प्रेरितो कै काम 8
8
शाऊल का बिशवासियौं पांदी अत्याचार
1शाऊल तैसकी मौत कै साथै पूरी तरह शै शामिल थिया। तैसी दूसै यरूशलेम शहर कै कलीसिया पांदी बौड़ा अत्याचार हौंदा लागा औरौ चोणेयौंदे चैलै कै छोड़ेयौ सौबै कै सौबै यहूदिया प्रदेश औरौ सामरिया प्रदेशो दै बैखरै गौवै। 2औरौ किछै मोरदै जू पौरमेशवर का आदर कौरौ थिए स्तिफनुस कै कब्रो दा राखा औरौ तैसी कारिए बैजाए शोग मोनोऊवा।
3पौरौ शाऊले कलीसिया कै लोगौ खै सोताए लौवै थिए, औरौ घोरे-घोरे घोसेयो मर्दो औरौ बैटमाणिशौ कै घोसिटै घोसिटैयौ कोयदखाने दै पाए दैंव थिया।
सामरिया प्रदेश दा फिलिप्पुस
4पौरौ जू बिशवाशी बैखरै रौवै थिए सै सुसमाचार शुणादै रौवै। 5औरौ फिलिप्पुस सामरिया प्रदेश कै ऐकी नगर दा जायौ लोगौ मुंजी मसीह का प्रचार कौरदा लागा।
6जूंजी बातौ फिलिप्पुसे बुली तिनु लोगै शोणेयो औरौ जूंजे निशान शै दिखांव थिया तिनु दैख दैखैयो ऐक मन हौयौ तैसकै बातौ पांदी ध्यान लौआ। 7जोबै फिलिप्पुसे आदैश दिया तौ बौहितै लोगौ पौरैशी दुष्टआत्मा बौड़ै आवाज़ो लैई लैलियायो निकल़ी गोई औरौ भौरिशै ओधरंग कै बीमार औरौ लोंगड़े बै ठीक हुवे। 8औरौ तैसी शहर कै बौहितै सारै लोग बैजाए खुशी हुवे।
शमौन जादूगर
9तैसी शहर दा शमौन नांव का ऐक आदमी थिया, जू जादू टोना कौरेयौ सामरिया प्रदेश कै लोगौ कै हैरान कौरो थिया औरौ आपी कै ऐक बौड़ा आदमी बौतांव थिया। 10औरौ सौबै नानड़ै शै लोयो बौड़ै तौड़ी सौबै लोग तैसकै इज्जत कौरौ थिए, औरौ बौल़ौ थिए, “ऐजा आदमी भगवानो कै सैजै अनौखी शौकतै औसौ जू महान औसौ।” 11तैणै बौहितै दूसौ शै तिनु आपणै जादू कै कामौ लैई हैरान कौरे राए थिए, इथकारिए सै तैसीखै बैजाए मानौ थिए।
12पौरौ जोबै लोगै फिलिप्पुस शै पौरमेशवर कै राज्य औरौ यीशु मसीह कै नांव का सुसमाचार शुणा तौ यीशु पांदी बिशवाश कौरा, औरौ बौहिती बैटमाणिशौ औरौ मर्दे बपतिस्मा लौआ। 13तोबै शमौने आपी बै फिलिप्पुस कै सौंदेश पांदी बिशवाश कौरा औरौ बपतिस्मा लोयो तैसकै साथी रौंदा लागा। औरौ निशान औरौ बौड़ै-बौड़ै शौकतै कै काम दैखैयो हैरान हौंव थिया।
सामरी लोगै पवित्र आत्मा पोऊवा
