YAM JAH 24
24
Icak Koe Moeng
1Abraham hoik kuad mai riex ju hu sipie, Simiang Siyiex nawb bwan piang Abraham kuceu heue. 2Mawh kheu nan Abraham kok ka kawncau pa riex ju daux nyiex, pa kwang ka can pa koe nawh khawmuik ah nin, “Deuh taix maix greem ba aux, 3aux tak kieh maix tiextu ka sivoe ngai Siyiex, pa mawh Cao raoma mai haktiex maix ang pon teei kawn bun ceu pui Khanan ka dee ot ex tin, sonsang mawh moeng kawn simex aux heue.” 4Maix hu ka haktiex aux, dee ot ru aux mai teei moeng tix kaux, son kawn simex aux Icak heue.” 5Kawncau nawh deeh ah nin ka nawh, “Phan bun ang koe rhawm tix hawt khaix aux hoek daux meung in, mawh sang kieh maix aux deeh viex kawn simex tix hu khaing dee kaoh tix lie?” 6Abraham deeh ah nin ka nawh, “Yuh satix tix, paw doh viex kawn simex aux hu tan heue.” 7Simiang Siyiex khaing meung raoma, pa hoik teei aux lih khaing nyiex ma keeing aux mai khaing haktiex dee ot ru aux mai pa tawx lox sijax mukheu ka aux ah nin, “Son doeh ru maix, Aux hoik tawx haktiex in ka son doeh ru maix, Nawh tak ploi kawncau Siyiex hu sivoe maix, maix tak yaox ti viex moeng tix kaux, son kawn simex aux khaing tan heue.” 8“Phan bun ang koe rhawm tix hawt khaix maix, maix hoik pon luan khaing lox pa tiextu aux, paw viex ngie kawn simex aux hu ka dee an heue.” 9Mawh kheu nan, kawncau nawh deuh taix tix greem ba Abraham mai tiextu ka grawng ceu inkix heue. 10Mawh kheu koe kraung kuceu daux tawm taix kawncau Abraham, nawh teei kala-uk kao mu mai lih hu mai nawh kaoh hu ka meung Mesopotimia mai hoek ka veng Nakhaw heue. 11Nawh kieh kala-uk khankix grux ngawng tix plak praix veng dex rawm daux tan, plakbo pa mawh bawg yam hoek kin bun khankix rawm heue. 12Nawh rawg bwan ah nin, “Siyiex Cao aux Abraham eue, kieh krax pa keud aux grum naog daux in singaix, mai jhi krax pa caux rhawm Maix ka cao simiang aux Abraham liak. 13Jhak heue, aux cung dex rawm daux mai cub kawn bunkrih pui veng an khankix hoek ti kin rawm heue. 14Kieh kawn bun pa ah aux nin ka, tah singiien maix mai tawx aux nyaux ka, phan nawh ah nin, nyaux heue. Mai aux tak baox tawx kala-uk maix khankix nyaux ka, bun an tak mawh pa hoik tawx Maix Cao ka kawncau tix Icak. Ka ceu inkix, aux tak tawng Maix Cao jhi krax caux rhawm tix ka cao simiang aux Abraham heue.” 15Yam ang nawh nyang tien hoik rawg bwan, jhak heue, Rebekkax kawn bun Betoelax klawm singiien rawm piang klip tix mai hoek kin rawm, Betoelax mawh kawn simex Melakha moeng Nakhaw, pux Abraham heue. 16Kawn bun an, kied sidaing mhawm grang mai nawh mawh kawn bunkrih pa ang sax pied sax pha simex tix bawg kawx, nawh lih hu ka rawm daux mai kin rawm daux singiien tix naog mai deeh viex hoek heue. 17Kawncau an nied ti to hu ka kawn bun an ah nin, “Tawx aux nyaux rawm khaing singiien rawm maix ceeix heue.” 18Nawh ah nin, “Simiang eue, nyaux heue.” Khaix an nawh nied ti tah singiien rawm khaing klip tix mai tawx nawh nyaux heue. 19Khaix hoik tawx nawh kawncau an nyaux rawm nawh ah nin, “Aux tak kin tix tawx rawm ka kala-uk maix khankix, tom hoik sak nyaux kix heue.” 20Khaix an nawh nied ti hu sau rawm ka daux dawng mai deeh to ti kin rawm, sonsang yaox kala-uk khankix ti nyaux khawmuik heue. 21Kaw an, daox deng ka pa yuh kawn bun an mai yawg tix, nawh keud ti yaox, mawh ang mawh, pa yuh Simiang Siyiex grawng krax hoek nawh heue. 22Khaix hoik nyaux kala-uk khankix rawm, nawh teei krim khri yhaok tix mu, pa koe tix plak Shekhe mai ble