YAM JAH 21

Grawng Keh Icak

1Simiang Siyiex hoek tix kia ngien ka Sara awm gumlox pa hoik ah Nawh mai Nawh Cao yuh son Sara awm sijax mukheu pa hoik tawx Nawh heue. 2Sara koe kaux#He 11:11 mai keh kawn simex tix kaux son Abraham yam hoik kuad nawh, daux singaix hoik ah Nawh Cao ti deuh ka nawh heue. 3Abraham kok ceu kaux kawn simex tix, pa keh son nawh khaing Sara mawh Icak heue. 4Khaix an Abraham pat hak kawn simex tix Icak, yam laig nawh daix ngaix, #Jah 17:12; Cau 7:8 awm gumlox pa tawm Simiang Siyiex ka nawh heue. 5Abraham hoik koe ju tix yieh num yam keh kawn simex nawh Icak son nawh heue. 6Sara ah nin, “Siyiex hoik tawx ceu pa nyiah ka aux, mai can pui pa mhong ku kaux tak yaox ti nyiah tau mai aux heue.” 7Sara ah nin, “Mawh pui mawx pa ah ka Abraham, Sara tak yaox ti tawx kawn tix peuex, viang mawh nan, aux hoik keh kawn simex son nawh tix kaux, yam hoik kuad nawh heue.”

Grheu Hagarax Mai Ishamelax

8Kawn nyawm Icak an haok hwan ting lhaong mai hoik prah teeh miex tix, yam hoik prah Icak ka teeh miex tix, Abraham yuh pawie ting tix mu ka daux singaix an heue. 9Daux tix ngaix Sara yaox ka kawn Hagarax, pui ceu Ejiptux, pa keh son Abraham klieh tau mai kawn simex nawh Icak heue. 10Nawh ah nin ka Abraham, “Grheu bun siliex in mai kawn simex nawh, kawn simex nawh tak ang chix pon sinngao tau mai kawn simex aux Icak heue.”#Ka 4:29-30 11Grawng in, kied mawh pa sung sang rhawm ka son Abraham jao mawh kawn simex nawh heue. 12Viang mawh nan, Siyiex ah nin ka Abraham, “Maix paw doh laux rhawm kheu jao kawn simex in mai jao siliex bun in, nghiet ka lox pa krai Sara ka maix, grawh grawng nawh doeh ru maix tak koe ka daux Icak heue.#Ro 9:7; He 11:18 13Kheu mawh nawh doeh ru maix, Aux tak yuh kawn simex siliex bun maix an, lih ti mawh ceu pui tix cub heue.” 14Mawh kheu nan, Abraham kaoh caocao ponngawb teei blah mai singiien hak rawm mai feuk piang klip Hagarax heue. Nawh ap kawn nyawm an ka nawh mai ploi kiex hu dee singai, khaix an nawh lih hu mai vung viang baoh daux tiag Berashabax heue. 15Yam hoik uik rawm khaing daux singiien hak, nawh deuh kawn nyawm greem yeem heue. 16Khaix an nawh hu ngawm dee singai tix dah, dee pon puing te hoek ti taix ah nin ka tokaux tix, “Paw kieh aux yaox ka yum kawn in liak.” Mawh kheu nan nawh ngawm plak sivoe nawh mai riag yo khawm yiiem tix heue. 17Siyiex mhong ka lox kawn nyawm an, khaix an kawncau Siyiex kok ka Hagarax khaing daux raoma ah nin ka nawh, “Hagarax eue, koe krax pa laux rhawm maix yuh ka mawx? paw vi khi rhawm grawh grawng nawh, Siyiex hoik mhong lox kawn nyawm an ka dee ot nawh heue. 18Kaoh, yaog ka kawn nyawm mai teem nawh ka taix maix, Aux tak yuh nawh mawh ceu pui pa ting tix cub heue.” 19Siyiex paoh ngai nawh mai nawh yaox ka rawm daux tix mu, khaix an nawh hu mai kin rawm naog daux singiien hak an mai nawh tawx kawn nyawm nyaux heue. 20Mawh kheu nan, Siyiex ot tau mai kawn nyawm mai nawh hwan sipie, mai nawh ot daux tiag tu Paran, Nawh lih ti mawh pui puing ak tix kaux heue. 21Miex nawh viex moeng son nawh khaing meung Ejiptux heue.

Sijax Mukheu Abraham Mai Abimaliet

22Khaix hoik luan bawg yam an, simiang Abimaliet#Jah 26:26 mai cao kaing kru naing nawh Phikawlax sikah tau mai Abraham ah nin, “Siyiex ot tau mai maix, ka daux can ceu pa yuh maix khawmuik heue. 23Mawh kheu nan, yam in tawx krax tiextu maix ka aux plak sivoe ngai Siyiex son ang maix lai yuh krax pa lud ka aux mai ka kawn praix aux mai krax magmi aux khankix, awm hoik yuh aux krax pa caux rhawm ka maix, maix tak caw ti yuh son aux mai son haktiex pa hoik yaox maix tix peung ka heue.” 24Abraham ah nin, “Aux tak tiextu ka heue.” 25Yam yaox Abraham tud rhim siliex Abimaliet ka rawm daux tix mu, Abraham ne raw ka simiang Abimaliet heue. 26Simiang Abimaliet ah nin, “Aux ang nyang tawng ka pui pa yuh ceu in maix kawx ang sax krai ka aux, aux ang nyang bax mhong tom in singaix heue.” 27Mawh kheu nan Abraham teei yung mai mawie khankix, tawx ka simiang Abimaliet mai kiex khawm ra yuh sijax mu kheu tau heue. 28Abraham gwieh ti deuh kawn yung shiang pa awn aliah mu khaing cub yung nawh tan heue. 29Khaix an simiang Abimaliet chawk Abraham, “Dee bleeh grawng gwieh maix kawn yung shiang pa awn aliah mu khaing cub yung nawh khankix koe yuh ka mawx?” 30Nawh ah nin, “Rieb maix teei kawn yung shiang pa awn in aliah mu khaing daux tawm taix aux, ceu inkix tak mawh sakse hoik kaong aux rawm daux in heue.” 31Mawh kheu nan nawh kok dee an mawh Berashebax, grawh grawng nawh, kiex ra kaux hoik tiextu ka paox tix heue. 32Kix yuh sijax mukheu ka Berashebax, khaix an simiang Abimaliet mai cao kaing kru naing nawh Phikawlax yaog ti ing ka haktiex Philitix heue. 33Abraham sum khaox plix phak tix num daux Berashebax mai yaogyaw ka Simiang Siyiex, pa mawh Siyiex leeing ju heue. 34Abraham peung pan ka daux haktiex Philitix tom rheung heue.

Currently Selected:

YAM JAH 21: WCL

Highlight

Copy