Luk 21

Bobo ge gwale kumu ho̰ Dok

Mrk 12.41-44

1Dwam a̰me go ɗu, Zeso ka ndil nda ge pwal ge mbo ya dol maa bobo ma, ge kaŋ dol bware go, ge zok ge Dok ne zì. 2Kuwa gwale kumu a̰me ge gaa no ɔg go, dol silay ma zi waɗme. 3Sok mbe go jan go: Mbi jan ḛ fare ge fareba, gwale kumu ge gaa ɔg go mbe ho̰ kaŋ waɗe nda gegene ma. 4Ago ne ka̰a̰m gegene mbe ma peɗ doo wa boyo ge maa kaŋ gan ma way boo ge kaŋ dol bware zì, ɗaŋɗe, ne sḛ ho̰ kaŋ ge kaa no ge ne pe ndwa dol dwam.

Zok ge Dok ne burmiya

Mat 24.1-5; Mrk 13.1-37

5Guwa̰, nda a̰me ma ɗege faa fare ge zok ge Dok ne sinna ne, àa ka janna go zok ge Dok ne mbe ɗebce ge njal ge siŋli mage kaŋ ge ɗogle ge àa ho̰ ge Dok pe ma me. Ɗaŋɗe, Zeso jan num go: 6Dwam ma mbo mbo ya, ge go kaŋ ge ḛ kuwa ne mbe no mbo gul-la se mɔɗwag. Njal a̰me mbo gaa na kon pagal digi to.

Yal ge mbo deɗ ja dunin̰a pe aaya ndwa zḛḛ ma

7Nda ge ka za̰a̰ Zeso ma ele ne go: Ba ge hate nda, fare ge mo jan mbe ma mbo kee mà sok go de, a ge ma̰ kaŋ ngayya ma ta ɗoo, nda wa mbo kuwaya zḛḛ go, kaŋ mbe ma mbo deɗ-ɗa keeya de? 8Ne sḛ gwan ge num janna go: Ḛ koy ta kwaɗa, ne kaa ge be ḛ n̰a ta n̰aameya to. Ago nda gḛḛ mbo mbo ya ge mbi dḭḭl, a̰me ge num buwal zige ma mbo ka janna go maa mbi sḛ ne, a sok mbe ma dee ya ne. Ḛ mbo num pe yà to. 9Sok ge ḛ mbo ɗege ya za̰a̰ ya go twam mballa swa̰me yà, nda ɗege ya digi ta ta ge ho̰o̰l, ḛ iigi to. Ɓyare go, kaŋ mbe ma dee ya keeya ne mbḛḛ, ɗaŋɗe, a be dunin̰a pe aaya mbe ne gaw to. 10Sok mbe go, jan num iya go: Suwal ma mbo ka mbal ta ta buwal zì, muluk ma mbo ɗege ho̰o̰l ta ta buwal zì waɗme. 11Suwa mbo ɗege ndaɗ ndaɗɗa ge sone. Sok a̰me ma gḛḛ, camal baktar mage mbɔgwam ma mbo kaɗ num go. Kaŋ a̰me ge ee nda duwana ma haɗ voo ma mbo ka ngay ta pḭḭ digi. 12Ɗaŋɗe, zḛḛ ge go kaŋ mbe ma dee ya keeya, àa mbo wan ḛ, àa kee ḛ yal. Àa mbo ɓyan ḛ ge nda ge kun sariya ge no zok kee kaɗeya ge Yahuɗ ma way zì ma tok go, àa mbo dol ḛ daŋay. Àa zwal ḛ bibil mbo gan ga̰a̰l mage goformo̰ ma ndwa se yà, ge mbi pe. 13Ano mbe ma no peɗ, mbo hon ḛ vin̰a ne, ge ḛ kee sayda ge ambi ge nda ta. 14Ḛ kaa ge be ee ḛ pagal zì zḛḛ wal gaw go, ḛ seɗ mà ma̰ fare ge ḛ wa mbo ben ta ge fare zì de to. 15Ge dape, a mbi sḛ mbo hon ḛ andaŋ ge faa fare ne, ge go ḛ nda ge ho̰o̰l ma peɗ mbo seɗ vin̰a ge faa fare ge mbo batame ḛ to. 16Ḛ ba ma, ḛ na̰ van ma, ḛ sele mage ḛ kondore ge wa kag ma mbo ɓyan ḛ gezi ge nda tok go. Nda a̰me ge ḛ buwal zige ma sḛ puy mbo seɗ swày. 17Nda mbo kuri ḛ gezi peɗ, ge mbi pe. 18Ano puy, ḛ pagal susu a̰me go ɗu mbo deɗ gezi to. 19Ḛ wa̰a̰ ta deŋel! A go mbe no, ḛ wa mbo seɗ ndwa go.

