यहुन्ना 11
11
लाजरैरी मोउत
1लाजर नाँईयेरा अक मैहणु बिमार भौ ग्या। सै मरियम जां तेसैरी भीणिरै मार्थायरू ग्राँ बैतनिय्याह किना थ्या। 2ऐ सैहै मरियम थी, जेनि प्रभुरै पैयिड़ा पन इत्र तैल सुटि करि सै अपड़ु शिरै ला पूंछथिया, तेसैरा भाई लाजर बिमार थ्या। 3तैन्हैं दोईयो भीणियें यीशुनि विषैक भेईजा, “हे प्रभु! तका, जैस सिंउ तु प्रेम काता सै बिमार आ।”
4जेख्णी यीशु ऐ शुणु ता तेनी बौलु, “ऐनि बिमारी ला मैहणु मरता ना, पण ऐ बिमारी परमेश्वरेरी महिमा भूंणेरै तेईनी आ भोरी। ऐनि ला परमेश्वरेरै पुत्रेरी मतलब मिंडी महिमा भूंणी।” 5यीशु, मार्थाय जां तेसैरी भीणी मरियम जां लाजरा सिंउ बड़ा प्रेम करींथ्या। 6पण ऐ शुणि करि कि लाजर बिमार आ, ता सै जेठि थ्या, तैठि दो धियाड़ि हौरा रुकि गिया; 7दुवां धियाड़िया किना बाद यीशु अपड़ा चैलानि बौलु, “ऐईछा! चला, असै यहूदिया प्रदेशनी गांहथै।” 8चैलै तेसनी बौलु, “हे गुरू! किछ धियाड़ि पेहिलै तेठणिरै यहूदी अगुवे तुहां पन घौड़ बजि करि मांना चांहथै थ्यै, जां फिरी तु तैठि गांहणा चांहथा?” 9यीशु बौलु, “क्या एकि धियाड़ि मझ बाराह घंण्टे ना भूंतै? जै धियाड़ी चलतै सै ठौकर ना खांतै, केईनी कि सै इस संसारेरू प्रगड़ु मतलब दीहा तकांतै अत्तै। 10पण जै राती चलतै, तैहांनि ठौकर लगती, केईनी कि तैन्हांं मझ प्रगड़ु ना भूंतु।”
11योउतु-तियु बोलणा किना बाद तैन्हैं फिरी बौलु, “असैड़ा मित्र लाजर झुलि गियौरा, पण आंउ तैस निंदरै किना ब्यौल्हणनि गांहथा।” 12तां चैलै तेसनी बौलु, “हे प्रभु! अगर सै झुलोरा ता सै ठीक भौ गांहणा।” 13यीशु ऐ गलै तेसैरी मोउतिरै बारै बोलोरी थी, पण चैलै समझु कि तेनी निद्रि मझ झुलि करि आराम कांनेरै बारै मझ बौलु। 14तां फिरी यीशु तैन्हांं सेईतै साफ-साफ बोलि दित्तु कि, “लाजर मरि गियौरा, 15जां आंउ तुवाड़ै फायदेरै तेईनी खुश आ कि आंउ तैठि ना थ्या, जेनि ला तुवे विश्वास करि लिया। चला, असै तैस किनि गांहथै।” 16तां थोमा जेसैरू नाँ दिदुमुस बि थियु, तैस सिंउ जै चैलै थ्यै, तेनी तेन्हांनि बौलु, “ऐईछा, असै बि ऐस सिंउ मरननी चलतै।”
यीशु पुनरूत्थान जां जीवन
17जेख्णी यीशु बैतनिय्याह ग्राँ मझ या ता तैस पता लगा कि लाजरा कब्रि मझ दबौरै चोउर धियाड़ी भौ गियोरी अत्ति। 18बैतनिय्याह ग्राँ यरूशलेम शहरा किना लगभग त्रा किलोमीटर दूर थियु। 19ऐठणीरै तेईनी बड़ै मैहणु यहूदी प्रदेशा किना मार्थाय जां मरियमा किनि, तैन्हांं बिचरांणनि यौउरै थ्यै। 20जिहींये मार्थाय ऐ शुणु कि यीशु ऐईंता आ, सै तैस सिंउ मिलणा गैई। पण मरियम घरा मझ बेठौरी रैही। 21मार्थाय यीशु सेईतै बौलु, “हे प्रभु! अगर तु ऐड़ि भूंता, ता मिंडा भाई मरना ना थ्या। 