प्रेरितो कै काम 7
7
महासभा दा स्तिफनुस का भाषण
1तोबै महायहूदी पुरोहिते पूछु, “का ऐजा इलजाम साचा औसौ?” 2स्तिफनुसे बौल़ौ, “ओए रै भाईयों, औरौ गुरुओं, शुणौ अमारै पुराणिया अब्राहम कै तैसकै हारान शहर दै आयौ बोसणो शै औगौड़ियौ जोबै सै मेसोपोटामिया प्रदेश दा थिया, तौ महिमामय पौरमेशवरे तैसी दर्शन दिया। 3औरौ तैसी बौल़ौ, ‘तू आपणै देश औरौ आपणै कुड़बे पौरैशा निकल़ैयो तैसी देशो दा जा, जू हांव ताखै दिखांदा।’
4तोबै सै कसदियो#7:4 तिथकौ औकौ नांव मेसोपोटामिया औसौ। कै देशो पौरैशा निकल़ैयो हारान शहर दा जायौ बोसा; औरौ तैसकै बापू कै मौरणौ कै बाद पौरमेशवरे तैसीकै तिथैदा ऐसी देशो दा लायौ बोसोऊंवा जिथै ऐबै आमै बोसु। 5तैसी सौमय पौरमेशवरे तैसकै किछै विरासत ना दी पौरौ लात धोरणो कै बै तिथमुंजी जौगैह ना दी, जौल़ौ कै तैसीकैईं ऐक बैटा बै ना थी। तोबै बै पौरमेशवरे तैसकै साथै ऐजा कौरार राखा कै, ‘हांव ऐजा देश तैरै औरौ तैरै बाद तैरै वंश कै दैय दैंदा।’
6औरौ पौरमेशवरे तैसीखै ऐजौ बै बौल़ौ, ‘तैरै सन्तान कै लोग पोराये देशो दै प्रदेशी हौंदै, औरौ सैजै लोग तिनु गुलाम बाणै दैंदै औरौ चार शौ सालो तौड़ी तिनकै साथै बुरा बर्ताव कौरदै।’ 7हौजौ पौरमेशवरे बौल़ौ, ‘जैसी जाति कै सै गुलाम हौलै, तिनु हांव सौजा दैंदा, औरौ इथकै बाद सै तैसी देश दै निकल़ैयो ऐसी देश दै आयौ इयौं जौगैह दै मैरै आराधना कौरदै।’ 8औरौ तैणै अब्राहम कै साथै ऐक कौरार बाना औरौ तैसीखै बौल़ौ; कै सै आपणै घोरो कै सौबी मोरदो का कौरार कै निशान कै रुपो दा खतना कौरांव। औरौ बाद दै इसहाक पौयदा हौआ औरौ आठवें दूसै तैसका खतना कौरा; औरौ ऐजा भोवार चालदा रौआ इसहाक शै याकूब औरौ याकूब शै बारौ कुलपति पौयदा हुवे।”
9“कुलपतिए आपणै भाई यूसुफ शै रिश कौरेयौ तैसी मिस्र देश दै जाणै वाल़ै कै हाथौ गुलाम कै रुपो दा बैकै दिया। पौरौ पौरमेशवर तैसकै साथै थिया। 10औरौ पौरमेशवरे यूसुफ खै सौबै कौल़ेशौ दा बौचायौ मिस्र कै राजा फिरौन कै नोज़रो दै अनुग्रह औरौ बुध्दि दैय दी, औरौ फिरौन राजाए यूसुफ खै मिस्र देश पांदी औरौ आपणै सौबै घोरो पांदी राज्यपाल बाणै दिया।
11जोबै यूसुफ राज्यपाल थिया तोबै सारै मिस्र देश औरौ कनान देश दा काल़ पौड़ा; जिथलैई भारी कौल़ेश हौआ औरौ अमारै बुड़ेईको कै खाणौ ना भैटी थी। 12पौरौ याकूबे ऐजौ शोणेयो कै मिस्र देश दो नाज़ औसौ, तैणै अमारै बुड़ेईको खै नाज़ लोणो कारिए भैजै औरौ सै यूसुफ खै भैटी औरौ नाज़ मोलै लो पौरौ तिनुऐ यूसुफ खै ना पौछेयाणी। 13औरौ दुजाल़ियो जोबै सै नाज़ लान्दै हौटै यूसुफे खुद कै पौछेयाण आपणै भाईयों खै बौताए, औरौ यूसुफ का गोत्र राजा फिरौन खै पोता चालै गौआ।
