Mark 14

Vin̰a ge ɓyare Zeso hunna

Mat 26.1-5; Luk 22.1-2

1Dwam gaa zi, ge go vḛḛso ge Paska#14.1 Paska ne pe wanna go: Vḛḛso dwaɗ pagal ge Ba ge puuya ne, ge hṵṵ Ejypt ma van ge pul sway ma, ge kale ge Hebre ma zok ma pagal digi, sok ge àa gale wa ya ge Ejypt diŋ. mage vḛḛso ge dupḛ ge be jìn̰al hore na ndwa zì wa mbo keeya. Ga̰a̰l ge nda ge kee tuwaleya ma way mage nda ge hate eeya ge Moyiz ne ma ka ɓyare vin̰a go, maa kee pe gyana maa wa wan Zeso ge maa zwam a̰me ɗu ɗoo, maa wa hun ne gezi de. 2Ago àa ka jan ta go: Ɓyare go nè wa̰a̰ ne ge dwam vḛḛso go to, ɓase ma mà haɗ ge ɗege ho̰o̰l ya ge nè pagal.

Idiir suusiya ge Zeso pagal

Mat 26.6-13; Luk 7.36-50; Yoh 12.1-8

3Sok ge Zeso kaa ge suwal Betani go, ge Simo̰ ge dee kṵṵ swàm diŋ, gwale a̰me ɗu waɗ-ɗa diŋ, seɗ ne wa ya zam kaŋ zam. Gwale mbe kaa ge koblo ge àa ca ne ge njal Albatr ge na tok go, huyya ge idiir ge yee gḛḛ, ge ɗiyage-ɗiyage, ge àa tol ne go nar. Hal koblo mbe wa gezi, suusi ne ge ɓul mɔɗwag ge Zeso pagal. 4Nda ge kaa ge sok mbe go ma, a̰me ge num buwal zige ma, sok kuwa gwale mbe kaŋ ge kee, num laa mbo ya vḛḛneya, àa jan ta go: Idiir ge yee gḛḛ ge go mbe no, ne sḛ vḛḛne ne gezi ge dape de? 5Ne kwaɗa daa go àa yaɗ ne gezi waɗe silay#14.5 Silay ɗu, a poɗɗa ge tèmel ge ndu kee ne dwam ɗu ne. Idiir mbe ye waɗe poɗɗa ge tèmel ge ndu kee ne dwam kikis taa waɗe. kikis taa, àa vaa nda ge a̰se ma ne to de? Num laa mbo ya hoɗ ge ne ta. 6Ɗaŋɗe, Zeso jan num go: Ḛ hoɗ ḛ laa ge ne ta ge dape de? Ḛ n̰a ne cɔgwaɗ. Kee kaŋ ge kwaɗa ge mbi pe. 7Ago nda ge a̰se ma go ge ḛ buwal zì ɗaɗag, ḛ ge pool ge kee num kwaɗa ge ḛ ɓyare go, ɗaŋɗe, kaɗɗa ge mbi ɗe, mbi mbo kaɗ kaal tata ge ḛ buwal zì to. 8Kee kaŋ ge na pool mbiya keeya tem, idiir ge ne suusi ne no ge mbi duul ta, nuusi zḛḛ duul swày ge ambi, ge mbulla pe. 9Fareba mbi jan ḛ ne no, sok ge no dunin̰a zì ma peɗ, ge àa mbo kaɗ-ɗa ka oy Fare ge Kwaɗa ge num go ma, àa mbo ka faa kaŋ ge gwale mbe kê ne waɗme, ndwa go ne gaa ge kaŋ dwaɗ pagal go ge nda ta peɗ.

Ko challa ge Yudas chiya Zeso ne

Mat 26.14-16; Luk 22.3-6

10Yudas Iskariyoɗ, ɗu ge na ka̰a̰m ge ame hateya ge wol pɔgwa zi ma buwal zige, ɗege mbo seɗ ga̰a̰l ge nda ge kee tuwaleya ma way ma, ndwa ɓyan Zeso gezi ge num tok go. 11Sok ge ɗege wan num fare pe, àa kee laa saal sok za̰a̰ ne go. Guwa̰, àa kee wa tii go maa ho̰ ne bware. Sok mbe go, Yudas ɗege ɓyare vin̰a ge jwab ndwa ɓyan ne gezi.

