प्रेरितों के काम 8
8
कलीसियै पन सताव
1शाऊल स्तिफनुसा मांना मझ बि पूरी तराहि सिंउ सहमत थ्या। तेसै धियाड़ी यरूशलेम शहरा मझ विश्वासिया पन बड़ा सताव भूंणा लगा। खास चैला छडि करि सभ विश्वासी यहूदियै जां सामरियै प्रदेशा मझ तित्तर-भित्तर भौ ग्यै। 2जां जै थोड़े मड़द परमेश्वरैरा आदर करींथ्यै, तैन्हैं स्तिफनुसेरी लास कब्रि मझ रखि जां तेसेरै तेईनी बड़ा विलाप केया। 3पण शाऊल तैस टैंमा कलीसियै परेशान काता थ्या; जां घर-घर गहि करि विश्वासी मड़दा जां जनेनियां ध्रीड़ी-ध्रीड़ी करि जैल्ही मझ बंद काता थ्या।
सामरिया मझ फिलिप्पुसेरा प्रचार
4पण जै विश्वासी तित्तर-भित्तर भोरै थ्यै, सै घुमि-फिरी करि खुशखबरी शुणांतै रिय्है। 5जां फिलिप्पुस सामरिया प्रदेशेरै एकि नगरा मझ ग्या जां तेठणिरै मैहणुवां सिंउ मसीहरै बारै मझ प्रचार कांना लगा। 6जै गलै फिलिप्पुसै बोलि सै गलै मैहणुवें शुणि करि जां जै चिन्ह सै लुहाईंथ्या तैन्हांं तका करि मैहणु अक मंन भौ करि जै गलै तेनी बोलि तैन्हांं पन ध्यान दींणा लगै। 7केईनी कि फिलिप्पुसेरै आदेश दींणै ला बड़ा मैहणुवां मझां अशुद्ध आत्माय जैन्हैं ला सै ग्रसित थ्यै, चिंडै दी-करि निकोहि गैई, जां बड़ै सारै अधरंगी मैहणु जां लट्टै मैहणु ठीक भौ ग्यै। 8जां तैस शहरेरै बड़ै सारै मैहणु खुश भौ ग्यै।
जादूगर शमौन
9तैस नगरा मझ अक शमौन नाँईयेरा मैहणु थ्या, जै जादु-टोंणा करि सामरिया नगरैरा मैहणुवां हैरान करींथ्या जां अपड़ै-आपानि बड़ा महान मड़द शुणाईंथ्या। 10जां सारै हल्कै-बडै तेसैरी गलै शुणियां करींथ्यै, कि “ऐ मैहणु परमेश्वरेरी सैकेई शक्ति आ जैसनि महान बोलतै।” 11तेनी बड़ै धियाड़िया किना सैक्यै मैहणु जादु-टोंणै ला हैरान करि रखौरै थ्यै, ऐठणीरै तेईनी सै तैस धेरै बड़ा ध्यान दिईंथ्यै। 12पण जेख्णी मैहणुवें परमेश्वरेरै राज्यरी जां यीशु मसीहरै नाँईयेरी खुशखबरी फिलिप्पुसेरै जरियै शुणि करि विश्वास केया, तां फिरी मड़दै जां जनेनियें बपतिस्मा ल्या। 13तां शमौने ऐपु बि फिलिप्पुसेरै संदेशा पन विश्वास केया जां बपतिस्मा लै करि फिलिप्पुसेरै पीछै-पीछै सारिया जगाईया गांहणा लगा जां चिन्ह जां अदभुत कम तका करि हैरान भौ गहींथ्या।
सामरिया मझ पतरस जां यूहन्ना
14जेख्णी खास चैलै जै यरूशलेम शहरा मझ शुणोरू थियु कि सामरिया प्रदेशेरै मैहणुवें परमेश्वरैरा वचन मनि लियौरा, तां पतरस जां यूहन्ना तैन्हांं किनि भेईजै। 15जां तैन्हैं तैठि पुज्जी करि नवाँ विश्वासिया केरै तेईनी प्रार्थना की कि तेन्हांनि पवित्र आत्मा मेईया। 16केईनी कि हालै-तेईनी पवित्र आत्मा तैन्हांं मझां कोसनि ना थ्या मेऔरा, तैन्हैं ता बस प्रभु यीशुरै नाँईयां मझ बपतिस्मा लियौरा थ्या। 17तां पतरसै जां यूहन्ने तैन्हांं पन हत्थ रखै जां तेन्हांनि पवित्र आत्मा मैआ। 18जेख्णी शमौनै तकाउ कि खास चैला केरै कोसक्यै मैहणु पन हत्थ रखणै ला पवित्र आत्मा मेईंता, ता तेनी तैन्हांं किनि पेईंसै अंणि करि बौलु कि, 19“छंदै ऐ शक्ति मूंनी बि देया, कि आंउ जैस-कोस पन बि हत्थ रखूँ, तेन्हांनि पवित्र आत्मा मेईया।” 20पतरसै तैस सेईतै बौलु, “तु जां तिंडा पेईंसा ताउ सेईतै नाश भौ गहिया, केईनी कि तीं परमेश्वरैरा दान पेईंसै मझ खरीदणैरी गल सौचि। 21ऐस खुशखबरिरी सेवकाय मझ ना तिंडा हिस्सा, ना भाग, केईनी कि तिंडि सौच परमेश्वरेरै सांमणै सच्ची ना। 22ऐठणीरै तेईनी अपड़ा मंन बदल जां पाप कांने बंद कर जां अपड़ि बुराई किना मंन फैर, प्रभु सिंउ प्रार्थना कर, तां शायद तिंडै मंनेरै विचार माफ करि दिया। 23अपड़ि बुराई किना अपड़ा मंन फैर केईनी कि आंउ तकांता, कि तु जलन सिंउ भरियोरा जां पापेरै वशा मझ पियौरा।” 24शमौनै उत्तर दित्ता कि, तुवे मिंडै तेईनी प्रभु सिंउ प्रार्थना करा कि जै गलै तुहैं बोलि, तैन्हांं मझां कौ बि गल मूं सिंउ ना भुईया। 25तेख्णी पतरस जां यूहन्ना ऐठां किना बाद गवाहि जां यीशु मसीहरा प्रचार कांना किना बाद सामरियै प्रदेशेरै केहिया ग्राँईयां मझ खुशखबरी शुणाय, जेख्णी सैक्यै यरूशलेम शहरानि वापस ऐयिंतै थ्यै।
