MAKUX 14

Sawg Teei Yesux Yum

(Mat 26:1-5; Luk 22:1-2; Yo 11:45-53)

1Khaix an ra ngaix mawh pawie Pasakha mai pawie blah pa ang sau susaix mai cao giex kaing li pa ting khankix mai pui tiiem lai khankix, sawg ti lhen nyaw Nawh Cao, sonsang pon giex mai teei Nawh yum heue. 2Kheu kix ah nin, “Paw yuh yam yuh pawie, phan ang mawh nan ha pui khankix kox lih koe krax lawh maw cuci kheu heue.”

Daux Yaong Betanix

(Mat 26:6-13; Yo 12:1-8)

3Yam ot Nawh Cao ka daux yaong Betanix, daux nyiex Simon pui sipawg, yam ngawm Nawh ti sawm, bun tix kaux hoek ka Nawh Cao pa koe sidah bhawng Nadu pa kied ngawh, daux kawng simaox paing mai nawh pah kawng an max mai groi sidah an piang kaing Nawh Cao heue. 4Viang mawh nan koe tix blah pa song rhawm mai ah nin ka paox tix, “Kieh sidah bhawng in nai giex going yuh nin yuh ka mawx? 5Phan coh sidah bhawng in tak sang pon ngawh lheu denari loe yieh plah mai tawx ka pui hot sibhawm khankix heue.” Kix deuh phimap ka bun an heue. 6Viang mawh nan, Yesux ah nin, “Paw chuh nawh, pex lai laklheut nawh yuh ka mawx? Nawh hoik yuh kaing pa mhawm piang Aux heue. 7Mawh kheu pui hot pui sibhawm ot mai pex jheung jheung mai pex mie ti yuh pa mhawm ka kix lai mawx ang ah, pex pon ti yuh, viang mawh nan, Aux ot mai pex jheung jheung ang mawh. 8Nawh hoik yuh pa chix yuh tix. Nawh hoik groi sidah bhawng ka tokaux Aux, sivoe, son bawg yam sipaung heue. 9Aux krai lox tete ka pex, dee mawx ang ah, dee sang sidiex gau lox bwan gaux rhawm in ka piang haktiex kudah dee khawmuik, grawng ceu pa yuh bun in kawx, tak sang krai, sonsang doh keud ka nawh heue.”

Khaw Rhawm Ti Tawx Yesux

(Mat 26:14-16; Luk 22:3-6)

10Yudax Isakariut pa mawh tix kaux ka daux kawncau kao ra kaux, hu ka cao giex kaing li pa ting khankix, sonsang tawx Nawh Cao ka kix heue. 11Yam mhong kix lox an, kix gaux rhawm mai tawx lox mukheu grawng sang tawx mau ka nawh heue. Nawh sawg bawg yam pa mhawm, sonsang pon tawx nawh Yesux ka kix heue.

Ih Pawie Pasakha

(Mat 26:17-25; Luk 22:7-14,21-23; Yo 13:21-30)

12Daux ngaix tix, blah pa ang sau susaix, khaix hoik pah hoik tan kix yung Pasakha, kawncau Nawh khankix ah nin ka Nawh Cao, “Maix mie ti kieh ex hu cox dee sang ih Maix pawie Pasakha dee mawx? 13Nawh Cao ploi kawncau Nawh ra kaux hu mai ah nin ka kiex, “Hu ka daux veng mai pui pa viex aw rawm tix kaux tak sipub pax heue. Hawt khaix nawh. 14Nawh laig dee mawx ang ah, ah nin ka cao nyiex an, Sara Cao gau ah nin, Lawg son nyo maix, dee tak sang ih Aux Pasakha tau mai kawncau Aux khankix, koe dee mawx? 15Tokaux nawh tak sang jhi pax yaox lawg pa ting plak piang, pa hoik koe kraung mai pa hoik cox. Cox khre dee an son ex heue.” 16Kawncau ankiex hu laig ka daux veng mai yaox awm pa hoik krai Nawh Cao ka kiex mai kiex cox khre pawie Pasakha heue. 17Yam hoek ponbo Nawh Cao hoek tau mai kix kao ra kaux. 18Yam ngawm neung kix mai sawm, Yesux ah nin, “Aux krai lox tete ka pex, ka daux pex tix kaux pa sawm tau mai Aux, tak sang tik sang tawx Aux heue.” 19Kix khi rhawm kah mai tix kaux lai tix kaux ah nin ka Nawh Cao, “Mawh aux lie?” 20Nawh Cao baox ah nin ka kix, “Mawh ka daux kao ra kaux tix kaux, pa mawh kaw pa cub daux klong tau mai Aux heue. 21Kawn kawn pui tak hu, awm hoik tiiem grawh grawng Nawh, viang mawh nan pui pa tik pa tawx Kawn kawn pui tak kha rhawm heue. Son pui an phan nawh ang keh lheu mhawm son nawh heue.”

