प्रेरितो कै काम 6
6
सात सुनांव सेवको का चुनाव
1तिनु दूसौ दै जोबै चैलै कै गिनती बौहितै बौढ़ गौए, तोबै इब्रानी भाषा बौलणोवाल़ै यूनानी भाषा बौलणोवाल़ै यहूदी बिशवाशी कै खिलाफ हौए गौवै, कै हर दूस कै पौयसै औरौ खाणौ कै सेवकाई दै अमारै विधवाओं कै दैख रैख ना कौरे जांव।
2तोबै तिनु बारौ चोणेयौंदे चैलै यरूशलेम शहर कै सौब चैलै कै आपणै धोरे बौएदैयौ बौल़ौ, “ऐजौ ठीक ना आथी कै आमुए पौरमेशवर कै वचन कै प्रचार ना कौरेयौ खयाणो पियाणौ कै सेवा दै लागै रौंऊ। 3इथकारिए ओए रै बिशवाशी भाईयों, आपी मुंजीदै सात इजतदार मर्दो कै जू पवित्र आत्मा औरौ बुध्दि शै भौरेयौंदे हौंव, जिनकै बारै मुंजी सौबै जोणे जाणौ हौलै, चोणे पाव, कै आमु तिनु ऐसी कामौ कै जुमैवारै सौंपै सौकु। 4पौरौ आमुए तौ प्रार्थना औरौ वचनो का प्रचार औरौ शिक्षा दैणौ दै लागैयौंदे रौंदै।”
5ऐजै बात सौबी मण्डली कै आछी लागै औरौ तिनुऐ स्तिफनुस नांव का ऐक मर्द कै जू पवित्र आत्मा लैई भौरेयौंदा थिया, औरौ फिलिप्पुस औरौ प्रुखुरुस औरौ नीकानोर औरौ तीमोन औरौ परमिनास औरौ अन्ताकिया शहर कै रौणौवाल़ै नीकुलाउस खै जू यहूदी कै गुट शै आए गौआ थिया, चोणे पाए। 6औरौ तिनु चोणेयौंदे चैलै कै सामणै लोऊवे औरौ तिनुऐ प्रार्थना कौरेयौ तैसी कामौ खै कौरणौ कारिए तिनुखै चुणै।
7औरौ पौरमेशवर का वचन फौयल़दा गौआ औरौ यरूशलेम शहर दै चैलै कै गिनती बैजाए बौढ़दै गौए औरौ बौड़ी संख्या दै यहूदी पुरोहिते बै यीशु मसीह पांदी बिशवाश कौरणौ कै ऐसी सौंदेश कै मानै पोऊवा।
स्तिफनुस की गिरफ्तारी
8स्तिफनुस अनुग्रह औरौ अनौखी शौकतै दा भोरेयौ लोगौ मुंजी बौड़ै-बौड़ै काम औरौ निशान दिखाया कौरौ थिया। 9पौरौ किछै लोग स्तिफनुस कै खिलाफ हौए गौवै, सै तियौं यहूदी सभा-घोरो कै सदस्य थिए, जिथु गुलामी शै आज़ाद हौणौ बौल़ौ थिए, सैजै लोग कुरेन औरौ सिकन्दरिया शहरो शै औरौ किलिकिया औरौ एशिया प्रदेशो शै बै थिए। सैजै लोग स्तिफनुस कै साथै बैहसबाजी कौरदै लागै।
10पौरौ स्तिफनुसे जू किछै बै बौल़ौ सै तिथका जोवाब ना दैय सौकी जिथुकै पवित्र आत्माए तैसी बौड़ै बुध्दिमानी कै साथै बौलणौ दै मौदद कौरे। 11इथपांदी गुलामी शै आज़ाद हौणौवाल़ै लोगै कैई लोगौ खै स्तिफनुस कै बारै मुंजी झूठ बौलणौ कारिए उकसोऊवे औरौ सै बौलदै लागै आमुए ऐसी मूसा कै कानून औरौ पौरमेशवर कै खिलाफ नेंदैया की बातौ बौलदै बैई शौणै राए।
12औरौ तिनुऐ स्तिफनुस कै खिलाफ लोगौ औरौ बुड़ेईको औरौ यहूदी शास्त्री कै उकसाए औरौ तिनुऐ आयौ स्तिफनुस कै थाम्बैयौ महासभा कै धोरे निया। 13औरौ तिनुऐ तिथै झूठै गवाह खौड़ै कौरे, जिनुवै स्तिफनुस पांदी इलजाम लोऊवा कै ऐजा आदमी ऐसी पवित्र ठाँव औरौ मूसा कै कानून कै खिलाफ बौलणौ ना छोड़ो। 14जिथुखै आमुए ऐसी ऐजौ बौलदै बैई शौणै राए कै ऐजा नासरत गांव का यीशु ऐसी मंदिर कै ढाल़ै दैंदा, औरौ तिनु भौवारो खै बौदलै दैंदा जू मूसाए आमु कै दैय राए। 15तोबै सौबी लोगै जू महासभा दै बौठै रौवै थिए, तैसकै ढौबौ टकटकी लायौ दैखौ औरौ तैसका मुँह स्वर्गदूत कै मुँह जैशणा चौमकेयौंदा दैखा।
Currently Selected:
प्रेरितो कै काम 6: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
