प्रेरितों के काम 7
7
स्तिफनुसेरा भाषण
1तां महायाजकै तैन्हांं किना स्वाल पुछा, “क्या ऐन्हैं जै आरोप ला सै सच आ?” 2स्तिफनुसै बौलु, “हे भाईयो जां वुजुर्गो मिंडी गल शुणा, असेड़ै पूर्वज अब्राहम तेसैरू हारान नगरा मझ अईछी करि बसणा किना पेहिलै जेख्णी सै मेसोपोटामिया प्रदेशा मझ थ्या, ता तैस टैंमा महिमामय परमेश्वर असेड़ै पूर्वज अब्राहमनि प्रकट भुआ।” 3जां परमेश्वरै तैस सिंउ बौलु, “तु अपड़ा इलाका जां परिवार छडि दै जां तैस देशानि चलि गा जै दैश मूं ताउनि लुहाना।” 4तां फिरी सै कसदियै देशा किना निकोहि करि हारान नगरा मझ गहि करि बसि ग्या; जां तेसेरै बाबेरी मोउती किना परमेश्वरै सै तेठां किना इस देशा मझ अंणि करि बसा, जैस मझ अबै तुवे बसतै अत्तै। 5पण परमेश्वरै तेसनी ऐठि किछ बि विरासत ना दित्ती, मतलब पैयिड़ रखणेरै तेईनी बि तैठि जगा ना दित्ती, जां तैस किनि तैस टैंमा कौ बि आउलाद ना थी। तां बि परमेश्वरै अब्राहमा सिंउ ऐ वायदा केया कि, मूं ऐ दैश, ताउनि जां ताउ किना बाद तिंडै वंशनि दी दींणा। 6जां परमेश्वरै तैन्हांं सिंउ ऐ बि बौलु, कि तिंडै वंशेरै मैहणु पराऐ देशा मझ परदेशी भूंणै जां तैन्हांं मैहणुवां सै गुलाम बंणा लींणै जां चोउर शाउ साला तेईनी तैन्हांं सिंउ बुरा व्याव्हार कांना। 7फिरी परमेश्वरै बौलु, पण मूं तैस जातिनि सजा दींणी जेसेरै सै गुलाम भूंणै, जां सैक्यै तैस देशा किना कढि करि ऐठि ऐसै जगायनी अणनै जां तैन्हांं मिंडी अराधना कांनी। 8परमेश्वरै अब्राहमा सिंउ अक समझौता केया जां तैस सिंउ बौलु, कि सै अपड़ै घरेरै सारा मड़दा केरा वायदेरै चिन्हेरै रूपा मझ खतना कराईया, बाद मझ जेख्णी इसहाक पेईदा भुआ, जां अठ धियाड़ि बाद अब्राहमै तेसैरा खतना केया। जां इसहाकै अपड़ै पुत्रा याकूबा सिंउ बि ऐहियें कियु जां याकूबै बि अपड़ै पुत्रा सिंउ ऐहियें कियु जै कि बाराह पूर्वज थ्यै।
9जां पूर्वजै अपड़ै भाई यूसुफेरा दुख करि-करि सै मिस्र देशा मझ गांहणारानि गुलाम बंणा करि बैचि दित्ता; पण परमेश्वर तेसेरै अंग-संग थ्या। 10जां परमेश्वरै यूसुफ सभनियांं दुखा किना बचा करि मिस्ररैरै राजै फिरौनेरै नजरियै मझ प्यारा जां बुद्धिमान बणा। फिरौन राजै यूसुफ मिस्र देशा पन जां अपड़ै सारै घरा पन राज्यपाल बंणा दित्ता। 11जेख्णी यूसुफ राज्यपाल थ्या, ता सारै मिस्र जां कनान देशा मझ अंणकाई जां घोर संकट पै ग्या। ऐनि वजहि ला असेड़ै पूर्वजनी अन्न ना नसीब भूं। 12पण याकूबै ऐ शुणु कि मिस्र देशा मझ अनाज मेईंतु आ, ता तैन्हैं असेड़ै पूर्वज तैठि पेहिली बार भेईजै। 13जां दुईं बारी जेख्णी सै अनाज लींणनी ग्यै ता यूसुफै अपड़ै भाईया केरै सांमणै प्रकट भौ करि बौलु कि सै केणु आ जां यूसुफेरै परिवारेरै बारै मझ फिरौना पता लगी ग्या। 14तां यूसुफै अपड़ा बाबा याकूब जां अपड़ै सारै रिश्तेदार, जै 75 जंणै थ्यै, सै ऐपु किनि विषैक दी-करि शदा ल्यै। 