Kaŋ zam ge Paska ne

Mat 26.17-36; Luk 22.7-18, 21-39; Yoh 13.1-38; 1Ko 11.23-25

12Ge dwam ge zḛḛge ge dupḛ ge be jìn̰al hore ne go, dwam ge àa vyan tame van ma kee tuwaleya ge vḛḛso ge Paska ne pe, Zeso nda ge ame hateya ma ele ne go: Mo ɓyare go i mbo nuusi mo sok ge zam kaŋ zam ge Paska ne ge diya de? 13Sok mbe go, teme na nda ge ame hateya ma zi, jan num go: Ḛ mbo ge suwal ga̰a̰l Jerusalem diŋ yà, ḛ mà seɗ ndu son a̰me ɗu in mam ge kṵṵri, ḛ kàre ne pe. 14Zok ge mà waɗ-ɗa ne diŋ, ḛ wuwa ne pe yà, ḛ jan ndu ge zok mbe go, Ba ge hateya jan go: Zok ge na mà mbo zam kaŋ zam kee vḛḛso ge Paska ne ɓanna ge na nda ge ame hateya ma diya de? 15Mà mbo ngay ḛ zok pul ge a̰a̰l ge zok ge na kon pagal digi-ge yà, nuusiya ge na kaŋ ma mɔɗwag zì ɓal. A ge sok mbe go, ḛ wa mbo nuusi nè kaŋ zam vḛḛso ge Paska pe. 16Nda ge ame hateya ge zi mbe ma kan ta mboya, àa deɗ-ɗa ge suwal ga̰a̰l diŋ, àa seɗ kaŋ ma ge Zeso jin̰a maa num mbe go tetem, àa nuusi kaŋ zam kee vḛḛso ge Paska pe.

17Sok ge sok yin̰a gasamal, Zeso mage na nda ge ame hateya ge wol pɔgwa zi ma yan-na. 18Sok ge àa kaa ge taabul wa go zam kaŋ zam, Zeso jan num go: Fareba mbi jan ḛ ne no, ḛ ge ḛ zam kaŋ zam no dagre ge mbi ma, ɗu ge ḛ buwal zige mbo ɓyan mbi gezi ge nda tok go. 19Ne nda ge ame hateya ma ndwa mbo ya suu se leɗeɗ. Ndu ge diige ɗege ele ne go: A mbi de? 20Gwan ge num janna go: A ɗu ge ḛ ge wol pɔgwa zi ma buwal zige, ge paa na tok no dagre ge mbi, ge seɗe ge ɗu go, mbo ɓyan mbi gezi ne. 21A ngaɗ go, mbi, Van ge Ndu ne, mbi mbo mbo swày dinna ge Njaŋeya ge Dok ne ma jin̰a go. Ɗaŋɗe, woo ge ndu mbe ge mbo ɓyan Van ge Ndu ne ya gezi. Nde-nde àa tol ndu mbe dana to.

22Sok ge àa ka zam kaŋ zam go, Zeso hee dupḛ, guwa̰ ge kee mersi hon Dok go, siɗi ne se, hon num ne, jan go: Ḛ ame, ano mbe no a mbi sḛ duul ne. 23Guwa̰, hee kob ge on̰or jìn̰al no ne zì, kee mersi hon Dok, hon num ne, àa peɗ, àa njoɗ ne me. 24Jan num go: Ano, a mbi swàm ne, swàm ge wa tii vwalla nee ne, ge mbo kan-na se ge nda pe peɗ. 25Fareba mbi jan ḛ ne no: Mbi mbo daa gwan njoɗ on̰or jìn̰al to baɗ, mbi gaa dee mbo njoɗ on̰or jìn̰al ge jin̰al, ge muluk ge Dok ne zì yà.

