Yohana 16
16
1Mbi jin̰a ḛ fare mbe ma no ndwa go ne kaa ge ḛ doo hoɗ fareba ge ḛ ḛ ma gezi to. 2Mbo deɗ-ɗa go àa mbo ka yan ḛ zum ge zok kee kaɗeya ge Yahuɗ ma way ma zì, be ano bàŋ to, koo dwam ma mbo mbo ya ge go ndu ge diige ge mbo hun ḛ ya, mbo dwaɗ go ne vin̰a ge na kee tèmel hon Dok ne. 3Àa mbo ee ḛ za̰a̰ yal mbe go ge dape, àa be kuwa mbi koo mbi Ba to me. 4Mbi jin̰a ḛ fare mbe ma no ndwa go sok ge num dwam ma mbo mbyaɗ-ɗa, ḛ duwa ge fare ge mbi dee ndiri ḛ tɔgwa ne pagal. Mbi be jan ḛ fare mbe ma ge zḛḛ ya wal to, ge dape, mbi kaa dagre ɗaɗag ge ḛ.
Kaŋ ge On̰om ge Harcal mbo kee ne ya
5Zeso gwan jan na nda ge ame hateya ma go iya: Ge sego, mbi gwan mbo ge mbi Ba ge teme mbi ya ta yà, ano puy, ndu a̰me ɗu ge ḛ buwal zige ele mbi go mbi mbo diya de to? 6Ɗaŋɗe, ge mbi jin̰a ḛ fare mbe no pe, ḛ seɗ tiɗiya ya ḛ sḛ zì no. 7Go no puy, fare ge mbi ɓyare mbo jan ḛ ne no, a fare ge fareba ne: A kwaɗa ge ḛ pe go, mbi mbo, kaɗɗa go to, Ba ge mbaaya mbo mbo ya ḛ ta to. Ɗaŋɗe, kaɗɗa mbi mbo ya, mbi mbo teme ḛ ne ya. 8Sok ge mbo mbo ja, mbo ngay nda ge dunin̰a zì ma go, num ge vuuɗiya zì, ge fare ge sone keeya ne pagal, ge fare ge temel taɗ ne pagal, ge sariya kunna ge Dok ne pagal me. 9Mbo ngay go num ge vuuɗiya zì ge fare ge sone keeya ne pagal, ge dape, àa kuri be hoɗ fareba mbi ta. 10Mbo ngay go num ge vuuɗiya zì, ge fare ge temel taɗ ne pagal, ge dape, mbi gwan mbo ge mbi Ba ta yà, ḛ mbo daa kuwa mbi to baɗ. 11On̰om ge Harcal mbo ngay num go num ge vuuɗiya zì ge sariya kunna ge Dok ne fare pagal, ge dape, Dok kun sariya ya ge ga̰a̰l ge on̰om ge sone ma way ge wa̰a̰ dunin̰a no na tok go pagal. 12Mbi go ge fare ma gḛḛ jan ḛ ta iya, ɗaŋɗe, ḛ mbyaɗ wan num pe kakaɗag to. 13Sok ge On̰om mbo mbo ja, ne ge jan fare ge fareba ge Dok pe, mbo ee ḛ kuwa fare ge fareba ge mbô ge Dok ta ya ge ɓul mɔɗwag. Mbo jan be na fare ma sḛ to, ɗaŋɗe, mbo jan fare ge na za̰a̰ num ma peɗ, mbo wuwage ḛ kaŋ ge mbo no ya ma me. 14Mbo ngay ḛ pateya ge ambi, sok hee fare ge mbi hate ḛ num ma, gwan wan ḛ num pe zum kɔn̰al. 15Kaŋ ge mbi Ba no ge num ma peɗ, àa ambi ma ne waɗme, a ge pe mbi jin̰a no go: On̰om mbo za̰a̰ fare ge mbi jan na ne, mbo zwagre ḛ ne janna me.
