Yohana 20

Tanna ge Zeso Krist ne

Mat 28.1-10; Mrk 16.1-11; Luk 24.1-12

1Dumas aaram vḛḛ, ajo̰o̰ sok gale wa ya pisil, Mari ge suwal Magdala ne mbo ge sḭḭ pagal yà. Sok ge dee yà, kuwa go àa viŋri njal ge àa dibi tugul mbul ta wa ge ne ya gezi. 2Sok mbe go, kale chiya mbo seɗ Simo̰ Piyer mage ndu ge ame hateya ge Zeso laa wa̰a̰ ne, ge sok ge num kaa no go. Jan num go: Àa hee Bagezok duul swày ya sok ge tugul zì, i wan sok ge àa ee ne ya go pe to. 3Piyer mage ndu ge ame hateya gegene waɗ ge zok diŋ ya zum ndwa mbo ge sḭḭ pagal yà. 4Àa ka chiya chiya jwàg, ɗaŋɗe, ndu ge ame hateya gegene ka chiya waɗe Piyer, deɗ ge sḭḭ pagal yà ge ne ndwa zḛḛ. 5Hugi se ndwa ndil sok tugul zì yà, kuwa ba̰a̰ pakta ge lɔgwa lalan̰ kanna se, ɗaŋɗe waɗ zì yà to. 6Simo̰ Piyer ge ka chiya ge ne guwa̰ ya, sok ge dee ya, kale waɗ tugul zì yà gaw, kuwa ba̰a̰ pakta ge lɔgwa lalan̰ ma kanna se. 7Kuwa ba̰a̰ wa ge àa tâ Zeso pagal zì ge ne waɗme. Ba̰a̰ wa mbe kaa wargeya ge sok ge ɗogle go, ge ziya yà hini caɗ ge ba̰a̰ pakta ge lɔgwa lalan̰ gegene ma. 8Sok mbe go, ndu ge ame hateya gegene ge dee ya zḛḛ tugul wa go, waɗ ge tugul zì yà waɗme. Sok ge kuwa ba̰a̰ pakta ma, hoɗ fareba go Zeso tan-na ge swày se. 9Ago, nda ge ame hateya ma be wan Njaŋeya ge Dok ne fare ge wuwage go, Zeso mbiya tan ge nda ge swày ma buwal zì pe gale to. 10Guwa̰ go, nda ge ame hateya ge zi mbe ma gwan mbo maa zok ma diŋ yà.

Zeso ngay tene ge Mari ge Magdala ndwa go

11Mari kaa mḛḛya gezi yà nde ge tugul, ka fyalla. Ajo̰o̰ na ka fyal fyal, hugi se ndwa ndil sok tugul zì yà, 12kuwa malayka ma zi ge ba̰a̰ saal taɗag maa ta kàɗɗa ge sok ge àa ee Zeso duul swày no ne go. Ge ɗu ge sok ge ne pagal ee go, gegene, ge ne ko se. 13Malayka mbe ma jan ne go: Gwale, mo fyal go kwaɗa ɓade? Gwan ge num janna go: Àa hee mbi Bagezok duul swày ya sok, mbi wan sok ge àa ee ne ya go pe to. 14Guwa̰ ge jin̰a fare mbe go, seŋe tene se, kuwa ndu mḛḛya na ziya, ɗaŋɗe, wan pe go ne Zeso ne to. 15Zeso ele ne go: Gwale, mo fyal go kwaɗa ɓade? Mo ɓyare huɗi de? Ka dwaɗɗa go ne ndu ge koy gaaso ne, jan ne go: Kaɗɗa mo hê nee ne, ngay mbi sok ge mo ee ne no go, ndwa go mbi wa mbo hee ne ya. 16Zeso tol ne ge ne dḭḭl go: Mari! Mari seŋe tene ya se, jan ne fare ge wa hebre go: Rabuni, ndwa go: Ba ge hateya! 17Zeso jan ne go: Wa̰a̰ mbi pagal to, ge dape, mbi gale be mbo mbi Ba ta digi yà to. Ɗaŋɗe, mbo jan mbi na̰ van, num mbe ge ame hateya ma go: Mbi mbo ge mbi Ba ge no ḛ Ba waɗme ta digi yà, ne sḛ a mbi Dok ne, kaɗ Dok ge ḛ ḛ waɗme. 18Ge sok mbe go, Mari ge suwal Magdala mbo wuwage ne nda ge ame hateya ma go, na kuwa Bagezok ya ge na ndwa. Wan num fare ge ne jin̰a na num ma me.