khri ra mu, pa koe kao Shekhe mai tawx ka nawh, 23ah nin, “Mawh maix kawn bun mawx, krai aux mhong liak, koe lawg dee sang peeng yix daux nyiex keeing maix lie?” 24Nawh deeh ah nin ka nawh, “Aux mawh kawn bun Betoelax kawn simex Milakha, pa keh khaing Nakhaw heue.” 25Nawh baox ah nin ka nawh, “Nyiex yix hoik koe brex nghox mai pa ih tom kub mai lawg sang peeng pex kawx koe heue.” 26Khaix an kawncau an gup kaing tix mai yaogyaw ka Siyiex heue. 27Nawh ah nin, “Kieh bwanson koe ka Siyiex Abraham, Nawh Cao ang sax mox krax pa caux rhawm tix mai krax pa rahsee tix ka simiang aux heue. Siyiex hoik thung aux hu ka nyiex pux simiang aux heue.” 28Kawn bun an, to tix ing krai grawng inkix ka miex tix daux nyiex heue. 29Yam an puxke Rebekkax, pa mawh Laban to hu ka kaw simex an ka rawm daux heue. 30Yam yaox nawh krim khri mau mai ble khri khankix ka taix nan nawh mai yam hoik mhong nawh lox Rebekkax ah nin, “Simex an sikah ka aux heue.” Laban tom hu ka kaw an, pa cung tau mai kala-uk hawt dex rawm daux heue. 31Nawh ah nin, “Hoek heue, Maix mawh pui pa hoik pon bwanson khaing Simiang Siyiex, maix lai cung plak praix yuh ka mawx? aux hoik khre rien lawg son maix, khawm dee sang ot kala-uk khankix heue.” 32Khaix an kaw simex an laig daux nyiex, Laban tah an kala-uk mai tawx kala-uk sawm brex mai pa ih tang ceu, nawh teei ti tawx rawm sonsang khoek kix caong tix heue. 33Khaix an kix khan priex preem sivoe nawh, sonsang ih kix, viang mawh nan, nawh ah nin, “Aux ang nyang sawm, sivoe ang tix nyang hoik krai grawng kaing pa hoek ti heue.” Nawh ah nin, “Krai grawng hoek maix heue.” 34Nawh tom ah nin, “Aux mawh kawncau Abraham heue.” 35“Simiang Siyiex hoik kied nawb bwan piang cao simiang aux tom nie mai nawh hoik mawh pui pa ting min, Siyiex hoik tawx yung mai tobrie, mau khri ka nawh, khawm kawncau simex kawncau bun khankix mai kala-uk mai la khankix haoh hun ka nawh heue.” 36“Sara moeng cao simiang aux, keh kawn simex tix kaux son simiang aux, yam riex ju nawh, mai nawh hoik tawx can ceu pa koe tix khawmuik ka nawh heue. 37Cao simiang aux kieh aux tiextu ah nin, maix paw teei kawn bun pui haktiex Khanan mawh moeng son kawn simex aux, pa hoik ot aux, 38maix hu ka nyiex ma keeing aux, ka ru aux mai teei tix viex moeng tix kaux, son kawn simex aux heue. 39Aux ah nin ka cao simiang tix, aux lhat bun ang cu ti hawt khaix tix heue.” 40Viang mawh nan, nawh ah nin ka aux, “Simiang Siyiex pa hoik hawt aux grawng lawng khaix Nawh, Nawh Cao tak ploi kawncau Siyiex ot mai maix, tom hoik pon yuh maix kaing yuh tix, maix tak yaox ti viex moeng tix kaux, son kawn simex aux, khaing daux doeh ru aux mai khaing daux nyiex ma keeing aux heue. 41Maix tak luad luan khaing krax pa tiextu, yam hoek maix ka doeh ru aux, phan kix ang tawx kawn bun an ka maix, maix tak luan khaing lox pa tiextu aux heue. 42Aux tom hoek ka rawm daux ah nin, Simiang Siyiex Cao Abraham eue, maix cox daux krax pa hu aux grum mhawm liak, 43jhak heue, aux cung hawt rawm daux tan mai aux yaox hoek bunkrih tix kin rawm mai aux ah nin ka nawh, tawx aux nyaux rawm khaing singiien rawm maix ceeix heue. 44Phan nawh deeh ah nin ka aux, nyaux heue. Mai aux tak kin rawm mai tawx kala-uk maix khankix nyaux ka kieh nawh mawh kawn bun pa hoik ciak Siyiex tix tawx son kawn simex cao simiang aux heue. 45Sivoe ang aux nyang tien hoik sikah grawng in, Rebekkax hoek khawm singiien rawm, piang klip tix mai lih hu plak rawm