15तां याकूब मिस्र देशा मझ ग्या जां तैड़ी किछ टैंमा बाद याकूब जां असेड़ै पूर्वज बि मरि ग्यै। 16सैक्यै याकूबा जां तेसेरै छोकरूवा केरी लासी असेड़ै देशा कनान मझ लै गियै, जां तैन्हैं याकूबेरी लास तैस कब्रि मझ दबि, जै अब्राहमै सही दाम दी करि खरीदोरी थी, जां तैन्हैं याकूबेरै छौकरै शेकेम शहरेरी तैस जमींनि मझ दबै, जै याकूबै हमोरेरै पुत्रा किना चांदी दी-करि खरीदोरी थी।
17पण जेख्णी तैस वायदै पूरा भूंणैरा टैंम नीड़ या, जै परमेश्वरै अब्राहमा सिंउ क्यौरा थ्या। जां असैड़ा मैहणुवां केरी गिणती मिस्र देशा मझ बड़ी जादा बधि गैई। 18फिरी जेख्णी अक हौरा राजा मिस्र देशा मझ राज्य कांना लगा जै यूसुफा ना जांणीथ्या। 19तेनी असेड़ि जाति सिंउ चलाकी करि-करि असैड़ा पूर्वजा सिंउ यौउता बुरा व्यवहार केया जां जबरदस्ती की कि तेन्हैरा मईया-बबा अपड़ै नउवें जमोरै छोकरू छडणै पियै कि सै मरि गहिया। 20तेसै टैंमा मूसेरा जन्म भुआ। जां सै परमेश्वरेरी नजरी मझ बड़ा छै थ्या जां त्रियां महीना तेईनी तेसेरै मयि-बबै सै कोस किना ना लुहा। 21पण जेख्णी तेन्हैरै बोलै सैक्या हौरा ना छपाईया ता तैन्हैं सै घरा भेईर छडि दित्ता जां फिरौनेरी छोकरी सै ऐपु किनि पाअननि रखि ल्या जां तेनी सै अपड़ा पुत्र समझि करि पाआ। 22मूसेनी मिस्रिया केरी सारी विद्या पढ़ाई जां सैक्या गल-बात कांना जां हर कम कांना मझ सामर्थी थ्या।
23जेख्णी मूसा चाहिया सालैरा भुआ ता तेनी मंना मझ फैसला केया कि सै अपड़ै इस्राएलि भाईया सिंउ गहिकरी मिलिया। 24तैठि तेनी अक मिस्रैरा मैहणु इस्राएलि मैहणु सिंउ बदसलूकि काता तका, तेनी सैक्या मैहणु बचा जां मिस्रि मैहणु मारी करि तेठणीरा बदला ल्या। 25तेनी सौचु, कि तेसेरै भाई समझि गांहणु कि परमेश्वरा तेसेरै जरियै तैन्हांं सभनियांं केरा बचाव कांना पण तैन्हैं ना समझु। 26दुवें रौजै जेख्णी इस्राएलि मैहणु योकिया मझ भिड़ियूंतै थ्यै ता सै तैठि गहि रिय्हा; तेन्हैरा ऐ बोलि करि राजीनामा ला कराणा, कि “तुवे ता भाई-भाई अत्तै, योकिया सिंउ भिड़ियूंतै केईनी अत्तै?” 27पण जै मैहणु अपड़ै पड़ोसी पन बदसलूकि काता थ्या, “तेनी ऐ बोलि करि मूसेनी ढक्का दित्ता कि, तु असु पन मालिक जां न्यायि कुनि बणा?” 28क्या जिहीं-चारै ही तीं सैक्या मिस्रैरा मैहणु मारा तिहीं ऐ तु मूं बि मारी छडणा चांहथा? 29ऐ गल शुणि करि मूसा मिस्र देशा किना नशि ग्या, जां मिद्यान देशा मझ गहि करि परदेशी बंणी करि रींहणा लगा; जां तैठि तेसेरै दो छोकरू भुवै।