22जां मूं पता कि ऐमिहां बि जै तु परमेश्वरा किना मगैला सै परमेश्वरा ताउनि दी दींणु।” 23जां यीशु तैस सेईतै बौलु, “तिंडे भाई फिरी जींति गांहणु।” 24मार्थाय यीशु सेईतै बौलु, “मूं पता, फैसलेरी धियाड़ि तैस दुबारे जींति गांहणु।” 25यीशु उत्तर दिता, पुनरूत्थान जां जीवन आंउ आ, जै मूं पन विश्वास काता अगर सै मरि बि गहिया ता सै मरि करि बि जींता रींहणा। 26जां जै कौ जींता आ जां मूं पन विश्वास रखता सै अनंतकाल तेईनी ना मरना। क्या तु ऐस गलै पन विश्वास काति। 27तेनी बौलु, “हे प्रभु! मीं विश्वास क्यौरा आ कि तु परमेश्वरैरा पुत्र मसीह आ, जै संसारा मझ ऐईंणै वा थ्या, तु सैहै आ।”
यीशु लैरी दित्ती
28सै ऐ बोलि करि चलि गैई जां अपड़ि भींण मरियम बलै बोलि करि शदाय जां तैस सिंउ बौलु, “प्रभु ऐठि आ जां तु शदांणी आ लाउरी।” 29ऐ शुणि करि सै झट खड़ी भुई जां यीशु सिंउ मिलणनी गैई। 30यीशु हालै-तेईनी ग्राँ ना थ्या पुजौरा, सै तेसै जगाय थ्या जेठि मार्था तैस मेईथी। 31जै यहूदी मैहणु तेसेरै घरै तैस बिचरांणनि यौउरै थ्यै, तैन्हैं जेख्णी मरियम खड़ी भौ करि भेईनि गांहथी तकाय ता सै बि तैस पिचोरै भेईनि चलि ग्यै; केईनी कि तैन्हैं समझु कि सै कब्रि पन लैरी दींणनी गैई।
32जां मरियम तैठि पुजि जेठि यीशु थ्या, तैस तकांतै सिंउ सै तेसेरै पैयिड़ा पै गैई जां बौलु, “हे प्रभु! अगर तु ऐड़ि भूंता भुईं ता मिंडा भाई मरना ना थ्या।” 33यीशु सै जां जै तैस सेईतै यहूदी मैहणु यौउरै थ्यै तैन्हांं तका करि बड़ा दुखी भौ ग्या जां लंम्बा शुवांश लै करि बौलु, 34“तुहैं सै कोठि आ दबौरा?” तैन्हैं मैहणुवें तैस सेईतै बौलु, “हे प्रभु! चल तका लै।” 35यीशु रूंणा लगा। 36तां ऐ तका करि यहूदी मैहणु बोलणा लगै, “तका! ऐ ऐस सेईतै क्यौता प्रेम रखींथ्या।” 37पण तैन्हांं मझां किछ मैहणु बोलणा लगै, “ऐनि ता कांणै मैहणु बि ठीक क्यौरै अत्तै, ता ऐ लाजरा बि मरना किना बचा सकता थ्या।”
लाजरानि जीवन दान
38यीशु फिरी लम्मा शुवांश ल्या जां कब्रि किनि या, सै कब्र एकि गुफाय मझ थी, जेसेरू दुवारा पन घौड़ रखौरा थ्या। 39यीशु बौलु, “घौड़ घैरा।” तैस मौरै मैहणुरी भींणी मार्थाय यीशु सेईतै बौलु, “हे प्रभु! तैस मौरै चोउर धियाड़ि भौ गियोरी अत्ति अबै तैस पनां मुस्क ऐईंती भूंणी।” 40यीशु बौलु, “क्या मीं ताउ सिंउ बोलोरू ना थियु कि अगर तु मूं पन विश्वास काति, ता ताउ परमेश्वरेरी महिमा तकाणी?” 41ऐत पनि मैहणुवें घौड़ घैरी ल्या जां यीशु स्वर्गा धेरै तका करि बौलु, “हे पिता परमेश्वर! आंउ तिंडा धन्यवाद काता; कि तीं मिंडी गल शुणि लैई। 