Luk 20

Pool ge Zeso ne kaŋ hateya zì

Mat 21.23-27; Mrk 11.27-33

1Deɗ-ɗa dwam a̰me go ɗu, Zeso sok hate ɓase ma ge zok ge Dok ne zì go, ka jan num Fare ge Kwaɗa. Ga̰a̰l ge nda ge kee tuwaleya ma way ma, nda ge hate eeya ge Moyiz ne ma, ɓanna ge Yahuɗ ma ga̰a̰l ge ɗeme num ma deɗ-ɗa ge sok mbe go me. 2Àa ele ne go: Jin̰a i gale, a ge ma̰ pool ɗoo, mo kee kaŋ mbe ma no de, koo a huɗi ho̰ mo vin̰a ge kee num ne de? 3Gwan ge num janna go: Mbi sḛ waɗme, mbi mà ele ḛ fare ɗu. Ḛ jin̰a mbi gale: 4A huɗi ho̰ Yohana vin̰a ge kee nda baptem ne, a Dok koo nda duwana ma de? 5Sok mbe go, àa ɗege pee ta ta buwal zì, àa ka janna go: Mà kaɗɗa nè gwan ge ne vinna ya go: A Dok ho̰ ne vin̰a ne, mà jan nè no go: Ge dape ḛ wa hoɗ fareba ge ne ta to de? 6Mà kaɗɗa nè gwan ge ne vinna ya go: A nda duwana ma ho̰ ne vin̰a ne, ɓase ma peɗ mà mbal nè ge njal, ge dape num sḛ ma ge kuwaya tyatyaɗ go Yohana ndu ge zwagre Dok wa ne. 7Sok mbe go àa gwan ge Zeso janna go: I kuwa ndu ge ho̰ ne vin̰a kee baptem to. 8Zeso jan num go me: Mbi sḛ waɗme, mbi jan ḛ go, mbi see pool mbe ge kee kaŋ mbe ma ge dii de to me.

Nda ge kee gaaso on̰or tèmel ge laa pisil ma

Mat 21.33-46; Mrk 12.1-12

9Guwa̰ go, Zeso ɗege kee ɓase ma fare sḭḭ mbe no go: Ndu a̰me ɗu ɗḭḭ on̰or, guwa̰, hon nda ge kee tèmel gaaso on̰or ma ne wanna. N̰a suwal, mbo kee ge na sok gɔswal yà dwam ma kaal swag. 10Sok ge sok kan siyal ge on̰or ne mbiya, teme na dore a̰me ya ɗu, ge nda ge kee gaaso on̰or tèmel ma ta, ndwa go num ho̰ na na on̰or ndwa ya. Ɗaŋɗe, nda ge kee gaaso on̰or tèmel ma iyal ne, àa yan ne tok bàŋ. 11Gwan teme na ndu ge tèmel ge ɗogle ya iya, ne sḛ mbe waɗme, àa ndil ne ge mojo̰o̰ ne ndu ne to go, àa iyal ne, àa yan ne tok bàŋ. 12Vin tene, teme ndu ge taa, àa tase ne cɔcɔm, àa fiyage ne ya zum. 13Guwa̰, Ba ge gaaso on̰or ele tene go: Mbi ke sḛ gyana de? Mbi van no, mbi laa wa̰a̰ ne gḛḛ, mbi gaa teme ne, mbi dwaɗ go àa mà hon ne hormo. 14Ɗaŋɗe, sok ge nda ge kee gaaso on̰or tèmel ma kuwa ne ya mboya, àa jan ta ta buwal zì go: A ndu ge zam ne joo ne no, nè hṵṵ ne, ndwa go joo mbe wa gaa nè ne. 15Àa mbô ge ne ge gaaso on̰or guwa̰ zum yà, àa hun ne gezi. Ge sego, ba ge gaaso on̰or gaa kee num gyana de? 16Mbo mbo ya, mbo puu nda ge kee gaaso on̰or tèmel mbe ma gezi, hee gaaso on̰or mbe hon nda ge ɗogle ma ne wanna.