26Guwa̰ ge àa mbaa kaŋ ge sale Dok ge no Maktub ge kaŋ mballa ma way zì go, àa kan ta mbo ge njal ge ɔwara oliv ma do̰o̰ no ge ne pagal digi yà. 27Jan num go: Ḛ peɗ, ḛ mbo n̰a mbi, ago njaŋe ge maktub ge Dok ne zì go: «Mbi mbo hun ba ge koy tame ma, go no tame ma mbo ɓasare se.»#Zak 13.7. 28Guwa̰ ge Dok mbo tan mbi ya digi, mbi mbo mbo ndaage ḛ ge suwa ge Galile ne yà. 29Piyer jan ne go: Kaɗɗa nda gegene ma n̰a mo ya peɗ puy ɗe, mbi mbo n̰a mo to. 30Ne sḛ gwan ge ne janna go: Fareba mbi jan mo ne no, mà ɗaal mbe no zì baba, zḛḛ ge go baare too fiyaso ge ndwa zi, mo mà ee mo wa ndwa taa go mo kuwa mbi to. 31Ɗaŋɗe, Piyer gwan dwage ne janna digi ge ka̰a̰l ndaal go: Kaɗɗa ne mbiya go, mbi mbo swày dagre ge mo puy, mbi mbo jan ge mbi wa zì go, mbi kuwa mo to, to baɗ. Ne nda ge ame hateya gegene ma peɗ ka janna mbe go me.

Kaɗeya ge Zeso ne ge gaaso Jeɗsemane zì

Mat 26.36-46; Luk 22.40-46

32Zeso mage na nda ge ame hateya ma mbo ya ge sok a̰me go ɗu, ge àa tol ne Jeɗsemane, jan num go: Ḛ kaa ge go go, mbi mbo kee kaɗeya. 33Tol Piyer, Jak mage Yohana, àa ge num mbo. Sok mboya go, ɗege za̰a̰ yal na sḛ zì, ka iigi tene. 34Jan num go: Mbi duul suu ya se leɗeɗ, iigiya ge mbi seɗ ne ya mbi sḛ zì mbe no, ee mbi mbo swày, ḛ kaa go go, ḛ kaɗ jejew me. 35Guwa̰, mbo gezi yà nde, kubi na pul ge suwa se, kee kaɗeya go: Kaɗɗa vin̰a go, n̰a ler ge yal mbe kale ge mbi pagal gezi. 36Gwan jan go: Abba, Baa, kaŋ a̰me ɗu ge tane mo be keeya to, to, cigi kob ge yal njoɗɗa ne mbe no gezi ge mbi pagal. Kaɗɗa na go to puy, kee kaŋ ge mo laa ɓyare ne keeya, ɗaŋɗe, ne kaa be laa ɓyareya ge ambi to.

37Gwan-na ge na nda ge ame hateya ma ta, seɗ num fii dwam. Tol Piyer jan ne go: Simo̰, mo gwan fii go dwam zoo de? Mo pool ge wan tene kàɗɗa ge mo ndwa ler ɗu to de! 38Ḛ kaa jejew, ḛ kee kaɗeya me, ne kaa ge ḛ dee pe heeya zì to, ago ḛ ge dwaɗɗa ge kee kaŋ ge kwaɗa ma ɓa, ɗaŋɗe, ajo̰o̰ sḛ duul tuguɗi ɗe, ḛ pool ge mḛḛ Ba ge ho̰o̰l ndwa zì to.

39Guwa̰, gwan mbo gezi yà nde ge ndwa zi, ka dwage Dok na fare mbe ma janna ge na kaɗeya zì. 40Gwan gwan-na iya, seɗ num, àa fii ya dwam galgatag ge go num ndwa ge kan zum go fyalag kaɗ to. Àa daa be kuwa fare ge maa gwan jan ne to.

41Gwan mbo kee kaɗeya ge ndwa taa, gwan-na ge num ta, jan num go: Ḛ go gale dwam ta fiiya baba de? Ḛ ɗwabe ta ɗaŋ! A̰me be gaa to, sok mbyaɗɗa go, àa gaa ɓyan Van ge Ndu ne ge nda ge sone ma tok go. 42Ḛ ɗege digi, nè mbo, ndu ge ɓyan mbi gezi yan ja no.