30मिद्यान देशा मझ मूसेरै चाही साल रींहणा किना बाद तेसनी सीनै पहाड़ेरै रेगिस्थाना मझ एकि जअतु झिल्लेरी आगी मझ परमेश्वर स्वर्गदूतेरै रूपा मझ लाधी या। 31जेख्णी मूसै जअतु झिल तकाउ ता सै शुश्त भौ ग्या, केईनी कि तेसनी आग पियौरी थी पण सै फुकियूंतु ना थियु। जां जेख्णी सै तैस तकांणनि नीड़ ग्या तां प्रभुरी आवाज बि शुणि कि, 32“आंउ तुवाड़ै पूर्वजा केरा परमेश्वर, अब्राहमेरा परमेश्वर, याकूबेरा परमेश्वर, जां इसहाकैरा परमेश्वर आ।” तां मूसा डरेरै कारण कंपि ग्या, जां तैस तकांणैरी बि हिम्मत ना भुई। 33तां प्रभु तैस सिंउ बौलु, “अपड़ै पैयिड़ा किना बूट खौल, केईनी कि जैस जगाय पन तु खड़ा, सै जगा पवित्र आ। 34मीं मिस्र देशा मझ रींहणै बाऐ अपड़ा मैहणुवां पन अत्याचार भूंता तकाउरा जां तेन्हैरू रूणु-पिटणु शुणि ल्यौरू आ। ऐठणीरै तेईनी आंउ तैन्हांं बचांणनि उतरि यौउरा, अबै आ! मूं तु मिस्र देशानि भेईजणा,
35ऐ सैहै मूसा आ जैसनि मनणा किना इस्राएलेरै मैहणुवें तेसनी नमां केईथ्या जां तेसनी बोलथियु कि, तु कुनि असु पन हाकिम जां न्यायि बंणा?” तैस स्वर्गदूतेरै जरियै जेनि तेसनी जअतु झिल्हा मझ दर्शन दित्थिया, सैहै मूसा परमेश्वरै हाकिम जां छुड़खांणार बंणा करि तैन्हांं किनि भेईजा। 36ऐनियैं मैहणु मिस्र देशा जां लाल समुद्रा जां चाहिया साला केरै दौरान जेख्णी इस्राएलि मैहणु रेगिस्थाना मझ थ्यै, अदभुत कम जां चिन्ह लुहाय करि मिस्र देशा किना भेईर कढि अंणै। 37ऐक्या सैहै मूसा जेनि इस्राएलेरै मैहणुवां सिंउ बौलु कि, “परमेश्वरा तुवाड़ा भाईया मझां मिंडै समान तुवाड़ै तेईनी अक भविष्यवक्ता खड़ा कांना।” 38ऐ सैहै मूसा जेनि सीनै पहाड़ा पन स्वर्गदूता सिंउ गलै केईथी जां असेड़ै पूर्वजा सेईतै रेगिस्थाना मझ थ्या। तैठि तैस मूसेनी जीवन दींणै बाऐ वचन मैऐ जां तेनी सै असु मैहणुवंनी शुणाय। 39पण असेड़ै पूर्वजै तेसैरी गल मंनणा किना नमां केया जां सैक्यै मिस्र देशानि वापस गांहणा चाहंथै थ्यै। 40तैन्हैं मूसेरै भाई हारूना सिंउ बौलु, “असेड़ै तेईनी कुछ दैवतै बंणा जै असु आघै-आघै चलिया जां असेड़ि मिस्र देशानि वापस गांहणैरै तेईनी मजत करिया, केईनी कि ऐ मूसा जै असु मिस्र देशा किना कढि करि लै या, असु ना पता कि तेसनी कितु भूं।” 41तैस टैंमा तैन्हैं अक बछड़ैरी मूरत बंणाय जां तैस मूर्तिनि बलि चढ़ाय; जां अपड़ै हत्थै ला बंणाउरिया मूर्तिया केरै तेईनी अक त्यौव्हार मना।
42ऐहीं कांने ला परमेश्वर तैन्हांं किना रूठि ग्या जां सै असमांणेरी, सूरजेरी, शुकईरी जां तारा केरी पूजा कांननी छडि दित्तै, जिहीं कि भविष्यवक्ता केरी किताबि मझ लिखोरू आ कि, हे इस्राएलेरै मैहणुवो! क्या तुहैं रेगिस्थाना मझ चाहिया साला तेईनी पशुवा केरी बलि जां अन्न-बलि मूंनीऐ चाढ़थी? ना! 43जां ऐठणीरी वजाय तुहैं सै तम्बु ढौता जैस मझ मोलेक देवतैरी मूरत जां तुवाड़ै दैवतै रिफान तारैरी मूर्ती थी, मतलब सैकेई मूर्ती जै तुहैं अराधना कांनेरै तेईनी बंणाउरी थी। ऐठणीरै तेईनी मूं अबै तुवे मैहणु बेबीलोन देशा पार नीं करि बसाणै।