14तोबै यूसुफे आपणै पिता कै सौंदेश भैजा याकूब औरौ आपणै सारै कुड़बे कै, जू पिचहतर आदमी थिए, मिस्र देश दै आणौ कारिए बौईदै। 15तोबै याकूब मिस्र देश दा हौटा; औरौ किछै सौमय कै बाद सै औरौ अमारै बुड़ेईक मौरे गौवै। 16सै याकूब औरौ तैसकै बैटै की लाश कै अमारै कनान देश दै लोए गौवै, औरौ तिनुऐ याकूब की लाश कै तियौं कब्रो दै दबाए, जियौं अब्राहमै ऐक सोही दाम दैयौ मोलै लोए राए थी, औरौ तिनुऐ याकूब कै बैटै खै शकेम शहर कै तियौं जोमीनो दै दबाए, जू याकूबे हामोर कै बैटै शै मोलै लोए राए थी।”
17“पौरौ जोबै तैसी कौरार कै पूरै हौणौ का सौमय नेड़िक ओऊवा, जू पौरमेशवरे अब्राहम शै कौरे राए थै, तौ मिस्र देश दै सैजै लोग बौढ़ै गौवै, औरौ बौहितै हौए गौवै। 18तोबै मिस्र देश दा ओका राजा हौआ, जू यूसुफ खै ना जाणौ थिया। 19तैणै अमारै जाति शै चालाकी कौरेयौ अमारै बुड़ेईको कै साथै बुरा बर्ताव कौरा, इथै तौड़ी कै माँ-बापू कै आपणै ठिकड़ै नानड़िया कै फेरकाणै पौड़ै कै सै मौरे जांव। 20तैसी सौमय मूसा का जन्म हौआ; औरौ सै पौरमेशवर कै नोज़रो दा बैजाए सुन्दर थिया; औरौ तैसी ती मीनै तौड़ी तैसकै माँ बापूए तैसी मेसो पाल़ा। 21पौरौ जोबै तिनकै तैसी चुरी ना, तौ तिनुऐ तैसीकै घोरो कै बायरै राखै दिया तोबै फिरौन राजा कै बैटीए तैसी गोद लौआ, औरौ आपणै बैटै कै जैशणा तैसी पाल़ा। 22औरौ मूसा खै मिस्र देश कै सौबै विद्या पोढ़ाए गौए, औरौ सै बातौ औरौ कामौ मुंजी ताकतवर थिया।
23जोबै मूसा चाल़ीश सालो का हौआ, तौ तैसकै मन दा विचार ओऊवा कै सै आपणै इस्राएल देश कै भाईयों कै साथै भैटियो। 24मिस्र देश दा मूसाए ऐक इस्राएल देश कै आदमी कै साथै अन्याय हौंदै बैई दैखा औरौ तैसी बौचौऊंवा, औरौ मिस्र देश कै आदमी खै मारैयौ सोताएयौंदे का बौदला लौआ। 25तैणै सुंचौ, कै तैसकै भाई सोमझलै कै पौरमेशवर तैसकै हाथौ लैई तिनुखै गुलामी शै बौचांदा पौरौ तिनुऐ ना सौमझी।
26दूजै दूसै जोबै इस्राएली आपी मुंजी झोगड़े रौवै थिए, तौ सै तिथै कै हौटा; औरौ ऐजौ बौलेयौ तिनु मैल कौरणौ कारिए सौमझाए, कै ओए रै नोइयां, ‘तुऐं तौ भाई-भाई औसौ, ऐकी दूजै पांदी किथु अन्याय कौरौ?’ 27पौरौ जैणै आपणै पड़ोसी पांदी अन्याय कौरे लौआ थिया, तैणै तैसीकै ऐजौ बौलेयौ कै धाका दिया, ‘ताखै कुणै आमु पांदी औधिकारी औरौ न्याय कौरणौवाल़ा ठोहराए राए? 28का जैशैखै तुऐं बियाल़ियो मिस्र देश कै रौणौवाल़ै कै मारै दिया मुखै बै मारणा चांए?’
