Luk 18

Fare sḭḭ ge ndu ge kun sariya mage gwale kumu ne

1Zeso jan num fare sḭḭ a̰me ɗu, ndwa ngay num go, num mbiya kee kaɗeya ɗaɗag be ge num kan ta se to baɗ. 2Jan num go: Ndu ge kun sariya a̰me ɗu kaa ge suwal ga̰a̰l diŋ, voo ge Dok ne ne zì to, vin ndu fare na sḛ zì to me. 3Ge suwal ga̰a̰l mbe diŋ, gwale a̰me ge kumu kaa waɗme, ka mbo ya ne ta jan ne go: Vaa i ge mbi kon ge huur buwal nde no de. 4Kuri ne fare mbe dwam ma kaal swag. Ɗaŋɗe, guwa̰ go, jan tene go: Koo voo ge Dok ne no mbi zì to no puy, mbi vin ndu fare mbi sḛ zì to puy me ɗe, 5go no puy ɗe, ajo̰o̰ kumu mbe mbyaɗ mbi go sḛ, ɓyare mbi vaa num buwal, ge go fare mbe mbo aaya, ne ka gwan-na ɓaa mbi pagal bàŋ ɗoɗoo to. 6Bagezok gwan jan num go iya: Ḛ kuwa ndu ge kun sariya ge na vin̰a go to mbe fare ge jin̰a gale. 7Kaɗɗa ge Dok ɗe, a ge pool kun sariya ge temel ge na nda ge talla, ge tol na ɗaal mage gyala ma pagal to de? Mà kee dṵṵl ge chiya num kṵwa̰ kode? 8Mbi jan ḛ ne no, mbo kun num sariya avun cab. Ɗeŋew go, sok ge Van ge Ndu ne mbo gwan ja, mbo seɗ nda ge hoɗ fareba ma ge suwa pagal ɓade?

Fare sḭḭ ge nda ge ndil ta kee Dok gḛḛ ma pagal

9Dwam a̰me go ɗu, Zeso gwan kee num fare sḭḭ iya, ge nda a̰me ge ndil ta go maa nda ge temel ma ne, àa ka sen maa ka̰a̰m ma pagal go: 10Nda a̰me ma zi mbô ge zok ge Dok ne zì yà ndwa mbo kee kaɗeya. Ge ɗu ge Farisi ne, gegene ndu ge chal siyal ne me. 11Farisi mbe mḛḛya digi, ka kaɗeya na dul wa zì go: Dok ge mbi, mbi kee mo mersi ge dape, mbi dinna ge mbi ka̰a̰m gegene mbe ge chala ma, num mbe ge kee kaŋ keeya ge maa vin̰a go to ma, num mbe ge kee zina ma go to, koo dinna ge ndu ge chal siyal mbe no go to me. 12Mbi wan mam njuwal ndwa zi ge Dumas ge ɗu pul zì, mbi hon kaŋ wa ge kaŋ seɗɗa ge ambi ma way ma peɗ me. 13Kaɗɗa ge ndu ge chal siyal ɗe, mḛḛ guwa̰ yà kaal nde ge nda gegene ma, ɓyare hee na ndwa pḭḭ digi to peɗ, ɗaŋɗe, kan na tok na laa go, ka janna go: Dok ge ambi, mbi ndu ge sone ne, kuwa mbi a̰se nde. 14Mbi jan ḛ go: A ne sḛ mbe gwan ge na diŋ yà ne be dṵṵl na pagal, a be ndu ge no ɓan pagal ge Farisi ma way zì mbe to. Ago, ndu ge diige ge hee na pagal digi, Dok mbo gwan ne nda guwa̰ yà, ndu ge gwan na pagal se, Dok mbo hee ne digi me.

Zeso kee nda jabso wa tare

Mat 19.13-15; Mrk 10.13-16

15Nda a̰me ma, koo van kaare ma puy, àa gene num ya ndwa go Zeso ee na tok ma num pagal kee num wa tare. Sok ge nda ge ame hateya ma kuwa kaŋ mbe ma go, àa ɗege mḛḛre num. 16Zeso tol nda jabso ya na ta, jan na nda ge ame hateya ma go: Ḛ n̰a nda jabso, num mbo ya ge mbi ta, ḛ kaa ge be tele num to. Ago, muluk ge Dok ne, a ge num ge dḭḭ ta ge nda jabso mbe go ma pe. 17Fareba mbi jan ḛ ne no: Ndu ge mbo gwan na pagal ya ge Dok pe se, dinna ge van jiyale go, ndwa go ne kee muluk na pagal, a ne sḛ ɗeŋew mbo waɗ ge muluk zì ne.

