प्रेरितों के काम 5
5
हनन्याह जां सफीरा
1जां हनन्याह नाँईयेरा अक मैहणु थ्या जां तेसेरी लाड़ी सफीराय किछ जमीन बैचि, जै तेसैरी थी। 2जां मेऔरा पेईंसा मझां किछ ऐपुनि रखि ल्यै, ऐस गलैरा तेसेरी लाड़ी बि पता थ्या, जां तेसैरा अक हैसा अंणि करि जै खास चैलै थ्यै तेन्हांनि दी दित्ता।
3पण पतरसै बौलु, “हे हनन्याह! जै शैतानै तिंडै मंना मझ पवित्र आत्माय सिंउ झूठ बोलणैरी गल सौचि जां तीं अपड़ि बैचोरी जमींनि मझां पेईंसा केरा अक हैसा अपड़ै तेईनी रखि ल्या। 4क्या बैचणा किना पेहिलै सै जमीन तिंडि ना थी? जां जेख्णी बैचि छडि ता क्या तेसैरी कीमत ताउ धेरै ना थी? तिंडै मंना मझ ऐतियै बुरै कंमैरा ख्याल किहीं या? तीं मैहणुवां सिंउ ना पण परमेश्वरा सिंउ झूठ बौलु।”
5हनन्याह ऐ गलै शुणि करि जमीनि पनि ढढ़ै चलि ग्या, जां सै मरि ग्या; जां सभ ऐ गलै शुणि करि बड़ै डरि ग्यै। 6किछ जुवानै खड़ै भौ करि तेसैरी लास कफणा मझ लपैटि जां भेईर नीं करि दबि छडा।
7लगभग त्रियें घंटै बाद तेसैरी लाड़ी अंदर गैई, पण तैस ऐठणीरै बारै मझ किछ बि पता ना थ्या। 8तां पतरसै तैस किना पुच्छु, “मूंनी शुणा, कि क्या तुहैं ऐ जमीन योउती कीमति मझ बेचौरी थी?” तेनी बौलु, “जी हाँ! असुवें योतियै कीमति मझ बेचौरी थी।”
9तां पतरसै तैस सिंउ बौलु, “ऐकेई केणु गल आ कि तुवे दोईयो प्रभुरै आत्माय परखणेरै तेईनी योकिया सिंउ सेहमत भौ ग्यै? तका, जै मैहणु तिंडै लाड़ै दबणनी गियोरै थ्यै, सै दुवारा पन चलि यौउरै अत्तै जां अबै तु बि भेईनि लै गांहणी।” 10तां सै इकदम तेसेरै पैयिड़ा पन पै गैई जां सै बि मरि गैई; जां जुवाने अंदर अईछी करि तकाउ ता सै मरि थी गियोरी जां सै बि तैन्हैं लै नीं जां तेसेरै लाड़ै किनि दबि छडि। 11जां सारी कलीसियै मझ जां ऐन्हां सारा गला शुणनै वा पन बड़ा डर छा ग्या।
चैला केरै चिन्ह जां चमत्कार
12खास चैलै बड़ै चिन्ह जां चमत्कार बाऐ कम मैहणुवां मझ लगातार लुहाईंथ्यै, जां सारै यीशु पन विश्वास कांनार सुलेमानेरै बिरांडै मझ किट्ठै भुईंथ्यै। 13पण जैन्हैं हालै-तेईनी यीशु पन विश्वास ना थ्या क्यौरा, तेन्हैरी हिम्मत ना भुईंथी कि सै गहि करि तैन्हांं विश्वासिया सिंउ बेशिया; तां बि मैहणु तेन्हैरा आदर करींथ्यै। 14प्रभु पन विश्वास कांने वा केरी गिणती बधती गैई, जां बड़ै जादै मड़द जां जनेनी प्रभु पन विश्वास कांना लगै। 15जै किछ खास चैलै कातै थ्यै, तेसेरै कारण मैहणु बिमार मैहणुवां रौड़ि ऐ मझ अंणि करि मंजै जां पालकी पन लमैरी दिईंथ्यै, कि जेख्णी पतरस तेदि बत्तै ऐईछिया ता तेसैरा छांउठा तैन्हांं मझियां कुछ मैहणुवां पन पै गहिया। 16जां यरूशलेम शहरेरै औरहां-परहां नगरा किना बि बड़ै मैहणु बिमार जां अशुद्ध आत्माय बाऐ परेशान मैहणुवां खास चैला किनि अंणि करि किट्ठैरी छडींथ्यै जां सै सारै ठीक भौ गहींथ्यै।
