लूका 16
16
चलाक भंडारी
1फिरी यीशु अपड़ा चैला सिंउ अक उदाहरण शुणा, कोसक्यै धनवान मैहणुरा अक भंडारी थ्या, जां मैहणुवें तेसेरै सांमणै भण्डारी पनि ऐक्या आरोप ला कि सै तिंडि सारी संम्पति उड़ा दींता। 2तां तेनी सै भण्डारी शदा करि बौलु ऐक्यु कितु आ जै आंउ तिंडै बारै मझ शुणता? तु मिंडी संम्पतिरा सारा हिसाब-किताब शुंणा दै; केईनी कि तु अबै आघै भंडारी ना रैहि सकता।
3तां भंडारी सोचणा लगा, अबै आंउ कितु करूं? केईनी कि मिंडा मालिक अबै भंडारिरै कंमा किना मूं कढता। जमीनि मझ खढै खणनेरा कम कांनेरी ताकत ता मूं मझ आह ना; जां भिख मगणनि ता मूं लज्ज लगती। 4ऐठणीरै तेईनी अबै आंउ समझि ग्या कि मूं कितु कांनु आ, ताकि आंउ जेख्णी भंडारिरै कंमा किना कढियूंणा, ता मैहणु मिंडी मजत करेलै।
5तां तेनी अपड़ै मालकेरै दैंणदार अक-अक करि शदाय, जां पेहिलै किना पुच्छु, कि ताउ पन मिंडै मालकेरा कैत्थरा कर्जा आ? 6तेनी बौलु, शाउ मण जैतूनेरा तैल, तां तेनी तैस सिंउ बौलु, अपड़ा खाता लै जां बेशि करि झट पंजाह लिखि दै। 7फिरी तेनी होरै किना पुच्छु, ताउ पन क्यौता कर्जा आ? तेनी बौलु शाउ मण किणक, तां तेनी तैस सिंउ बौलु, तु बि अपड़ा खाता पकड़ी लै जां आस्सी लिखि दै।
8तां तेनी मालिकै तैस बेईमान भण्डारिरी तारीफ की, कि तेनी बड़ी चलाकि सिंउ कम क्यौरा; केईनी कि ऐस संसारेरै मैहणु अपड़ै टैंमेरै मैहणुवां सिंउ व्यवहार कांना मझ ज्योतिरा मैहणुवां किना जादै चलाक अत्तै। 9जां आंउ तुहां सिंउ बोलता, कि संसारिक धनै ला अपड़ै तेईनी मित्र बंणा लिया; ताकि जेख्णी तुवाड़ै मरना किना बाद धन-दौलत गायब भौ गांहणी, ता सै तुवाड़ा हमेशा रींहणैरै घरा मझ स्वागत करेलै। 10जै हल्किया-हल्किया गल्ला मझ ईमानदार आ, सै बड़ु मझ बि ईमानदार भूंणा, जां जै हल्किया किना हल्किया गल्ला मझ बेईमान आ, सै बड़ु मझ बि बेईमान भूंणा। 11ऐठणीरै तेईनी जेख्णी तुवे संसारेरी धन-दौलती मझ ईमानदार ना निकोत्थै, ता स्वर्गेरी सच्ची धन-दौलत तुहांनि केणु दैला? 12जां अगर तुवे पराऐ धन-दौलती मझ ईमानदार ना निकोत्थै, ता तुहांनि तुवाड़ी अपड़ि धन-दौलत केणु दैला?
