लूका 15
15
हरायोउरी भ्रेडेरा उदाहरण
1यीशु जेख्णी उपदेश दिईंथ्या ता बड़ै सारै चुंगी लींणार जैन्हां मैहणु पापी मनींथ्यै तेसेरी गलै शुणनेरै तेईनी तैस किनि अईछींथ्यै। 2पण फरीसी जां यहूदी शास्त्री कुड़कुड़ा करि बोलणा लगै, “ऐक्या ता पापिया सिंउ मिलता जां तैन्हांं सेईतै खांता बि।” 3तां यीशु तैन्हांं सिंउ अक होरा उदाहरण बोला; 4“अगर तुहां मझ कोसक्यै मैहणु किनि शाउ भ्रैडै अत्ति, जां तैन्हांं मझांं अक हराई गहिया, ता सै नाड़ेनुवें भ्रैडा सुनसान मझ छडि करि, तैस सै हराउरी भ्रैड ज्यो-तेईनी सै मेईं ना गांहथी तोपतै रींहणु?” 5जां तैस सै मेईं गांहथी, ता सै बड़ा खुश भौ करि तैस मुंढै पन चुकि करि लै नींता। 6जां अपड़ै घरै अईछी करि मित्रा जां नगरवाला किठैरी करि बोलता, “मूं सेईतै खुशी मना, केईनी कि मिंडी हराउरी भ्रैड मेयि गैई।” 7आंउ तुहां सिंउ बोलता, कि ऐतियै अक मंन फैरने बाऐ पापिरै बारै मझ बि स्वर्गा मझ योउती खुशी मनायुंणी, ज्यौति कि नाड़ेनुवें ऐतियै धर्मियां केरै बारै मझ न मनायुंणी, जैन्हां कि मंन फैरनेरी जरूरत ना।
सुटियोउरै सिक्केरा उदाहरण
8फिरी यीशु अक होरा उदाहरण दी करि बौलु, मनि ल्या कि एकि जनानि किनि चाँदिरै दश सिक्कै अत्तै जां तैन्हांं दशा मझांं अक सुटि गहिया, ता तैस दीया जाई करि पूरू घरा सैत दींणी जां ज्यो-तेईनी तैस सै सिक्का मेयि ना गांहथा त्यो-तेईनी तैस सै तौपणा। 9जां जेख्णी सै सिक्का तेसनी मेयि गांहथा ता सै अपड़ि सहेलिया जां नगरवाला किठैरी करि बोलती कि, मूं सेईतै खुशी मना, केईनी कि मिंडा सुटियोउरा सिक्का मेयि ग्या। 10आंउ तुहां सिंउ सच बोलता कि, “ऐहियें-चारै अक मंन फैरने बाऐ पापिरै तेईनी बि परमेश्वरेरै स्वर्गदूता केरै सांमणै खुशी मनायूंति।”
उड़ाउ पुत्रैरा उदाहरण
11फिरी यीशु अक होरा उदाहरण बोला, एकि मैहणुरै दो पुत्र थ्यै। 12तैन्हांं मझांं हल्कै पुत्रै बबा सिंउ बौलु, हे बाबा! आंउ तिंडै मरना तेईनी भायि ना सकता, तुवाड़ी संम्पति मझ जै हिस्सा मिंडा बंणता सै ऐम्हीं मूंनी दी दै। बबै दोईयो पुत्रा मझ अपड़ि धन संम्पति बंडि दित्ती।
13जां अबै किछ ऐ धियाड़ि भोरी थी कि हल्का पुत्र अपड़ि संम्पतिरा हैसा बैचि करि पेईंसै लैई करि दूर देशानि चलि ग्या, जां तेदि कुकर्मा मझ अपड़ि संम्पति उड़ा दित्ती। 14जां सै सभ किछ खर्च करि बेठा, ता तैस देशा मझ अक बड़ा बडा अकाल पेया, जां तैस किनि खांणुनि बि किछ ना बचु। 15ऐठणीरै तेईनी सै तैस देशेरै रींहणारै एकि मैहणुरै कंम कांना ग्या, तेनी मैहणु सैक्या अपड़ि पट्टि मझ सूंर चाननी भेईजा। 16जां तैस योउती भ्रुख लगोरी थी, कि सै तैन्हांं रोटिया खांणनी बि खुश थ्या, जै सूंर खईंथियै। कि तेनी ला अपड़ु पैट भरिया; पर तेसनी कौ किछ ना दिईंथ्या।