फिलिप्पुस जां इथियोपिया देशैरा अधिकारी
26फिरी प्रभुरै एकि स्वर्गदूतै फिलिप्पुसा सेईतै बौलु, “खड़ा भौ, जां दक्षिण धेरै तेनी बत्तै गा, जै यरूशलेम शहरा किना गाजा शहरानि गांहथी। ऐ बत्त रेगिस्थानै बतै थी।” 27ऐठणीरै तेईनी फिलिप्पुस तियार भौ करि चलि पेया, जां तां अजाग्गै सै इथियोपिया देशेरै एकि मैहणु सिंउ मैआ, जै कि अक हिजड़ा थ्या। सै अक खास अधिकारी थ्या, जै इथियोपिया देशैरी रांणी कन्दाकेरी राज्य सभाय मझ देख-रेख करींथ्या, जां जै पूजा कांननी यरूशलेम शहरा मझ यौउरा थ्या। 28जां सै अपड़ै देशानि रत्था पन गांहथा थ्या, जां यशायाह भविष्यवक्तेरी किताब जौरै-जौरै पढ़ता चलौरा थ्या। 29तां पवित्र आत्माय फिलिप्पुसा सिंउ बौलु, “नीड़ गा जां रत्था सेईतै-सेईतै चल।”
30फिलिप्पुस दाउड़ी करि रत्था किनि पुज्जा जां तेनी सैक्या यशायाह भविष्यवक्तेरी किताब पढ़ता शुणा, जां पुच्छा कि, “क्या तु जै पढ़ता, तैस समझता बि आ।” 31तेनी जुबाव दित्ता, कि “अगर कौ मूंनी शुणांणार ना भुईया ता आंउ ऐस किहीं समझि सकता?” जां तेनी फिलिप्पुसा सिंउ छंदै क्यै कि, चढ़ी करि रत्था पन मूं सेईतै बेश। जां फिलिप्पुस तैठि गहि करि बेशि ग्या।
32पवित्र शास्त्रैरा जै भाग सै पढ़ता थ्या, सै ऐ आ; “कि जिहीं भ्रैडै बढणेरै तेईनी नींतै जां जीं मेम्ना उन्नै मुनणारै किनि चुप-चाप बेशता, तिहीं ऐ तेनी अपड़ु मुँह ना खौलु। 33तेसैरा अपमान केया जां तेसनी न्याय ना मैआ, कौ बि तेसेरै वंशेरै बारै मझ ना शुणां सकता? केईनी कि ऐठां पेहिलै कि धरती पन ऐसेरा कौ वंश भूंता मैहणुवें सै मारी छडा।” 34ऐत पन हिजड़ै फिलिप्पुसा किना पुच्छु कि, “आंउ ताउ सिंउ विनती काता, ऐ मूंनी शुणा कि भविष्यवक्ता ऐ गल कोसेरै बारै मझ बोलता, अपड़ै बारै मझ या कोसक्यै होरेरै बारै मझ?” 35तां फिलिप्पुसै बोलणु शुरू कियु जां ऐसै पवित्र शास्त्रेरै भागा किना शुरू करि-करि तेसनी यीशुरी खुशखबरी शुणाय, फिरी सै हिजड़ा समझि ग्या जां यीशु पन विश्वास केया।
36बत्तै मझ चलतै-चलतै एकि तलाबा किनि पुज्जै, तां हिजड़ै बौलु, “तका, ऐठि तालाब आ, अबै मूंनी बपतिस्मा लींणैरै तेईनी कितु रौक आ?” 37फिलिप्पुसै बौलु, “अगर तु पूरै मंन किना विश्वास काता ता बपतिस्मा लै सकता।” तेनी जुबाव दित्ता कि, “आंउ विश्वास काता कि यीशु मसीह ऐ परमेश्वरैरा पुत्र आ।” 38तां तेनी रत्थ रौकणैरी आज्ञा दित्ती तां फिलिप्पुस जां हिजड़ा दोईयो तलाबा मझ उतरि ग्यै, जां फिलिप्पुसै तेसनी बपतिस्मा दित्ता। 39जां जेख्णी सै पांणी मझां निकोहि करि प्रन यै, ता प्रभुरा आत्मा फिलिप्पुसा उछुई करि लै ग्या, जां हिजड़ै फिरी सैक्या ना लधा, जां सै बड़ा खुश भुआ कि परमेश्वरै सै बचा लिया जां सै अपड़ै देशानि वापस चलि ग्या। 40जां फिलिप्पुसै अपांणा अश्दोद शहरा मझ पुजौरा तका, जां सै हर शहरा मझ खुशखबरी शुणांता ग्या जेख्णी तेईनी सै कैसरिया शहरा मझ ना पुज्जा।
Currently Selected:
प्रेरितों के काम 8: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
