प्रेरितों के काम 1
1
भैत-पछियांण
1आदरणीय थियुफिलुस! मीं अपड़ि पेहिली किताबि मझ तुहांनि तैन्हांं सभनियांं गला केरै बारै मझ शुणाउरू आ, जै गलै यीशु स्वर्गा मझ उछुई गांहणा किना पेहिलै कांनी जां शिख्रांणी शुरू क्यौरी थी। 2पण ऐत किना पेहिलै कि परमेश्वर यीशु स्वर्गानि उछुई लै ग्या। तेनी अपड़ा खास चैलानि पवित्र आत्मायरी मजति ला आदेश दित्तै। 3जां ऐठां किना बाद यीशु यौउता जादा दुख सेहन कांना किना बाद जां मरना किना बाद दुबारे जींति करि तेख्णी बड़ै पक्कै सबूत लुहाय करि तेन्हांनि शुणाउ कि सै जींता जां यीशु अगली चाहिया धियाड़िया केरै दौरान केही बारी खास चैलानि लाधी ऐईंता रिय्हा। जां तैन्हांं सिंउ परमेश्वरेरै राज्यरी गलै काता रिय्हा।
पवित्र आत्मायरी प्रतिज्ञा
4जेख्णी यीशु अपड़ा चैला सेईतै बेशि करि रोटी खांता थ्या, ता तेनी तेन्हांनि ऐ हुक्म दिता कि, “यरूशलेम शहर मेईं छडा पण जै वायदा पिता परमेश्वरै क्यौरा तैस पूरा भूंणैरा इन्तजार कातै रिय्हा, जेसेरै बारै मझ तुवे मूं किना शुणि बेठोरै अत्तै। 5केईनी कि यूहन्ना ता पांणी मझ बपतिस्मा दिईंथ्या पण थोड़ी धियाड़िया किना बाद परमेश्वरा तुवाड़ै अंदर रींहणेरै तेईनी पवित्र आत्मा भेईजणा जै तुहां सेईतै रींहणा।”
यीशुरू स्वर्गानि गांहणु
6ऐठणीरै तेईनी बाद मझ जेख्णी खास चैलै यीशु सिंउ मैऐ ता चैलै यीशु किना पुछणा लगै कि, “हे प्रभु! क्या रोमी राज्य किना छडाणनि जां इस्राएलेरा राज्य दुबारे किना बसांणेरै तेईनी तिंडा टैंम अईछी गियौरा?” 7यीशु तैन्हांं सेईतै बौलु, “तैस टैंमेरै बारै मझ तैन्हांं पता लगणा जरूरी ना, फैसला लींणैरा सै अधिकार पिता परमेश्वरै ऐपु किनि रखौरा। 8पण जेख्णी पवित्र आत्मा तुहां किनि ऐईंणा ता तुहांनि शक्ति मेईंणी; जां यरूशलेम शहरा जां सारै यहूदिया जां सामरिया प्रदेशा मझ जां सारै संसारा मझ हर जगाय मिंडै बारै मझ शुणांणार गवाह भूंणै।” 9ऐ गल बोलणा किना बाद जेख्णी चैलै तकांतै थ्यै ता परमेश्वरै यीशु उछुई करि स्वर्गानि लै नियां, जां बदऐ यीशु तेन्हैरी लाधी किना छपा ल्या। 10जां तेसेरै खड़ै गांहथै टैंमा जेख्णी खास चैलै असमांणा धेरै तकांतै थ्यै तां अजागै दो मैहणु हच्छै लिकड़ै लाउरै तैन्हांं किनि अईछी करि खड़ै भौ ग्यै। 11जां चैला सिंउ बोलणा लगै, “हे गलील प्रदेशेरै मैहणुवो! तुवे केईनी ऐमिहां तेईनी खड़ै भौ करि असमांणा धेरै हैतै अत्तै? सैहै यीशु जै परमेश्वरै तुहां किना सुरगनी उछुई करि लै न्यौरा, जिहीं-चारै तुहैं सै स्वर्गानि गांहथा लधा तिहियें यीशु फिरी दुबारे वापस ऐईंणु।”
मत्तियाहेनी यहूदैरा औधा मेईंणा
