Luk 22

Za̰a̰ ta ge ga̰a̰l ma way ndwa hun Zeso

Mat 26.1-16; Mrk 14.1-16

1Dwam vḛḛso ge nda zam dupḛ ge be jìn̰al hore na ndwa zì ne, ge àa tol ne Paska ndaa ja zì guwa. 2Ga̰a̰l ge nda ge kee tuwaleya ma way mage nda ge hate eeya ge Moyiz ne ma ka ɓyare vin̰a go maa kee pe gyana maa wa hun Zeso de. Ɗaŋɗe, àa ka chiya voo go ɓase ma mà ɗege ho̰o̰l digi. 3Sok mbe go, Saytan waɗ fare ge Yudas ge àa tol ne Iskariyoɗ zì, ɗu ge àa ka isi ne ge nda ge ame hateya ge wol pɔgwa zi ma buwal zige. 4Ɗege mbo za̰a̰ tene ge ga̰a̰l ge nda ge kee tuwaleya ma way mage nda ge koy zok ge Dok ne wa ma ga̰a̰l ma, ge vin̰a ge na wa ɓyan num ne pagal. 5Fare mbe kee num duul tii, àa vin ta go maa ho̰ ne bware. 6Yudas vin num fare mbe, ɗege ɓyare vin̰a ge jwab ndwa ɓyan num Zeso, be ge ɓase ma kaɗ ge ne kuwaya.

Nuusiya ge vḛḛso ge Paska ne

Mat 26.17-29; Mrk 14.12-25; 1Ko 11.23-29

7Dwam vḛḛso ge dupḛ ge be jin̰al hore na ndwa zì mbe mbyaɗ go, ge go nda mà vyan tame van kee tuwaleya ge Paska#22.7 Paska: A paska ge vyan tame van ne. pe, 8Zeso teme Piyer mage Yohana, hoɗ num na wa go: Ḛ mbo nuusi ne vḛḛso ge Paska zamma pe. 9Àa ele ne go: Mo ɓyare go i nuusi nè ne ge diya de? 10Gwan num janna go: Ḛ za̰a̰ gale, sok ge ḛ mà yan-na suwal ga̰a̰l diŋ yà, ḛ mà seɗ ndu a̰me ɗu in mam ge kṵṵri, ḛ kàre ne pe mbo ge zok ge ne mà mbo ya waɗ ne diŋ yà. 11Ḛ jan ndu ge zok mbe go, Ba ge hateya jan go: Zok ge na mà mbo zam kaŋ zam kee vḛḛso ge Paska ne ɓanna ge na nda ge ame hateya ma diya de? 12Mà mbo ngay ḛ zok pul ge a̰a̰l ge zok ge na kon pagal digi-ge yà, nuusiya ge na kaŋ ma mɔɗwag zì ɓal. A ge sok mbe go, ḛ wa mbo nuusi nè kaŋ zam vḛḛso ge Paska pe. 13Àa mbo, àa seɗ kaŋ ma mbe go tetem ge Zeso jin̰a maa num go, àa nuusi kaŋ zam kee vḛḛso ge Paska pe.

Zeso paska ge jin̰al ne

14Sok ge gyala zam kaŋ zam mbiya, Zeso mbo ya kaɗ se zam kaŋ zam ge taabul wa go, ɓanna ge nda ge temeya ma. 15Jan num go: Mbi kee ene go gḛḛ zam kaŋ zam ge Paska ne mbe no dagre ge ḛ, zḛḛ ge go mbi mbo njoɗ yal. 16Ago, mbi jan ḛ ne no, mbi mbo daa gwan zam kaŋ zam mbe to baɗ, ɗiŋ ge go ne wa huy ge muluk ge Dok ne zì yà. 17Guwa̰, àa hon Zeso seɗe on̰or jin̰al ya, kee Dok mersi, jan na nda ge ame hateya ma go: Ḛ ame seɗe mbe no, ḛ vaa ta ne njoɗɗa ta buwal zì. 18Ago, mbi jan ḛ ne no, a gaa mbo zḛḛ no, mbi mbo daa gwan njoɗ on̰or jìn̰al mbe to baɗ, ɗiŋ ge go mbi njoo ne ge dwam ge Dok mbo ya kee muluk go. 19Guwa̰, hee dupḛ, kee Dok mersi, siɗi ne se, hon num ne, jan num go:#22.19 Ge varseya 19 sok ano mbe no go me no, varseya ge 20 me ɗe, mo seɗ num ge maktub ge àa zwagre num a̰me ma zì to. Ano mbe no a mbi sḛ duul ge mbi ɓyare mbo hon ne gezi ge ḛ pe ne. Ḛ gaa zam ne mbe go, ḛ wa ka dwaɗ ge mbi. 20Guwa̰ ge àa za kaŋ zam go, kee mbe go ca ge seɗe ge on̰or jin̰al ne, hon num ne, jan num go: Kob mbe no, ngay wa tii vwalla ge jin̰al, ge swàm ge ambi ta, ge mbo kan-na se ge ḛ pe. 21Ɗaŋɗe, ḛ kuwa go, ndu ge mbo ɓyan mbi gezi go kaŋ zam wa go ge mbi dagre. 22A ngaɗ go, mbi, Van ge Ndu ne, mbi mbo swày, ge mojo̰o̰ Dok nuusi ne ge zḛḛ ya day go. Ɗaŋɗe, woo ge ndu mbe ge mbo ɓyan ne gezi pe ɗaŋ. 23Àa ɗege ele ta ta buwal zì, ne huɗi ge maa buwal zige ge mbiya kee fare ano mbe ne de.

