Luk 19

Monna ge ndu ge gan ne

1Guwa̰ ge Zeso wuwa ya suwal ga̰a̰l Jeriko diŋ, kale digi ge na ko. 2Sok mbe go me ɗe, ndu a̰me ɗu, ne dḭḭl Zache, a nda ge chal siyal ma ga̰a̰l ne, ge seŋe ya ndu ge pwal. 3Ka ɓyare go na kuwa Zeso, ɗaŋɗe, seɗ vin̰a to, ge dape nda kaa ɓase me no, ago kaa doŋ jiyale iya me. 4Chiya zḛḛ yà, ndee ge ɔwara ga̰a̰l ge àa tol ne sikomor digi, ndwa go na kuwa Zeso, ge dape kale mà vin̰a mbe go. 5Sok ge Zeso dee ya ge sok mbe go, ndil sok digi, jan Zache go: Ka̰a̰ mo ko ya se vun cab, Zache, ago màno, ɓyare go mbi kaa ge mo diŋ. 6Zache kan na ko ya se vun cab, gene ne ge laa saal ge na diŋ yà. 7Nda peɗ ge kuwa kaŋ mbe ma ka faa laa hoɗɗa, àa ka janna go: Ḛ kuwa gale, a mbo ya kaɗ ge ndu ge kee sone diŋ yà ɗoo me! 8Sok mbe go, Zache mbo ya Bagezok ndwa se, jan ne go: Za̰a̰ mbi gale Bagezok, mbi hon a̰se ma mbi kaŋ gan ma buwal go cḛḛ. Kaɗɗa mbi zâ ndu a̰me go, mbi gwan ne ne kaŋ mbe poɗɗa ndwa ndà. 9Zeso gwan ge ne janna go: Màno Dok mon nda ge zok mbe diŋ-ge ma ya go. Ge dape mo sḛ, mo rusu ge Abraham nee ne waɗme. 10Ago mbi, Van ge Ndu ne mbo ya ɓyare nda ge ba̰a̰ ma, ndwa mon num.

Fare sḭḭ ge nda ge tèmel ge wol ma way

Mat 25.14-30

11Sok ge Zeso yin̰a ya guwa ge suwal ga̰a̰l Jerusalem, nda ka dwaɗ go sok ge muluk ge Dok ne dyan-na zum mbiya mbyaɗ no gaw. Ɗege kee nda mbe ge mbo ya za̰a̰ na ma fare sḭḭ iya, ndwa kee num kuwaya go num dwaɗɗa mbe ma ge maa vin̰a go to. 12Ḛ kuwa fare ge a wa̰a̰ num no: Ndu a̰me ɗu ge rusu ge gan ma way zì, ɗege mbo ge maa suwa sok a̰me ge kaal ndiɗ yà, ndwa go gan ga̰a̰l ge waɗe ho̰ na vin̰a ge mbo ya kaɗ gan ge na suwal go. 13Zḛḛ ge go ne mbo, tol na nda ge tèmel ma ya wol, hon num bware dinar wol, jan num go me: Ḛ seŋe ḛ tok, ɗiŋ mbi gwanna ya. 14Ɗaŋɗe, ne ka̰a̰m kuri ne gezi. Àa teme maa nda ge vin̰a ma ge ne pe yà, ndwa mbo jan gan ga̰a̰l ge waɗe go: I ɓyare go ndu mbe kaa i gan to. 15Guwa̰ ge àa ho̰ ne vin̰a kaɗ gan go, gwan-na na suwa go. Ee tèmel tol nda ge na ho̰ num bware ma ya, ndwa kuwaya go ndu ge tèmel ge diige kee ma̰ kaŋ ge na bware tem de. 16Ndu ge zḛḛge, yan-na, jan ne go: Mbi ndu ge zok-goo, mbi seɗ mam ja bware dinar wol ge bware dinar ge mo ho̰ mbi pagal. 17Gan ga̰a̰l mbe jan ne go: A gag, ndu ge tèmel ge kwaɗa. Ajo̰o̰ mo kaa ndu ge ɗeŋer ge kaŋ ge hoɗege guwa ma zì, ke muluk ge suwal ga̰a̰l ma pagal wol. 18Ndu ge zi yan-na, jan ne go: Mbi ndu ge zok-goo, mbi seɗ mam ja bware dinar nuwan̰ ge bware ge mo ho̰ mbi pagal. 19Gan ga̰a̰l mbe jan ne go: Mo sḛ waɗme, mo mbiya kaɗ ga̰a̰l ge suwal ma pagal nuwan̰.