17जेख्णी सै होशी मझ या ता अपड़ै मंना मझ सौचणा लगा, मिंडै बाबेरै घरा मझ योउतै मजदूर अत्तै जैन्हांनि खांणिनी योउती रजि रोटी मेईंती, पण आंउ ऐठि भ्रुख्णां मरता। 18मूं अबै उठिकरि अपड़ै बाबै किनि गांहणु जां तैस सिंउ बोलणु, कि हे बाबा! मीं परमेश्वरेरै जां तिंडै खिलाफ पाप क्यौरा। 19अबै आंउ तिंडा पुत्र बंणनेरै लायक ना, मूं अपड़ै एकि मजूरा समझि करि रखि लै।
उड़ाउ पुत्रैरू वापस ऐईंणु
20तां सै उठिकरि तैस देशा छडि करि अपड़ै बाबै किनि चलि ग्या, सै हालै दूर ऐ थ्या कि, तेसेरै बाबै सै लहि ल्या, जां तैस पन तरस खा करि दाउड़ी करि तेसनी कला दित्ती जां फोकु दींणा लगा। 21पुत्रै तैस सिंउ बौलु, “हे बाबा! मीं परमेश्वरेरै जां तिंडै खिलाफ पाप क्यौरा। अबै आंउ तिंडा पुत्र बंणनेरै लायक ना।”
22पण बबै अपड़ा दासा सिंउ बौलु, “झटपट छै किना छै लिकड़ै कढि करि ऐसनि लुवा, जां ऐसेरै हत्थेरी उंगलि पन अंगुठी जां पैयिड़ा पन बूट लुवा।” 23जां अक बडी धाम तियार करा, ताकि धाम खा करि असै खुशी मनांईया। 24केईनी कि मीं समझोरू थियु कि मिंडा ऐ पुत्र मरि गियौरा भूंणा, पण ऐ जींता; हराई गियौरा थ्या, आज फिरी मेयि ग्या।
बडै पुत्रेरी शिकायत
25मालिकेरा हल्का पुत्र घरै वापस चलि या पण बडा पुत्र पट्टि कंम कांना गियौरा थ्या, जेख्णी सै घरेनी ऐईंता नींड़ पुज्जा, तां तेनी गांणै-बजांणैरा, जां नचणैरा हूला शुणा। 26जां तेनी अक दास शदा करि पुच्छा, “ऐ कितु आ भूंतु?” 27तेनी तैस सिंउ बौलु, तिंडा भाई घरै वापस चलि या, जां तिंडै बाबै अक बडी धाम तियार कराय, ऐठणीरै तेईनी कि तिंडा भाई ठीक-ठाक वापस यौउरा।
28ऐ शुणि करि तैस बड़ा गुस्सा या, जां सै अंदर ना ग्या, पण तेसैरा बाबा भेईर अईछी करि तैस अंदरैनि लै गांहणेरै तेईनी मनांणा लगा। 29तेनी बाबेनी जुबाव दित्ता, कि तका, आंउ ऐत्थरै साला किना तिंडि सेवा काता, जां कदि बि तिंडि कौ गल ना टायि, पण तीं मिंडै तेईनी कदि बि बकरा ना बढा जां धाम ना दित्ती, कि आंउ अपड़ा दोस्ता सिंउ खुशी मनांउ। 30पण जेख्णी तिंडा ऐक्या पुत्र अपड़ा सारा पेईंसा वैश्या मझ उड़ा करि या, ता तुवे तेसेरै तेईनी बडी धाम बंणा करि खुशी मंनातै अत्तै।
31तेनी तैस सिंउ बौलु, मिंडै पुत्र, तु हमेशा मूं सेईतै आ, जां जै किछ मिंडु आ सै सभ किछ तिंडु ऐ आ। 32पण अबै आनंद काना जां खुश भूंणु चेहिंथु, “केईनी कि मीं समझोरू थियु कि तिंडा ऐ भाई मरि गियौरा भूंणा, पण ऐक्या जींता; ऐ हराई गियौरा थ्या, अबै फिरी मेयि ग्या।”
Currently Selected:
लूका 15: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
