प्रेरितों के काम 2
2
पवित्र आत्मायरू उतरनु
1यहूदिया केरै पिन्तेकुस्तेरै त्यौव्हारेरी धियाड़ी सै सारै विश्वासी एकि जगाय किट्ठै भोरै थ्यै। 2तां अजाग्गै सुरगा किना तूफाना सैयि ब्यारिरी आवाज भुई, जां तेनी ला सारू घर जेठि सै बेठोरै थ्यै, सै हिलि गियु। 3तां तेन्हैरै सांमणै ऐतेई आग प्रकट भुई जेसेरै लवट्टै जिभै सैयि थ्यै, जै अलग भौ-करि तैन्हांं मझ हर मैहणु प्रंन अईछी करि बेश्ती गैई। 4सै सारै मैहणु पवित्र आत्मायरी शक्ति ला भरी ग्यै जां जै वरदान पवित्र आत्माय तेन्हांनि दिता, तेठणिरै अनुसार सै अलग-अलग भाषाय मझ बोलणा लगै।
5जां तैस टैंमा परमेश्वरा हैरी डरींणार बड़ै सारै यहूदी मैहणु थ्यै जै कि संसारेरै हर-एकि जातिया किना त्यौव्हार मंनाणनी योउरै थ्यै जां यरूशलेम शहरा मझ रींहथै थ्यै। 6जां जेख्णी तैस ब्यारिरी आवाज शुणि ता मैहणुवां केरी भीड़ किट्ठी भौ गैई जां मैहणु शुश्त भौ ग्यै, केईनी कि हर-अक मैहणु अपड़ि-अपड़ि भाषाय मझ चैला केरी आवाज शुणतै थ्यै। 7जां सै सारै शुश्त भौ-करि जां हैरान भौ करि बोलणा लगै, “तका, ऐ जै बोलतै अत्तै क्या ऐ सारै गलील प्रदेशेरै नत्तै? 8ता ऐ कितु भूंतु आ, कि असु मझियें हर-अक मैहणु ऐन्हां अपड़ि-अपड़ि मातृभाषाय मझ गल कातै शुणता। 9असै जै पारथी इलाकेरै जां मेदी, एलामी जां मेसोपोटामिया, यहूदिया जां कप्पदूकिया जां पुन्तुस जां एशिया। 10जां फ्रूगिया जां पंफूलिया, मिस्र जां कुरेन शहरा नीड़ लीबिया देशेरै किछ हिस्सै किना जै कुरेने शहरेरै आस-पास अत्तै, ऐन्हां सभनियांं देशेरै रींहणारै जां रोम शहरा किना ऐईंणारै मैहणुवो, 11मतलब क्या यहूदी क्या गैर-यहूदी जैन्हैं यहूदी धर्म मनि लियौरा थ्या, क्रेते टापुरै मैहणु जां अरब प्रदेशेरै मैहणु बि अत्तै, पण अपड़ि-अपड़ि भाषाय मझ तैन्हांं सिंउ परमेश्वरेरै बड़ा-बड़ा कमां केरी चर्चा शुणतै अत्तै।” 12जां सभ शुश्त भौ ग्यै, जां घबराय करि योकिया सिंउ बोलणा लगै, ऐ कितु भूंतु आ? 13पण होरनियें मजाकि मझ बौलु कि, “ऐ ता शराब पी करि नशै मझ भौ गियोरै अत्तै।”
पतरसैरा भाषण
14पतरस तैन्हांं ग्याराह खास चैला सिंउ खड़ा भुआ जां जौरै हक दी-करि बोलणा लगा कि, “हे यहूदिया प्रदेशेरै मैहणुवो! जां हे यरूशलेम शहरेरै मैहणुवो! ऐ समझि ल्या जां मिंडी गलै ध्यान सिंउ कंन ला करि शुणा।” 15तुहां मझियें किछ गलत सौचतै अत्तै, कि ऐ मड़द नशै मझ अत्तै, मगर सै नशै मझ नत्तै! केईनी कि हालै-तेईनी ता भियागेरै नाउ बजोरै अत्तै। 16पण जै असुवां सिंउ भौरू आ तेनी ला ऐ गल पूरी भुई जै भविष्यवक्तै योएलै पवित्र शास्त्रा मझ बोलोरी थी