14जोबै चोणेयौंदे चैलै जू यरूशलेम शहर दै थिए, ऐजौ शुणु कै सामरिया प्रदेश कै लोगै पौरमेशवर कै वचन कै मान पाए तौ पतरस औरौ यूहन्ना कै तिनकै धोरे छाड़ै। 15औरौ तिनुऐ तिथै पौंचेयौ तिनु कारिए प्रार्थना कौरे ताकि पवित्र आत्मा पांव। 16जिथुकै पवित्र आत्मा इबी तौड़ी तिनुमुंजी दै कोसी पांदी बै ना आए रैई थी; तिनुऐ तौ सिरफ प्रभु यीशु कै नांव शै बपतिस्मा लोए राए थिया। 17तोबै पतरस औरौ यूहन्नाए तिनु पांदी हाथ राखै, औरौ तिनुऐ पवित्र आत्मा पाए।
शमौन का पाप
18जोबै शमौने दैखौ कै चोणेयौंदे चैलै कै हाथ राखणौ शै पवित्र आत्मा आए जांव, तौ तिनकै धोरे पौयसै लायौ बौल़ौ, 19ऐजै अनौखी शौकतै मुखै बै दै कै जैसी कोसी पांदी बै हांव हाथ राखु, सै पवित्र आत्मा पांव।
20पतरसे तैसी बौल़ौ, तू औरौ तैरै पौयसै नाश हौंव, जिथुकै तुऐं पौरमेशवर का वरदान पौयसै लैई मोलै लोणो का विचार कौरे राए। 21इयौं सेवा मुंजी ना तैरा हिस्सा औसौ, ना भाग; जिथुकै तैरा मन पौरमेशवर कै सामणै सोही ना आथी। 22इथकारिए आपणी इयौं बुराई शै पाप कौरणै छोड़े दै औरौ प्रभु शै प्रार्थना कौर जै हौए सौकौ तौ पौरमेशवर तैरै ऐसी बुरै विचारो कै माफ कौरे दैंव।
23जिथुकै हांव दैखु कै तू बैजाए ज़लन शै औरौ पाप कै गुलामी मुंजी पौड़ै रौआ। 24शमौने जोवाब दिया, “तुऐं मुं कारिए प्रभु शै प्रार्थना कौरौ कै जू बातौ तुऐं बौल़ै रैई, तिनुमुंजी दै कुणजै मुं पांदी आए ना जांव।”
25इथकै बाद पतरस औरौ यूहन्नाए गवाहै दै औरौ प्रभु यीशु का वचन शुणौऊवा, औरौ यरूशलेम शहर कै पाछु जांदै बैई तिनुऐ सामरी प्रदेश कै कैई गांवो दा सुसमाचार का प्रचार कौरा।
कूश कै खोज़े खै फिलिप्पुसे का उपदैश
26तोबै प्रभु कै ऐकी स्वर्गदूतै फिलिप्पुस कै बौल़ौ, बिज़यो, दक्षिण दिशा कै ढौबौ तैसी बाटो पांदी जा जू यरूशलेम शहर शै गाज़ा शहर कै जांव। ऐजी रेगिस्थान कै बाट औसौ। 27सै बिज़यो चाल पौड़ा औरौ कूश देश का ऐक आदमी जांदा लागै रौआ थिया जू ऐक खोजा थिया औरौ खास औधिकारी थिया। जू कूशियो की राणी कन्दाके का मंत्री औरौ खोजांची थिया, (कूश देश कै लोग राणी कै आपणी भाषा दै कन्दाके बौल़ौ थिए) औरौ आराधना कौरणौ कारिए यरूशलेम शहर दा आए रौआ थिया।
