YAM JAH 23
23
Abraham Liag Dee Sipaung Son Sara
1Sara im ju tix yieh tixnga aliah num, in mawh baux num im ju Sara heue. 2Sara yum daux veng Kirathabax pa mawh veng Hebron, ka meung Khanan, Abraham hoek ti yiiem doe son Sara heue. 3Abraham cung sivoe lawng moeng tix ah nin ka ceu pui Hetax khankix, 4“Aux mawh pui tang meung mai mawh nyo sinie tix kaux sinax pex.#He 11:13 Tawx aux sipaung moeng tix ka simeeig tix dah sinax pex, #Cau 7:16 sonsang glip nawh khaing sivoe ngai aux heue.” 5Ceu pui Hetax khankix deeh pawk lox Abraham ah nin, 6“Cao simiang aux eue, nghiet ka lox yix liak, maix hoik mawh pui pa ting min Siyiex sinax yix, laug maix teei simeeig cie yix mai sipaung moeng maix ka, yix ang doh koe krax thiang tix kaux kawx, sonsang sipaung maix pui yum ka heue.” 7Khaix an Abraham yaog ti kaoh mai tawx krax nab yam ka can pui pa ot daux meung an, pa mawh ceu pui Hetax khankix heue. 8Nawh ah nin ka kix, “Phan pex koe rhawm ti kieh aux sipaung pui yum in glip sivoe ngai aux, nghiet heue, kieh pex hu khyox khaw ka Epharon kawn simex Zawrax son aux liak, 9sonsang tawx Epharon daux rang Makhapelax pa mawh cie nawh pa koe daog kaung nawh heue. Ngawh miex ding kawx, kieh nawh coh ka aux, sonsang mawh simeeig cie aux sinax pex heue.” 10Epharon pa mawh ceu pui Hittix, ngawm tau mai ceu pui Hetax, pawk lox Abraham sivoe ngai ceu pui Hetax pa laig ka daux siviex an khawmuik ah nin, 11“Ang mawh nan, cao simiang aux eue, nghiet ka lox aux, aux tak tawx daux rang pa koe daux kaung an ka maix, mai aux tawx ka maix sivoe ngai pui ceu aux khankix sonsang pon sipaung maix moeng tix heue.” 12Khaix an Abraham tawx krax nab yam ka ceu pui haktiex an khankix heue. 13Nawh ah nin ka Epharon, sonsang mhong pui haktiex an ka, “Phan maix sang tawx an, nghiet ka lox aux, aux tak sang tawx mau son kaung an mai teei hu, aux tak sipaung moeng tix tan heue.” 14Epharon deeh pawk lox Abraham ah nin, 15“Cao simiang aux eue, nghiet ka lox aux liak, haktiex an, ngawh caw lonmau pon yieh Shekhe heue. Sinax maix mai aux, ang koe grawng tix ceu kawx, mawh kheu nan, sipaung moeng maix ka heue.” 16Abraham khaw rhawm ka lox Epharon mai nawh ciang tix tawx lonmau ka Epharon, awm hoik tat Epharon jum, pon yieh Shekhe plah, awm pa shiao pui yuh lai geu ka sivoe ngai pui Hetax khankix heue. 17Mawh kheu nan, kaung Epharon pa koe ka Makhapelax, veng Morean, khawm daux rang mai khaox ox pa koe daux kaung khawmuik, hoik mawh cie nawh heue. 18Nawh hoik ap haktiex an ka Abraham sivoe ngai ceu pui Hetax mai can pui pa laig ka daux siviex veng khankix heue. 19Khaix hoik ceu inkix, Abraham sipaung moeng tix Sara ka daux rang Makhapelax, sivoe veng Mamre, pa mawh veng Hebron, daux haktiex Khanan tan heue. 20Mawh kheu nan, kaung an mai daux rang an, sonsang mawh haktiex simeeig son cie Abraham, ceu pui Hetax khankix hoik ap ka nawh heue.
Currently Selected:
YAM JAH 23: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