17कि परमेश्वर बोलता कि लाष्टिरिया धियाड़िया मझ ऐत्यु भूंणु कि मूं अपड़ा आत्मा सभनियांं मैहणुवंनी भरपूरी सिंउ दींणा जां तुवाड़ै छोकरूवा जां छोकरिया भविष्यवाणी कांनी, जां तुवाड़ै जुवान छोकरूवनी दिव्य-दर्शन भूंणै जां तुवाड़ै वुजुर्ग मैहणुवां सुपनै तकांणै। 18तैन्हांं धियाड़िया मझ मूं अपड़ै दासा जां दासियनी बि अपड़ा पवित्र आत्मा भरपूरी सिंउ दींणा जां तैन्हांं भविष्यवाणी कांनी। 19जां मूं प्रंन असमांणा मझ अदभुत कम जां थल्लै धरती पन अदभुत चिन्ह मतलब खून, आग, जां धुंवेरै बदअ लुहानें। 20प्रभु परमेश्वरेरी महान जां महिमामय धियाड़ी ऐईंणा किना पेहिलै दीह अंधारू भौ गांहणु जां शुकयि खूना सैयि भौ गांहणी। 21तेख्णी जै कौ प्रभुरा ना लैला, सैहै बचायूंणा।
22जां पतरस फिरी बोलणा लगा, हे इस्राएलि भाईयो! मिंडी गलै ध्यान सिंउ शुणा! तुहां मैहणुवां ऐपु पता कि परमेश्वरै यीशु नासरीरै जरियै तुहां मैहणुवां केरै बिच कियोतै सामर्थी जां चमत्कारै बाऐ कम क्यै जां चिन्ह लुहाओरै अत्तै। ऐनि ला ऐ साबित भूंतु कि यीशु परमेश्वरै अपड़ि तरफ सिंउ असु मैहणुवां किनि भेईजौरा थ्या। 23यीशु पकड़वांणैरी योजना परमेश्वरै पेहिलै किना बंणा रखौरी थी जां तुहैं मैहणुवें सै अधर्मी मैहणुवां केरै हवालै केया जां तैन्हैं सै क्रूसा पनि लटका करि मारी छडा। 24पण परमेश्वरै सै मोउतिरै दुखै बाऐ बन्धना किना छुड़खाय करि यीशु दुबारे जींतैरा। केईनी कि ऐ ना भौ सकतु कि सै मोउतिरै वंशा मझ रिय्हा। 25यीशु मसीहरै बारै मझ राजै दाऊदै ऐ बोलोरू आ कि आंउ प्रभु हमेशा अपड़ै सांमणै तकांता रिय्हा केईनी कि सै मिंडै देहिणै पासै बेठौरा ताकि आंउ तैन्हांं मैहणुवां हैरी ना डरूं जै मिंडा नुकसान कांना चांहथै अत्तै। 26ऐठणीरै तेईनी आंउ बड़ा खुश आ जां खुशी मझ मघन भौ-करि तिंडि स्तुति काता; जां मिंडै शरीरा बि आशाय मझ आराम कांना। 27केईनी कि मूं तु अधोलोका ना रींहणा दींणा जां ना अपड़ै पवित्र मैहणुरी लास शड़ना दींणी। 28तीं मूनी जींणैरी बत्त लुहाओरी आ; जां तिंडि उपस्थिति मझ बणि रींहणै ला मूंनी बड़ी खुशी भूंणी।
29हे भाईयो! आंउ तैस पूर्वज दाऊदेरै बारै मझ तुहां मैहणुवां सिंउ विश्वासै सिंउ खुलिकरि बोलि सकता कि सै मरि गियौरा जां कब्रि मझ रखि छडौरा। तेसैरी कब्र आज-तेईनी बि असेड़ै ऐठि पियौरी आ। 30राजा दाऊद भविष्यवक्ता थ्या। तैस पता थ्या कि परमेश्वरै वायदा करि-करि तैस सिंउ वचन क्यौरा थ्या कि, मूं तिंडै वंशा मझां अक मैहणु तिंडै सिंघासना पन बिशाना। 31भविष्य मझ परमेश्वर कितु कांनारा, ऐ जांणीकरी दाऊदै यीशुरै जीवना मझ वापस ऐईंणैरी गल बोलि। तेनी बौलु, कि मसीह जींति करि जीवना मझ वापस ऐईंता, जेख्णी तेनी लिखु कि परमेश्वरा मसीह मौरा मझ ना दींणा रींहणा, ना ऐ तैस मसीहरी लास शड़ना दींणी। 32परमेश्वरै ऐहै यीशु दुबारे जींतैरा, जेसेरै असै गवाह अत्तै। 