KAWLAWSIE 3

1Phan hoik yaog pex kaoh tau mai Cao Khrit, nied ti sawg ceu pa koe dee long, dee ngawm Cao Khrit ka plak taix khawn dawm Siyiex #Yaog 110:1 heue. 2Kieh rhawm pex keud grawng ceu pa koe dee long, paw keud grawng ceu pa koe ka piang haktiex khankix heue. 3Pex hoik yum, hoik mox ju pex tau mai Cao Khrit ka daux Siyiex. 4Yam hoik sidawng Cao Khrit pa mawh ju ex sax, pex kawx tak sang sidawng ka daux min pakngai tau mai Nawh Cao heue.

Ju Pa Prim Mai Ju Pa Khraox

5Mawh kheu nan teei kraung pakpeung tokaux pex yum ka ceu pa koe ka piang haktiex, pa mawh pa phit vao, pa ang singax singeh, alo nex nham, pa simie pa caox, pa ghoing, pa mawh ceu pa krub riang grang heue. 6Mawh kheu grawng ceu an khankix, pa song rhawm songrhi Siyiex hoek ka piang kawn pa lieh lox khankix. 7Pex kawx hoik sax hu ka ceu an khankix yam kawn im pex ka daux pa awm an heue. 8Yam in pex tik ka ceu an khawmuik, pa song rhawm songrhi pa hax rhawm, pa koeng riang ciang khoi, pa nieb ah nieb yuh plakngai pui laux, pa ah lox seeing lox brai khaing daux jheeh pex heue. 9tix kaux lai tix kaux paw pie paw lhen ka paox tix, kheu pex hoik peeik ti tik pui prim,#Efe 4:22 khawm ceu pa yuh nawh, 10hoik ceep pui khraox, pa kawn yuh pa khraox pot tom pon krax tawng, #Efe 4:24awm riang pakpeung kaw pa phan pa yuh nawh#Jah 1:26 heue. 11Ka daux pa phan pa yuh an, ang lai pon koe pui Helasax, pui Yudax, pa pat hak, pa ang pat hak, pui pheem, pui Sakusix, siliex, pui ploi, Cao Khrit mawh khawmuik mai ot ka daux khawmuik heue. 12Awm pui pa hoik laug Simiang Siyiex, pa singax singeh, pa moh kah, pex ceep ceu pa moh rhawm, pa caux rhawm, pa mhawm rhawm, pa tiem rhawm tiem rhi, pa awn rhawm awn rhi, pa lang gun lang yeung heue. 13Phan pui tix kaux kaux koe dee deuh phimap ka pui tix kaux kaux, #Efe 4:2tix kaux lai tix kaux yeung ka paox tix, pluat ploi phimap ka paox tix, awm hoik pluat ploi Cao Khrit phimap pex, pex kawx yuh awm an heue.#Efe 4:32 14Ka piang ceu in khawmuik ceep pa moh rhawm, pa mawh ceu pa vien pa grum mhawm heue. 15Kieh pa nhim Cao Khrit giex kaing ka daux rhawm rhi pex, pa hoik kok pex ka, khawm ka tokaux tix mu khaing, kieh pex yaogyaw bwanson heue. 16Kieh gumlox Cao Khrit ot ka daux rhawm rhi pex tom nie, sidiex gau ka paox tix ka daux krax pingnya cuyi khawmuik, ka lox rhax yaogyaw, lox rhax lai, lox rhax bwan, kieh koe krax yaogyaw bwanson ka daux rhawm rhi pex mai ah lox rhax ka Siyiex heue. 17Pex yuh patix ang ah, ka daux gumlox ang ah, ka daux pa yuh ang ah, yuh khawmuik ka daux ceu kaux Simiang Yesux mai yaogyaw bwanson ka Siyiex pa mawh Keeing Cao ka daux Nawh heue.#Efe 5:19-20

Kaing Pa Caw Pui Khraox Ti Yuh

18Moeng khankix eue, kieh koe krax cu nghiet ka mex tix,#Efe 5:22; 1Pe 3:1 awm pa khaw ka daux Simiang Siyiex. 19Mex khankix eue, moh ka moeng tix#Efe 5:25; 1Pe 3:7 mai paw nieb kieh kix koe krax song rhawm heue. 20Kawn nyawm khankix eue, nghiet lox miex keeing tix ka daux ku ceu khawmuik, grawh grawng nawh pa yuh nan mawh pa khaw caw rhawm ka daux Simiang heue.#Efe 6:1 21Keeing khankix eue, paw cheeik tix kieh kawn pex song rhawm,#Efe 6:4 ha kix kox laux rhawm kah heue. 22Siliex khankix eue, nghiet lox kix pa mawh cao pex ka daux nex nham, ka daux ku ceu khawmuik, ang mawh ceu pa yuh pa yaox ka ngai khaing, yuh ka daux pa viex rhawm tix khawmuik, ka daux pa lhat pex ka Simiang heue. 23Pex yuh patix ang ah, viex rhawm coca ti yuh, awm pa yuh son Simiang Siyiex, paw yuh awm pa yuh son kawn pui heue. 24Mawh kheu hoik tawng pex grawng tak sang pon bwanson pa mawh sin khaing Simiang. Pa yuh pex mawh son Simiang Cao Khrit heue. 25Kaw pa yuh pa ang khaw, tak sang deeh pon son pa ang khaw pa hoik yuh nawh an#Efe 6:5-8 mai ang koe ceu pa jhak ka pakngai pui heue. #Pi 10:17; Efe 6:9

Currently Selected:

KAWLAWSIE 3: WCL

Highlight

Copy