44ऐक्या गवाहिरा तम्बु रेगिस्थाना मझ असेड़ै पूर्वजा केरै बिच थ्या; तैन्हैं तेतिया ऐ बंणा जिहीं परमेश्वरै मूसेनी हुक्म दितौरा थ्या, तेसै ढांचै सैयि जै तीं तकाउरा थ्या तेतियै ऐस बि बंणा। 45बड़ै साल बाद परमेश्वरै होरी जाति जमींनि किना दूर केयि, यहोशू जां असेड़ै पूर्वजै सैकेई जमीन तैन्हांं किना लै लैई। सैक्यै तैस तम्बु ऐपु सेईतै लै यै जां सै तम्बु राजै दाऊदेरै टैंमा तेईनी बंणी रिय्हा। 46राजै दाऊदा पन परमेश्वरै अनुग्रह केया; जां राजै दाऊदै याकूबेरै परमेश्वरेरै तेईनी निवास स्थान बंणाणैरी विनती की। 47पण तेसेरै पुत्रै राजै सुलेमाने तेसेरै तेईनी निवास स्थान बंणा। 48पण परमप्रधान परमेश्वर हत्थेरै बणाउरै निवास स्थान मझ ना रींहथा, जिहीं कि भविष्यवक्ता यशायाहेरी किताबि मझ लिखोरू आ; 49“परमेश्वर बोलता, कि स्वर्ग मिंडा सिंघासन आ जां धरती मिंडै पैयिड़ रखणैरी चौकी आ। सै बोलता; कि तुवे मिंडै तेईनी केतिया निवास स्थान बंणालै? मूंनी बेशणनी केणुहिं-तेयि जगा भूंणी? 50क्या ऐकेई सारी चीजै मीं ऐपु नति बंणाउरी?” 51हे जिद्दी मैहणुवो! मंना मझ आज्ञायरा पालन ना कांने बाऐ जां कंन्ना किना टांउणै मैहणुवो! तुवे हर-बारी पवित्र आत्मायरा विरोध कातै, जिहीं तुवाड़ै पूर्वज बि करींथ्यै। 52-53तुवाड़ै पूर्वजै सभनियांं भविष्यवक्ता पन अत्याचार केया। तैन्हैं सै मैहणु मारी छडै, जैन्हैं पेहिलै किना मसीह ऐईंणेरै बारै मझ जै कि धर्मी मैहणु आ संदेश दी दितौरा थ्या। तुहां मैहणुवां स्वर्गदूता किना व्यवस्थायरै बारै मझ पता लगा, पण तुहैं तेन्हैरी आज्ञा ना मनि जां तुहैं यीशु धोखै सिंउ पकड़वा जां मारी छडा।
स्तिफनुसा पन घौड़तिया
54जेख्णी स्तिफनुसेरी गलै शुणि करि यहूदी अगुवे गुस्सै भौ ग्यै जां स्तिफनुसा पन गुस्सै मझ दंत चापणा लगै। 55पण स्तिफनुसै जै पेहिलै किना पवित्र आत्माय ला भरौरा थ्या सुरगा धेरै तकाउ जां परमेश्वरेरी महिमा जां यीशु परमेश्वरेरै देहिणै पासै खड़ा हैरी करि, 56बौलु, “तका, आंउ सुरग खुलोरू जां मैहणुरै पुत्रा परमेश्वरेरै सुमलै-पासै खड़ा तकांता।” 57तां तैन्हैं चिंडै दी-करि अपड़ै हत्थै ला अपड़ै कंन बंद करि ल्यै जां तैस मांननी तैस पन शिंडै पै ग्यै। 58जां स्तिफनुस यरूशलेम शहरा किना भेईर कढि करि तैस पन घौड़तिया बजि करि सै मारी छडा, जां तैस पनि आरोप लांणारै मैहणुवें अपड़ै भेईरियें लिकड़ै खोलि करि शाऊल नाँईयेरै एकि जुवानेरै पैयिड़ा किनि रखि दित्तै। 59जां सै स्तिफनुसा पन घौड़तिया बजतै रिय्है जां तेनी ऐ बोलि करि प्रार्थना की कि, “हे प्रभु! यीशु मिंडी आत्मा ग्रहण कर।” 60फिरी तेनी जेणु टंकि करि जौरै चिन्ड दी करि हक दित्ती, “हे प्रभु! ऐस पापेरै तेईनी ऐन्हांनि माफ कर।” जां सै मरि ग्या।
Currently Selected:
प्रेरितों के काम 7: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