42जां मूं पता थ्या, कि तु सदा मिंडी शुणता, पण जै भीड़ मूं किनि आस-पास खड़ी आ तेन्हैरै कारण मीं जौरै हक दी-करि बौलु, जेनि ला कि ऐ मैहणु विश्वास करिया कि तीं आंउ भेईजौरा।” 43ऐ बोलि करि तेनी जौरै हक दी करि बौलु, “हे लाजर! भेईर निकोहि आ।” 44मौरा लाजर भेईर चलि या, तेसेरै हत्थ जां पैयिड़ कफणै ला बंन्हौरै थ्यै जां तेसेरू मुहां पन कफण पलैटोरू थियु। यीशु मैहणुवां सिंउ बौलु, “ऐसेरू कफण खोलि दिया जां ऐस गांहणा दिया।”
यीशुरै खिलाफ षड़यंत्र
45जै यहूदी मैहणु मरियमा किनि मिलणा यौउरै थ्यै जां जैन्हैं यीशुरा ऐ चमत्कार तका, तैन्हांं मझां बड़ै सारै मैहणुवें यीशु पन विश्वास केया। 46पण तैन्हांं मझां किछ मैहणुवें फरीसिया किनि गहि करि ऐ शुणा दित्तु कि यीशु कितु कियु। 47तां फिरी प्रधानयाजके जां फरीसियै सभा-घरेरै मैहणु शदाय जां तैन्हांं सिंउ बौलु, “असु कितु कांनु? ऐ मैहणु बड़ै हौरंन्धै चमत्कार लुहाता। 48अगर असै ऐस ऐहियें कातै रींहणा दैलै, ता सभनियांं तैस पन विश्वास करि लींणा कि सैहै मसीह आ जां रोम सरकारी अईछी करि असेड़ि जाति जां मंदर नष्ट करि दींणै।”
49तां तैन्हांं मझ यहूदी सभायरा कैफा नाँईयेरा अक मैहणु थ्या जै तैस साला महायाजक थ्या, तेनी तैन्हांं सिंउ बौलु, कि तुवे मैहणु किछ ना जांणतै। 50जां ना तुवे समझतै अत्तै कि तुवाड़ै तेईनी ऐ अच्छु आ कि मैहणुवां केरै तेईनी अक मैहणु मरिया जां पूरै इस्राएल देशेरै मैहणु नष्ट ना भुईया।
51-52तेनी ऐ गल अपड़ि तरफ सिंउ ना बोलि पण एकि महायाजकेरै रूपा मझ भविष्यवाणी की कि यीशु यहूदी जातिरै मैहणुवां केरै तेईनी अपड़ि जांन दींणी। तैस सिर्फ यहूदी जातिरै तेईनी ऐ ना पण ऐठणीरै तेईनी कि तैस परमेश्वरेरै सारै भटकोरै मैहणु किट्ठै कांनेरै तेईनी बि अपड़ि जान दींणी। 53तेसै धियाड़ी किना यहूदी अगुवे यीशु मांनेरै तेईनी सलाह कांना लगै। 54ऐस साजिशिरी वजहि ला यीशु तैस टैंमा यहूदी मैहणुवां मझ खुलै-आम ऐईंणु-गांहणु बन्द करि दित्तु। जां फिरी सै तैठि रेगिस्थाना नीड़ एकि इफ्राईम नाँईयेरू ग्राँनि चलि ग्या, जां तैठि अपड़ा चैला सिंउ रींहणा लगा।
55यहूदिया केरा फसहैरा त्यौव्हार नीड़ थ्या। बड़ै सारै मैहणु त्यौव्हारा किना पेहिलै अपांणा शुद्ध कांनेरै तेईनी ग्राँ किना यरूशलेम शहरानि यै। 56सै यीशु तौपणा लगै जां मंदरा मझ खड़ै भौ करि योकिया मझ गलै कातै थ्यै कि, “तुवे कितु सौचतै अत्तै कि तैस त्यौव्हारा मझ ऐईंणु कि ना?” 57प्रधानयाजके जां फरीसियै यीशु गिरफ्तार कांनेरै तेईनी ऐ आदेश दितौरा थ्या, कि कोस बि मैहणु पता लगी गहिया कि यीशु कोठि आ ता सै तेसैरा पता तेन्हांनि दिया कि सै यीशु गिरफ्तार करि लिया।
Currently Selected:
यहुन्ना 11: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