खास चैलै जैल्ही मझ सुटणै
17तां ऐ सभ तका करि महायाजक जां तैन्हांं सेईतै जै सदूकी गुट्टेरै मैहणु थ्यै, सैक्यै खास चैला सिंउ बड़ी जादा जलन कांना लगै। ऐठणीरै तेईनी तैन्हैं किछ कार्यवाही कांनेरा फैसला केया। 18जां खास चैलै पकड़ी करि जैल्ही मझ बंद करि दित्तै। 19पण राती प्रभुरै एकि स्वर्गदूतै जैल्हिरै दुवार खोलि करि सैक्यै भेईर अंणै जां तैन्हांं सिंउ बौलु, 20“गहा! मंदरा मझ खड़ै भौकरी मैहणुवंनी ऐस अनन्त जीवनेरी सारी गलै शुणा।”
21ऐ शुणि करि खास चैलै भियाग भूंतै सिंउ मंदरा मझ गहि करि उपदेश दींणा लगै। पण महायाजकै जां तेन्हैरै साउगियै अईछी करि महासभा जां इस्राएलेरै सारै वुजुर्ग मैहणु किट्ठैरै, जां खास चैला अंणनैरै तेईनी मंदरेरै चोकिदार जैल्ही मझ भेईजै। 22पण जेख्णी मंदरेरै चोकिदार जैल्ही मझ पुज्जै ता तैन्हांं सै मैऐ ना, जां वापस अईछी करि सभनियांनि शुणा दित्तु। 23आज भियगा असै तकाउ कि जैल्ह पूरी तराहि सिंउ बंद थी, जां पेहरैदार भेईर दुवारा पन पेहरा दींतै अत्तै; पण जेख्णी दुवार खौलु, ता अंदर कौ बि ना मैआ। 24जेख्णी मंदरेरै पेहरेदारा केरै सरदारै जां प्रधानयाजके ऐ खबर शुणि ता सैक्यै दुविधाय मझ पै गियै कि अबै ऐन्हां गला केरा कितु नतीजा भूंणा। 25तां कुनिक्यै अईछी करि तैन्हांं सिंउ शुणाउ कि, तका, जै तुहैं जैल्ही मझ बंद करि रखौरै थ्यै, सै मैहणु ता मंदरा मझ खड़ै भौकरी मैहणुवंनी उपदेश दींतै अत्तै। 26तां ऐ शुणि करि पेहरेदारा केरा सरदार सैनिका सेईतै ग्या जां जबरदस्ती कांने बगैर खास चैलै लै अंणै, केईनी कि सरदार जां सैनिक मैहणुवां हैरी डरींथ्यै कि किहींक्यै असुवां मैहणु घौड़तिया बजि करि मारी ना दिया।
27जेख्णी खास चैलै महासभाईरै सांमणै खड़ै क्यै ता महायाजकै तैन्हांं किना पुच्छु, 28“तुहांनि असै आज्ञा दितोरी थी कि ऐस मैहणुरू नाँ लै करि अबै कोसनि किछ बि मेईं शिख्रांतै; पण तुहैं पूरै यरूशलेम शहरा मझ ऐस मैहणुरै नाँईयें ला चर्चा फैलाय छडि जां तैस मैहणुरी मोउतिरा इल्जाम असु पन लांणा चाहंथै अत्तै?” 29तां पतरसै जां होरै खास चैलै उत्तर दिता, “असु मैहणुवां केरी आज्ञा ना, पण परमेश्वरेरी आज्ञा मनणी जरूरी आ। 30तुहैं मैहणुवें यीशु लकड़िरै क्रूसा पनि लटका करि मारी छडा, पण असेड़ै पूर्वजा केरै परमेश्वरै सै दुबारे मौरा मझां जींतैरा। 