daux sonsang kin rawm heue. Aux tom ah nin ka nawh, tawx aux nyaux rawm heue. 46Nawh tah singiien rawm tix phaiphai, khaing klip tix ah nin, nyaux ka heue. Aux tak baox kin rawm mai tawx kala-uk maix khankix nyaux ka Mawh kheu nan, aux tom nyaux rawm mai nawh baox kin rawm mai tawx kala-uk aux khankix nyaux heue. 47Khaix an aux chawk ka nawh, mawh maix kawn bun mawx lie? mai nawh ah nin, aux mawh kawn bun Betoelax kawn simex Nakhaw, Nakhaw mawh pa keh khaing Milakha, mawh kheu nan, aux sau krim khri meeh ka nawh mai ble khankix ka taix nawh heue. 48Aux gup ngai tix mai krub ka Simiang Siyiex mai tawx krax yaogyaw ka Simiang Siyiex Abraham, pa hoik jhi aux yaox daux krax pa rahsee, sonsang teei aux kawn puxaik Abraham son kawn simex nawh heue. 49Yam in, phan maix koe krax pa caux rhawm mai pa sang yuh bwanson ka cao simiang aux, pon yuh ang pon yuh krai yam in, aux tak sang hu plak dawm phan ang mawh nan, plak gwiex heue.” 50Khaix an Laban mai Betoelax pawk lox ah nin, “Kaing in mawh pa kaoh khaing Simiang Siyiex, yix ang chix krai ka maix mhawm ang mhawm heue. 51Jhak heue, Rebekkax hoik koe sivoe ngai maix, teei nawh hu mai kieh nawh mawh moeng kawn simex cao simiang maix, awm lox pa hoik ah Simiang Siyiex heue.” 52Yam hoik mhong kawncau Abraham lox krai kix, nawh tom grux ngawng tix piang tiex mai krub ka Simiang Siyiex heue. 53Kawncau an, teei kraung mau kraung khri khawm kraung ceep khankix mai tawx ka Rebekkax, mai nawh tawx totaix pa ngawh pa mhawm ka prie nawh mai miex nawh heue. 54Kawncau an mai pao nawh, kix ih tau, nyaux tau mai peeng tan daux sawm an heue. Yam kaoh kix ponngawb caocao mai nawh ah nin, “Kieh aux deeh ing ka cao simiang tix liak.” 55Prie nawh mai miex nawh ah nin, “Kieh kawn bun in ot mai yix kao ngaix ha, khaix an nawh pon ti hu heue.” 56Nawh ah nin ka kix, “Paw nyang tiebtie ka aux liak, awm hoik yuh Siyiex krax hu aux grum mhawm, kieh aux deeh ing ka cao simiang tix heue.” 57Kix baox ah nin, “Yix sang kok chawk ti yaox ka rhawm nawh heue.” 58Kix kok Rebekkax ah nin ka nawh, “Sang hu maix mai pui in lie?” Mai nawh deeh ah nin, “Aux sang hu heue.” 59Mawh kheu nan kix ploi Rebekkax tau mai cao pa priex nawh hu tau mai kawncau Abraham mai pui nawh heue. 60Kix nawb bwan ka Rebekkax ah nin ka nawh, “Kieh nan ex mawh miex ka pui kaing rheng mai kaing mheen, mai kieh ru maix pon kwang ka siviex veng pui pa koeng ka kix heue.” 61Khaix an Rebekkax mai kawn bun pa priex nawh khankix, yaog ti kaoh mai brug kala-uk mai hawt khaix kawncau an, yam an kawncau Abraham viex Rebekkax hu khaing kix heue. 62Yam an Icak kaoh khaing Beralahieraw mai hu ot ka baoh Negep, caong ma seh heue. 63Icak lih hu plak praix daux kaung plak bo mai maong ti jhak, nawh yaox ka cub kala-uk pa hoek khankix heue. 64Rebekkax maong ti jhak mai yaox ka Icak, nawh lih khaing kala-uk brug tix heue. 65Nawh ah nin ka kawncau an, “Mawh pui mawx pa lailing daux kaung sonsang rieb ka ex lie?” Cao cau an deeh ah nin, “Nawh mawh simiang aux heue.” Mawh kheu nan, nawh tom teei man tawb tix pheen mai tawb ngai tix ka heue. 66Cao cau an, krai grawng kuceu pa hoik yuh ti ka Icak heue. 67Khaix an Icak rieb nawh laig daux nyiex gox man miex tix Sara mai teei Rebekkax mawh moeng tix, kheu hoik mawh pa moh nawh ka heue. Mawh kheu nan, Icak deeh koe krax nyawm rhawm khaix yum miex tix heue.
Currently Selected:
YAM JAH 24: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