Priex Bo Cie Simiang

(Mat 26:26-30; Luk 22:14-20)

22Yam sawm kix Nawh Cao teei blah, khaix hoik nawb Nawh bwan. Nawh sivit mai tawx ka kix ah nin, “Pex teei, in mawh tokaux Aux heue.” 23Nawh Cao teei kawk mai khaix hoik yaogyaw Nawh bwanson, Nawh tawx ka kix mai kix khawmuik nyaux kah heue. 24Nawh Cao ah nin ka kix, “In mawh nham Aux pa dex dawd mai sijax mukheu pa khraox, pa lih son pui tom nie heue. 25Aux krai lox tete ka pex, Aux tak ang nyaux rawm plix siiet in, tom sidah ngaix yam tak nyaux Aux pa khraox ka daux meung Siyiex heue.” 26Khaix hoik rhax kix lai rhax tix mu kix lih hu ka gawng Sanlun heue.

Grawng Thiang Petrux

(Mat 26:31-35; Luk 22:31-34; Yo 13:36-38)

27Yesux ah nin ka kix, “Pex khawmuik tak sang laux rhawm kah heue. Kheu hoik tiiem ah nin, Aux tak pah cao liang yung mai yung khankix tak prung prang heue. 28Viang mawh nan, khaix hoik deeh kaoh Aux, Aux tak sang hu sivoe pex ka daux meung Galilie heue.” 29Viang mawh nan Petrux ah nin ka Nawh Cao, “Viang kix khawmuik laux rhawm kawx, aux tak ang laux rhawm heue.” 30Yesux ah nin ka nawh, “Aux krai lox tete ka maix, daux ngaix, daux sawm in, ka ang ia nyang ux ra bawg maix tak thiang titik vud Aux loe bawg heue.” 31Viang mawh nan nawh baox krai lox kied riex ah nin, “Phan aux tak yum tau mai Maix kawx, ang aux doh thiang titik vud Maix heue.” kix khawmuik kawx, ah awm an heue.

Rawg Bwan Daux Sipeem

(Mat 26:36-46; Luk 22:39-46)

32Kix hoek tix dah dee Kesasemanix, Nawh Cao ah nin ka kawncau Nawh khankix, “Pex ngawm tin yam hu rawg Aux bwan heue.” 33Nawh Cao teei Petrux mai Yakop mai Yohan, hu tau mai Nawh mai Nawh Cao kied daox deng mai sung sang rhawm heue. 34Nawh Cao ah nin ka kix, “Aux kied khi rhawm, tom dex sang yum, pex ot tin mai pau heue.” 35Nawh Cao hu sivoe ceeix mai grux gup piang tiex mai rawg bwan, bawg yam an tak luan khaing Nawh, phan chix kieh luan heue. 36Nawh Cao ah nin, “Abax, Keeing eue, Maix chix yuh kuceu heue. Teei kawk in khaing Aux liak, viang mawh nan, paw kieh mawh alo pa khaw caw rhawm Aux, kieh mawh pa khaw caw rhawm Maix heue.” 37Nawh Cao deeh hoek mai yaox kix laig it mai ah nin ka Petrux, “Simon eue, laig it maix lie? Ang maix pon ti pau tix nari khaing lie? 38Pau mai rawg bwan heue, yuh ka mawx son ang pex laig ka daux pa nyaw glaw. Khuan koe rhawm ti sang yuh tete, viang mawh nan nex nham mawh pa iak riang iak rao heue.” 39Nawh Cao baox deeh lih hu mai rawg bwan mai ah lox awm phao ka heue. 40Nawh Cao baox deeh hoek mai yaox kix laig it, kheu ngai kix cien. Kix ang tawng lox pa sang pawk ka Nawh heue. 41Nawh Cao deeh hoek loe bawg tix bawg mai ah nin ka kix. “Yam in kawn it mai laux lee tix heue. Ding heue, bawg yam nari hoik hoek, jhak heue, tak sang tik sang tawx Kawn kawn pui daux tawm taix pui phimap khankix heue. 42Kaoh, ex hu heue, jhak heue, kaw pa sang tik sang tawx Aux dex hoek heue.”

Giex Yesux

(Mat 26:47-56; Luk 22:47-53; Yo 18:3-12)

43Yam kawn sikah Nawh Cao, dom mawx dom an, Yudax pa mawh ka daux kix kao ra kaux tix kaux, hoek tau mai cub pui hun, pa viex vaid viex khaox mai lih hoek khaing cao giex kaing li pa ting mai pui tiiem lai mai kuad song khankix heue. 44Kaw pa tik pa tawx Nawh Cao hoik tawx mhai, sonsang kieh kix tawng tix ceu ah nin, “Aux ngheut pui mawx ang ah, mawh Kaw an. Giex Nawh mai tuk Nawh hu mhawm mhawm.” 45Yam hoek nawh, nawh hoek ka Nawh Cao dom mawx dom an ah nin, “Rabi eue,” mai ngheut ka Nawh heue. 46Kix giex ti teei Nawh Cao heue. 47Viang mawh nan ka daux kix pa cung de tan tix kaux lawd vaid tix mai kid yhaok siliex cao giex kaing li pa ting piang khawmuik dud heue. 48Yesux ah nin ka kix, “Pex viex vaid viex khaox hoek ti giex Aux awm giex ka pui tud rhim lie? 49Aux ot tau mai pex mai sidiex gau ka daux nyiex bwan ku ngaix mai pex ang giex Aux. Viang mawh nan, ceu in hoik mawh sonsang naog phuk lai sigang khri heue.” 50Kawncau Nawh khawmuik prah Nawh Cao mai to hu heue.

