यूहन्ना 16
16
1“मोऐं ऐजी बातौ तुऔं कै इथकारिए बुली कै तुऐं कोसी पांदी बिशवाश कौरेयौ धौखा नै खांव। 2सै तुऔं यहूदी सभा-घोरो पौरैशै बायरै निकाल़ै दैंदै, औरौ सैजा सौमय आए गौआ, कै जू कुणिए तुऔं मारणौ शै ऐजौ सौमझला कै जू पौरमेशवर चांव सैजौ हांव कौरु। 3ऐजौ सैजै इथकारिए कौरदै कै तिनुऐ पिता पौरमेशवर कै ना जाणी औरौ ना मुखै जाणौ। 4पौरौ मोऐं तुऔं ऐजी बातौ इथकारिए बुली, कै जोबै इनु बातौ का पूरै हौणौ का सौमय आला, तौ तुऔं याद आए जांदो, कै मोऐं तुऔं आगैई बौताए दियु थियु। मोऐं शुरुआत शै ऐजी बातौ इथकारिए ना बुली जिथुकै हांव तोंवारै साथै ही थिया।”
पवित्र आत्मा कै काम
5“पौरौ ऐबै हांव आपणै भैजणौवाल़ै पौरमेशवर कै धोरे चालै रौआ औरौ ऐबै तुऔं मुंजीदै कुणिए मुं कैईंदु ना पूछौ, ‘तू कुकै चालै रौआ?’ 6पौरौ मोऐं जू ऐजी बातौ तुऔं बुली, इथकारिए तोंवारा मन उदास हौए गौआ। 7हौजौ बै हांव तुऔं साचौ बुलू, कै मैरौ जाणौ तुऔं कारिए आछौ औसौ, जिथुकै जै हांव ना जोऊं, तौ सैजा हौंसला दैणौवाल़ा, तोंवारै धोरे ना आन्दा, पौरौ जै हांव जोऊं, तौ तैसी तोंवारै धोरे भैजै दैंदा। 8औरौ सै आयौ खै दुनिया कै लोगौ कै पाप औरौ धार्मिकता औरौ न्याय कै बारै मुंजी यकीन दिलांदा। 9सै पाप कै बारै मुंजी यकीन दिलांदा कै सै मुं पांदी बिशवाश कौरणौ शै इन्कार कौरौ। 10औरौ धार्मिकता कै बारै मुंजी यकीन दिलांदा कै हांव पिता पौरमेशवर कै धोरे चालै रौआ, औरौ तुऐं मुखै हौजौ ना दैखदै। 11औरौ न्याय कै बारै मुंजी यकीन दिलांदा कै इयौं दुनिया का ठोगड़ा शैतान दोषी ठोहराए गौआ।”
12“मैरै तुऔं हौजौ बै बौरिशी बातौ बोताणी, पौरौ इबी तुऐं तिथु बरदाश ना कौरे सौकौ। 13पौरौ जोबै सैजा सत्य का आत्मा आला, तौ तुऔं पौरमेशवर कै बारै मुंजी जू बै साचौ औसौ बौतांदा। जिथुकै सै आपणै औधिकार शै ना बौलदा, पौरौ जू किछै पौरमेशवर कै ढौबौशौ शुणल़ा, सैजौई बौलदा, औरौ आणौवाल़ी बातौ तुऔं बौतांदा। 14सै मैरै महिमा कौरदा, जिथुकै तैसी जू मैरै ढौबौशौ जू भैटी रौं, सैजौई तुऔं बोताला। 15जू किछै पिता पौरमेशवर कौ औसौ, सैजौ सौबै मैरौ औसौ; इथकारिए मोऐं बौल़ौ, कै तैसी मैरी ढौबौशौ जू भैट रौं, सैजाई तुऔं बोताला।”
दुख खुशी दा बौदलै जाला
16“तैतियोड़ै तुऐं मुखै ना दैखदै, औरौ हौजौ बिस्तौड़ी मुखै दैखलै।” 17तोबै यीशु कै किछै चैलै आपी मुंजी बौल़ौ, “ऐजौ का औसौ कै सै आमुखै बौल़ौ, ‘तैतियोड़ै तुऐं मुखै ना दैखदै, औरौ हौजौ बिस्तौड़ी मुखै दैखलै? औरौ ऐजौ इथकारिए कै हांव पिता पौरमेशवर कै धोरे जोऊं?’” 18तोबै तिनुऐ बौल़ौ, “ऐजौ तैतियोड़ै, जू सै बौल़ौए, ऐजै का बात औसौ? आमुए ना जाणु, कै सै का बौल़ौ।”