Burmiya ge suwal ga̰a̰l Jerusalem ne

20Guwa̰, Zeso jan num go: «Sok ge ḛ mbo kuwa vwag twam ma ya mbo ya vee Jerusalem se, sok mbe go, ḛ kuwa go ne burmiya gaa guwa. 21Sok mbe go me ɗe, nda ge mbo kàɗ-ɗa ge Jude go ma, num chiya mbo way ta ge njal ma zì. Num ge mbo kàɗ-ɗa ge Jerusalem diŋ ma, num wuwa zum, num ge mbo kàɗ-ɗa ful zì ma me ɗe, num guwa̰ ya ge suwal ga̰a̰l diŋ to me. 22Ago, ge dwam mbe ma zì, Dok mbo ee dṵṵl ge ɓase ge na ne ma pagal, ndwa huy fare ge maktub jin̰a num ma wa peɗ. 23A ma̰ yal ne, ge nda zaab ge mbo kaɗ-ɗa ge emel mage nda zaab ge mbo kaɗ-ɗa hon maa van ma pam ge dwam mbe ma go ma pe de! Ago, wa nɔnna ge ɓaŋlaŋ mbo kaɗ ge suwa pagal, twam ge Dok ne mbo deɗ ge ɓase mbe ma pagal. 24Nda a̰me ma mbo seɗ swày walam, àa mbo ɔwabe a̰me ma moor ɓasareya se ɗu ɗu ge rusu ge ɗogle ma buwal zì yà me. Rusu ge ɗogle mbe ma mbo tɔcwage Jerusalem ge maa ko se, ɗiŋ ge go dwam ge Dok ho̰ num kee muluk wa huy.»

Van ge Ndu ne gwanna ya

25Gyala, saba mage gùwa̰ ma mbo ngay kaŋ ajab ma. Kṵwa̰ ge sḭ̀ḭl ge mam ga̰a̰l nuwam ne mbo ee pe rusu ge suwa pagal go ge ma haɗ voo mage tandaŋeya. 26Voo mbo hun nda a̰me ma, sok da̰a̰re yal ge mbo no ya tan nda duwana ge no dunin̰a zì ma tugcug go. Ago kaŋ ge ɓaŋlaŋ ge no pḭḭ digi ma mbo ba̰a̰le se me. 27Sok mbe go, nda mbo kuwa Van ge Ndu ne, mbo ya ge pḭḭ#21.27 Pḭḭ: Ngay go Van ge Ndu ne mbo ya ge pool ge Dok ne. ge laaya gutub zì ge pool ge ɓaŋlaŋ mage pateya.#Dan 7.13. 28Sok ge kaŋ mbe ma deɗ ja keeya, ḛ ee ḛ ndwa kwaɗa, ḛ ho̰ ta pool, ndwa go sok ge Dok mon ḛ gaa guwa.

Fare sḭḭ ge fere ne

29Guwa̰, Zeso kee num fare sḭḭ mbe no: «Ḛ ndi fere mage ɔwara gegene ma peɗ gale: 30Sok ge ḛ ndil num ɗege ɗufiya go, ḛ sḛ ma kuwa kuwa gaw go mamasege gaa guwa. 31Go mbe waɗme, sok ge ḛ mbo dee ɗege ya kuwa kaŋ mbe ma mboya ya, ḛ kuwa go, sok ge Dok mbo ya kee muluk gaa guwa. 32Fareba mbi jan ḛ ne no: Nda ge doŋ pe mbe go ma mbo suu peɗ to, ge go kaŋ mbe ma peɗ num dee ya keeya. 33Pḭḭ mage suwa mbo kaɗ to, ɗaŋɗe, mbi fare janna ma mbo kaɗ ɗiŋ ge din.»

Kaɗɗa jejew

34Ḛ duwa kwaɗa, ne kaa ge go ḛ ho̰ ta ge vḛḛso an̰n̰a ge jin̰al ma, ge kaŋ zamma ge vagal mage dwaɗ yal ge kàɗɗa ge dunin̰a ne ma to, ge go dwam mbe mbo ya tan ḛ tugcug, 35dinna ge birgi kan ge sini ma pagal go to. Ago, dwam mbe mbo deɗ ge nda duwana ge kaa no suwa pagal ma peɗ pagal mbe go waɗme. 36Ḛ ka jejew ɗaŋ, ḛ kaɗe ge dwam ma zì mɔɗwag ndwa go Dok wa hon ḛ pool ge mbiya ḛ iyan ta ge kaŋ ge ɓyare deɗ ḛ pagal ma pe peɗ, ḛ wa seɗ pagal ge hee digi ge Van ge Ndu ne ndwa se yà go.

Dwage hateya ge Zeso ne ge zok ge Dok ne zì

37Dwam ma zì mɔɗwag, Zeso ka hon hateya gyala ge zok ge Dok ne pul diŋ yà, guwa̰ ɗege mbo dwam ge njal pagal digi yà, ne mbe ge ɔwara oliv ma do̰o̰ no ne pagal. 38Ɓase ma peɗ ka ɗege aaram vḛḛ, mbo ge zok ge Dok ne pul diŋ yà mbo za̰a̰ ne.

Currently Selected:

Luk 21: kiaGRB

Highlight

Copy