Wanna ge Zeso ne

Mat 26.47-56; Luk 22.47-53; Yoh 18.2-12

43Zeso gale sok jan fare go, Yudas, ɗu ge nda ge ame hateya ge wol pɔgwa zi ma buwal zige zuɗ-ɗa ge nda ɓase ge na pe go. Ɓase mbe ma mbo ya ge kasagar mage calaŋ ma ge maa tok go. Ga̰a̰l ge nda ge kee tuwaleya ma way ma ɓanna ge nda ge hate eeya ge Moyiz ne mage Yahuɗ ma ga̰a̰l ge ɗeme num ma teme num ya ne. 44Yudas ge ɓin̰a Zeso gezi, za̰a̰ tene zḛḛ ge ɓase mbe ma, ge fare a̰me ge na mà mbo ya keeya ge ne. Jin̰a num ya go: Ndu ge mbi mà buu ne ya zì ge komreya ɗe, a nee ne, ḛ wa̰a̰ ne, ḛ mbo ge ne, ḛ koy ne ge ḛ ndwa pe zì keceɗ. 45Sok ge àa dee ya gaw, Yudas mbo ya ge ne ta zì guwa, tol ne go: Rabbi#14.45 Rabbi pe wanna go: Ba ge hateya.! Buu ne zì me. 46Ge sok mbe go, nda mbe ma paa maa tok, àa wan ne. 47Ndu a̰me ɗu ge kaa ge Zeso ma dagre, ndage na kasagar ge na vum zì, kun ga̰a̰l ge nda ge kee tuwaleya ma way ge waɗe ndu ge kee ne tèmel tɔgwa gezi. 48Sok mbe go, Zeso hee fare, jan num go: Ḛ daa zuu ya zum gyana ge kasagar ma, ge calaŋ ma ge ḛ tok go ndwa wan mbi dinna ge àa wan ndu ge fiiri vin̰a go de! 49Dwam ma mɔɗwag mbi kaa ge ḛ buwal zì, mbi ka hateya ge zok ge Dok ne zì, ḛ be wan mbi to me ɗe, ɗaŋɗe, ano mbe dee ya keeya ndwa huy fare ge Njaŋeya ge Dok ne jin̰a num ma wa. 50Ge sok mbe go, nda ge àa ge num kaa dagre ma peɗ chiya, àa n̰a ne. 51Bogol a̰me ɗu ka kàre ne pe, kaa ge ladara ɗeŋew laaya ge na ta. Àa ɓyare go maa wan ne waɗme, 52ɗaŋɗe, swaɗ na ladara mbe ge num tok yà, jay na pe soo, gaa chiyaya swala.