Kiimi mbo kaɗ zḛḛ ne, laa saal gaa ya guwa̰
16Zeso gwan jan na nda ge ame hateya ma go iya: Zḛḛ ta fyalag, ḛ mbo kuwa mbi daa to, guwa̰ ta fyalag, ḛ mbo gwan kuwa mbi, [ge dape, mbi mbo ge mbi Ba ta yà]. 17Sok mbe go, ne nda ge ame hateya a̰me ma ka ele ta ta buwal zì go: Ɓyare jan nè ma̰ fare sḛ tem de? A jan nè go: Zḛḛ ta fyalag, ḛ mbo kuwa mbi to. Guwa̰ ta fyalag, ḛ mbo gwan kuwa mbi. Jin̰a i no waɗme go: Mbi gwan mbo mbi Ba ta yà. 18Nda ge ame hateya ma gwan ka janna go: Zeso ɓyare jan i ma̰ fare, sok ge jin̰a go, zḛḛ ta fyalag de? I wan fare ge jan ne mbe pe to. 19Zeso kuwa go num ɓyare ele na fare, jan num go: Mbi jan ḛ ne ya daa zum waŋ go: Zḛḛ ta fyalag, ḛ mbo kuwa mbi to, guwa̰ ta fyalag, ḛ mbo gwan kuwa mbi. A ge fare mbe no pagal, ḛ ele ta fare ta buwal zì no de? 20Fareba mbi jan ḛ ne no: Ḛ mbo ka fyalla, ḛ ka sun ta. Nda ge dunin̰a zì ma me ɗe, àa mbo ka kee laa saal. Ḛ mbo kee kiimi ɓa, ɗaŋɗe, ḛ kiimi mbe mbo seŋe laa saal. 21Sok ge ndu gwale kaɗ kee twàl, wan kiimi, ge dape, a ne sok ge za̰a̰ yal gḛḛ mbiya ne. Ɗaŋɗe, sok ge tol van ya se, daa gwan dwaɗ na yal mbe to, gaa kee laa saal ge na too van dunin̰a zì pe. 22A fare mbe see ḛ ne ge sego, ḛ mbo ka kee kiimi, ɗaŋɗe, mbi mbo gwan-na kuwa ḛ ndwa. Go mbe no, ḛ mbo kee laa saal keeya ge go, ndu a̰me ge tele ḛ mbo kaɗ to me. 23Sok ge dwam mbe mbo mbyaɗ-ɗa, ḛ mbo daa gwan ele mbi fare ma to. Fareba mbi jan ḛ ne no, kaŋ ge ḛ mbo kaɗe Dok Ba num ya ma peɗ, ge mbi dḭḭl zì, mbo hon ḛ num. 24Ɗiŋ ge sego, ḛ gale be kaɗe a̰me ge mbi dḭḭl zì to. Ḛ kaɗe ḛ mbo seɗ, ndwa go ḛ wa kee laa saal huyya tab.
Zeso halla ge dunin̰a pagal
25Zeso gwan jan na nda ge ame hateya ma go iya: Mbi jin̰a ḛ fare mbe ma no ge fare sḭḭ. Dwam ma mbo mbo ya ge go mbi mbo gwan jan ḛ fare ge fare sḭḭ to baɗ, ɗaŋɗe, mbi mbo jan ḛ fare ge Dok Ba ne ge go ḛ wa wan ne pe zum kɔn̰al. 26Ge dwam mbe ma go, ḛ mbo gaa kaɗe kaŋ mbi Ba, ge mbi dḭḭl zì. Mbi jan ḛ go, mbi mbo daa kaɗe nee ne ge ḛ pe to, 27ago Dok ge mbi Ba sḛ laa wa̰a̰ ḛ wan, ge dape ḛ laa wa̰a̰ mbi wan, ḛ ho fareba no go mbi mbo ge ne ta ya. 28Mbi ge ɗege ge Dok Ba ta ya, mbi mbo ya dunin̰a zì no, ge sego, mbi ɗege ge dunin̰a zì, gwan mbo ne ta yà.
29Sok mbe go, Zeso nda ge ame hateya ma jan ne go: Kuwa, mo gale ɗege ya jan i fare ma zum waŋ ge sego! Be ge kee fare sḭḭ a̰me daa to. 30Ge sego, i kuwa ya go mo kuwa fare ma kuwa kakaɗag, koo fare ge ndu dwaɗ ne na pagal zì ele mo ne. A ge pe, i ho fareba no go mo mbo ge Dok Ba ta ya. 31Zeso gwan ge num janna go: Ge sego ḛ hoɗ fareba ya kade! 32Ḛ za̰a̰ gale, dwam ma mbo mbo ya, ge sego àa mbo ja mbo zoo, ge go ḛ mbo ɓasare se ɗu ɗu, ndu ge diige mbo ɓyare sok na pagal, ndu daa gaa mbi ta ɗu to. Ano puy, mbi hini to, ago mbi Ba go dagre ge mbi. 33Mbi jin̰a ḛ fare mbe ma no peɗ ndwa go ḛ kaa halas ge ɓanna ge ḛ ɓa̰a̰ dagre ge mbi pe. Ḛ mbo za̰a̰ yal ge dunin̰a mbe no zì, ɗaŋɗe, ḛ wa̰a̰ ta deŋel ge dape, mbi hal-la ne pagal.
Currently Selected:
Yohana 16: kiaGRB
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translations, Inc. All rights reserved.