20Ndu ge tèmel ge ɗogle yan-na, jan ne go: Mbi ndu ge zok-goo, mo bware dinar no. Mbi warge ne ba̰a̰ wa zì jan. 21Ago, mbi ka chiya mo voo, ge dape mo ndu ge ndaa kaka ne, mo ɔwabe kaŋ ge mo ee ne digi to, mo syaɗ kaŋ ge mo zare ne to me. 22Gan ga̰a̰l gwan ge ne janna go: Ndu ge tèmel ge laa pisil, mbi kun mo sariya ge fare ge ndage ge mo wa zì pagal. Mo kaa ge kuwaya go mbi ndu ge ndaa kaka ne, mbi ɔwabe kaŋ ge mbi ee ne digi to, mbi syaɗ kaŋ ge mbi zare ne to me. 23Mo kuwa fare mbe ma kuwa go ko, ge dape, mo wa mbo kan mbi bware mbe ge sok koy bware zì yà to gyana de. Mbi daa gwan-na no ɗe, mbi daa mà mbo ame ne ya zum ge mam to de? 24Guwa̰, jan num mbe ge kaa na ziya mbe ma go: Ḛ ame ne bware dinar mbe gezi ge ne tok go ɗaŋ, ḛ hon ne ndu ge see bware dinar wol. 25Àa gwan ge ne janna go: Bagezok, a go ge bware dinar wol iya me ɗe. 26Mbi jan ḛ ne no, ndu ge go na ge a̰me, àa mbo hon ne kon pagal. Ɗaŋɗe, ndu ge go na be a̰me, koo ne ne ge hoɗege guwa mbe puy, àa mbo ame ne ne gezi. 27Kaɗɗa mbi ka̰a̰m ge ho̰o̰l ma, num mbe ge ɓyare go mbi kê muluk ge maa pagal to ma ɗe, ḛ gene num ya go go, ḛ vyan num mbi ndwa go. 28Guwa̰ ge Zeso jin̰a na fare mbe ma go, dol tene ya nda vuwa̰ zḛḛ, ndwa mbo suwal ga̰a̰l Jerusalem.

Kunna ge walay nde ge Zeso ne Jerusalem diŋ

Mat 21.1-9; Mrk 11.1-10; Yoh 12.12-19

29Ɗeɗ-ɗa go, Zeso yan ja guwa ge suwal van ge zi ma, Betfaje mage Betani, ge no njal ge ɔwara oliv ma do̰o̰ no ne pagal digi kin̰a go, teme na nda ge ame hateya ma zi ge maa ka̰a̰m buwal zì, 30jan num go: Ḛ mbo ge suwal van ge no ge nè ndwa nga diŋ yà. Sok waɗ ne diŋ yà go gaw, ḛ mà seɗ kwar van ge ndu ndâ ne dwam ɗu to vwalla se. Ḛ saa ne, ḛ gene ne ya. 31Mà kaɗɗa ndu a̰me ele ḛ ya go: Ḛ saa ne ge dape? Ḛ jin̰a ne go: A Bagezok ɓyare nee ne.

