जाणौ कै हांव कुकै दा ओऊं या कुकै जोऊं। 15तुऐं लोगौ का न्याय आदमी कै सोंच कै हिसाब शै कौरौ, हांव कोसी का न्याय ना कौरु। 16औरौ जै हांव न्याय कौरुबै तौ मैरा न्याय साचा औसौ, जिथु हांव इकली ना आथी, पौरौ हांव पिता पौरमेशवर कै साथै औसौ, जैणै मुखै भैजै राए। 17औरौ तोंवारै मूसा कै कानून दो बै लैखै राए कै दो जोणे कै गवाही मिलैयौ ठीक हौंव। 18ऐक तौ हांव आपणै गवाही आपी दियु, औरौ ओका पिता पौरमेशवर मैरी गवाही दैंव, जैणै मुखै भैजै राए।” 19तिनुऐ तैसीखै बौल़ौ, “तैरा पिता कुकै औसौ?” यीशुए जवाब दिया, “ना तौ तुऐं मुखै जाणौ औरौ ना मैरै पिता खै जाणौ, जै तुऐं मुखै जाणदै तौ मैरै पिता खै बै जाणदै।”
20ऐजी बातौ तैणै मन्दिरो कै आँगणो दी उपदैश दैंदै बैई भण्डार घोरो दी बुली, औरौ कोसीए तैसीखै ना पाकड़ी जिथु तैसका दुख सोणो का सौमय इबी तौड़ी ना आए रैई थी।
यीशुए आपणै बारै मुंजी बौतौऊं
21यीशुए हौजौ तिनुकै बौल़ौ, “हांव जोऊं, औरौ तुऐं मुखै जौले औरौ लगातार पाप कौरदै बैई मौरे जांदै; जिथै हांव जोऊं तिथै तुऐं ना आए सौकौ।” 22इयौं बातौ पांदी यहूदी नेताए बौल़ौ, “का सै आपी खै मारै दैंदा जू बौल़ौए, ‘जिथै हांव जोऊं, तिथै तुऐं ना आए सौकौ?’” 23तैणै तिनुखै बौल़ौ, “तुऐं इयौं दुनिया दै पौयदा हौए रौवै थिए, पौरौ हांव स्वर्ग पौरैशा आए रौआ। तुऐं दुनिया कै औसौ, हांव दुनिया का ना आथी। 24इथकारिए मोऐं तुऔं खै बौल़ौ, कै तुऐं लगातार पाप कौरदै बैई मौरे जांदै, जै तुऐं मुं पांदी बिशवाश नै कौरलै कै हांव सैजाई औसौ, तौ तुऐं लगातार पाप कौरदै बैई मौरे जांदै।” 25यहूदी नेताए तैसीखै बौल़ौ, “तू कुण औसौ?” यीशुए तिनुखै बौल़ौ, “हांव सैजाई औसौ, जू आगै दा उंडा तुऔं उपदैश दैन्दा औरौ बौलदा आए रौआ कै हांव औसौ।” 26तोंवारै बारै मुंजी मुखै बौहितु किछै बौलणौ औरौ तोंवारा न्याय कौरणा; पौरौ मैरा भैजणौवाल़ा पौरमेशवर साचा औसौ; औरौ जू मोऐं तैसीयांदो शौणै राए, सैजौई दुनिया कै लोगौ खै बुलूए।
27पौरौ सै ऐजौ ना सौमझी कै यीशु तिनुवा पिता पौरमेशवर कै बारै मुंजी बौल़ौ थिया। 28तोबै यीशुए बौल़ौ, “जोबै तुऐं मुखै आदमी कै बैटै खै क्रूसो पांदी चौढ़ाल़ै, तोबै तुऐं जाणदै कै हांव सैजाई औसौ जू शुरु शै तुऔं उपदैश दैंदा औरौ बौतांदा आए रौआ कै हांव ही औसौ, औरौ आपी शै किछै ना कौरु। पौरौ जैशै मैरै पिता पौरमेशवरे मुखै शिखाए राए ऐशैखैई हांव ऐजी सौबै बातौ बुलू। 29मैरा भैजणौवाल़ा मैरै साथै औसौ, तैणै मुखै इकली ना छोड़े रैई जिथुखै हांव हमैशा सैजाई काम कौरु, जिथलैई सै खुश हौंव।” 30यीशुए ऐजी सौबै बातौ बौल़ै लोई थी तौ बौहितै लोगै तैसी पांदी बिशवाश कौरा।