A huɗi ge waɗe ga̰a̰l ne de?

Mat 18.1-4; Mrk 10.35-45; Yoh 13.2-17

24Ɗeɗ-ɗa go, fare pee ta ɗege ge nda ge ame hateya ma buwal zì, ndwa seɗɗa go, ne huɗi sḛ mbiya kaɗ ga̰a̰l ne maa buwal zì de? 25Zeso jan num go: «Ɓase ge no rusu Yahuɗ zì to ma, num gan ga̰a̰l ma za̰a̰ num yal, nda ge pool no num tok go ma waɗme ɓyare nda ka tol maa “ɓase ma soŋon̰ ga̰a̰l”. 26Ɗaŋɗe, kaɗ mbe go ge ḛ pe to. Ndu ge no ge mojo̰o̰ soŋon̰ ga̰a̰l go ge ḛ buwal zì, kaɗ vare zoo ge ndu ge kee tèmel hon ḛ go. Ndu ge no nda pagal digi, ne kaa dinna ge ndu jiyale go. 27Ago, ge num ge zi mbe ma no buwal zì ɗe, a huɗi ciciliŋ ne de? Ndu ge àa ee ne kaŋ zam, koo ndu ge vaa kaŋ zam de. A ndu ge àa ee ne kaŋ zam taabul digi, koo a ndu ge kee tèmel de? A be ndu ge kaa taabul wa go to de? Kaɗɗa ge Mbi ɗe, ge ḛ buwal zì go, Mbi ge ndu ge kee tèmel hon nda go.

28«Kaɗɗa ge ḛ sḛ ma ɗe, ḛ nda ge wa̰a̰ ta deŋel ma ne ge mbi dagre, sok ge mbi kaa pe heeya ma zì. 29Ge ano mbe no pe, ajo̰o̰ mbi Baa hon mbi vin̰a ge kee muluk ya go, mbi hon ḛ vin̰a ge kee muluk ya waɗme. 30Ḛ mbo zam mage njoɗ ge mbi ɗagre, ge mbi muluk zì yà. Ḛ mbo kaɗ hòol gan pagal ndwa kun sariya ge vuwal pe ge wol pɔgwa zi ge Izrayel van ma way ma pagal.

31«Simo̰! Simo̰! Kuwa go Saytan seɗ vin̰a ya ge Dok ta ndwa kugi ḛ ge mojo̰o̰ nda in̰ale geme ndwa vaa num ge mboo go. 32Ɗaŋɗe, mbi kaɗe ge Dok ta, ge mo pe ndwa go mo ba̰a̰ hoɗ fareba ge amo to. O̰o̰ mo sḛ me ɗe, sok ge mo mbo gwan ja mbi ta, ho̰ mo na̰ van ma pool.» 33Piyer jan ne go: Bagezok, mbi guwa ge mbo daŋay zì, koo mbo swày ge mo dagre. 34Zeso jan ne go: Piyer, mbi jan mo go, ɗaal mbe no zì, be ge baare tol fiyaso to gale peɗ, mo mà ee mo wa ndwa taa go mo kuwa mbi sḛ to peɗ.