Tuk Yesux Hu

(Mat 26:57-68; Luk 22:54-55,63-71; Yo 18:13-14,19-24)

51Pui pa awn ju tix kaux hawt khaix Nawh Cao, pa koe man fua tix pheen, pa fua ka tokaux kakaong tix mai kix giex nawh heue. 52Viang mawh nan nawh prah man fua nawh tan mai to hu kakaong heue. 53Kix tok Yesux hu ka cao giex kaing li pa ting piang khawmuik mai cao giex kaing li pa ting khankix mai kuad song, mai pui tiiem lai khankix, khrawm paox tix tau mai nawh heue. 54Petrux hawt khaix Nawh Cao dee singai mai hoek ka brawk nyiex cao giex kaing li pa ting an mai ngawm tau mai pui cau simiang khankix mai co ngu heue. 55Cao giex kaing li pa ting khankix mai kuad song cao prawng see khawmuik sawg mhai rug grawh grawng Yesux, sonsang pon ti teei Nawh yum mai ang kix yaox. 56Mawh kheu pui tom nie kham mhai rug pa ang mawh meh grawng Nawh Cao mai mhai rug pa kham kix ang khaw paox tix. 57Tix blah cung mai kham mhai rug grawng Nawh Cao ah in, 58“Ex mhong Nawh ah nin, Aux tak yieh nyiex bwan in pa hoik yuh ka taix daux loe ngaix mai Aux tak baox yuh tix lhang pa ang yuh ka taix heue.” 59Viang yuh nan kawx mhai rug kix ang khaw paox tix. 60Cao giex kaing li pa ting cung sinax kix mai chawk Yesux ah nin, “Maix ang deeh pawk lox tidtix lie? Pa kham mhai rug ceu in grawh grawng Maix, mawh pa yuh ka mawx?” 61Viang Nawh Cao ang nye, ti pawk lox tidtix. Cao kaing li an, deeh baox chawk Nawh Cao ah nin, “Maix mawh Khrit, Kawn Cao Pa Ting Bwan lie?” 62Yesux ah nin, “Mawh Aux heue. Pex tak sang yaox Kawn kawn pui ngawm plak dawm daux sibrawm mai hoek tau mai paiawm raoma khankix heue.” 63Cao giex kaing li pa ting an riah kraung ceep tix ah nin, “Ex baox lo mhai rug yuh ka mawx? 64Pex hoik mhong lox salao Nawh ka Siyiex heue. Pex ce yuh ka mawx?” kix khawmuik prawng ca Nawh, ah Nawh keung ti yum heue. 65Tix blah baig rawm myia piang Nawh Cao mai tawb pakngai Nawh Cao mai jhawp taix tix klah Nawh Cao mai ah nin ka Nawh, “Krai lox jhai heue.” Pui cau simiang khankix kawx, yam rieb ti teei Nawh Cao, kix simang Nawh ka taix tix.

Thiang Ti Tik Yesux

(Mat 26:69-75; Luk 22:56-62; Yo 18:15-18,25-27)

66Yam ngawm Petrux greem ka brawk, bun pa mawh kawncau cao giex kaing li pa ting an hoek, 67Yaox Petrux co ngu mai bun an jhak ka nawh ah nin, “Maix kawx, mawh pa ot tau mai Yesux pui veng Nazariet heue.” 68Viang mawh nan nawh thiang ah nin, “Aux ang tawng pa ah maix heue.” Nawh lih hu ka grah nyiex mai ia ux heue. 69Bun an baox yaox nawh tix bawg mai ah nin ka pui pa cung dex tan, “In mawh kix tix kaux heue.” 70Nawh baox thiang tix bawg mai khaix an tivud, kix pa cung dex tan baox ah nin ka Petrux, “Maix mawh daux kix tix kaux tete heue, kheu maix mawh pui meung Galilie heue.” 71Viang mawh nan nawh jah ti jhax mai tiextu ah nin, “Ang aux tawng Pui in pa krai pex.” 72Dom mawx dom an ia ux ra bawg tix bawg heue. Petrux doh keud ka lox pa hoik krai Yesux ka nawh ah nin, “Ka ang ia nyang ux ra bawg maix tak thiang ti tik Aux loe bawg heue.” Yam keud nawh grawng ceu an nawh yiiem heue.

Currently Selected:

MAKUX 14: WCL

Highlight

Copy