सौचाई तुऔं आज़ाद कौरलै
31बाद मै यीशुए तिनु यहूदी नेताओं शै जिनुवै तैसी पांदी बिशवाश कौरे राए थिया, तिनुखै बौल़ौ, “जै तुऐं मैरै शिक्षा दै बौणैयौंदे रौलै, तौ सौथी कै मैरै चैलै ठोहरलै। 32तुऐं सौचाई जाणलै, औरौ सौचाई तुऔं खै आज़ाद कौरलै।” 33तिनुऐ तैसीखै जवाब दिया, “आमै तौ अब्राहम कै वंशो कै औसौ, औरौ कौलोंई कोसी कै गुलाम ना होई, तोबै तू किथु बौल़ै, कै तुऐं आज़ाद हौए जांदै।” 34यीशुए तिनुखै जवाब दिया, “हांव तुऔं कै साचौ-साचौ बुलू, कै जू कुणिए पाप कौरौ, सै पापौ कै वश दा औसौ। 35औरौ ऐक गुलाम सौदा अमारै कुड़बे का हिस्सेदार ना हौंव; पौरौ बैटा सौदा कुड़बे का हिस्सेदार हौंव। 36जै हांव पौरमेशवर का बैटा तुऔं आज़ाद कौरु, तौ तुऐं सौथी कै आज़ाद हौए जालै।
37हांव जाणुए कै तुऐं अब्राहमो कै वंशो कै औसौ, तौ बै तुऐं मैरी शिक्षाओं कै ना मानौ, इथकारिए तुऐं मुखै मार दैणा चांव। 38मोऐं तुऔं खै तिनु चीज़ौ खै बौताए लोई जू मोऐं आपणै पिता पौरमेशवर धोरे दैखी रैई; औरौ तुऐं सैजौई कौरदै रौंव, जू तुऐं आपणै पिता शै शौणै राए।” 39तिनुऐ यीशु खै जवाब दिया, “अमारा पुराणिया तौ अब्राहम औसौ।” यीशु तिनुखै बौल़ौ, “जै तुऐं अब्राहम कै वंश हौन्दै, तौ अब्राहम साए टोल सांडदै। 40अब्राहमै जू कियु, सैजौ कौरणौ कै बजाय तुऐं मुखै मारणा चांव, जिथुकै मोऐं तुंवागै साचौ बौल़ै राए जू पौरमेशवर कैईंदु शौणै राए। पौरौ अब्राहमै कौलोंई ऐशणी चीज़ौ ना कौरी। 41तुऐं आपणै पिता पौरमेशवर कै साए टोल कौरौ।” तिनुऐ यीशु खै बौल़ौ, “आमै गौलत सौमबंध बाणैयौ पौयदा ना हौए रैई, अमारा सिरफ ऐकै पिता पौरमेशवर औसौ औरौ सै पौरमेशवर औसौ।”
42यीशुए तिनुकै बौल़ौ, “जै पौरमेशवर तोंवारा पिता पौरमेशवर हौंदा, तौ तुऐं मुं आरी प्यार राखदै, जिथुकै हांव पौरमेशवर कै ढौबौशा आए रौआ, हांव खुद शै ना आए रैई पौरौ तैणै ही मुखै भैजै राए। 43जू बातौ हांव बुलू तुऐं किथु ना सौमझौ? इथकारिए कै तुऐं मैरी शिक्षा खै मानणौ शै मोना कौरौ।