Twam mballa ge ndaa kaka

35Guwa̰, Zeso gwan jan num go: Sok ge mbi dee teme ḛ mbo oy Fare ge Kwaɗa go, be ḛ hee bware, koo galam, koo tyako ḛ tok-ga to no, ḛ hoɗege a̰me ɗu de? Àa gwan ge ne janna go: To. 36Gwan jan num go iya: «Ɗaŋɗe, ge sego, ndu kaɗɗa na go ge bware, koo galam, ne he ne na tok-ga. Ndu ge no be kasagar me ɗe, ne yiya na ba̰a̰ ga̰a̰l ge pul zige gezi, ne yiya kasagar ɗu me. 37Ago, mbi jan ḛ ne ge dape, fare ge Njaŋeya ge Dok ne jin̰a num ma go: “Àa isi ne ge nda ge kê sone ma buwal zì”, wa mbiya huyya. #Eza 53.12. Kaŋ ge njaŋe ge mbi pe mbe ma wa mbo huyya ne no.» 38Ne nda ge ame hateya ma jan ne go: Bagezok kuwa gale, kasagar ma no zi. Ne sḛ jan num go me: Ḛ mḛḛ go ga.

Kaɗeya ge Zeso ne njal digi

Mat 26.36-46; Mrk 14.32-42; Yoh 18.1-2

39Guwa̰ ge Zeso wuwa ya zum ge suwal diŋ ya, mbo ge mojo̰o̰ na ha̰a̰le keeya go, ge njal ge ɔwara oliv ma do̰o̰ no ne pagal digi yà. Ne nda ge ame hateya ma mbo dagre ge ne. 40Sok ge àa dee ya ge sok mbe go, jan num go: Ge go ḛ dee pe heeya zì to ɗe, ḛ ke kaɗeya. 41Guwa̰, mbo gezi yà kaal nde ge num, ge mojo̰o̰ ndu mbal tul go ga, guu na ko rùsu ma se, ɗege kaɗeya, 42jan Dok go: Baa, kaɗɗa mo vin-na, gene yal mbe gezi yà kaal ge mbi nde! Go no puy, ne kaa laa ɓyareya ge ambi to, ɗaŋɗe, laa ɓyareya ge amo huy ne. 43Sok mbe go, ge pḭḭ zì ya, malayka a̰me dyan tene ya ne ta ndwa hon ne pool. 44Ne duul suu se leɗeɗ, ka ke kaɗeya ge aa tene. Sok mbe go, uwa̰se ka tooya kokoɗog ge ne ndwa digi, mbo deɗ suwa se ge swàm duu go#22.44 Varseya ge 43 mage 44 ge maktub ge nda zwagre num a̰me ma zì to.. 45Ɗege ge na sok ke kaɗeya go, mbo ya ge na nda ge ame hateya ma ta, seɗ num, fare dwaɗɗa dol num ya dwam galgatag, 46jan num go: Ḛ fii go dwam zoo de? Ge go ḛ dee pe heeya zì to ɗe, ḛ ke kaɗeya.

Wanna ge Zeso ne

Mat 26.47-56; Mrk 14.43-50; Yoh 18.3-12

47Zeso be aa na fare faaya to gale, ḛ kuwa, nda yan ja no. Ɗu ge num ge wol pɔgwa zi ma buwal zige, ge àa tol ne Yudas, yan ja ɗeme num. Mbo ya Zeso ta zì guwa, buu ne zì ge komreya. 48Zeso jan ne go: Yudas-soo, a ge buuya ge amo mbe ge mo buu mbi zì ge komreya mbe no ta, mo ɓyan mbi, Van ge Ndu ne gezi no kade!

49Nda ge kaa dagre ge Zeso ma, sok ge àa kuwa kaŋ ge ɓyare keeya, àa jan ne go: Bagezok-goo, mo jan i iyal kyarga ge i kasagar ma to ɓade? 50A̰me ɗu kale zoɗ na kasagar gaw, chal ga̰a̰l ge nda ge kee tuwaleya ma way ge waɗe ndu ge tèmel, fete ne tɔgwa matoson gezi caɗ. 51Ɗaŋɗe, Zeso jan num go: Ḛ mḛḛ go ga! Guwa̰, ee na tok ndu mbe tɔgwa jwaŋ mbe go, kale zon gaw.