33अबै सै आदर योग्य आ जां परमेश्वरा नीड़ आदर बाई जगाय बेश्ता, पिता परमेश्वरै तेसनी पवित्र आत्मा दित्ता जैस दींणैरा तेनी वायदा क्यौरा थ्या। तेनी भरपूरी सिंउ असुनि पवित्र आत्मा दित्ता, जिहीं-कि आज तुवे तैस तकांतै जां शुणतै अत्तै। 34दाऊद ता सुरगनी ना ग्या; पण सै अपुवै बोलता कि, प्रभु परमेश्वरै मिंडै प्रभु मसीह सिंउ बौलु; परमेश्वरा नीड़ आदर बाई जगाय बेश, 35ज्यो तेईनी आंउ तिंडै दुशमणा तिंडै आधीन ना करि दियुं। 36अबै इस्राएलेरा सारा मैहणुवां पूरी तराहि सिंउ समझि लींणु चेहिंथु कि जै यीशु तुहैं क्रूसा पन चाढ़ा, परमेश्वरै सैहै यीशु प्रभु जां मसीह दोईयो बणा दित्ता।
37जेख्णी मैहणुवें ऐ शुणु ता सै सभ अपड़ै आपानि बड़ै दोषी समझणां लगै, जां सै पतरसा जां होरनियां खास चैला किना पुछणा लगै, “हे भाईयो! असु कितु कांनु चेहिंथु?” 38पतरसै तेन्हांनि बौलु, “पापा किना मंन फैरा जां तुहां मझां हर-अक मैहणु अपड़ै-अपड़ै पापा केरी माफिरै तेईनी यीशु मसीहरू नाँ लै-करि बपतिस्मा लिया। ऐहीं-चारै तुहांनि पवित्र आत्मायरा वरदान मेईंणा। 39केईनी कि सै कसम तुवाड़ै तेईनी जां तुवाड़ी आउलादिरै तेईनी आ जां तैन्हांं सभनियांं दूरियां मैहणुवंनी बि आ जै मैहणु असेड़ै प्रभु परमेश्वरा ऐपु किनि शदांणै।” 40तैस टैंमा पतरसै होरिया बि बड़िया सारिया गला केरी गवाहि दी-करि तेन्हैरै छंदै क्यै कि तुवे अपांणा ऐईंणै बाई सजाय किना बचा जै ऐन्हां दुष्ट मैहणुवां पनि भूंणु। 41जै किछ पतरसै बौलु, तैन्हांं गला पन जैन्हैं विश्वास केया तैन्हैं बपतिस्मा ल्या। तेसै धियाड़ी लगभग त्रा हजार मैहणु तैन्हांं विश्वासिया केरै झुंडा सिंउ किट्ठी ग्यै। 42सै खास चैला किना शिक्षा लींणा जां मिलणा-जुलणा जां प्रभु भोजा मझ सेईतै भुईंथ्यै जां विश्वासी किट्ठी प्रार्थना करि करि अपड़ि रोटी खईंथ्यै।
विश्वासिया केरी संगती
43यरूशलेम शहरेरै सभ मैहणु डरौरै थ्यै, केईनी कि खास चैलै बड़ै चमत्कार जां चिन्ह लुहाईंथ्यै। 44जां सारै विश्वास कांनारै किठै बेशींथ्यै, जां जै किछ तैन्हांं किनि थियु, तैस पन सभनियांं केरा हक भुईंथ्या। 45जां सै अपड़ि-अपड़ि संम्पति जां समान बैचि करि जैस ज्योति जरूरत भुईंथी, तेसनी बंडि दिईंथ्यै। 46जां सै सारै रौज अक मंन भौ-करि मंदरा मझ किठै भुईंथ्यै, जां सै सारै योकिया केरै घरै प्रभु भोजा मझ सेईतै भुईंथ्यै जां विश्वासी किट्ठी करि बड़ै खुश भौ करि प्रेम सिंउ अपड़ि रोटी खईंथ्यै। 47जां परमेश्वरेरी स्तुति करींथ्यै, जां सारै मैहणु बड़ै खुश थ्यै जां तेन्हैरा बड़ा आदर करींथ्यै। जां जै बचाई गहींथ्यै तैन्हांं प्रभु रौज कलीसियै मझ मिला दिईंथ्या।
Currently Selected:
प्रेरितों के काम 2: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