31सेहै यीशु परमेश्वरै प्रभु जां मैहणुवां केरा उद्धारकर्ता बंणा करि सभनियांं बडा करि सारै अधिकार तेसनी दित्तै ताकि इस्राएलेरै मैहणु अपड़ै बुरै कंमा किना परमेश्वरा धेरै मुड़िया जां तैस किना अपड़ै पापा केरी माफी प्राप्त करि सकिया। 32जां असै ऐन्हां गला केरै गवाह अत्तै जां पवित्र आत्मा बि जै परमेश्वरै तेन्हांनि दितौरा जै तेसैरी आज्ञा मनता।”
33ऐ शुणि करि महासभायरै मैहणु बड़ै जादै गुस्सै भौ ग्यै जां सै तैन्हांं खास चैला केरा खून करि दींणा चांहथै थ्यै। 34पण गमलीएल नाँईयेरा अक फरीसी मैहणु जै मूसेरी व्यवस्थाय शिख्राणै वा जां सारा मैहणुवां मझ इज्जतदार थ्या, तेनी महासभाय मझ खड़ै भौ करि थोड़ी हांणिरै तेईनी तैन्हांं खास चैलानि भेईनि लै गांहणैरै तेईनी बौलु। 35तां तेनी महासभायरै सदस्या सिंउ बौलु, “हे इस्राएलि भाईयो! जै किछ तुवे ऐन्हां मैहणुवां सिंउ कांना चांहथै अत्तै, सौचि समझि करि करै। 36केईनी कि कुछ टैंम पेहिलै थियूदासै विद्रोह केया जां ऐ दावा करियां करींथ्या कि आंउ बि किछ आ; जां कोई चोउर शाउ मैहणु तेसैरू साउग दींणा लगै, पण सैकिया मारी छडवा; जां जेत्थरै मैहणु तैस मनींथ्यै सै सारै तित्तर-भित्तर भौ गियै जां तेन्हैरा विद्रोह खत्म भौ ग्या। 37तेठां किना बाद मैहणुवां केरी गिणती कांनेरिया धियाड़िया मझ गलीलेरै यहूदै विद्रोह केया जां तेनी बड़ै मैहणु अपड़ै पासै करि लियै। सै बि खत्म भौ ग्या जां जेत्थरै मैहणु तैस मनींथ्यै सैक्यै सभ तित्तर-भित्तर भौ ग्यै। 38ऐठणीरै तेईनी ऐस मामलै मझ आंउ तुहां सिंउ ऐ बोलणा चांहथा कि तुवे ऐन्हां खास चैला केरै कंमा मझ दखल मेईं देया जां ऐ जेनि बत्तै गांहणु चांहथै तेदि गांहणा देया। अगर ऐ योजना मैहणुवां केरी अपड़ि तरफ सिंउ भुई ता ऐ अपड़ै-आप हारी गांहणै। 39अगर ऐ कंम परमेश्वरेरी तरफ सिंउ अत्तै ता ऐन्हां कौ ना रौकि सकता, किहीं क्यै ऐहीं ना भुईया कि तुवे परमेश्वरा सिंउ बि भिड़ियूंणार बंणी गहिया।”
40तां महासभायरै मैहणुवें तेसैरी गल मनि लैई; जां खास चैलै शदा करि तैन्हांं पन कोड़ै ला बजाय; जां तेन्हांनि धमकी दित्ती कि अबै यीशुरू नाँ लै करि किछ बि मेईं शिख्रांतै जां फिरी सै छडि दित्तै। 41खास चैलै ऐस गलै ला खुश भौ करि महासभाय किना चलि ग्यै कि परमेश्वरै असै ऐस काबिल समझै कि यीशुरै नाँईयेरी वजहि ला असै दुख सैहिया। 42ऐत किना बाद रौज मंदरा जां केहिया घरा मझ खास चैलै हर धियाड़ि खुशखबरी शिख्रांतै जां शुणांतै थ्यै कि यीशु ऐ मसीह आ।
Currently Selected:
प्रेरितों के काम 5: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
