Mark 13

Gulla ge zok ge Dok ne

Mat 10.16-23; 24.1-51; Luk 17.22-37; 21.5-36

1Sok ge Zeso wuwa ge zok ge Dok ne zì ya zum, ɗu ge ne nda ge ame hateya ma buwal zige, sok ndil zok ge Dok ne go, dore ne, jan ne go: Ba ge hateya, ndi zok mbe gale, ne siŋli go me! Àa sḭḭ ne ge njal ge siŋli ma ɗoo! 2Zeso gwan ge ne janna go: Zok na̰ ge ɓaŋlaŋ ge mo kuwa ne mbe no, mbo gul se ge ɓul mɔɗwag. Njal ge àa sḭḭ ne ge num ma, a̰me ɗu mbo gaa na kon pagal digi to.

3Mbo ya kaɗ na pe ge njal ge ɔwara oliv ma do̰o̰ no ne pagal kin̰a go, ge zok ge Dok ne ndwa nga. Ge sok mbe go, Piyer, Jak ɓanna ge Andre mage Yohana, àa mbo ya ge ne ta hini jan, àa ele ne fare go: 4Jin̰a i gale, fare ge mo daa jin̰a ne mbe no, dee ma̰ del ɗoo wa mbo keeya de? A ma̰ kaŋ ma mbo kee ne ge wa mbo ngay ya go, kaŋ mbe ma peɗ, num gaa guguwa ge keeya de? 5Ge fare eleya mbe no pagal, gwan ge num janna go: Ḛ koy ta kwaɗa, ne kaa ge ndu a̰me mbo ya n̰aame ḛ to. 6Ago nda gḛḛ mbo hee mbi dḭḭl, àa mbo ya ge ne, àa mbo ka janna go: A mbi Krist ne. Ge num fare janna mbe ma no ta, àa mbo ee nda gḛḛ n̰aameya. 7Sok ge ḛ mbo kaɗ-ɗa ka za̰a̰ twam mballa ma ge ḛ ta guwa, ḛ ka za̰a̰ kṵwa̰ ge twam mballa ma way ma, ge sok kaal ya ma me, ḛ iigi ta to. A ngaɗ go kaŋ mbe ma num dee ya keeya, ɗaŋɗe, mbo gale kaɗ gwanna ge Ndu ge Dok taa ne, nee ne to. 8Ago suwal ma mbo ka mbal ta ta buwal zì, muluk ma mbo ɗege ho̰o̰l ta ta buwal zì waɗme. Ge sok a̰me ma go, suwa mbo ka ndaɗɗa, camal baktar ma ka deɗ-ɗa me. Àa mbo ka deɗ-ɗa dinna ge yal ge twàl ne deɗ ndu gwale go.

9Kaɗɗa ge ḛ sḛ ma ɗe, ḛ koy ta kwaɗa, ge fare ge mbo seɗ ḛ ya ma pe. Nda a̰me ma mbo wan ḛ, àa gene ḛ mbo ge nda ge kun sariya ma ndwa se yà. Àa mbo keme ḛ ge bol, ge zok kee kaɗeya ge Yahuɗ ma way ma zì, àa zwal ḛ bibil mbo goformo̰ mage gan ga̰a̰l ma ndwa se yà, ge mbi pe. Go mbe no, ḛ mbo kee sayda ge ambi ge num ta. 10Ago, zḛḛ gale ɓiya, ɓyare go àa oy Fare ge Kwaɗa ge rusu ge suwa pagal ma ta peɗ. 11Sok ge àa mbo wan ḛ ya ndwa ɓyan ḛ ge nda ge kun sariya ma tok go, ne kaa ge ḛ iigi ta zḛḛ, ge fare ge ḛ mà mbo ya faa ne pe to. Ɗeŋew, ḛ mbo faa fare ge Dok mbo hon ḛ ne ya ge sok mbe go. Ago, ḛ sḛ ma mbo faa fare ne ge ḛ pagal to, a On̰om ge Harcal mbo faa fare ne ge ḛ byalam go. 12Nda a̰me ma mbo ɓyan maa na̰ van ma gezi ge nda tok go, ba a̰me ma mbo ɓyan maa van ma mbe go waɗme. Van a̰me ma mbo ɗege ho̰o̰l digi ge maa ba ma, àa mbo ɓyan num gezi me. 13Nda mbo kuri ḛ gezi peɗ, ge mbi pe. Ɗaŋɗe, ndu ge mbo wan tene deŋel ya ɗiŋ mbo wa yà, mbo seɗ monna.