Sok ge ɓase ma za̰a̰ fare mbe ma go, àa jan go: Ne dee ya keeya mbe go to! 17Ɗaŋɗe, Zeso ndil num bàa, jan go: Fare ge njaŋe no maktub ge Dok ne zì go:

«Njal ge nda ge sin zok ma doo ne gezi,

A ne gaa ya njal ge gag ge zok keŋ pe ne.»#Mkm 118.22.

18Ndu ge diige ge mbo deɗ-ɗa ge njal mbe pagal, mbo hal na sok ma kɔkɔcwa. Kaɗɗa njal ne dee ge ndu pagal ne me ɗe, mbo roɗ ne gezi njaɗaɗ me.

19Ga̰a̰l ge nda ge kee tuwaleya ma way ma, nda ge hate eeya ge Moyiz ne ma ka ɓyare vin̰a ge ee tok ne pagal ge sok mbe go gaw, ge dape àa see go ne kê na fare sḭḭ mbe ge maa pagal. Ɗaŋɗe, àa ka chiya voo ge ɓase ma pe.

Vin̰a ge wan Zeso ge fare

Mat 22.15-22; Mrk 12.13-17

20Ge sok mbe go, àa dol ndwa ge Zeso pagal keceɗ. Àa teme nda ge hee nda ka̰a̰l ma ya, àa kee ta ge mojo̰o̰ nda ge be fare ma go anna ge ne, ndwa wan ne ge fare, ge ne fare janna ma ta, maa wa gaa ɓyan ne ge goformo̰, ndu ge pool tok go ndwa kun ne sariya me. 21Nda mbe ma ele ne go: Ba ge hateya, i kuwa kuwa go mo fare janna mage mo kaŋ hateya ma fare ge fareba ma ne. Mo vare ndu to. Ago mo hate vin̰a ge Dok ne ge fareba pagal. 22Jin̰a i gale, ge eeya ge nè ne ma pagal ɗe, vin̰a hage hage go àa poo siyal hon Sezar,#20.22 Sezar pe wanna wa garab go: Gan ga̰a̰l ge waɗe, ge ka no suwal ga̰a̰l Rom diŋ. koo àa poo ne to de? 23Ɗaŋɗe, Zeso, kuwa num son mbe ma, gwan ge num janna go: 24Ḛ ngay mbi silay ɗu gale. Pagal mage kaŋ njaŋeya ge ne ta mbe ma huɗi ne ma ne de? Àa gwan ge ne janna go: A Sezar ne ma ne. 25Sok mbe go, jan num go: Kaŋ ge go na ge Sezar nee ne, ḛ ho̰ Sezar ne. Kaŋ ge go na ge Dok nee ne, ḛ ho̰ Dok ne kaŋ me. 26Àa be seɗ vin̰a ge wan ne ge fare ge ɓase ma ndwa go, ge ne fare janna ma ta ɗu to. Ne fare gwanna ma ka kee num ajab vare zoo, àa seɗ fare ge janna daa to.