29ऐजै बात शोणेयो, मूसा डौरे गौआ औरौ इथकारिए सै मिस्र देश शै दौड़ै गौआ औरौ मिद्यान देश दा प्रदेशी हौयौ कै रौंदा लागा: औरौ तिथै तैसकै दो बैटै का जन्म हौआ।”
30“मिद्यान देश दै मूसा कै चाल़ीश साल रौणौ कै बाद, मूसाए सीनै पाहाड़ कै ऐकी रेगिस्थान दा ऐक स्वर्गदूत कै दैखा औरौ पौरमेशवरे तैसी स्वर्गदूत कै दवारा जोल़ेयौंदे झाड़ी शै तैसीआरी बातौ कौरी। 31जोबै मूसाए जोल़ेयौंदे झाड़ी कै दैखै जू हिशे ना रैई थी, तौ सै हैरान हौए गौआ। औरौ जोबै दैखणौ कारिए नेड़िक हौटा, तौ प्रभु कै आवाज़ शौणै, 32हांव तैरै पुराणिया, अब्राहम, इसहाक औरौ याकूब का पौरमेशवर औसौ, तोबै मूसा डौरेयौ कांमणै गौआ, औरौ इथै तौड़ी कै तैसी दैखणौ कै हिम्मत ना होई।” 33तोबै प्रभुए तैसीखै बौल़ौ, मुं कारिए आदर दिखाणौ कारिए आपणै लातो पौरैशा जूता उंढा खोल, जिथुकै जैसी जौगैह पांदी तू खौड़ा औसौ, सै पवित्र जौगैह औसौ। 34मोऐं सौथी कै आपणै लोगौ पांदी हौए रौवै अत्याचार कै मिस्र देश दै दैख राए औरौ तिनकै शुशकार औरौ रुणु शौणै राए; इथकारिए हांव तिनु बौचाणौ कारिए धैनै आए रौआ। ऐबै आ, हांव ताखै मिस्र देश कै भैजदा।
35“ऐजा सैजाई मूसा औसौ जैसीकै इस्राएल देश कै लोगै ना अपनाए रैई थी औरौ बौल़ौ राए थियु, ‘ताखै कुणै आमु पांदी औधिकारी औरौ न्याय कौरणौवाल़ा ठोहराए राए?’ पौरमेशवर कै जैसी स्वर्गदूतै मूसा कै जोल़ेयौंदे झाड़ी मुंजी दर्शन दिया, तैणैई मूसा कै इस्राएली लोगौ का औधिकारी औरौ छुड़ाणौवाल़ा ठोहरायो भैजा। 36एसी आदमीए ही मिस्र देश औरौ लाल समुन्द्र औरौ शुनशान जौगैह दा चाल़ीश सालो तौड़ी अनौखै काम औरौ निशान दिखाए दिखायौ तिनु निकाल़ैयो लोऊवे। 37ऐजा सैजाई मूसा औसौ, जैणै इस्राएल देश कै लोगौ कै बौल़ौ, ‘पौरमेशवर तोंवारै भाईयों मुंजीदा तुऔं कारिए मैरै जैशणा ऐक पौरमेशवर कै बातौ बौताणौवाल़ा भैजदा।’
38ऐजाई मूसा ऐक पौरमेशवर कै बातौ बौताणौवाल़ै कै रुप दा अमारै पुराणियो कै साथै थिया, जोबै सै रेगिस्थान दै कौठै थिए। पौरमेशवरे आपणै स्वर्गदूत कै भैजा जैणै सीनै पाहाड़ पांदी मूसा शै बातौ कौरी औरौ मूसा कै अमारै कानून दिए औरौ मूसाए तिनु कानून कै आमु तौड़ी पोऊंचाए। 39पौरौ अमारै पुराणियाए तैसकी आज्ञा कै ना मानी, बल्कि तिनु टाल़ेयौ आपणै मन ही मन दै मिस्र देश कै पाछु जाणौ चांव थिए। 40औरौ तैसकै भाई हारून शै बौल़ौ, ‘आमु कारिए ऐक ऐशणा देवता बाण, जू मिस्र देश दै पाछु आणौ कारिए अमारै औगौड़ियौ-औगौड़ियौ चालौ; जिथुकै ऐजा मूसा जू आमु मिस्र देश शै निकाल़ैयो इथै लाए राए, आमुए ना जाणु कै तैसकौ का हौं?’
41तिनु दूसौ दै तिनुऐ ऐक कौलडु़ कै मूर्ति बाणै, औरौ तिथु मूरत कै औगौड़ियौ बल़ि कौरौ; औरौ आपणै हाथौ शै बाणैयौंदे कामौ मुंजी मगन हौंदै लागै। 42इथकारिए: पौरमेशवरे मुँह मोड़ेयो तिनु गौयण कै सुरज, चांद औरौ तारै कै आपणै देवताओं कै रुप दै आराधना कारिए छोड़े दिए। जैशैकै पौरमेशवर कै बातौ बौताणौवाल़ै कै किताबो दो लैखै राए,
‘ओए रै इस्राएल देश कै लोगौ, का तुऐं रेगिस्थान दै चाल़ीश सालो तौड़ी गोरु की बल़ि औरौ नाज़ोबल़ि मुखै ही चौढ़ांदै रौवै? ना, तुऐं तिनु ओकी देवताओं कै चौढ़ेई!