14Ḛ ge isi maktub ge Dok ne ma, ḛ kuwa fare mbe pe gezi kwaɗa! Sok ge ḛ mbo kuwa ge sone kakatag ge vḛḛne kaŋ ya, mbo ya kàɗɗa ge sok ge harcal ge ne sḛ mbiya kaɗ ne go to go, sok mbe go, num ge mbo kaɗ-ɗa ge suwa ge Jude ne go ma, num chiya mbo ge njal ma zì yà. 15Ndu ge mbo kaɗ-ɗa ɗwabe tene ge na zok pagal digi, ɓyare go ne ndee ya se, ne wuwa zok zì hee a̰me to, ɗaŋɗe, ne chiya caɗ. 16Ndu ge mbo kaɗ-ɗa kee tèmel ge na kaŋ kyarga zì, ɓyare go ne guwa̰ ya ge diŋ ndwa ɔwabe na ba̰a̰ ga̰a̰l to, ɗaŋɗe, ne chiya caɗ. 17A ma̰ yal ne, ge dwam mbe ma go, ge nda zaab ge mbo kaɗ-ɗa ge emel mage ge mbo kaɗ-ɗa hon maa van ma pam ma pe de! 18Ḛ ka kee kaɗeya ndwa go yal mbe dee ya ge ḛ pagal ge somo̰ pagal go to. 19Ago, ge dwam mbe ma go dee, iigiya ma mbo kaɗ gḛḛ. Mbo kaɗ iigiya ge ndu see ne pe dwam ɗu to, ge pe dolla ge Dok doo dunin̰a ya day ɗiŋ màno. Ndu mbo gwan seɗ iigiya mbe no pe, zḛḛ daa to baɗ me. 20Daa na go Bagezok chiya dwam mbe ma ya zì to, ndu a̰me ɗu mà seɗ vin̰a ge ɓuuya to. Ɗaŋɗe, chiya num ya zì, ge nda ge na ne, ge na taa num ma pe. 21Ge dwam mbe ma go, kaɗɗa ndu a̰me jan ḛ ya go: Na! Krist, ndu ge Dok taa ne no ge go go no, koo jan ḛ ya go: Na! Ano yà no, ḛ ho fareba ge ne fare janna mbe ma ta to. 22Ago, nda ge kee ta krist ma ɓanna ge nda ge kee ta nda ge zwagre Dok wa ma mbo mbo ya. Àa mbo ka kee kaŋ ngayya mage kaŋ haŋle ma keeya ge go, ee nda ge Dok taa num ma n̰aameya. 23Mbi jan ḛ fare ma ya zḛḛ kakaɗag, ḛ koy ta kwaɗa.

Gwanna ge Van ge Ndu ya

24Guwa̰ dwam ge yal ɓaŋlaŋ mbe ma way go, gyala mbo daa gwan zen to, saba mbo hon kɔn̰al ge na ne to me. 25Gùwa̰ ma mbo deɗ ge pḭḭ ma zì ya se, kaŋ keeya ge Dok ne ge ɓaŋlaŋ ge no pḭḭ digi ma mbo ba̰a̰le se. 26Ge sok mbe go, nda mbo kuwa Van ge Ndu ne zuɗ-ɗa ge pḭḭ ge laaya gutub zì,#Dan 7.13. ge pool ge ɓaŋlaŋ, ge pateya ge na ne zì me. 27Mbo hoɗ na malayka ma na wa go, num mbo ge suwa keŋ ge ndà mage suwa wa ndegeɗe ma yà, mbo kwate na nda ge talla ma deɗ-ɗa ge sok ge ɗu go.

28Ḛ za̰a̰ fare sḭḭ ge àa kee no ge ɔwara fere pagal. Sok ge ɔwara ɗege ɗufiya, ne dɔgwa ma haɗ pisil, ḛ kuwa kuwa go, ne gyala pul ne, ago mamasege gaa guwa. 29Ḛ sḛ ma waɗme, sok ge ḛ mbo kuwa kaŋ mbe ma ya keeya ge ḛ ndwa go, ḛ kuwa go, Van ge Ndu ne gaa guwa ge gwan-na, dinna ge ndu yan-na mḛḛya zok wa go da̰a̰reya go. 30Fareba mbi jan ḛ ne no: Nda ge doŋ pe mbe go ma mbo suu peɗ to, ge go kaŋ mbe ma peɗ num dee ya keeya. 31Pḭḭ mage suwa mbo kaɗ to, ɗaŋɗe, mbi fare janna ma mbo kaɗ ɗiŋ ge din.

32Kaɗɗa ge fare ge dwam mage ler ne ɗe, ndu a̰me ɗu ge kuwa num to. Koo malayka ge Dok ne ma, koo mbi sḛ ge Dok teme mbi ya puy, mbi kuwa ne to. Ɗaŋɗe, a Dok ge mbi Ba ɗu ɗeŋew kuwa nee ne. 33Ge ano mbe no pe, ḛ kaa jejew, ḛ ka kaɗeya, ago ḛ kuwa dwam ge kaŋ mbe ma mbo keeya go to. 34Kaŋ mbe ma mbo kaɗ dinna ge fare ge ndu ge ɗege mbo gɔswal ne go. Sok ɗege mbo gɔswal go, n̰a na zok ge na nda ge kee na tèmel ma tok go. Hon ndu ge diige tèmel ge ne mbiya kee ne, hoɗ na wa ge ndu ge koy na zok wa ta go, ne doo na ndwa ge na zok pagal. 35Mbi jan ḛ ne no, ɓyare go ḛ kaa jejew, ne kaa ge go ndu ge zok mbo ya tan ḛ tugcug to. Tamekyala gasamal de, ɗaal ga̰a̰l de, aaram pagal de, koo aaram de. 36Kaɗɗa na mbo ja tan ḛ tugcug, ne kaa ge ne see ḛ fii dwam to. 37Fare ge mbi jan ḛ ne no, mbi jan ne ge nda pe peɗ. Ḛ kaa jejew.

Currently Selected:

Mark 13: kiaGRB

Highlight

Copy