यहुन्ना 10
10
पुव्हाला जां भ्रैडा केरा उदाहरण
1“आंउ तुहां सिंउ सच-सच बोलता कि जै कौ भ्रैडा केरै बाड़ा मझ दुवारै बत्तै ना ऐईंता, पण होरी बत्तै ऐईंता सै चौर या डाकु भूंता। 2पण जै दुवारै बतै ऐईंता, सै भ्रैडा केरा पुव्हाल भूंता। 3जां तेसेरै तेईनी चोकिदार दुवार खौलता। भ्रैडै तेसैरी आवाज परयांणति। सै भ्रैडा केरू नाँ लै करि शदांता जां भेईनि लै गांहथा। 4जेख्णी सै सारिया भ्रैडा भेईनि कढता ता सै आघै-आघै चलता, जां भ्रैडै तैस पिचालीं चलती; केईनी कि भ्रैडै तेसैरी आवाज परयांणति। 5सै अणजांण मैहणु पिचालीं ना गांहथी, पण तैस किना दूरनि नशति; केईनी कि भ्रैडै तेसैरी आवाज ना परयांणति।” 6यीशु तैन्हांं सिंउ ऐ उदाहरण बोला, पण तैन्हांं समझ ना लगी कि जै यीशु बोलता; तेठणीरा मतलब कितु आ।
आंउ भ्रैडा केरू दुवार आ
7ऐठणीरै तेईनी यीशु फिरी तैन्हांं सिंउ बौलु, “आंउ तुहां सिंउ सच-सच बोलता कि भ्रैडा केरू दुवार आंउ आ। 8जेत्थरै मूं किना पेहिलै यौउरै अत्तै सै चौर जां डाकु अत्तै, पण मिंडी भ्रैडै तेन्हैरी गलै ना शुणि। 9दुवार आंउ आ; मिंडै जरियै दुवारै बत्तै अंदरैनि ऐईंणारा केरा परमेश्वरा उद्धार कांना। तैस अंदर भेईर गहियां कांनु जां तेसनी खांणेरै तेईनी अच्छु-अच्छु मेईंणु। 10चौर सिर्फ भ्रैडा केरी चोरी कांननी, मारननि जां नष्ट कांनेरै तेईनी ऐईंता। आंउ ऐठणीरै तेईनी यौउरा कि तेन्हांनि पूरी तराहि सिंउ जीवन मेईया।
11अच्छा पुव्हाल आंउ आ; अच्छा पुव्हाल अपड़िया भ्रैडा केरै तेईनी अपड़ि मर्जी सिंउ अपड़ि जांन दींता। 12मजदूर ना पुव्हाल आ, ना भ्रैडा केरा मालिक आ, भेड़ियै तका करि सै भ्रैडा छडि करि नशि गांहथा जां भेड़िया भ्रैडा केरी कन्नि पन हमला काता जां तित्तर-भित्तर करि छडता। 13मजदूर नशि गांहथा, केईनी कि सै ता मजदूर आ, तैस भ्रैडा केरी कोई चिंता ना।”
14-15“अच्छा पुव्हाल आंउ आ। जिहीं-चारै पिता परमेश्वर मूं जांणता, तिहियें मिंडी भ्रैडै मूं जांणति जां तिहियें आंउ अपड़िया भ्रैडा जांणता। जां आंउ भ्रैडा केरै तेईनी अपड़ि जांन दींणनी बि तियार आ।” 16मिंडी होरी भ्रैडै बि अत्ति, जै ऐस बाड़ा मझीं नत्ती। मूं सै बि अंणनी जरूरी अत्ति, तैन्हांं मिंडी आवाज पछियांणनि। तां सारा केरी अकै कन्नि जां अकै पुव्हाल भूंणा। 17“पिता ऐठणीरै तेईनी मूं सेईतै प्यार काता कि आंउ अपड़ि मर्जी सिंउ अपड़ि जांन दींता ता कि आंउ तैस फिरी वापस लै लियुं। 18कौ मूं किना मिंडै प्रांण ना कढि सकता; पण आंउ ऐपुवै तेसनी अपड़ि मर्जी सिंउ अपड़ै प्रांण दींता। मूंनी अपड़ै प्रांण दींणैरा जां फिरी वापस लींणैरा बि अधिकार आ, ऐक्या अधिकार मूंनी मिंडै पिता परमेश्वरै दितौरा।”
19ऐन्हां गला केरी वजहि सिंउ यहूदी मैहणुवां मझ फिरी फूट पै गैई। 20तैन्हांं मझां बड़ै सारै मैहणु बोलणा लगै, “ऐस मझ बुरी आत्मा आ जां सै पागल आ तेसैरी मेईं शुंणा?” 21जां किछ होरै मैहणुवें बौलु, “ऐ गलै ऐतियै मैहणुरी ना भौ सकती जैस मझ बुरी आत्मा आ, क्या दुष्ट आत्मा कांणै मैहणुवां केरै टीरै ठीक करि सकता।”
यहूदिया केरा अविश्वास