43औरौ तुऐं तैसी तोम्बू कै टिपा जिथमुंजी तोंवारै मोलेक देवता कै मूरत
औरौ रिफान देवता कै तारै कै मूर्ती थी।
यानी तिनु मूर्तियों कै जिनु तुऐं पूज़णो कारिए बाणै रैई थी।
इथकारिए हांव तुऔं बाबेल देश शै दूर लोय जायौ बोसांदा।’”
44“गवाह का तोम्बू रेगिस्थान दा अमारै पुराणियो कै बीच मुंजी थिया; जैशैकै पौरमेशवरे ठोहराए राए थिया, औरौ पौरमेशवरे मूसा शै बौल़ौ, ‘जू आकार तुऐं दैख राए, तिथकै हिसाब शै इथु बाण।’ 45बौहितै सालो बाद तैसी तोम्बू खै अमारै पुराणियाए यहोशू कै साथै इथै लियोऊवा; जैसी सौमय कै तिनुऐ ओकी देशो पांदी औधिकार पोऊवा, जिनु पौरमेशवरे अमारै पुराणियो कै सामणै दै निकाल़ै दिए थिए, औरौ सैजा तोम्बू राजा दाऊद कै सौमय तौड़ी रौआ। 46राजा दाऊदो पांदी पौरमेशवरे अनुग्रह कौरा, औरौ तैणै बिन्ती कौरे, कै हांव याकूब कै पौरमेशवर कारिए रौणौ कै घोर बाणु।
47पौरौ तैसकै बैटै राजा सुलैमाने तैसी कारिए मंदिर बाणा। 48पौरौ सौबीदा बौड़ा पौरमेशवर हाथौ कै बाणैयोंदै मंदिरो दा ना रौंव, जैशैखै यशायाह पौरमेशवर कै बातौ बौताणौवाल़ै कै पवित्र शास्त्र दो लैखै राए, कै 49‘पौरमेशवर बौल़ौ, स्वर्ग मैरा सिंहासन औरौ धोरती मैरै लातो तौड़ी कै ठेली औसौ, मुं कारिए तुऐं कैशणा मंदिर बाणदै? औरौ मैरै विशांव का कुणजा ठाँव हौंदा?’ 50का मोऐं आपी स्वर्ग औरौ धोरती की सौबै चीज़ौ खै ना बाणी?”
51“ओए रै ढीठ तुऐं तैसकै बातौ मानणौ औरौ शुणणौ शै इन्कार कौरौ तुऐं हमैशा पवित्र आत्मा का विरोध कौरौ, जैशै तोंवारै पुराणिया कौरौ थिए, तैशैखैई तुऐं बै कौरौए। 52पौरमेशवर कै बातौ बौताणौवाल़ै खै तोंवारै पुराणियाए ना सोताए रैई थी? औरौ तिनुऐ पौरमेशवर कै बातौ बौताणौवाल़ै खै मारै दियै जिनुवै तैसी धरमी आदमी यानी मसीह कै आणौ कै बारै मुंजी बौल़ै राए थियु, औरौ जोबै मसीह ओऊवा, तौ तुऐं तैसी धौखा दिया औरौ तैसकै मारै दिया। 53तुऐं स्वर्गदूतौ कै दवारा ठैहरायौंदे मूसा कै कानून तौ पाए, पौरौ तिनुखै मानी ना।”
स्तिफनुस की मौत
54ऐजी बातौ शोणेयो यहूदी नेता गुस्से हुवे औरौ स्तिफनुस पांदी डाठी किटदै लागै। 55पौरौ तैणै पवित्र आत्मा शै भोरेयौ स्वर्ग कै ढौबौ दैखौ औरौ पौरमेशवर कै महिमा कोरी औरौ यीशु कै पौरमेशवर कै सोऐं ढौबौ खौड़ा हौयौ दैखैयो 56बौल़ौ, “दैखौ, हांव स्वर्ग कै खोलेयौंदा, औरौ आदमी कै बैटै कै पौरमेशवर कै सोऐं ढौबौ खौड़ा हौएयौंदा दैखु।”
57तोबै तिनुऐ बौड़ै जोर शै लैलियायो कान बोन्द कौर दिए औरौ ऐकी साथी तैसी पांदी झोपके, 58औरौ स्तिफनुस खै पाकड़ा औरौ लौशेयो यरूशलेम शहर शै बायरै निकाल़ैयो पथराव कौरेयौ मारै दिया, तैसी पांदी आरोप लाणोवाल़ै लोगै आपणै बायरौ कै लुस्कै खौलेयौ शाऊल नांव कै ऐकी जवानो कै लातो कै धोरे राखै दिए।
59सै स्तिफनुस पांदी पाथर मारदै रौवै औरौ सै ऐजौ बौलेयौ प्रार्थना कौरदा रौआ, “ओए रै प्रभु यीशु, मैरै आत्मा कै कबूल कौरेया।” 60हौजौ घुंडू नियुड़ायो जोर सै बौल़ौ, “ओए रै प्रभु, ऐसी पाप कारिए इनु माफ कौर।” ऐजौ बौलेयौ सै मौरे गौआ।
Currently Selected:
प्रेरितो कै काम 7: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