28औरौ सै आपणै रथ पांदी बौठेयौ आपणै देश कै पाछु जांदा लागै रौआ थिया औरौ यशायाह पौरमेशवर कै बातौ बौताणौवाल़ै कै किताब जोर-जोर शै पौढ़ै लोए थै। 29तोबै पवित्र आत्माए फिलिप्पुस कै बौल़ौ, नज़दीक जायौ ऐसी रथ कै साथी हांड। 30फिलिप्पुस दौड़ैयौ रथ कै धोरे पोऊंचा औरौ तैसी यशायाह पौरमेशवर कै बातौ बौताणौवाल़ै कै किताब पौढ़दे बैई शुणा, औरौ पूछु, “तुऐं जू पौढ़ै लो का इथु सौमझै बै औसौए?” 31तैणै बौल़ौ, “जै कुणिए मुखै सौमझाणौ वाल़ा ना हौला तौ हांव इथु कैशैखै सौमझै सौकु?” औरौ तैणै फिलिप्पुस शै बिन्ती कौरे कै रथ पांदी चौढ़ेयौ तैसकै धोरे बौठौ।
32पवित्र शास्त्र का जू अध्याय तैणै पौढ़ै लौआ थिया सै ऐजा थिया,
“सै भेड़ कै जैशणा काटणौ कै पोऊंचाए गौआ,
औरौ जैशै मेम्ना आपणै ऊन कौतराणोवाल़ै कै जैशणा चुपचाप रौंव, तैशैखैई
जोबै लोगै तैसीखै पीड़ो दी तौ तैणै बै आपणौ मुँह ना खुली,
33तैसकै बैज्जती कौरे औरौ तैसी न्याय ना भैटी,
शायद कुणिए बै तैसकै वंशो कै बारै मुंजी ना बौताए सौकौ,
जिथुकै इदा आगै कै धरती पांदी तैसका वंश हौंदा, लोगै तैसी मारै दिया।”
34इथपांदी खोज़े फिलिप्पुस कैईंदु पूछु, “हांव तांव कैईंदै बिन्ती कौरु, कै ऐजौ बौता कै पौरमेशवर कै बातौ बौताणौवाल़ै ऐजौ कोसके बारै मुंजी बौल़ौ, आपणै या कोसी ओकी कै बारै मुंजी?” 35तोबै फिलिप्पुसे बौलणौ शुरु कौरौ औरौ ऐसी पवित्र शास्त्र पौरैशौ शुरु कौरेयौ तैसीखै यीशु का सुसमाचार शुणौऊवा इथकारिए सैजा औधिकारी सौमझै गौआ औरौ यीशु पांदी बिशवाश कौरा।
36बाटो दै चालदै-चालदै तिनुऐ बाटो कै किनारे ऐक तालाब दैखा, तोबै खोज़े बौल़ौ, “दैख इथै तालाब औसौ ऐबै मुखै बपतिस्मा लोणो दा का रौक औसौ?” 37फिलिप्पुसे बौल़ौ, “जै तू सारै मन लैई बिशवाश कौरे तौ लोए सौकै।” तैणै जोवाब दिया, “हांव बिशवाश कौरु कै यीशु मसीह ही पौरमेशवर का बैटा औसौ।” 38तोबै तैणै रथ खौड़ै कौरणौ कै आज्ञा दी, औरौ फिलिप्पुस औरौ खोजा दुईनै तालाब मुंजी हौटै गौवै औरौ फिलिप्पुसे खोजा खै बपतिस्मा दिया।
39जोबै सै पाणी मुंजीदै निकल़ैयो बायरै ओऊवे, तौ प्रभु का आत्मा फिलिप्पुस खै टिपयौ लोय गौआ, औरौ खोज़े तैसी हौजौ ना दैखी, औरौ सै खुश हौआ कै पौरमेशवरे तैसीखै बौचाए पाए औरौ आपणै देश कै पाछु हौटै गौआ। 40पौरौ फिलिप्पुसे आपी खै अश्दोद शहर दा पोऊवा औरौ जांव तौड़ी कैसरिया शहर दा ना पोऊंची, तांव तौड़ी तैणै हर गांव दै सुसमाचार का प्रचार कौरदै बैई ऐक जौगैह शै ओकी जौगैह आपणी यात्रा जारी राखै।
Currently Selected:
प्रेरितो कै काम 8: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