Zeso ge Yahuɗ ma ga̰a̰l ge kun sariya ma ndwa se

Mat 26.57-68; Luk 22.54, 63-65; Yoh 18.13-24

53Àa gene Zeso ya ge ga̰a̰l ge nda ge kee tuwaleya ma way ge waɗe ndwa se. Ge sok mbe go, ga̰a̰l ge nda ge kee tuwaleya ma way mage Yahuɗ ma ga̰a̰l ge ɗeme num ma ɓanna ge nda ge hate eeya ge Moyiz ne ma kwate ya se. 54Piyer ka kàre ne pe ge guwa̰ ya kaal nde ɗiŋ waɗ-ɗa ge ga̰a̰l ge nda ge kee tuwaleya ma way ge waɗe zok pul diŋ. Sok mbe go, kaɗ se ɔwal ol ge nda ge koy zok ge Dok ne wa ma ta. 55Ga̰a̰l ge nda ge kee tuwaleya ma way ma ɓanna ge Yahuɗ ma ga̰a̰l ge kun sariya ma peɗ ka ɓyare vin̰a go maa see fare eeya ge Zeso pagal, ndwa hun ne, ɗaŋɗe, àa seɗ fare a̰me ge ne ta ɗu to. 56Ago, nda gḛḛ ka kee sayda ge hày ma ge ne pagal, ɗaŋɗe, sayda ge num way mbe ma be deɗ-ɗa ge sok ge ɗu go to. 57Guwa̰ dwab, a̰me ma ɗege digi, àa kun fare hày mbe no ge ne pagal. Àa jan go: 58I za̰a̰ ne janna go: Mbi mbo gul zok ge Dok ne mbe ge nda duwana ma sḭḭ ne ge maa tok gezi. Ge dwam ge taa ma pul zì, mbi mbo sin ge ɗogle ge nda duwana ma mbo sin ne ya ge maa tok zì to. 59Ɗaŋɗe, koo num sayda keeya mbe ma puy, àa be deɗ-ɗa ge sok ge ɗu go to. 60Sok mbe go, ga̰a̰l ge nda ge kee tuwaleya ma way ge waɗe ɗege digi ge ɓase ma tuwal zì, ele ne go: Mo fare a̰me ge gwanna ge fare ge àa ee num ya ge mo pagal go ga mbe ma byalam to de? A ma̰ fare ge nda mbe ma ee num no ge mo pagal ne de? 61Ɗaŋɗe, Zeso kaɗ wa daal, gwan ge fare a̰me ɗu to. Ga̰a̰l ge nda ge kee tuwaleya ma way ge waɗe ele ne fare ge ɗogle go: Mo Krist, Ndu ge Dok taa ne, Van ge i uware nee ne ɗaŋ de? 62Zeso gwan ge ne janna go: Mbi nee ne. Ḛ mbo kuwa mbi, Van ge Ndu ne kàɗɗa ge mbi Dok, Ba ge pool waɗe-waɗe tok matoson pagal. Ḛ mbo kuwa mbi mboya ya ge pḭḭ ge laaya gutub ma zì.#Mkm 110.1. 63Sok mbe go, ga̰a̰l ge nda ge kee tuwaleya ma way ge waɗe taabe na ba̰a̰ ma gezi ge na ta, jan go: Nè gwan ɓyare ma sayda ma iya de? 64Ḛ za̰a̰ ne fare janna ge sone kakatag ya go ge Dok pagal. Ḛ dwaɗ gyana de? Àa vin ta mɔɗwag go sariya wan ne ya go ndwa mbo swày. 65A̰me ma cub ɗege too watwa ge ne ta, àa vwal ne ndwa, àa ka sil ne ge maa tok guɗumul, àa jan ne go: Ngay i gale, a huɗi kee mo kaŋ mbe ne de? Nda ge koy zok wa ma ɗege ge ne ta yaaya.

Wa eeya ge Piyer ne

Mat 26.59-75; Luk 22.55-62; Yoh 18.15-18, 25-27

66Ge fare mbe ma ndwa zì, Piyer gale wa ya kàɗɗa ge zok ge pe se ge, pul ge zum-ge go. Moor kale a̰me ɗu ge ga̰a̰l ge nda ge kee tuwaleya ma way ge waɗe moor kale ma buwal zì, mbo ya, 67kuwa ne, wa ya ɔwal ol, ndil ne go ɗer, jan ne go: Mo waɗme, mbi kuwa mo dee ɓanna ge Zeso ge Nazareɗ ne. 68Ɗaŋɗe, ne sḛ ee na wa, jan go: Fare mbe ge mo jan ne no, mbi wan ne pe to. Guwa̰, waɗ mbo ge zok wa ge ga̰a̰l zum yà [baare tol fiyaso.] 69Moor kale mbe gwan kuwa ne, ɗege jan nda ge kaa no sok mbe go ma go: Ndu son mbe no, kaa ge ne nda ma buwal zì. Gwan ee na wa. 70Guwa̰ swag, nda ge kaa sok mbe go ma gwan jan Piyer go: A fare ge fareba ne, mo ɗu ge ne nda ma buwal zige ne waɗme, ago mo van Galile ne. 71Sok mbe go, Piyer ka jan digi ge ka̰a̰l ndaal go: Ndu mbe ge ḛ faa ne fare no, mbi kuwa ne to. Kaɗɗa mbi kun hày, mbi guni tene no: N̰a wa vḛḛneya ge Dok ne kaa ge mbi pagal. 72Ge sok mbe go gaw, baare tol fiyaso ge ndwa zi, Piyer pagal dwaɗ fare ge Zeso jin̰a na ne go: Zḛḛ ge go baare mà mbo tol fiyaso ndwa zi, mo mà ee mo wa ndwa taa go mo kuwa mbi to. Sok mbe go ɗege fyalla.

Currently Selected:

Mark 14: kiaGRB

Highlight

Copy