32Nda mbe ge tèmel ma mbô, àa seɗ kaŋ mbe ma ge mojo̰o̰ Zeso jin̰a maa num mbe go tetem. 33Sok ge àa ɗege saa kwar van go, ne ba ma ele num go: Ḛ saa kwar van mbe ge dape de? 34Àa gwan ge num janna go: A Bagezok ɓyare nee ne. 35Àa gene Zeso kwar van mbe ya, àa kan maa ba̰a̰ ma ge ne guwa̰ digi, àa ee Zeso ndaa ge ne pagal. 36Zeso gale sok mboya go, nda ka zen maa ba̰a̰#19.36 Zen ba̰a̰ ndu ko se ge tapi go, a hon ndu hormo ngayya go ne ndu ge ciciliŋ. ma ge vin̰a pul go, ge ne ndwa zḛḛ. 37Ajo̰o̰ na yan ja guwa ge Jerusalem, ge vin̰a ge soole no ge njal ge ɔwara oliv ma do̰o̰ no ne pagal kin̰a digi ya se, laa saal mbo ya fere nda ge ame hateya ge gḛḛ mbe ge ka kàre ne pe ma peɗ, àa ɗege uware Dok ge ka̰a̰l ndaal, ge kaŋ ajab mbe ge maa kuwa num ge ne ta ma pe. 38Àa ka janna go:

Dok ke wa tare ge gan ga̰a̰l pagal,

Ne ge mbo no ya ge dḭḭl ge Bagezok ne pagal!

Halas go ge pḭḭ zì yà,

Saleya ge Dok ge no pḭḭ ma digi yà dḭḭl pagal me.

39 Farisi a̰me ma, ge ɓase ma buwal zì ya, àa ka jan Zeso go: Ba ge hateya, mḛḛre mo nda ge ame hateya ma go nde no de! 40Gwan ge num janna go: Mbi jan ḛ ne no, kaɗɗa num zane wa daal puy, njal ma mbo kee kṵwa̰!

Laa pisil ge Zeso ne ge Jerusalem pe

41Sok ge Zeso dee ya zì guwa, kuwa suwal ga̰a̰l, laa pisil ɓyare ka hun ne, ge num ge no ne diŋ ma pe, jan go: 42Mà kaɗ kwaɗa, daa no go ḛ sḛ ma wan kaŋ ge gene halas màno ya ma pe wan! Ɗaŋɗe, kaŋ mbe ma ge sego, àa way way ge ḛ ndwa zḛḛ. 43Dwam ma mbo deɗ-ɗa ḛ pagal, ge go ḛ nda ge ho̰o̰l ma mbo hee tok ge sok ma ya peɗ, àa mbo vee ḛ se, ge go ndu seɗ vin̰a ge ɓuuya to. Àa mbo waɗ-ɗa ḛ pe diŋ ge sok ma ya peɗ. 44Àa mbo burmi ḛ ge ḛ suwal genjem. Àa mbo n̰a njal ge ḛ zok ma way a̰me ge na kon pagal digi to. Kaŋ mbe ma mbo kee go ge dape, mo be vin sok mbe ge Dok mbo ya ḛ ta mon ḛ mbe to.

Yanna ge nda ge kee suk ma way

Mat 21.10-16; Mrk 11.15-18; Yoh 2.13-17

45Zeso waɗ-ɗa ge zok ge Dok ne pul diŋ, ɗege yan nda ge kee suk ma zum, 46jan num go: «Njaŋe ge maktub ge Dok ne zì go: “Mbi zok mbo kaɗ zok kee kaɗeya ne.” Ɗaŋɗe, ḛ me ɗe, ḛ seŋe ne ya sok way ta ge chala ma way no.»#Eza 56.7. 47Ka hate nda dwam ma tatab ge zok ge Dok ne zì. Ga̰a̰l ge nda ge kee tuwaleya ma way ma, nda ge hate eeya ge Moyiz ne ma, ga̰a̰l ge ɗeme ɓase ma ka ɓyare vin̰a ge ban ne gezi, 48ɗaŋɗe, àa be kuwa kaŋ ge maa keeya tem ge maa wa ee tok ne pagal to, ge dape ɓase ma peɗ ho̰ ta mɔɗwag sok za̰a̰ ne go.

Currently Selected:

Luk 19: kiaGRB

Highlight

Copy