Yohana 21

Zeso ngay tene ge na nda ma ndwa go

Mat 28.16; Luk 5.1-11

1Ge ano mbe guwa̰, Zeso gwan ngay tene ge na nda ge ame hateya ma ndwa go, ge mangaɗam ga̰a̰l ge Tiberiyaɗ ne wa go. Ḛ kuwa go ne ngay tene num ta pe gyana de. 2Simo̰ Piyer, Tomas ge àa chiya ne dḭḭl Bumu, Natanayel ge suwal Kana ge no suwa Galile go, Zebede van ge soɗob ma, nda ge ame hateya ge ɗogle ma zi kaa dagre ge num. 3Simo̰ Piyer jan num go: Mbi mbo soso. Num sḛ ma jan ne go: I mbo ge mo waɗme. Àa waɗ-ɗa zum, àa ndee ge faa ga̰a̰l go. Ge ɗaal mbe zì, àa be wan a̰me to. 4Sok yan aaram, Zeso mbo ya mḛḛya ge mangaɗam ga̰a̰l wa go, ɗaŋɗe, nda ge ame hateya ma wan pe go ne nee ne to. 5Jan num go: Kondore ma, ḛ soso kê ḛ gyana de? Àa gwan ne janna go: I be wan a̰me to. 6Jan num go: Ḛ doo kuwal ge faa ga̰a̰l lee matoson go, ḛ mà seɗ a̰me ne kade. Sok ge àa doo kuwal go, àa seɗ pool ge gwan zwal ne ya digi to, ge dape, kaa kageya se rigib ge sini. 7Sok mbe go, ndu ge ame hateya ge Zeso laa wa̰a̰ ne, jan Simo̰ Piyer go: A Bagezok ne! Sok ge Simo̰ Piyer za̰a̰ go, ne Bagezok ne ɗe, kan na ba̰a̰ kapoɗ ge na daa fwage ne digi ge na ta, dol tene mam se yà. 8Nda ge ame hateya gegene ma sok ɗiibi faa ga̰a̰l ya wa kal zì go, àa ka zwal kuwal ge sini kage ne se rigib ya ge maa pe go, ge dape, wa kal be kaɗ kaal ge num to, kaa guwa ge tok piyaso kikis zi go. 9Sok ge àa ndee ge wa kal digi go, àa kuwa ol mbaaya sok mbe go, sini dolla ne pagal suwaya, dupḛ eeya se me. 10Zeso jan num go: Ḛ gene sini ge ḛ wa̰a̰ ma ya kwaɗa zi. 11Simo̰ Piyer ndee faa go, zwal kuwal mbe ya wa kal digi. Kuwal mbe kaa kageya se rigib ge sini ga̰a̰l ma kis ge ziya warnuwan̰ pɔgwa taa. Go no puy, kuwal mbe ndwal a̰me ɗu be taabe to. 12Zeso jan num go: Ḛ mbo ya zam kaŋ zam. Ndu ge ame hateya a̰me ɗu be tal tene ele ne go: Mo huɗi ne de to. Ago àa kaa ge kuwaya tyatyaɗ go ne Bagezok ne. 13Zeso gwan tene ya zì, hee dupḛ mbe, vaa num ne. Guwa̰, vaa num sini mbe waɗme. 14A ge ndwa taa ne, ge Zeso ngay tene no, ge na nda ge ame hateya ma ndwa go, guwa̰ ge a ta̰a̰ ge nda ge swày ma buwal zì go.

Zeso ele fare Piyer

15Guwa̰ ge àa zâ kaŋ zam go, Zeso ele Simo̰ Piyer go: Simo̰ ge Jonas van, mo laa wa̰a̰ mbi wan kale nda gegene ma no de? Gwan ge ne janna go: O̰o̰, Bagezok, mo kuwa kuwa go mbi laa wa̰a̰ mo wan. Zeso jan ne go: Doo mo ndwa mbi tame van ma pagal. 16Guwa̰, ele ne ge ndwa zi go: Simo̰ ge Jonas van, mo laa wa̰a̰ mbi wan de? Piyer gwan ge ne janna go: O̰o̰, Bagezok, mo kuwa kuwa go mbi laa wa̰a̰ mo wan. Zeso jan ne go: Koy mbi tame ma. 17Guwa̰, jan ne ge ndwa taa go: Simo̰ ge Jonas van, mo laa wa̰a̰ mbi wan de? Fare mbe kee Piyer yal ge Zeso dwage na ne ya eleya ndwa taa pe go: Mo laa wa̰a̰ mbi wan de? Gwan ge ne janna go: Bagezok, mo kuwa fare ma kuwa kakaɗag, mo kuwa kuwa go mbi laa wa̰a̰ mo wan. Zeso jan ne go: Doo mo ndwa mbi tame ma pagal. 18Fareba mbi jan mo ne no, sok ge mo kaa bogol, mo sḛ ka vwal hoo mo pul go ne, mo gaa mbo sok ge mo ɓyare mboya. Ɗaŋɗe, sok ge mo mbo haɗ-ɗa sabar, mo gaa ɔwabe mo tok ma digi, ndu ge ɗogle vwal mo hoo mo pul go, gene mo mbo sok ge mo ɓyare mbo ne to go. 19Ge fare mbe ma no ta, Zeso ɓyare ngayya go, Piyer mbo suu pe gyana de, ne swày mbe wa kaɗ vin̰a ge ngay nda pateya ge Dok ne. Guwa̰, Zeso jan Piyer go: Kàre mbi pe.

20Piyer seŋe tene ya se, kuwa ndu ge ame hateya ge Zeso laa wa̰a̰ ne, mboya ge maa guwa̰ ya. A ndu mbe ge paa na wa Zeso tɔgwa zì sok zam kaŋ go ne, ele ne no go: Bagezok, a huɗi ɓyare ɓyan mo gezi ne de? 21Sok ge Piyer kuwa ne, ele Zeso go: Bagezok, ndu mbe no, mbo kaɗ gyana ge ne pe de? 22Zeso gwan ge ne janna go: Kaɗɗa mbi ɓyare ya go ne kaa ge na ndwa ɗiŋ mbi gwan-na wa go puy no, paa mo zì de? Kaɗɗa ge mo, kàre mbi pe. 23Ge sok mbe go, kṵwa̰ ge fare mbe ne dasare se ge na̰ van ge ho fareba ma ta go go ndu ge ame hateya mbe mbo suu to. Zane no, Zeso be jan Piyer go, ne mbo suu to de ɗe, be jan ne go to. Ɗaŋɗe, jin̰a go: Kaɗɗa mbi ɓyare ya go ne kaa ge na ndwa ɗiŋ mbi gwan-na wa go puy no, paa mo zì de? 24A ndu ge ame hateya mbe kee sayda ge fare ge na kuwa num ge na ndwa ma ne peɗ, njaŋe num no me. I kuwa kuwa go ne fare mbe ma fare ge fareba ma ne.

25Zeso gwan kee kaŋ ge ɗogle ma ta gḛḛ-gḛḛ waɗeya. Daa no go àa njaŋe num njaŋe kakaɗag ɗe, mbi dwaɗ go, sok ge kan kaŋ njaŋeya mbe ma mà kaɗ daa to ge dunin̰a zì.

Currently Selected:

Yohana 21: kiaGRB

Highlight

Copy