यहुन्ना 15
15
यीशु सच्ची दाखलता
1“सच्ची दाखलता आंउ आ, जां मिंडा पिता परमेश्वर किसान आ। 2मूं मझ लगौरी हर डाई जैस पन फल ना लगतै, तैस डाई सै बढि सुटता जां जैस पन फल लगता तैस डाई सै छांटता कि तेत पन हौरा बि जादा फल लगिया। 3तेनी वचने ला जै मीं तुहां सिंउ बोलौरा, तुवे पवित्र भौ गियोरै अत्तै। 4तुवे मिंडै बणि करि रैहलै ता मूं तुहां मझ बणि रींहणु। जिहीं-चारै अगर डाई दाखलता मझ बणि करि ना रिय्हा ता तैस पन अपुवै फल ना लगता, तिहियें-चारै अगर तुवे बि मूं मझ बणि करि ना रैहलै ता तुवे कोई फल ना अंणि सकतै। 5आंउ दाखलता आ तुवे डाई अत्ति। जै मूं मझ बणौरा रींहथा, जां आंउ तैस मझ बंणौरा रींहथा ता सै बड़ा फलता। केईनी कि मूं किना अलग भौ करि तुवे किछ न करि सकतै। 6अगर जै मूं मझ बणि न रिय्हा, ता सै डाई सैयि बढि दियूंता, जां शुकि गांहथी, जां मैहणु तैस बटौई करि आगी मझ सुटि दींतै जां सै फुकी गांहथी। 7अगर तुवे मूं मझ बंणी रिय्हा जां मिंडी शिक्षा तुहां मझ बंणी रिय्हा, ता चाहै जै मगेलै ता सै तुवाड़ै तेईनी भौ गांहणु। 8मिंडै पिताऐरी महिमा ऐसै मझ आ कि तुवे बड़ै फल अंणा। तां तुवे मिंडै चैलै ठहरायूंणै। 9जेतिया पिता परमेश्वरै मूं सेईतै प्रेम केया, तेतियाऐ मीं बि तुहां सेईतै प्रेम केया। तुवे मिंडै प्रेमा मझ बणि रिय्हा। 10अगर तुवे मिंडी आज्ञाय केरा पालन करेलै जां मिंडै प्रेमा मझ बणौरै रैहलै; जिहीं कि मीं अपड़ै पिता परमेश्वरेरी आज्ञाय केरा पालन क्यौरा जां तेसेरै प्रेमा मझ बणौरा रींहथा। 11मीं ऐ गलै तुहां सेईतै ऐठणीरै तेईनी बोलि कि मिंडा आनन्द तुहां मझ भुईया जां तुवाड़ा आनन्द पूरा भौ गहिया।”
चैला केरा एकि दुवें सिंउ रिश्ता
12मिंडी आज्ञा ऐ आ, कि जेतिया प्रेम मीं तुहां सेईतै केया, तींहै तुवे बि एकि दुवें सेईतै प्रेम करा। 13ऐस किना बडा प्रेम कोसेरा बि ना कि कौ अपड़ै मित्रैरै तेईनी अपड़ि जांन दिया। 14अगर तुवे मिंडी दितोरी आज्ञाय केरा पालन कातै, ता तुवे मिंडै मित्र अत्तै। 15अबै आंउ तुहांनि दास न बोलैला केईनी कि दास न जांणता कि तेसैरा मालिक कितु कांनारा। मीं तुहांनि अपड़ा मित्र बौलु केईनी कि मीं अपड़ै पिता परमेश्वरा किना जै किछ शुंणु, सै सभ तुहांनि शुणा दितोरू आ। 16तुहैं आंउ ना चुणा पण मीं तुवे ऐठणीरै तेईनी चुणै जां नियुक्त क्यै, कि तुवे संसारा मझ गहि करि फल अंणा जां फल बंणी रिय्हा, तुवे मिंडै चैलै अत्तै ऐठणीरै तेईनी तुवे मिंडु नाँ लै करि जै बि पिता परमेश्वरा किना मगेलै, सै तुहांनि मेईंणु। 17ऐन्हां गला केरी आज्ञा आंउ तुहांनि ऐठणीरै तेईनी दींता कि तुवे योकिया सिंउ प्रेम रखा।
संसारैरा बैर
18अगर संसारेरै मैहणु तुहां सिंउ बैर रखतै ता तुहां पता कि तैन्हैं तुहां किना पेहिलै मूं सिंउ बैर रखौरा आ। 19अगर तुवे संसारैरा मैहणुवां सैयि भूंतै भुईं ता संसारैरा मैहणुवां तुवे अपड़ै समझि करि प्रेम कांना थ्या। पण तुवे संसारेरै नत्तै, केईनी कि मीं तुवे संसारा किना चुणी लियौरै अत्तै। ऐठणीरै तेईनी संसार तुहां सिंउ बैर काता। 20मीं तुहां सिंउ जै गल बोलोरी आ, तैस चैतै रखा दास कदि अपड़ै मालिका किना बडा ना भूंता। अगर तैन्हैं आंउ सता, ता तैन्हांं तुवे बि सतांणै। अगर तैन्हैं मिंडै वचनेरा पालन केया ता तैन्हांं तुवाड़ै वचनेरा बि पालन कांना। 21पण ऐन्हां सभनियांं मैहणुवां ऐ तुहां सिंउ ऐठणीरै तेईनी कांनु केईनी कि तुवे मिन्डै चैलै अत्तै, केईनी कि जेनि आंउ भेईजौरा आ, तैस सै ना जांणतै। 22“अगर आंउ ना ऐईंता भुईं जां तेन्हांनि शिक्षा ना दींता भुईं, ता तेन्हांनि पाप बि ना थ्या लगणा, पण अबै तैन्हांं किनि अपड़ै पापा किना बचणैरा कौ बहाना ना।” 23जै मूं सिंउ बैर रखता सै पिता परमेश्वरा सिंउ बि बैर रखता। 24अगर मीं तैन्हांं केरै सांमणै सै अदभुत चमत्कार ना भूंतै क्यौरै, जै होरै कुनि कदि नत्तै क्यौरै, ता तेन्हांनि पाप ना थ्या लगणा। पण अबै ता तैन्हांं तका करि बि मूं जां मिंडै पिता परमेश्वरा सिंउ बैर क्यौरा आ। 25ऐ ऐठणीरै तेईनी भूं कि सै वचन पूरा भुईया जै तेन्हैरै पवित्र शास्त्रा मझ लिखोरू आ; तैन्हैं मूं सिंउ बिना मतलबै बैर केया। 26“पण जेख्णी सै सहायक ऐईंणा, जै मूं पिता परमेश्वरा किना तुहां किनि भेईजणा, मतलब जैस मझ सच्चाईरा आत्मा, जै पिता परमेश्वरा किना निकूंथा, ता तैस मिंडै बारै मझ गवाहि दींणी। 27जां तुहां बि गवाहि दींणी, केईनी कि तुवे शुरूवाति किना मूं सेईतै अत्तै।”
Currently Selected:
यहुन्ना 15: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
