Luk 17

Sone keeya mage ele poreya

Mat 18.6-9, 21-22; Mrk 11.22-26

1Guwa̰, Zeso jan na nda ge ame hateya ma go: A ngaɗ go kaŋ ge ee nda deɗɗa ma num kaa. Ɗaŋɗe, woo ge ndu ge kaŋ ge ee nda deɗɗa mbe ma mbo ɗege ya ge ne ta! 2A nde-nde ge ne pe ge go, àa vwal njal ga̰a̰l ge ne ka̰a̰l zì, àa dol ne ge mam ga̰a̰l nuwam se yà, zḛḛ ge go ne kaa kaŋ ge ee ɗu ge nda jabso mbe ma buwal zige deɗɗa. 3Ḛ sḛ ma, ḛ koy ta kwaɗa! Kaɗɗa mo na̰ van deɗ-ɗa ge sone zì, mḛḛre ne. Kaɗɗa na seŋe tene ja se, pore ne ne sone mbe. 4Kaɗɗa kê sone mo ta ndwa ɓỳala ge dwam ge ɗu pul zì, gwan-na ge mo ta ndwa ɓỳala waɗme, jan mo go: Mbi kuwa mbi sone ya go, ago mo pore ne pore.

5 Nda ge temeya ma jan Bagezok go: Ho̰ i pool ta iya ge fareba hoɗɗa ge i i ma zì. 6Bagezok gwan ge num janna go: «Kaɗɗa hoɗ fareba ge ḛ ḛ ma hoɗege guwa ge mojo̰o̰ sugu ge àa tol ne mutard ndwa go puy, kaɗɗa ḛ jan ɔwara ga̰a̰l mbe no ya go: “Ndage ge mo too ɗereɗ, mo mbo mḛḛ ge mam ga̰a̰l nuwam se yà, mbo kee ge mojo̰o̰ ḛ ɓyare go.”

Kaŋ ge ndu ge tèmel mbiya keeya

7«Tamekyala, ndu a̰me ge ḛ buwal zige a ge dore ge kee na tèmel gaaso koo ge koy na vwag kaŋ kogor ma. Mà kaɗɗa go ndu ge tèmel mbe jaɗ ge ful zì ya no, mà jan ne go: Kale ya zam kaŋ zam gaw de? 8Jan ne mà vare zoo go: Ke mbi kaŋ zam ge gasamal, ka̰a̰ mo ba̰a̰ tèmel ge mo ta, mo hon mbi kaŋ zam ya, ɗiŋ ge go mbi aa kaŋ zam zamma. Guwa̰, mo wa gaa zam amo. 9Mà kee mersi hon na ndu ge tèmel mbe, ge ne kê tèmel ge na ho na wa ne kê na ne pe de? 10Ḛ sḛ ma mbe go ca, sok ge ḛ kee kaŋ ge àa hoɗ ḛ wa num pagal ma go peɗ, ḛ jin̰a go: “I nda ge tèmel ge be fare a̰me pe to ma ne boo, kaŋ ge i kee ma no, a kaŋ ge i mbiya kee num ma sḛ ne.”»

Zonna ge nda ge kṵṵ swàm ge wol ma way

11Ɗeɗ-ɗa go, sok mbo gɔswal Jerusalem yà go, Zeso kale walape ge vaa Samari mage Galile buwal se. 12Sok waɗ suwal ge jiyale a̰me diŋ go, nda ge kṵṵ swàm ma wol mbo ya seɗ ne. Àa mḛḛ gezi yà kaal nde. 13Àa ɗege hee maa ka̰a̰l digi, sok tol Zeso go: «Ba ge hateya, kuwa i a̰se nde no de!» 14Sok ge Zeso kuwa num go, jan num go: «Ḛ mbo ngay ta ge nda ge kee tuwaleya ma ta.» Sok mbo ge nda ge kee tuwaleya ma ta yà go, num bol ma haɗ somndol gaw, àa haɗ kɔn̰al me. 15Sok ge àa see go maa zonna go, a̰me ge num buwal zige ɗu gwan-na ge na ko pagal, ge Dok saleya ge ka̰a̰l ndaal. 16Guu na ko Zeso ndwa se, ka kee ne mersi. Ndu mbe, a van ge suwa Samari nee ne. 17Sok mbe go, Zeso ele sok go: «Num mbe ge wol ma daa be seɗ zonna mɔɗwag, àa haa kɔn̰al no to wa? Gegene ge wa gezi ɗu ma gaa diya no de? 18Ndu a̰me be seɗ go na guwa̰ ya kee Dok mersi to, a van gɔswal mbe no ɗu guwa̰ ya gwan ge mersi hon Dok ne ɗeŋew-wa?» 19Guwa̰ jan ne go: «Ɗege digi, mo mbo. Ge mo ho fareba mbi ta pe, mo mon-na go.»