52Guwa̰ go, Zeso jan ga̰a̰l ge nda ge kee tuwaleya ma way ma, nda ge koy zok ge Dok ne wa ma ga̰a̰l mage Yahuɗ ma ga̰a̰l ge ɗeme num, ge mbo ya wan na ma go: Ḛ dwaɗ go mbi chala ne ɗoo, ḛ wa zuɗ ya zum ge kasagar mage calaŋ ma de. 53Dwam ma mɔɗwag, mbi kaa dagre ge ḛ ge zok ge Dok ne zì, ḛ be wan mbi to me ɗe. Ɗaŋɗe, ge sego, a ḛ mage ba ge no ge pool ge kaŋ ge kee no tṵṵ zì ma pagal sok mbiya mà ne.

Wa eeya ge Piyer ne

Mat 26.57-75; Mrk 14.53-72; Yoh 18.12-27

54Guwa̰ ge àa wa̰a̰ Zeso go, àa mbo ge ne. Àa gene ne ge ga̰a̰l ge nda ge kee tuwaleya ma way ge waɗe diŋ yà. Piyer ka kàre num pe ge guwa̰ se ya kaal nde. 55Nda a̰me ma mbaa ol zok pul diŋ, àa kaɗ ne wa go. Piyer mbo ya kaɗ num buwal zì waɗme. 56Moor kale a̰me ge kee tèmel kuwa ne kàɗɗa ge ol wa go, ndil ne ɗer, jan go: «Ndu mbe no, kaa dagre ge ne waɗme to wa!» 57Ɗaŋɗe, Piyer ee na wa, jan ne go: «Van kale, mbi kuwa ne ge dii de!» 58Guwa̰ go swag, ndu a̰me ge ɗogle gwan kuwa ne, jan ne go: Mo sḛ waɗme, mo kaa dagre ge nda mbe ma. Piyer jan ndu mbe go: Bà jo̰o̰, mbi dagre ge num to. 59Guwa̰, guwa ge ler ɗu go, ndu a̰me ge ɗogle wan na wa bàba, ka janna go: A fare ge fareba ne, ndu mbe no kaa dagre ge ne, ge dape a van Galile ne waɗme. 60Piyer gwan ge ne janna go: Mbi wan fare ge mo jan mbe no pe to. Gale sok jan na fare mbe no go, baare kale tol fiyaso gaw. 61Bagezok seŋe tene ya se, ndil Piyer bàa. Piyer pagal dwaɗ fare ge Bagezok jin̰a na go: Zḛḛ ge go baare mà mbo tol fiyaso, ge ɗaal mbe no zì, mo mà ee mo wa ndwa taa go mo kuwa mbi to. 62Waɗ ge zok pul diŋ ya zum, fyal fiyaso ge kirgi tene.

Lugiya ge àa lugi Zeso

63Nda ge ka koy Zeso ma ka lasage ne, àa ka iyal ne me. 64Àa vwal ne ndwa zì, ndu a̰me yaa ne, àa ka ele ne go: Ngay i gale, ndu ge ben fare ɗimil ma zum, a huɗi yâ mo ne no de? 65Àa gwan jan fare ge ɗogle ge sone kakatag ma gḛḛ-gḛḛ ge ne pagal.

Zeso ge Yahuɗ ma ga̰a̰l ge kun sariya ma ndwa se

66Sok kon̰ ya gezi, Yahuɗ ma ga̰a̰l ge ɗeme num ma, ga̰a̰l ge nda ge kee tuwaleya ma way mage nda ge hate eeya ge Moyiz ne ma mbo seɗ ta, àa gene Zeso ya ge maa ndwa se, 67àa jan ne go: Kaɗɗa mo Krist, ndu ge Dok taa nee ne, jin̰a i ne. Zeso gwan ge num janna go: «Koo mbi jin̰a ḛ ne puy, ḛ mà hoɗ fareba to peɗ, 68mà kaɗɗa mbi ele ḛ fare me ɗe, ḛ vin gwan ge mbi fare janna pagal to me. 69Ɗaŋɗe, ge mà go mbo zḛḛ, Van ge Ndu ne mbo gaa kàɗɗa tok matoson ge Dok ge pool waɗe-waɗe ne pagal.»#Mkm 110.1. 70Nda peɗ pyan-na wa dagre ɗu go: Mo zane Dok Van ne ɗaŋ de? Gwan ge num janna go: Ḛ sḛ ma jan fare mbe go, Mbi nee ne. 71Sok mbe go, àa jan ta go: Nè gwan ɓyare ma sayda iya de? Nè sḛ ma gaw, nè za̰a̰ fare ge wuwa no ge ne wa zì ya ne ge nè tɔgwa ma.

Currently Selected:

Luk 22: kiaGRB

Highlight

Copy