Mark 15

Zeso ge goformo̰ Pilaɗ ndwa se

Mat 27.1-2; 27.11-31; Luk 22.66-71; 23.1-4, 13-25; Yoh 18.28-40; 19.1-16

1Aaram pe vḛḛ, ga̰a̰l ge nda ge kee tuwaleya ma way ma kwate ɓanna ge Yahuɗ ma ga̰a̰l ge ɗeme num mage nda ge hate eeya ge Moyiz ne ma, ndwa go, Yahuɗ ma ga̰a̰l ge kun sariya ma peɗ, ndwa za̰a̰ ta ge fare a̰me pagal ɗu. Sok ge àa za̰a̰ ta go, àa vwal Zeso ya, àa gene ne ya, àa ɓyan ne ge Pilaɗ tok yà me. 2Ge sok mbe go, Pilaɗ ele ne go: Mo gan ga̰a̰l ge Yahuɗ ma way ne de? Zeso gwan ge ne janna go: Mo jin̰a ne no.

3Ga̰a̰l ge nda ge kee tuwaleya ma way ma ee fare ma gḛḛ-gḛḛ ge ne pagal. 4Pilaɗ gwan ele ne go: Mo za̰a̰ fare ge àa ee num no ge mo pagal ma ya go peɗ de? Fare a̰me ɗu ge mo gwan ge num janna ge pagal ndwa ben tene to de? 5Ɗaŋɗe, Zeso be gwan jan fare a̰me ɗu to baɗ. Fare mbe kee Pilaɗ yal.

6Ge vḛḛso ge Paska ne ma go tatab, Pilaɗ kaɗ dol ɓase ma ndu ge daŋay zì ya zum ɗu, ge laa ɓyareya ge num way pagal. 7Zane no ɗe, ndu a̰me ɗu ge àa tol ne Barabas wa ya ge daŋay zì ɓanna ge nda ge kee ho̰o̰l ge muluk ge Rom ne ma. Sok kee ho̰o̰l mbe go, àa hṵṵ swày no. 8Ɓase ma mbo ya ge Pilaɗ ta, àa jan ne go, ne kee maa kaŋ ge ne ha̰a̰le kee maa ne ge vḛḛso ge Paska ne go. 9Pilaɗ gwan ge num janna go: Ḛ ɓyare go mbi doo ḛ digi gan ga̰a̰l ge Yahuɗ ma way de? 10Jin̰a go mbe ge dape, kaa ge kuwaya tyatyaɗ go, ne yil ee ga̰a̰l ge nda ge kee tuwaleya ma way ma ne go, num ɓin̰a na Zeso ya gezi. 11Ɗaŋɗe, ga̰a̰l ge nda ge kee tuwaleya ma way suti ɓase ma digi go, num jin̰a Pilaɗ ne doo maa ya digi zoo Barabas. 12Pilaɗ gwan hee fare ele num go: Ḛ ɓyare go mbi kee ge ndu ge ḛ tol ne go gan ga̰a̰l ge Yahuɗ ma way gyana de? 13Àa gwan oy digi ge ka̰a̰l ndaal go: Pee ne ge ɔwara kaŋre ta. 14Pilaɗ ele num go: Kee ma̰ sone de? Àa gwan oy digi ge ka̰a̰l ndaal waɗeya go: Pee ne ge ɔwara kaŋre ta! 15Sok mbe go, dol Barabas ya digi ndwa eyal ɓase ma laa. Guwa̰ ge dwagle Zeso ge bol go, hon asagar ma ne ndwa go num mbo pel ne. 16Asagar ma wan Zeso, àa gene ne goformo̰ sok kun sariya zì yà. Àa tol asagar gegene ma ya ge maa ta. 17Àa kan ba̰a̰ ge gan ga̰a̰l ma way ge kàal sasaw ge ne ta, àa tiɗ balme ge gumi tok van ma, àa kubi ne ge ne pagal. 18Guwa̰, àa ɗege coɗ ne janna go: I sa̰a̰ mo wa, gan ga̰a̰l ge Yahuɗ ma way! 19Àa ka keme ne ge ne pagal go ge kɔn̰a, àa sen watwa ge ne ta, àa guu maa ko ma se, àa kubi ta se, ndwa uware ne. 20Guwa̰ ge àa lasage ne go, àa fwage ba̰a̰ ge gan ga̰a̰l ma way ge kàal sasaw mbe ge ne ta gezi, àa kan ne, ne ba̰a̰ ma, àa gene ne suwal guwa̰ zum yà ndwa mbo pel ne ge ɔwara kaŋre ta.

Pella ge Zeso ne ge ɔwara kaŋre ta

Mat 27.32-56; Luk 23.26-49; Yoh 19.17-37

21Ndu a̰me ɗu ge suwal Siren ne, ge àa tol ne Simo̰, a Alekzandr mage Rufus ba ne. Sok jaɗ ge gaaso ya, ka kale mboya ge sok mbe go, asagar ma wan ne, àa ee ne ge pool in kaŋre ge Zeso ne. 22Àa gene Zeso ya ge sok a̰me ge àa tol ne golgota go, ge ne pe wanna no go: Sok ge dḭḭ pagal kal. 23Àa hon ne on̰or jìn̰al kirgiya ge drog ge àa tol ne go mir, ɗaŋɗe, kuri ne be njoɗɗa. 24Àa pel ne ge ɔwara kaŋre ta digi, guwa̰ ge àa pee ne go, sok ɓyare vaa ta ne ba̰a̰ ma go, àa ee daŋ ndwa go ndu ge diige see kaŋ ge daŋ mà deɗ ne ya. 25Àa pee ne gyala horom ndwa go ler wa gezi ɗu ge aaram. 26Fare ge ee num kun sariya swày ge Zeso pagal, àa njaŋe ne ge byalga ge àa pee ne ge ne kaŋre pagal digi go: Ano a gan ga̰a̰l ge Yahuɗ ma way ne. 27Àa pel nda ge fiiri vin̰a ma zi ge maa kaŋre ma ta, ge ne ziya ma go, ɗu ge lee matoson go, gegene ge lee magul go me. 28[Ago mbe no, fare ge Njaŋeya ge Dok ne jin̰a go: Àa isi ne ge nda ge kee sone ma buwal zì, wa huy no.]

