YAM JAH 20

Abraham Mai Abimaliet

1Abraham lih hu ka plak seh mai ot sinax veng Kadeshax mai Shurax mai peung ka veng Gerax tan heue. 2Abraham ah nin ka moeng tix Sara, “Nawh mawh nan aux#Jah 12:13, 26:7 heue.” Mawh kheu nan, simiang Gerax pa mawh Abimaliet ploi pui tix hu teei ka Sara heue. 3Viang mawh nan, Siyiex hoek ka Abimaliet daux camaox ponsawm ah nin ka nawh, “Maix mawh pui pa yum tix kaux tete heue. Grawh grawng nawh, bun pa hoik teei maix an, mawh moeng pui tix kaux heue.” 4Simiang Abimaliet ang nyang pon ti hoek dex nawh, mai nawh ah nin, “Simiang Siyiex eue, Maix tak sang pah ka ceu pui pa rahsee lie? 5Nawh hoik ah, mawh nawh nan tix ka aux, pie cao nawh kawx krai, Nawh mawh puxke aux heue. Ka daux krax pa rahsee mai taix pa singax singeh aux in, aux hoik lud yuh ceu in heue.” 6Siyiex ah ka nawh daux camaox, “Mawh heue, Aux tawng hoik yuh maix ceu in ka daux krax pa rahsee rhawm maix, mawh kheu nan, sonsang ang maix koe krax lud ka Aux, Aux hoik tiebtie maix, son ang maix pon ti teei ka nawh heue.” 7“Mawh kheu nan, deeh tawx moeng nawh ka nawh, kheu mawh nawh cao jhai tix kaux mai nawh tak rawg bwan son maix mai kieh maix im ju ka heue. Viang mawh nan phan maix ang deeh tawx nawh maix tak yaox ti yum tete, khawm can ceu pui pa dex pa dawt mai maix khawmuik heue.” 8Simiang Abimaliet yaog ti kaoh tom cao plak ponngawb mai kok ka kawncau mau soi nawh khawmuik mai krai kix mhong grawng inkix, mai pui khawmuik, kied lhat graung ka heue. 9Simiang Abimaliet kok Abraham ah nin ka nawh, “Kheu maix yuh ceu inkix piang yix? mawh koe krax lud aux ka maix yuh ka mawx? maix tom sang viex phimap pa ting lhaong koe piang aux mai meung haktiex aux lie? maix hoik yuh kaing ceu pa ang maix keung ti yuh heue.” 10Khaix an simiang Abimaliet ah nin ka Abraham, “Mawh kheu yaox maix ceu pa yuh ka mawx maix tom yuh nin lie?” 11Abraham ah nin, “Kheu yaox aux pui haktiex inkix ang koe krax lhat graung ka Siyiex mai kix tak pah aux yum son grawng moeng aux, aux tom yuh nin heue.” 12“Viang mawh nan, nawh mawh pux nan aux tete heue. Nawh mawh kawn bun keeing aux mai ang mawh kawn bun miex aux, mai nawh deeh mawh moeng aux heue.” 13Yam hoik hoek bawg yam kieh Siyiex aux vung viang khaing nyiex ma keeing tix mai aux ah nin ka nawh, “In hoik mawh krax pa caux rhawm, pa caw maix ti yuh son aux kudah dee, yam hu dee mawx ang ah, krai, Nawh mawh puxke aux, Aux hoik tawm tix priex ka moeng ti yuh nan heue.” 14Khaix an simiang Abimaliet teei yung mai mawie, tau mai kawncau simex, bun mai tawx ka Abraham, nawh deeh tawx moeng nawh Sara ka nawh heue. 15Abimaliet ah nin, “Jhak heue, haktiex aux hoik koe sivoe ngai maix, sang moh maix tix ot dee mawx, kieh mawh awm rhawm cao maix heue.” 16Khaix an nawh tom ah nin ka Sara, “Jhak heue, aux hoik tawx lonmau ka puxke maix tix rheng sonsang liag tix tawx man tawb pakngai mai khawm son paox grawm maix khankix heue.” Nawh tom hoik yaox krax sidiex gau grawng kuceu heue. 17Mawh kheu nan, Abraham rawg bwan ka Siyiex mai Siyiex pai jhawm saux simiang Abimaliet mai moeng nawh, khawm bun pa cau nawh khawmuik heue. Khaix an kix deeh keh kawn, 18mawh kheu Simiang Siyiex hoik nyeep vaig pa chix nghe, daux nyiex Abimaliet jao grawng moeng Abraham Sara yam an heue.

Currently Selected:

YAM JAH 20: WCL

Highlight

Copy