यूहन्ना 15
15
साची बैल
1“साची बाल हांव औसौ; औरौ मैरा पिता पौरमेशवर किसान औसौ। 2सौबै शाई जू मुंदी जूड़ेयोंदी औसौ, औरौ ना फोल़ो, तौ तिनु सै काटै दैंव, औरौ जू शाई फोल़ोए, तिनु सै हौजौ छांटौ ताकि सै हौजौ बै जादा फोल़ो। 3तुऐं तौ तियौं शिक्षा की बौजैह शै जू मोऐं तुऔं दैय राए, तिथलैई तुऐं शुध्द हौए गौवै। 4तुऐं मुंदै बौणैयौंदे रौंव, औरौ हांव तुऔं दा बोणेयोंदा रौंदा। जैशै शाई जै बाली दी बौणेयौंदी ना रौंव, तौ आपी ना फोल़ सौकौ। तैशैकैई, तुऐं किछै बै आछौ ना कौर सौकौ जै तुऐं मुं दै बौणैयौंदे ना रौंव।
5हांव बैल औसौ, तुऐं शाई औसौ। जू मुं दै बौणैयौंदे रौंव, औरौ हांव तिनुदा बोणेयोंदा रौंऊ; औरौ सै बैजाए फोल़ लांव, जिथुकै मुं दै जौई हौयौ तुऐं किछै ना कौरे सौकौ। 6जै कुणिए मुं दै बौणैयौंदे ना रौंव, तौ तिनु काटैयौ फेरकाए दैंव। जोबै सै शाई शोकै जांव, तौ तिनु कौठी कौरेयौ जोल़ाए दैंव। 7जै तुऐं मुं दै बौणैयौंदे रौंव, औरौ मैरी शिक्षा तुऔं मुंजी बौणेयौंदी रोली, तौ जू किछै मांगलै, तिथु हांव तुऔं दैंदाए। 8मैरै पिता पौरमेशवर की महिमा इथी लैई हौंव, कै तुऐं बैजाए फोल़ लांव, तोबैई तुऐं मैरै चैलै ठोहरलै।
9जैशै पिता पौरमेशवरे मुं आरी प्यार राख राए, तैशैकैई मोऐं तुऔं आरी प्यार राखा, मैरै प्यार दै बौणैयौंदे रौंव। 10जै तुऐं मैरी आज्ञा कै मानलै, तौ मैरै प्यार दै बौणैयौंदे रौलै, जैशैकै मोऐं आपणै पिता पौरमेशवर की आज्ञा का पालन कौरे राए, औरौ तैसकै प्यार दा बोणेयोंदा रौंऊ। 11मोऐं तुऔं ऐजी बातौ इथकारिए बुली, कै तुऔं दै सैजै खुशी हौंव जू मुं दै औसौ, औरौ तुऔं पूरी तरह शै खुशी भैटौ।”
चैलै कै ऐकी दुजैआरी सौमबंध
12“मैरी आज्ञा ऐजी औसौ, कै ऐशैखैई जैशै मोऐं तुऔं आरी प्यार कौरा, तैशैकैई तुऐं बै ऐकी दूजै आरी प्यार राखौ। 13ऐक आदमी आपणै दोस्त कै ऐजौ दिखाणौ कारिए कै सै तैसीआरी प्यार कौरौ, सौबिदा आछा तरीका ऐजा औसौ कै सै तिनु कारिए मौरे जांव। 14जै तुऐं मैरी आज्ञा कै मानौ तौ तुऐं मैरै दोस्त औसौ। 15ऐलो दै ऊबै हांव तुऔं नोकर ना बौलदा, जिथुकै नोकर ना जाणौ कै तैसका मालिक का कौरौ। पौरौ मोऐं तुऔं खै दोस्त राए बौल़ै, जिथुकै मोऐं जू बातौ आपणै पिता पौरमेशवर शै शौणै रैई, सैजी सौबै तुऔं बौताए दी। 16तुऐं मुखै ना चुणी, पौरौ मोऐं तुऔं चोणे राए औरौ तुऔं ठोहराए राए कै तुऐं जायौ फोल़ लांव औरौ तोंवारा फोल़ टिकैयौंदा रौंव, कै तुऐं मैरै चैलै औसौ, इथकारिए जू किछै पिता पौरमेशवर शै मांगलै, सै तुऔं दैला। 17इनु बातौ की आज्ञा हांव तुऔं इथकारिए दियु कै तुऐं ऐकी दुजैआरी प्यार राखौ।”
दुनिया शै सताव
18“जै दुनिया कै लोग तुंआरी बोयर राखौ, तौ याद राखौ तिनुऐ तुऔं दा औगौड़ियौ मुंआरी बै बोयर राखा। 19जै तुऐं इयौं दुनिया कै लोगौ कै जैशणै हौंदै, तौ दुनिया कै लोग आपणै आरी प्यार राखदै, पौरौ इयौं दुनिया कै लोगौ कै साथै तोंवारै संगति ना आथी, जिथुकै मोऐं तुऔं दुनिया पौरैशै चोणे राए; इथकारिए दुनिया कै लोग तुऔं आरी बोयर राखौ। 20याद राखौ कै मोऐं तुऔं का राव थियु बौल़ै, ‘नोकर आपणै मालिक दा बौड़ा ना आथी,’ जै तिनुऐ मुखै सोताए राए, तौ सै तुऔं खै बै सतांदै, जै सै मैरी शिक्षा कै मानदै, तौ तोंवारै बै मानलै। 21पौरौ ऐजौ सौबै ठुँ सै तोंवारै साथै कौरदै, जिथुकै तुऐं मैरै चैलै औसौ, औरौ सैजै मैरै भैजणौवाल़ै पौरमेशवर कै ना जाणौ।
22जै हांव ना आन्दा औरौ तिनुआरी बातौ नी कौरदा, तौ सै पापी ना ठोहरदै, पौरौ ऐबै तिनुवागे तिनकै पाप कारिए कुणजाई बाना ना आथी। 23जू मुं आरी बोयर राखौ, सै मैरै पिता पौरमेशवर आरी बै बोयर राखौ। 24जोबै मोऐं तिनकै बीच मुंजी ऐजै चौमत्कार कै काम कौरे राए, जू ओकी कोसीए ना कौरे रैई, इथकारिए सै पापी ठोहरदै, पौरौ ऐबै तौ तिनुऐ मुखै दैख राए कै मोऐं जू किछै कौरे राए, औरौ तोबै बै मुं आरी औरौ मैरै पिता पौरमेशवर आरी बोयर कौरौ। 25औरौ ऐजौ इथकारिए हौ, कै जू तिनकै पवित्र शास्त्र दो लैखै राए, सैजौ पूरु हौंव, ‘तिनुऐ बिना बौजैह शै मुं आरी बोयर कौरा।’
26पौरौ जोबै सैजा हौंसला दैणौवाल़ा आला, जैसी हांव तोंवारै धोरे पिता पौरमेशवर कै ढौबौशा भैजदा, या सच का आत्मा जू पिता पौरमेशवर कै ढौबौशा भेजेयोंदा औसौ, सै मैरै गवाही दैला। 27औरौ तुऐं बै गवाह औसौ जिथुकै तुऐं शुरु दै ऊबै मैरै साथै रौए रौवै।”
Currently Selected:
यूहन्ना 15: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