12जेख्णी स्वर्गदूत चलि ग्या तां सै खास चैलै जैतून पहाड़ा किना यरूशलेम शहरा मझ जै पहाड़ा किना लगभग अक किलोमीटर दूरी पन थियु, तैठि शहरानि वापस चलि पियै। 13जां जेख्णी सै तैठि नगरा मझ पुज्जै ता सै तैस प्रनियैं कमरै मझ ग्यै जेठि सै खास चैलै बेठोरै थ्यै, तैन्हांं मझ पतरस, यूहन्ना, याकूब, अन्द्रियास जां फिलिप्पुस, थोमा, बरतुल्मै, मत्ती, हलफईरा पुत्र याकूब जां शमौन जेलोतेस #1:13 जेलोतेस ऐक्या अक मैहणुवां केरा झुंड आ जै लड़ाई झगड़ा करि करि रोमियोनि हठांणैरी कोशिश कातै थ्यै जै यहूदी मैहणुवां पनि राज्य कातै थ्यैजां याकूबेरा पुत्र यहूदा थ्यै। 14ऐन्हां सेईतै तैठि होरी बि बड़ी जनेनी थी जैन्हैं यीशुरी मजत क्यौरी थी जां यीशुरी माँ मरियम जां यीशुरै भाईया सेईतै बेशि करि अक चित भौकरी प्रार्थना कातै रिहींथ्यै। 15तां अक धियाड़ि जेख्णी लगभग अक शाउ बीह विश्वासी भाई किट्ठै थ्यै, ता पतरस तेन्हैरै बिच खड़ा भौकरी बोलणा लगा, 16“हे भाईयो! जरूरी आ कि पवित्र शास्त्रा मझ लिखोरी सैकेई गल अबै पूरी भुईया, जै पवित्र आत्माय राजा दाऊदेरै जरियै यहूदेरै बारै मझ पेहिलै किना बोलोरू थियु कि सै यीशु पकड़वाणै वा केरा अगुवा भूंणा। 17केईनी कि सै असुवां मैहणुवां मझियां थ्या जां ऐस सेवकाई कातै टैंमा असैड़ा साउगी थ्या। 18जिहीं कि तुहां पता कि, यहूदी अगुवे यहूदेरी तरफि सिंउ अधर्मेरी कमाईरै पेईंसै ला जै यहूदै कमोरा थ्या अक पट्टि खरीदी लैई जां जेख्णी यहूदै ऐपुनि फांसी दित्ती ता सै मुँहेरै भारै भुणां छुड़खा जां तेसैरू पैट फटि गियु जां तेसैरी सारी आंतरै भेईर निकोहि गेई। 19जां ऐस गलैरै बारै मझ सारै यरूशलेम शहरेरै मैहणुवां पता लगी ग्या, ऐठणीरै तेईनी सै मैहणु तैस जगायनी अपड़ि भाषाय मझ ‘हकलदमा’ बोलणा लगै, मतलब खूने बाई पट्टि।
20केईनी कि राजै दाऊदेरी भजन संहिता बाई किताबि मझ लिखोरू आ कि तेसैरू घर उजड़ि गांहणु चेहिंथु जां तैस मझ कौ बि ना बसिया, जां राजा दाऊद एकि होरी जगाय ऐ बि बोलता कि, हौरा कोई तेसैरी ठाहर लै लिया। 21-22ऐठणीरै तेईनी ऐ जरूरी आ, कि अक ऐतिया मैहणु चुणियो, जै प्रभु यीशु मसीहरै सारा कंमा केरै टैंमेरा गवाह भुईया। प्रभु यीशुनि यूहन्ने किना बपतिस्मा दियूंणा किना लै करि सैक्या परमेश्वरेरै जरियै स्वर्गा धेरै लेई गांहणा तेईनी ऐ मैहणु असुवां सेईतै प्रभु यीशुरै मौरा मझां दुबारे जींतियुणेरै बारै मझ गवाह भुईया।” 23तां तैन्हैं दो मैहणु खड़ै क्यै, अक यूसुफ जेसैरू उप नाँ बरसब्बा थियु जैसनि यूस्तुस बि बोलींथ्यै, दुवां मत्तियाह खड़ैरा। 24तां तैन्हैं ऐ बोलि करि प्रार्थना की कि, “हे प्रभु! तु सारा केरै मना केरी गलै जांणता, ऐ लुहाय कर कि तीं ऐन्हां दोईयो मझां केणु चुणौरा, 25ता कि सै ऐस सेवकाईरै कमां जां खास चैलैरी सै खाली जगा लिया। यहूदा मरि ग्या जां तैस जगायनी चलि ग्या जेठि सै भूंणा चेहिंथा।” 26तैन्हैं दोईयो केरै नाँईयां केरी पर्ची सुटि जां पर्ची मत्तियाहैरे नाँईयेरी निकोत्थी, जां सै तैन्हांं ग्याराह खास चैला मझ शामिल भौ ग्या।
Currently Selected:
प्रेरितों के काम 1: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