13आंउ तुहां सिंउ सच बोलता कि, “कौ दास दुवां मालिका केरी सेवा ना करि सकता केईनी कि तैस एकि सिंउ बैर ता होरै सिंउ प्रेम रखणा; या एकि सिंउ मिलि रैहला जां होरैनि तुच्छ समझैला। तिहियें तुवे परमेश्वर जां धन दोईयो केरी सेवा ना करि सकतै।”
यीशुरै कुछ उपदेश
14जेख्णी फरीसी मैहणुवें ऐ सभ शुणु, ता सै यीशुरा मजाक उडाणां लगै, केईनी कि सै पेईंसै सिंउ प्यार करींथ्यै। 15यीशु तैन्हांं सिंउ बौलु, तुवे अपड़ै आपानि मैहणुवां केरै सांमणै धर्मी बंणातै, पण परमेश्वर तुवाड़ै मंना जांणता, केईनी कि जै चीजै मैहणुवां केरी नजरी मझ अच्छी अत्ति सै परमेश्वरेरी नजरी मझ बेकार अत्ति। 16“यीशु तैन्हांं सिंउ बौलु, जेख्णी तेईनी यूहन्ना बपतिस्मा दींणै वा त्यो तेईनी मूसेरी व्यवस्था जां भविष्यवक्ता केरी गल्लै शुणांणारा केरै संदेश तुहांनि बत्त लुहाईथ्यै, पण अबै टैंमा सिंउ परमेश्वरेरै राज्यरी खुशखबरी शुणायूंति आ, जां हर-अक मैहणु तेत मझ मजबूत भौ करि ऐईंता। 17सुरग जां धरती मुकि सकतै, पण जै पवित्र शास्त्रा मझ लिखोरू आ; सै सभ पूरू भूंणु। 18उदाहरणेरै तौरा पन जै कौ अपड़ि लाड़ी त्यागि करि होरी सिंउ ब्याह काता, सै तैस सिंउ व्यभिचार काता; जां जै कौ तैस छडोरी जनेनी सिंउ ब्याह काता सै बि व्यभिचार काता।
शैठ मैहणु जां गरीब लाजर
19यीशु अक होरा उदाहरण शुणां; अक अमीर मैहणु थ्या जै मेंहगै-मेंहगै लिकड़ै लईंथ्या जां हर रौज स्वादिष्ट रोटी खईंथ्या जां मोउज-मस्तिरा जीवन जिईंथ्या। 20तैस अमीर मैहणुरै घरेरै फाटका किनि लाजर नाँईयेरा अक कंगाल भिखारी बेठौरा भुईंथ्या। तेसैरी सारी जांनि पनि जख्म थ्यै। 21जां सै सोचींथ्या कि अमीर मैहणु रोटी खांणा किना बाद जै जुठी रोटी बचि गहींथी, तैन्हैं ला अपड़ु पैट भरिया, ऐठि तेईनी कि कुत्तै बि तेसेरै जख्म चटींथ्यै।
22ऐतियु भूं कि सै गरीब भिखारी लाजर मरि ग्या, जां स्वर्गदूत तैस असेड़ै पूर्वजा अब्राहमा सेईतै रींहणैरै तेईनी लैई गियै। सै अमीर मैहणु बि मरि ग्या जां सै दबि छडा।
23जां जिहींये तेनी अमीर मैहणु नरका मझ पीड़ाय मझ प्यौरै अपड़ै टीरै ला खड़ु तकाउ, ता तेनी दूरां किना लाजर अब्राहमेरै खोक्खा बेठौरा तका। 24तां अमीर मैहणु बौलु, हे पिता अब्राहम! मूं पन दया करि-करि लाजरा भेईजि दै, ताकि सै अपड़ि अंगुलिरा आघा पांणी मझ सैलि करि मिंडी जिभै पन रखि करि ठंडि करिया, केईनी कि आंउ ऐसै आगी मझ तड़फता।
25तां अब्राहमै बौलु, हे पुत्र, याद कर कि तु अपड़ि जिन्दगी मझ सारी अच्छी-अच्छी चीजै लै आ बेठौरा, जां तिहियें लाजरानि धरती पनि सारी बुरी चीजै मेयि गियोरी अत्ति, पण अबै सै ऐठि सुखै सिंउ बेठौरा जां तु तड़फता। 26ऐन्हां सारिया गला छडि करि असेड़ै जां तुवाड़ै बिच अक बड़ा मौटा गढा बणौरा कि जै ऐठां किना ऐस पार ताउ किनि गांहणु बि चहिया ता ना गहि सकता। जां ना कौ तेठां किना असु किनि अईछी सकता। 27तेनी बौलु, ता हे पिता अब्राहम! आंउ ताउ सिंउ विनती काता कि तु लाजरा धरती पन मिंडै बाबेरै घरै भेईज, 28केईनी कि मिंडै पंज भाई अत्तै, आंउ चांहथा कि लाजर गहि करि तेन्हांनि ऐहां गला केरै बारै मझ चेतावनी दिया, ऐहीं ना भुईया कि तैन्हांं बि ऐस दुख दींणै बाई जगाईनी ऐईंणु पुईया। 29अब्राहमै तैस सिंउ बौलु, तैन्हांं किनि ता तैन्हांं समझांंणेरै तेईनी मूसेरी जां भविष्यवक्ता केरी किताबि अत्ति, सै तेन्हैरी व्यवस्था शुणियां जां अपड़ै पापा किना मंन फेरिया। 30तां अमीर मैहणु बौलु, हे पिता अब्राहम! अगर कौ मौरा मझांं तैन्हांं किनि गहिया जां समझाईया ता तैन्हांं अपड़ै पापा किना मंन फैरी लींणा। 31अब्राहमै तैस सिंउ बौलु, अगर सै मूसेरी जां भविष्यवक्ता केरी गल ना मंनतै, ता अगर ऐठां किना मौरा बि जींति करि कौ तैन्हांं किनि गहिया ता तैन्हांं तैस पन विश्वास ना कांना।”
Currently Selected:
लूका 16: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