Kaŋ ge ngay dwam ge Dok mbo ya kee muluk ma

Mat 24.3-42

20Dwam a̰me ɗu, nda ge no ɓan pagal ge Farisi ma way zì ma ele Zeso go: Dok mbo ya kee muluk ma̰ del de. Gwan ge num janna go: «Dwam ge Dok mbo ya kee muluk, ndu a̰me mbo kuwa ne ge na ndwa to. 21Ndu a̰me mbo jan go to: “Ḛ kuwa gale, a ee pe ya go go no!” Koo “A ee pe ya yà go no!” Ago, ḛ za̰a̰ kwaɗa, Dok kee muluk go ḛ buwal zì.»

22Gwan jan nda ge ame hateya ma iya go: «Dwam ma mbo mbo ya, ge go ḛ mbo kee ene kàɗɗa go swag dagre ge mbi, Van ge Ndu ne, ge ne dwam mbe ma go, ɗaŋɗe, ḛ mbo seɗ vin̰a to. 23Nda mbo jan ḛ go: “Ne ge yà go!” Koo “Ne ge go go”. Ḛ za̰a̰ num to, ḛ mbo num pe yà to me. 24Ago, mbo kaɗ kɔn̰al go, dinna ge mam see ge pḭḭ wa aaya ge ɗu go, mbo ge pḭḭ wa aaya gene yà, dwam ge Van ge Ndu ne, mbo kaɗ mbe go no ca. 25Ɗaŋɗe, ɓyare go ne gale njoo yal gḛḛ guy, nda ge doŋ pe mbe go ma kuri ne gezi me.

26«Kaŋ ge mbo keeya ge dwam ge Van ge Ndu ne go ma, mbo kaɗ dinna ca ge kaŋ ge kê ge dwam ge Nowe ne ma yà go. 27Nda ka zamma, àa ka njoɗɗa, àa ka kaɗ zok, àa ka san maa van ge soɗob ma gwale, àa ka hon ge gwale ma zok kàɗɗa, ɗiŋ ge go dwam ge Nowe waɗ faa ga̰a̰l zì, mam yḛḛreya dee ya, ne puu nda gezi mɔɗwag. 28Koo mbo kaɗ dinna ca ge dwam ge Loɗ ne go go: Nda ka zamma, àa ka njoɗɗa, àa ka yaɗ kaŋ ma, àa yaɗ maa kaŋ ma gezi, àa ka dol kaŋ rusu suwa zì, àa ka sin zok me, 29ɗaŋɗe, ge dwam ge Loɗ wuwa ya zum ge Sodom diŋ ya go, Dok kan ol mage ɓoo ge ol bibiliw ge pḭḭ digi ya ge mam suwa go, puu nda gezi mɔɗwag. 30Mbo kaɗ mbe go ca, ge dwam ge Van ge Ndu ne mbo dyan ja zum go.

31«Ge dwam mbe go, ndu ge mbo kaɗ-ɗa ge na zok pagal digi#17.31 Yahuɗ ma nuusi zok pagal ta̰a̰sal. Àa mbo kaɗ gyala pe digi za̰a̰ sa̰a̰m., ne ka̰a̰ na ko ya se ndwa mbo ɔwabe kaŋ ge na zok zige ma to. A mbe go ca ge ndu ge mbo kaɗ-ɗa ge gaaso zì yà pe, ne guwa̰ ya zok diŋ to. 32Ḛ duwa ge fare ge see Loɗ gwale#17.32 Mo mbo seɗ fare mbe ge maktub ge Pe dolla ge kaŋ ma way zì yà. Pe dolla 29: 16.. 33Ndu ge mbo ɓyare ya kwacware ndwa ge na ne, mbo ban ne. Ndu ge mbo ban na ndwa ya, mbo seɗ ne me. 34Mbi jan ḛ gezi waŋ go, ge ɗaal mbe no zì, nda zi mà kaɗ ge saŋal ge ɗu go, àa mà hee ɗu, àa n̰a gegene me. 35Nda zaab zi ge mbo kaɗ-ɗa nan swa sok ge ɗu go, àa mbo hee ɗu, àa n̰a gegene me.» 36[Nda soɗob zi mà kaɗ kee maa tèmel gaaso, àa mà hee ɗu, àa n̰a gegene me.] 37Nda ge ame hateya ma ele ne go: «Mbo kee go mbe lee diya yà de, Bagezok-goo?» Gwan ge num janna go: «Sok ge kaŋ suu no go, boge#17.37 Fare sḭḭ ge boge ma way, ngay go ndu kuwa boge ma ya voloweya ɗe, a̰me suu go. Sok ge nda duwana ma mbo ɗege ya kuwa kaŋ ngayya a̰me ma me ɗe, dwam gwanna ge Bagezok ne gaa guwa me. ma tabe ya ge sok mbe go.»

Currently Selected:

Luk 17: kiaGRB

Highlight

Copy