44तुऐं आपणै बापू शैतान शै औसौ औरौ आपणै बापू कै इछा खै पूरै कौरणै चांव। सै तौ आगै दा उंडा हथियारा औसौ, औरौ सै कौलोंई साचा ना थी, जिथुखै सौचाई तैसदै आथी ना, जौल़ौ सै झूठु बौल़ौ, तौ सै आपणै स्वभाव शै बौल़ौ, जिथुखै सै झूठा औसौ, औरौ झूठै का बापू औसौ। 45हांव साचौ बुलू, इथकारिए तुऐं मुं पांदी बिशवाश ना कौरौ। 46तुऔं मुंजीदा मुखै कुण मुं पांदी पाप कौरणौ का दोष लाए सौकौ? तौ जौल़ौ हांव साचौ बुलू, तोबै तुऐं मैरा बिशवाश काए ना कौरौ? 47जू कुणिए पौरमेशवर शै सौमबंध राखौ, सै पौरमेशवर कै बातौ शुणौ, औरौ तुऐं इथकारिए ना शुणौ कै तुऐं पौरमेशवर शै सौमबंध ना राखौ।”
यीशु औरौ अब्राहम
48ऐजौ शोणेयो यहूदी नेताए तैसीखै बौल़ौ, “आमै ठीक लो बौल़ै, कै तू सामरिया प्रदेश का रौणौवाल़ा औसौ, औरौ तांव दै दुष्टआत्मा औसौ।” 49यीशुए जवाब दिया, “मुं दै दुष्टआत्मा ना आथी; पौरौ हांव आपणै पिता पौरमेशवर का आदर कौरु, औरौ तुऐं मैरा आदर ना कौरौ। 50पौरौ हांव आपणा आदर ना चोऊ पौरौ ऐक औसौ जू चांव कै मुखै आदर भैटौ औरौ सै सैजाई औसौ जू न्याय बै कौरौ। 51हांव तुऔं कै साचौ-साचौ बुलू, कै जै कुणिए आदमी मैरी शिक्षा पांदी चाल़ला, तौ सै सौदा तौड़ी ना मौरदा।”
52यहूदी नेताए तैसीकै बौल़ौ, “ऐबै आमुए जाणै पोऊँ कै तांव दै दुष्टआत्मा औसौ। अब्राहम मौरे गौआ, औरौ पौरमेशवर कै बातौ बौताणौवाल़ा बै मौरे गौवै औरौ तू बौल़ै, ‘जै कुणिए मैरी शिक्षा पांदी हांडला तौ सै हमैशा तौड़ी ना मौरदा।’ 53अमारा पुराणिया अब्राहम तौ मौरे गौआ, का तू तैसदा बौड़ा औसौ? औरौ पौरमेशवर कै बातौ बौताणौवाल़ै बै मौरे गौवै, तू आपी खै का सौमझै।”
54यीशुए जवाब दिया, “जै हांव आपी आपणै तारीफ कौरु, तौ मैरी किछै तारीफ ना आथी, जू मैरै तारीफ कौरौ, सै मैरा पिता औसौ, औरौ तुऐं बौल़ौ, कै सै तोंवारा पौरमेशवर औसौ। 55तुऐं तौ तैसी ना जाणौ: पौरौ हांव तैसी जाणुए। जै हांव तैसी बुलू, कै हांव ताखै ना जाणु, तौ हांव तुऔं साए झूठा ठोरदा। पौरौ हांव तैसी जाणुए औरौ तैसकै आज्ञा मानुए। 56तोंवारा पुराणिया अब्राहम मैरै दूस दैखणौ कै आशा शै बौहिता खुशी थिया, औरौ तैणै दैखौ, औरौ खुशी मौनाए।”
57यहूदी नेताए तैसीखै बौल़ौ, “इबी तौड़ी तैरै उमर पचाश सालो कै बै ना हौए रैई औरौ तू बौल़ै कै तुऐं अब्राहम कै दैखै राए।” 58यीशुए तिनुखै बौल़ौ, “हांव तुऔं खै साचौ-साचौ बुलू, कै अब्राहम कै पौयदा हौणौ दा आगै, हांव औसौ।” 59तोबै तिनुऐ यीशु कै मारणौ कारिए पाथर टिपै, पौरौ सै चुपकै शै मन्दिरो कै आँगणो पौरैशा निकल़ै गौआ।
Currently Selected:
यूहन्ना 8: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