29-30Nda ge ka kale mboya ge sok mbe go ma ka pisigi maa pagal, àa ka sal ne, àa ka janna go: Woo! Mo ge jan go: Mo gul zok ge Dok ne se, mo gwan sin ne digi ge dwam ge taa ma pul zì baba, ge sego, mo̰o̰ tene sḛ gale ɗaŋ! Ka̰a̰ mo ko ge ɔwara kaŋre ta digi ya se.

31Ga̰a̰l ge nda ge kee tuwaleya ma way ma ɓanna ge nda ge hate eeya ge Moyiz ne ma ka coɗ ne waɗme, àa ka jan ta ge ta buwal zì go: Mon nda ge ɗogle ma ɗag, ne mo̰o̰ tene sḛ gale ɗaŋ! 32N̰a Krist, ndu ge Dok taa ne, gan ga̰a̰l ge Izrayel ma way ka̰a̰ na ko ge ɔwara kaŋre ta digi ya ge sego, ndwa go i wa kuwa, i wa hoɗ fareba ge ne ta me! Nda ge àa pee num dagre ge ne ma ka sal ne waɗme.

Swày ge Zeso ne

33Sok ge gyala pɔgwa taɗ mbiya go, sok mbo ya saa se tṵṵ ɗeɗeg ge suwa pagal peɗ, ɗiŋ mbo gyala swa saa. 34Sok ge gyala tok gasamal ler taa mbiya go, Zeso oy digi ge ka̰a̰l ndaal go: Eli, Eli, lama sabaktani? Ne pe wanna go: Dok ge mbi, Dok ge mbi, ge dape, mo wa seŋe mbi mo guwa̰ go de?#Mkm 22.2. 35Nda a̰me ge kaa sok mbe go ma za̰a̰ ne, àa ka janna go: Ḛ za̰a̰ a tol Eli go ne chiya na kṵwa̰ ba! 36Ndu a̰me ɗu ge num buwal zì, chiya mbo hee chifo̰ ya, paa ne ge on̰or jìn̰al ge haɗ-ɗa ka̰a̰mal pagal, tyal ne ge kɔn̰a wa zì, tare ne ne digi yà, ndwa go ne suwa̰me ne njoɗɗa, jan go: Nè ndi gale, Eli mà mbo ya ndage ne ge kaŋre digi ya se de! 37Guwa̰, Zeso oy digi ge ka̰a̰l ndaal, ne on̰om ndage. 38Sok mbe go, ba̰a̰ ge vaa zok ge Dok ne pul taabe tene se buwal zi, ge digi ya ɗiŋ mbo se. 39Ga̰a̰l ge asagar ge kis ma way, ge mḛḛ ge Zeso ndwa nga, sok kuwa ne suuya mbe go ɗe, jan go: Fareba, ndu mbe no, a Dok Van ne. 40Nda zaab a̰me ma kaa ge sok mbe go, num sḛ ma waɗme, àa ka ndil sok ge zum-ma kaal. Ge num buwal zì, Mari ge suwal Magdala ne, Salome, Mari ge Jak ge jiyale mage Joze na̰. 41Num sḛ ma nda ge dee ka kàre ne pe mage kee ne tèmel ma ne, sok ge kaa ge Galile yà. Nda zaab a̰me ge ɗogle ma gḛḛ-gḛḛ, ge àa ɓa̰a̰ ya mboya dagre ge ne, ge Jerusalem diŋ ya ma kaa ge sok mbe go waɗme.

Mbulla ge Zeso ne

Mat 27.57-61; Luk 23.50-56; Yoh 19.38-42

42-43Sok ge gyala gale wa ya be dinna, Jozef, ndu ga̰a̰l ge hormo ge no ga̰a̰l ge Yahuɗ ma way ge kun sariya ma buwal zì, ge ne suwal no Arimate, ne ge ee na jobreya no ge muluk ge Dok ne ge mbo no ya pagal, yan-na. Ajo̰o̰ ne dwam ge nda nuusi ta ge vḛḛso sabaɗ pe ne ɗe, wan na dul wa mbo ge Pilaɗ ta, ndwa ele ne duul swày ge Zeso ne. 44Sok ge dee ne ta yà, jan ne go Zeso suu ya go. Pilaɗ kee ajab sok ge za̰a̰ go ne suu ya go. Tol asagar ma ga̰a̰l ya ge na ta, ele ne go Zeso suu ge daa day de. 45Sok ge asagar ma ga̰a̰l wa̰a̰ ne fare pe, hon Jozef vin̰a go, ne mbo hee ne duul swày. 46Jozef mbo yaɗ pakta lwaga lalan̰ ya, mbo ya ndage Zeso duul ge kaŋre digi ya se, warge ne ge pakta ge lalan̰ mbe zì, ee ne ge tugul swày ge àa ca ne njal zì. Guwa̰ go, viŋri njal ya, mbo ya dibi tugul mbe wa. 47Mari ge suwal Magdala ne ɓanna ge Mari ge Joze na̰ ka ndil sok ge àa ee ne duul no ge ne go.

Currently Selected:

Mark 15: kiaGRB

Highlight

Copy