19यीशुए ऐजौ जाणैयौ कै सैजै मुंआदा इनु बातौ का मतलब पूछणा चांव, तिनुखै बौल़ौ, “का तुऐं आपी मुंजी इनु बातौ कै बारै मुंजी शाह पूछ कौरौ, ‘तैतियोड़ै तुऐं मुखै ना दैखदै औरौ बिस्तौड़ी तुऐं मुखै दैखदै?’ 20हांव तुऔं साचौ-साचौ बुलू; तुऐं मैरै मौरणौ कै बाद रुलै, औरौ दुख दै रौलै पौरौ दुनिया कै लोग खुशी मनांदे, तुऔं शोग हौंदा, पौरौ जोबै तुऐं मुखै होटेयो जियुंदा दैखलै तौ तोंवारा शोग खुशी मुंजी बौदलै जांदा। 21जोबै बैटमाणिशौ कै सुजणौ का सौमय आंव तौ सै बौहितै पीड़ो दै हौंव। जिथुकै तियौंकै दुखो का सौमय आए गौआ, पौरौ जोबै नानड़िया कै जन्म दैय दैंव तौ इयौं खुशी लैई दुनिया पांदी ऐक आदमी पौयदा हौए जांव, तिनु पीड़ो कै सै औटेयौ याद ना कौरौ। 22ऐशैखैई तुऔं इबी शोग औसौ, पौरौ जोबै हांव होटेयो तुऔं आरी भैटिंयुबा तोबै तुऐं खुशी हौंदै; औरौ तोंवारै खोशे कुणिए तुऔं कैईंदै ना छीनदा। 23तैसी सौमय जोबै हांव तुऔं हौजौ दैखुबा तुऐं मुं कैईंदु किछै ना पूछदै। हांव तुऔं कैंई साचौ-साचौ बुलू, जै तुऐं पिता पौरमेशवर कैईंदु किछै मांगलै, तौ सै मैरै चैलै हौणौ की बौजैह शै तुऔं दैन्दा। 24इबी तौड़ी तुऐं मैरै चैलै हौणौ की बौजैह शै पिता पौरमेशवर शै किछै ना मांगै रैई, मांगलै तौ सै तुऔं दैला, ताकि तुऔं पूरै खोशे भैटौ।”
दुनिया पांदी जीत
25“मोऐं ऐजी बातौ तुऔं उदारणो दी बौल़ै रैई, पौरौ सैजा सौमय आए गौआ, कै हांव तुऔं खै उदारणो दौ हौजौ ना बौलदा, पौरौ खौलेयौ तुऔं पिता पौरमेशवर कै बारै मुंजी बोताऊंबा। 26तैसी सौमय तुऐं मैरै चैलै हौणौ की बौजैह शै मांगलै, तौ मुखै तुऔं कारिए पिता पौरमेशवर शै बिन्ती ना कौरणी पौड़दै। 27जिथुकै पिता पौरमेशवर तौ आपी बै तुऔं आरी प्यार राखौ, इथकारिए कै तुऐं मुंआरी प्यार राख राए औरौ ऐजा बै बिशवाश कौरे राए कै हांव पिता पौरमेशवर की ढौबौशा आए रौआ। 28हांव पिता पौरमेशवर कै ढौबौशा दुनिया दा आए रौआ, हौजौ दुनिया कै छोड़ेयौ पिता पौरमेशवर कै धोरे पाछु जांदा लागै रौआ।”
29यीशु कै चैलै बौल़ौ, “दैख, ऐबै तौ तू खौलेयौ कै बौल़ैए, औरौ कुणजैई उदारणो दौ ना बौल़ै। 30ऐबै आमै जाणै गौवै, कै तू सौबै ठुँ जाणै, औरौ ताखै कोसी कै जौरुरत ना आथी कै कुणिए तुंआदै सवाल पूछौ, इथकारिए आमुए बिशवाश कौरु, कै तू पौरमेशवर की ढौबौशा आए रौआ।”
31ऐजौ शोणेयो यीशुए तिनुखै बौल़ौ, “का तुऐं ऐबै बिशवाश कौरौ? 32दैखौ, सैजा सौमय आए रौआ बल्कि आए बै गौआ जोबै तुऐं सौबै तितर बितर हौयौ कै आपणा आपणा रास्ता लौन्दै, औरौ मुखै इकली छोड़े दैन्दै, तोबै बै हांव इकली ना आथी जिथुकै पिता पौरमेशवर मैरै साथै औसौ। 33मोऐं ऐजी बातौ तुऔं इथकारिए बुली, कै तुऐं मैरै चैलै औसौ औरौ तुऔं शान्तै भैटौ; दुनिया पांदी तुऔं कौल़ेश हौंव, पौरौ हिम्मत राखौ, मोऐं इयौं दुनिया कै ठोगड़े यानी शैतान कै हराए दिया।”
Currently Selected:
यूहन्ना 16: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