Zeso ngay tene ge na nda ge ame hateya ma ndwa go

Mrk 16.14-18; Luk 24.33-45

19Ge dwam Dumas gasamal mbe go bàba, ge zok ge nda ge ame hateya ma seɗ ta ne diŋ, zok wa ma dibiya ɓereɗ num pagal, ge dape, àa ka chiya Yahuɗ ma ga̰a̰l ma voo. Zeso waɗ-ɗa num pagal zì ɓal, mbo ya mḛḛ ge num tuwal zì, jan num go: Halas kaa ge ḛ! 20Sok ge jin̰a fare mbe go, ngay num jwaŋ pyalaŋ ge no na tok pul go mage na ziya go ma. Sok ge nda ge ame hateya ma kuwa Bagezok go, àa kee laa saal gḛḛ waɗeya. 21Zeso jan num go iya: Halas kaa ge ḛ! Dinna ge mbi Ba teme mbi ya dunin̰a zì go, mbi sḛ waɗme, mbi teme ḛ dunin̰a zì. 22Guwa̰ ge jin̰a fare mbe ma go, uusi sa̰a̰m num pagal, jan num go: Ḛ n̰a On̰om ge Harcal seɗ sok ḛ zì. 23Kaɗɗa ḛ pore nda num sone ma ya, Dok pore num pore waɗme. Kaɗɗa ḛ kuriya be pore num sone ma, Dok mbo kuri be pore num waɗme.

Zeso ngay tene Tomas ndwa go

24Tomas, ɗu ge Zeso nda ge ame hateya ge wol pɔgwa zi ma buwal zì ge, ge àa chiya ne dḭḭl go Bumu, be kaɗ ge num buwal zì to, sok ge Zeso ngay tene num ndwa go. 25Nda ge ame hateya gegene ma jan ne go: I kuwa Bagezok ge i ndwa. Ɗaŋɗe, Tomas gwan ge num janna go: Kaɗɗa mbi kuwa jwaŋ pyalaŋ ge ponde ge ne tok pul go ma ya to, mbi ee mbi tok van ge num ta koo mbi ee mbi tok van ge jwaŋ pyalaŋ ge ne ziya wa kal zige ta to, mbi hoɗ fareba go ne tan-na go to. 26Dumas ɗu guwa̰, Zeso nda ge ame hateya ma gwan seɗ ta ge zok mbe diŋ, Tomas wa ya go. Zok wa ma dibiya ɓeɓereɗ ge num pagal, ɗaŋɗe, Zeso waɗ-ɗa num pagal zì ɓal, mbo ya mḛḛya num tuwal zì, jan num go: Halas kaa ge ḛ! 27Guwa̰, jan Tomas go: Ee mo tok van ya ge jwaŋ pyalaŋ ge mbi tok pul go ge ta, ndi mbi tok pul ma no me. Ee mo tok van ya ge jwaŋ pyalaŋ ge mbi ziya wa kal go ge ta waɗme. Pee daa to, ho fareba. 28Tomas gwan ge ne janna go: Mbi Bagezok, Dok ge ambi! 29Zeso jan ne go: A ge mo kuwa mbi pe, mo ho fareba no. Laa saal a ge num ge hoɗ fareba be kuwa mbi to ma pe. 30Zeso gwan kee kaŋ ajab ge ɗogle ma gḛḛ-gḛḛ, ge na nda ge ame hateya ma ndwa go, ge njaŋe no ge maktub mbe no zì to ma. 31Ɗaŋɗe, fare ge njaŋe no ne zì ma, a ndwa go num ee ḛ hoɗ fareba go Zeso Dok Van ne, Krist, Ndu ge Dok sḛ taa ne tal ne. Go mbe no, kaɗɗa ḛ hoɗ fareba ya ne ta, ḛ mbo seɗ ndwa ge fareba.

Currently Selected:

Yohana 20: kiaGRB

Highlight

Copy