22तैन्हांं धियाड़िया यरूशलेम शहरा मझ यहूदी मंदरेरै उदघाटनैरा त्यौव्हार मनांयूंता थ्या, जां ठंण्डिरा मौसम थ्या। 23यीशु मंदरा मझ सुलेमानेरै बंणाउरै बरांडै मझ घुमता-फिरता थ्या। 24तां यहूदी अगुवे अईछी करि यीशु घैरना लगै जां बौलु, “तु असु क्यो-तेईनी सौचणा पन मजबूर काता रैहला? अगर तु मसीह आ ता सही-सही शुणा।”
25यीशु तेन्हांनि उत्तर दिता, “मीं तुहां मैहणुवां सिंउ शुणा दितोरू आ, पण तुवे विश्वास ना कातै, जै कम आंउ अपड़ै पिताऐरु ना लै करि काता, सैहै मिंडै गवाह अत्तै। 26पण तुवे ऐठणीरै तेईनी विश्वास ना कातै कि तुवे मिंडी भ्रैडा मझां नत्तै। 27मिंडी भ्रैडै मिंडी आवाज परयांणति, आंउ तैन्हांं जांणता जां सै मूं पीछै-पीछै चलती। 28आंउ तेन्हांनि अनन्त जीवन दींता, सै कदि नष्ट ना भूंणी जां तैन्हांं मूं किना कौ हरि ना सकता। 29जै किछ मिंडै पिता परमेश्वरै मूंनी दितोरू आ, सै सभनियांं किना महान आ, जां तैस पिता परमेश्वरेरै हत्था किना कौ हरि ना सकता। 30आंउ जां मिंडा पिता अक्कै अत्तै।”
31फिरी जै यहूदी अगुवे थ्यै, तैन्हैं यीशु मांनेरै तेईनी दुबारे घौड़ चुक्कै। 32ऐत पन यीशु तेन्हांनि बौलु, “मीं अपड़ै पिता परमेश्वरेरी तरफ सिंउ तुहां मैहणुवां केरै सांमणै बड़ै अच्छै-अच्छै कम लुहाओरै अत्तै, तैन्हांं मझियें कोस कंमेरै तेईनी तुवे मूं पन घौड़तिया अत्तै बजतै।” 33तैन्हैं तेसनी उत्तर दिता, “कोसक्यै भलै कंमेरै तेईनी ना पण परमेश्वरेरी निंदा कांनेरै तेईनी असै ताउ पन घौड़तिया बजि करि मारी छडणा चांहथै अत्तै, केईनी कि तु मैहणु भौ-करि अपड़ै आपानि परमेश्वर भूंणैरा दावा काता।” 34यीशु तेन्हांनि उत्तर दिता, “क्या पवित्र शास्त्रा मझ ऐहीं ना लिखोरू कि, परमेश्वरै अपड़ै मैहणुवां केरै अगुवो सिंउ बोलोरू आ कि; तुवे ईश्वर अत्तै? 35तुहां पता कि पवित्र शास्त्रा मझ लिखोरू किछ बि बदली ना सकतु। ऐठणीरै तेईनी अगर तेसेरै मैहणुवां केरै अगुवोनि ‘परमेश्वर’ बोलोरू आ; 36ता जै पिता परमेश्वरै पवित्र बंणा करि संसारा मझ भेईजौरा, तैस सिंउ तुवे मैहणु ऐ किहीं बोलि सकतै, तुवे ईश्वरैरी निंदा कातै रींहथै; केईनी कि मीं बौलु, आंउ परमेश्वरैरा पुत्र आ।” 37“अगर आंउ अपड़ै पिता परमेश्वरेरै कम ना काता, ता तुवे मूं पन विश्वास मेईं करा।” 38पण अगर आंउ तैन्हां कंमा काता, ता बेशक मूं पन विश्वास मेईं करा पण तैन्हांं कंमा केरा विश्वास करा जेनि ला तुहां पता लगी गहिया जां तुवे समझि गहिया पिता परमेश्वर मूं मझ आ जां आंउ पिता परमेश्वरा मझ आ। 39तां तैन्हैं फिरी यीशु पकड़नेरी कोशिश की पण सै तेन्हैरै हत्था किना निकोहि करि दूर चलि ग्या।
40फिरी यीशु यरदन नदी पार तैस जगायनी चलि ग्या जेठि पेहिलै यूहन्ना बपतिस्मा दिईंथ्या जां फिरी सै तैठिऐ बेठा। 41जां बड़ै मैहणु तैठि ऐईंणा लगै जां बोलींथ्यै, “यूहन्ने ता कोई चमत्कार ना लुहा, पण यूहन्ने जै किछ ऐस मैहणुरै बारै बौलु सै सभ किछ सच निकोत्थु।” 42जां तैठि बड़ै सारै मैहणुवें यीशु पन विश्वास केया।
Currently Selected:
यहुन्ना 10: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