Tanna ge nda ge suu ma way

Mat 22.23-33; Mrk 12.18-27; 1Ko 15

27Sok mbe go, Saduki a̰me ma, num mbe ge vin tanna ge nda ge suu ma way to ma mbo ya ge Zeso ta, àa jan ne go: 28Ba ge hate nda, Moyiz ho̰ i na wa ge maktub ge Dok ne zì go: «Kaɗɗa go ndu suu ya be van, ago ne na̰ van hee gwale kumu mbe, ne ke na na̰ van mbe ge suu rusu.»#Dwa 25.5. 29Ago, nda a̰me ma kaa ta pe go nda soɗob ɓỳala, na̰ van ge ba ɗu mage na̰ ɗu. Ge pul sway san gwale, wan suu be van. 30Ge zi ame gwale kumu mbe, 31guwa̰ go ge taa ame ne waɗme. Na̰ van ge ɓỳala mbe ma mɔɗwag ame ta gwale mbe go, àa suu be n̰a van ɗu to. 32Guwa̰ go me ɗe, gwale mbe suu waɗme. 33Ajo̰o̰ go num mbe ge ɓỳala ma mɔɗwag kaa zok ge ne, mbo kaɗ dee ge diige gwale ge dwam tanna ge nda ge swày ma way go ɗaŋ de? 34Zeso gwan ge num janna go: Ge pe dolla ge dunin̰a ne ya day, nda soɗob mage nda zaab kaɗ zok go. 35Ɗaŋɗe, ge nda ge Dok see go num mbiya mbyaɗ tan-na ge nda ge suu ma buwal zì, num mbo deɗ-ɗa ge zaman ge mbo no ya zì ma, àa mbo gwan kaɗ zok to baɗ. 36Num sḛ ma daa gwan suu to baɗ, ge dape àa mbo kaɗ dinna ge malayka ma go. Dok mbo ndil num na van ma, ndwa go Dok ee num ya kaɗ ge ndwa. 37Fare janna ge Moyiz ne ma ngay kɔn̰al go go nda ge suu ma mbo tan, ge maktub sok a̰me ge faa fare ge kore za̰a̰l ne, sok ge àa tol «Bagezok go Dok ge Abraham ne, Dok ge Isak ne, Dok ge Jakob#20.37 Sok ge Dok ka jan Moyiz fare ge kore za̰a̰l zì ya, Abraham, Isak mage Jakob ma kê ya kaal tàal zì. ne me.»#Waz 3.6. 38Dok mbe sḛ be Dok ge nda ge suu ma way ne to, ɗaŋɗe, a Dok ge nda ge ndwa ma way ne. Ago nda a̰me ge nè dwaɗ go num suu suu ma, ge Dok ta, àa ge ndwa. 39Nda a̰me ge hate eeya ge Moyiz ne ma gwan ge ne janna go: Ba ge hateya, mo fare mbe jin̰a ge na vin̰a go. 40Ago, ndu daa gwan be tal tene ele ne fare a̰me ge ɗogle ɗu to baɗ.

Fare ge Zeso mage Daviɗ ne

Mat 22.41-46; Mrk 12.35-44

41Zeso jan num go: Pe gyana nda wa ka janna go Krist, ndu ge Dok taa ne Daviɗ Baŋ ne de? 42Daviɗ sḛ jin̰a vare zoo, ge Maktub ge kaŋ mballa ma way zì go: Bagezok Dok jin̰a mbi Bagezok go: «Mbo ya kaɗ ge mbi tok matoson pagal, 43ɗiŋ ge go mbi seŋe mo nda ge ho̰o̰l ma mo kaŋ ee mo ko ma.»#Mkm 110.1. 44Mà kaɗɗa go Daviɗ sḛ ge na pagal tol ne Bagezok no, kee mà pe gyana Krist, Ndu ge Dok taa ne wa gwan kaɗ ne baŋ de?

Sariya kunna ge Zeso ne

Mat 23.1-33; Mrk 12.38-40

45Ajo̰o̰ ɓase ma sok za̰a̰ Zeso go, jan na nda ge ame hateya ma ge num ndwa go go: 46Ḛ koy ta kwaɗa ge nda ge hate eeya ge Moyiz ne ma ta. Num laa wa̰a̰ anna ge ba̰a̰ ga̰a̰l ma ndwa ngay ta, wa sanna ge hormo ge sok ɓase ma go, sok kàɗɗa ge nda ndwa zḛḛge ma ge zok kee kaɗeya ge Yahuɗ ma way ma zì, sok kàɗɗa ge nda ge hormo ma way ge sok vḛḛso zam kaŋ zam ma go me. 47Àa ka ke kaɗeya twala lindiŋ ndwa ngayya go maa nda ge kee Dok kwaɗa ma ne, zane no àa ɓyare vin̰a ge aa nda zaab ge kumu ma tok zamma num zok ma diŋ me. Ge kaŋ keeya ge go mbe pe, Dok mbo wan num ge sariya ge ndaa kaka.

Currently Selected:

Luk 20: kiaGRB

Highlight

Copy