Ga̰a̰l ge tok seɗɗa

Mat 19.16-30; Mrk 10.17-31

18Ga̰a̰l ge Yahuɗ ma way a̰me ɗu ele Zeso go: Ba ge hateya ge kwaɗa, a ma̰ kaŋ ge mbiya mbi kee nee ne ndwa hon mbi vin̰a ge mbo kaɗ ge ndwa ge ɗiŋ ge din ge Dok de? 19Zeso jan ne go: Ge dape mo wa tol mbi ndu ge kwaɗa de? Ndu a̰me ge kwaɗa ɗu to, ɗeŋew Dok. 20Mo kuwa wa yuwaleya ma kuwa: «Ke zina to, hṵṵ swày to, chee kaŋ to, ke sayda ge hày ndu pagal to, ho̰ mo ba mage mo na̰ hormo.»#18.20 Sok mbe àa hê ne ge Waz 20.12 zì ya.#Waz 20.12-16. 21Ndu mbe jan Zeso go: Mbi mbo go num pagal peɗ ge mbi bogol ya day. 22Guwa̰ ge Zeso za̰a̰ ne fare mbe ma go, jan ne go: A̰me ɗu hoɗege mo go gale iya: Yiya mo kaŋ gan ma gezi mɔɗwag, va a̰se ma num bware mbe, go mbe no, mo mbo seɗ kaŋ gan ge pḭḭ ma zì yà. Guwa̰, mbo ya, mo kàre mbi pe me. 23Sok ge za̰a̰ fare ge Zeso jin̰a na mbe ma go, ne ndwa mbo ya suu se leɗeɗ, ago kaa gan njonjon̰. 24Sok ge Zeso kuwa go ne ndwa suu ya se leɗeɗ, jan go: A haŋle ge go nda ge no ge kaŋ gan ma wuwa ge muluk ge Dok ne zì! 25Ago, a fogo waɗeya, ge jambal ge jujul zi waɗ ge libra ndwal zì, ge go ndu ge gan waɗ ge muluk ge Dok ne zì. 26Num ge ka za̰a̰ ne ma jan go: Kaɗɗa na mbe go, a huɗi ge pool seɗ monna ne ɗaŋ de? 27Zeso gwan ge num janna go: Kaŋ ge ndil haŋle ge nda duwana ma ndwa zì, Dok ge pool ne pagal.

28Sok mbe go, Piyer jan ne go: O̰o̰, i n̰a i kaŋ ma ya ya peɗ, i kàre mo pe ya no. 29Zeso gwan ge num janna go: Mbi jan ḛ fare ge fareba, a huɗi ne ge wa n̰a na zok, na gwale, na na̰ van ma, na sele ma, koo na van ma, ge muluk ge Dok ne pe ɗoo, 30wa mbo seɗ num waɗeya ge sego, gwan mbo seɗ ndwa ge ɗiŋ ge din ge Dok ta yà ge zaman ge mbo no ya go to de?

Zeso faa fare ge na swày ne iya

Mat 20.17-19; Mrk 10.32-34; Luk 9.22, 44-45

31Zeso gene nda ge ame hateya ge wol pɔgwa zi ma ya gezi nde, jan num go: Ḛ kuwa go, nè mbo go Jerusalem, ge go fare ge nda ge zwagre Dok wa ma njaŋe num ge mbi, Van ge Ndu ne pagal ma, wa mà mbo huyya. 32Ago, àa mà mbo ɓyan ne ge nda ge no rusu Yahuɗ zì to ma tok go, num sḛ mbe ma mbo lasage ne, àa mbo kee ne yal, àa mbo too watwa ge ne ta. 33Guwa̰ ge àa mà dwagle ne ya ge bol go, àa mà hun ne. Ge dwam ge taa pagal, mbo tan digi. 34Ɗaŋɗe, àa wan fare mbe pe go fyalag to. Ajo̰o̰ fare mbe pe wanna way way, àa be kuwa go Zeso ɓyare jan gyana de to me.

Zeso hage ɓaal ndwa

Mat 20.29-34; Mrk 10.46-52

35Ɗeɗ-ɗa go, Zeso yan ja guwa ge suwal ga̰a̰l Jeriko, sok mbe go me ɗe, ɓaal ɗu wa ya kàɗɗa vin̰a kin̰a go, kaɗe kaŋ me. 36Sok ge kṵwa̰ ge ɓase ge kale ma way dee ya ne tɔgwa zì go, ele sok go: A ma̰ kaŋ kee ne de? 37Nda kee ne kuwaya go, ne Zeso ge suwal Nazareɗ ne yin̰a ya ne. 38Sok mbe go, ka oyya go: Zeso ge Daviɗ Baŋ, kuwa mbi a̰se nde no de! 39Nda ge ka mbo ya vuwa̰ zḛḛ ma ɗege ngwabe ne, ne dibi na wa, ɗaŋɗe, gwan ka aa na pe oyya digi ndaal waɗeya go: Gan ga̰a̰l Daviɗ Baŋ, kuwa mbi a̰se nde no de! 40Zeso mḛḛ se, hoɗ na wa go àa gene ne ya na ta. Sok ge yin̰a ya ne ta zì guwa, ele ne go: 41Mo ɓyare go mbi ke mo da de? Ndu ge ɓaal gwan ge ne janna go: Bagezok, n̰a go mbi kuwa sok! 42Zeso jan ne go: Kuwa sok ɗaŋ! Ge mo ho fareba mbi ta pe, mo zon go. 43Sok mbe go gaw, ɓaal kuwa sok, ka kàre Zeso pe, ka sale Dok. Ɓase ma peɗ kuwaya ge àa kuwa kaŋ mbe ma go, àa ɗege uware Dok waɗme.

Currently Selected:

Luk 18: kiaGRB

Highlight

Copy